“Algun fariseo a bin serka [Hesus] pa pon’é na prueba, bisando: ‘Lei ta permití pa un hòmber divorsiá su esposa pa kualke motibu?’”​—Mateo 19:3.

DEN tempu di Hesus tabatin hende ku a kuestioná e areglo di matrimonio. Segun nan matrimonio no mester ta algu permanente. Hesus a bisa nan: “Boso no a lesa ku esun ku a krea hende for di prinsipio ‘a traha nan hòmber i muhé,’ i a bisa: ‘Pa e motibu akí un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni. P’esei loke Dios a uni, no laga ningun hende separá.” * (Mateo 19:​4-6) Ta bisto anto ku Dios su propósito tabata pa matrimonio dura.

Den hopi pais, un 40 porshento òf mas di tur pareha kasá ta “separá” i divorsiá. Esei ke men ku loke Beibel ta bisa tokante matrimonio no ta práktiko mas? Òf akaso Dios su areglo di matrimonio no ta bon?

Pensa un ratu riba e siguiente ehèmpel: Dos pareha ta kumpra e mesun modèl di outo. Un di e parehanan ta kuida nan outo i ta kor’é ku kuidou. Nan outo no ta daña. E otro pareha no ta hasi nada pa kuida nan outo, i nan ta maltrat’é. E outo ei ta daña i nan ta pon’é para un banda. Unda e problema ta sinta? Ta mas ku klaru ku e problema ta sinta serka e doñonan di e outo.

Meskos tambe, e echo ku hopi relashon matrimonial ta daña òf kibra no ta nifiká ku e areglo di matrimonio no ta bon. E miónes di matrimonionan ku sí ta bai bon ta proba nèt lo kontrario. E matrimonionan ei ta trese felisidat i stabilidat tantu pa hende individual komo famianan i komunidatnan. Pero meskos ku un outo, mester kuida i konserbá un matrimonio pa e por dura.

Sea ku bo ta kasá pa un poko tempu òf pa hopi tempu, Beibel su konseho enkuanto kon pa kuida i fortalesé matrimonio realmente ta duna bon resultado. Laga nos wak algun ehèmpel riba e siguiente páginanan.

[Nota]