Risibí Bindishon Mediante Dios Su Rei Guiá pa Spiritu Santu!

‘E spiritu di Yehova lo keda riba dje.’​—ISA. 11:2.

1. Ki preokupashon algun hende tin relashoná ku problemanan di mundu?

“KON e rasa humano por sobrebibí 100 aña mas den un mundu ku ta den un káos polítiko, sosial i di medio ambiente?” Esaki ta loke e astrofísiko Stephen Hawking a puntra na aña 2006. Un artíkulo den e revista New Statesman a bisa: “Nos no a abolí pobresa ni establesé pas mundial. Mas bien, ta parse ku nos a logra nèt lo kontrario. Anto no ta ku nos no a hasi nos bèst. Nos a purba tur kos, for di komunismo te merkado liber; Liga di Nashon te na menasa ku armanan nuklear. Masha hopi biaha nos a rekurí na guera pa kaba ku guera, sin por logra. Pues, nos no por bisa ku nos sa kon pa kaba ku guera.”

2. Kon Yehova, e Soberano, lo ehersé su outoridat riba tera aki poko tempu?

² E preokupashonnan akí no ta un sorpresa pa sirbidónan di Yehova. Dikon? Pasobra Beibel ta bisa ku Dios no a krea hende pa goberná nan mes. (Jer. 10:23) Yehova ta e úniko ku tin e derecho legítimo di goberná hende. Komo nos Soberano, e tin e derecho di establesé norma pa nos, pa definí e propósito di nos bida i pa guia nos pa kumpli ku e propósito ei. Es mas, pronto lo e ehersé su outoridat pa pone un fin na tur gobièrnu di hende, ya ku tur a resultá di ta un frakaso. Na mesun tempu, Yehova lo destruí tur hende ku rechasá su soberania, pasobra nan rechaso ta mustra ku nan ke pa hende en general keda sklabisá na piká, imperfekshon i Satanas e Diabel, “e dios di e mundu akí.”​—2 Kor. 4:4.

3. Kiko Isaias a profetisá tokante e Mesias?

³ Den e benidero Paradeis, Yehova lo goberná humanidat na un manera amoroso mediante e Reino Mesiániko. (Dan. 7:​13, 14) Relashoná ku e rei di e Reino Mesiániko, Isaias a profetisá: “Un sprùit lo sali for di e tronkon di Isaí, i un rama for di su raisnan lo karga fruta. E spiritu di SEÑOR lo keda riba dje, e spiritu di sabiduria i komprondementu, e spiritu di konseho i poder, e spiritu di konosementu i temor di SEÑOR.” (Isa. 11:​1, 2) Kon Dios a usa su spiritu santu pa kapasitá Hesukristu, e ‘sprùit for di e tronkon di Isaí,’ pa goberná humanidat? Ki bindishon humanidat lo risibí for di su gobernashon? I kiko nos tin ku hasi pa haña e bindishonnan ei?

Dios A Kapasitá Hesus pa Goberná

4-6. Ki konosementu di vital importansia lo kapasitá Hesus pa sirbi komo un Rei, Sumo Saserdote i Hues sabí i kompasivo?

⁴ Yehova ke pa su súpditonan humano alkansá perfekshon bou di guia di un gobernante ku realmente ta un Rei, Sumo Saserdote i Hues sabí i kompasivo. P’esei, Yehova a skohe Hesukristu, kende el a kapasitá pa medio di spiritu santu pa kumpli ku e responsabilidatnan sumamente importante ei. Laga nos konsiderá algun motibu pakiko Hesus lo kumpli perfektamente ku e responsabilidatnan ku Dios a dun’é.

⁵ No tin ningun persona ku konosé Dios mihó ku Hesus. Probablemente, e Yu unigénito konosé e Tata pa mas ku míles di miónes di aña, mas ku kualke otro persona. Durante e tempu ei, Hesus a siña konosé  Yehova asina bon ku Beibel ta bisa ku “e ta e imágen di e Dios invisibel.” (Kol. 1:15) Hesus mes a bisa: “Esun ku a mira mi a mira e Tata.”​—Juan 14:9.

⁶ Despues di Yehova, Hesus ta esun ku konosé henter e kreashon—inkluso hende—mihó. Kolosensenan 1:​16 i 17 ta bisa: “Pa medio di dje [e Yu di Dios] tur kos a wòrdu kreá, tantu den e shelunan komo riba tera, visibel i invisibel . . . I e ta promé ku tur kos, i den dje tur kos ta konsistí.” Djis pensa riba esei! Hesus, komo Dios su “trahadó eksperto” a yuda krea tur otro kos. P’esei, e sa kon henter e universo, inkluso e maravioso selebro humano, ta hinká den otro. Sí, en bèrdat Kristu ta sabiduria personifiká!​—Pro. 8:​12, 22, 30, 31.

7, 8. Kon e spiritu di Dios a yuda Hesus den su ministerio?

⁷ Hesus a ser ungí ku e spiritu santu di Dios. Hesus a bisa: “E spiritu di SEÑOR ta riba mi, pasobra el a ungi mi pa prediká evangelio na e pobernan; el a manda mi pa proklamá libertat na e prezunan, i restorashon di bista na e siegunan, pa duna libertat na esnan ku ta wòrdu oprimí, pa proklamá e aña agradabel di SEÑOR.” (Luk. 4:​18, 19) Evidentemente, ora Hesus a batisá, spiritu santu a yud’é kòrda loke el a siña durante su eksistensia prehumano, inkluso loke Dios tabata ke pa e logra durante su ministerio riba tera komo e Mesias.​—Lesa Isaias 42:1; Lukas 3:​21 i 22; Juan 12:50.

⁸ Debí ku Hesus tabatin poder di spiritu santu i un kurpa i mente perfekto, e no solamente tabata e hòmber di mas importante sino tambe e mihó Maestro ku a yega di biba riba tera. De echo, su oyentenan “a keda asombrá di su siñansa.” (Mat. 7:28) Pa kuminsá, Hesus por a trata ku e kousanan básiko di humanidat su problemanan—piká, imperfekshon i falta di konosementu di Dios. Ademas, Hesus por a mira loke hende ta di bèrdat den nan kurason i trata nan di akuerdo ku esei.​—Mat. 9:4; Juan 1:47.

9. Kon meditashon riba Hesus su bida riba tera ta oumentá bo konfiansa den dje komo Gobernante?

⁹ Hesus a biba komo hende. Hesus su eksperensia komo hende i su asosiashon estrecho ku hende imperfekto a yud’é kualifiká komo Rei. Apòstel Pablo a skirbi: “[Hesus] mester a wòrdu hasí igual ku su rumannan den tur kos, pa e por a bira un sumo saserdote miserikòrdioso i fiel den kosnan ku tin di hasi ku Dios, pa hasi ekspiashon pa e pikánan di e pueblo. Pasobra komo ku e mes a wòrdu tentá den loke el a sufri, e por bin na yudansa di esnan ku ta wòrdu tentá.” (Heb. 2:​17, 18) Debí ku Hesus “a wòrdu tentá,” e por komprondé pa esnan ku haña nan ku prueba. Hesus su kompashon tabata bisto durante su ministerio riba tera. Tantu hende enfermo, desabilitá i oprimí—asta mucha—a sinti nan liber pa aserk’é. (Mar. 5:​22-24, 38-42; 10:​14-16) Hende humilde i esnan ku tabata deseoso pa siña tokante Dios a sinti nan atraí na dje. Di otro banda, hende orguyoso, arogante i esnan ku no tabatin “e  amor di Dios” den nan a rechas’é, odi’é i opon’é.​—Juan 5:​40-42; 11:​47-53.

10. Den ki gran manera Hesus a demostrá su amor pa nos?

¹⁰ Hesus a entregá su bida pa nos. Kisas e prueba di mas grandi ku ta mustra ku Hesus ta e mihó Gobernante ta e echo ku e tabata dispuesto pa muri pa nos. (Lesa Salmo 40:​6-10.) Kristu a bisa: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13) Sí, distinto for di gobernantenan humano imperfekto ku ta hiba un bida di luho ku plaka di nan súpditonan, Hesus a duna asta su bida pa humanidat.​—Mat. 20:28.

Dios A Duna Hesus Poder pa Apliká e Benefisionan di e Reskate

11. Dikon nos por tin pleno konfiansa den Hesus komo nos Reskatador?

¹¹ Hesus komo Sumo Saserdote ta e mihó persona pa apliká e benefisionan di e sakrifisio di reskate na nos. De echo, durante su ministerio riba tera, el a duna nos un bista adelantá di loke lo e hasi komo nos Reskatador durante su Reinado di Mil Aña, ku nos lo por disfrutá di dje basta nos keda fiel. Hesus a kura hende enfermo i desabilitá, lanta hende for di morto, alimentá multitut di hende i asta a dominá forsanan di naturalesa. (Mat. 8:26; 14:​14-21; Luk. 7:​14, 15) Es mas, e no a hasi e kosnan akí djis pa mustra kuantu poder i outoridat e tin sino pa demostrá su amor i kompashon. Por ehèmpel, Hesus a bisa un leproso kende a rog’é pa kur’é: “Mi kier.” (Mar. 1:​40, 41) Hesus lo demostrá e mesun kompashon ei durante su Reinado di Mil Aña, pero na un eskala mundial.

12. Kon Isaias 11:9 lo haña kumplimentu?

¹² Kristu i su ko-gobernantenan lo sigui tambe ku e programa di edukashon spiritual ku el a inisiá mas o ménos 2000 aña pasá. E tempu ei, e siguiente palabranan di Isaias 11:9 lo haña kumplimentu: “Tera lo ta yen di e konosementu di SEÑOR, manera awa ta tapa laman.” Sin duda, e programa di edukashon ei lo inkluí instrukshon pa kuida nos tera i tur kriatura; esei ta e tarea ku Dios a duna Adam na prinsipio. Na fin di e 1000 aña, Dios su propósito original deskribí na Génesis 1:28 lo ta kumplí i e sakrifisio di reskate lo a ser apliká kompletamente.

Dios A Duna Hesus Poder pa Husga

13. Kon Hesus a demostrá su amor pa hustisia?

¹³ Kristu ta “Esun ku Dios a nombra komo Hues di e bibunan i di e mortonan.” (Echo. 10:42) P’esei, ta un konsuelo pa sa ku Hesus ta inkoruptibel i ku hustisia i fieldat ta manera un faha rònt di su sintura. (Isa. 11:5) El a demostrá ku e ta odia golosidat, hipokresia i tur otro maldat. Ademas, el a kondená hende ku no tabatin sintimentu pa esnan ku tabata sufri. (Mat. 23:​1-8, 25-28; Mar. 3:5) Es mas, Hesus a demostrá ku aparensia di hende no ta gañ’é, pasobra ‘e tabata sa kiko tabatin den hende.’​—Juan 2:25.

14. Kon Hesus ta demostrá su amor pa hustisia awe, i kiko nos mester puntra nos mes?

¹⁴ Hesus ta sigui demostrá su amor pa hustisia, dirigiendo e trabou di mas grandi den historia, esta, e trabou di prediká i di siña hende. Ningun hende, ningun gobièrnu humano ni ningun spiritu malbado por stroba e trabou akí di ser kompletá na Dios su pleno satisfakshon. Pues, nos por tin tur konfiansa ku hustisia divino lo prevalesé despues di Armagedón. (Lesa Isaias 11:4;  Mateo 16:27.) P’esei, puntra bo mes: ‘Mi ta trata hende ku mi topa den sirbishi meskos ku Hesus a hasi? Mi ta duna Yehova lo mihó asta ora mi salú i sirkunstansianan personal ta limitá loke mi por hasi?’

15. Pa duna Dios lo mihó, kiko nos tin ku tene na mente?

¹⁵ Si nos tene na mente ku e trabou di prediká ta Dios su trabou, esaki lo yuda nos sirbié di henter nos alma. Ta é a manda nos hasié; mediante su Yu, e ta dirigié; i mediante su spiritu santu, e ta duna poder na esnan ku ta partisipá den dje. Bo ta apresiá bo privilegio di por sirbi komo kolaboradó di Dios huntu ku su Yu guiá pa spiritu santu? Ken por a impulsá mas ku shete mion persona, di kua e mayoria ta ser konsiderá komo hende ku no ta “eduká ni siña,” pa prediká e mensahe di Reino den 236 pais? Ta Yehova so por hasi esei, no ta bèrdat?​—Echo. 4:13.

Hasi Esfuerso pa Bo Risibí Bindishon Mediante Kristu

16. Kiko Génesis 22:18 ta indiká enkuanto Dios su bindishon?

¹⁶ Yehova a bisa Abraham: “Den bo desendientenan tur e nashonnan di e tera lo ta bindishoná, pasobra bo a obedesé mi bos.” (Gén. 22:18) E palabranan akí ta indiká ku esnan ku ta balorá nan sirbishi na Dios i su Yu por spera ku konfiansa riba e bindishonnan ku e Desendiente, òf Simia, Mesiániko lo trese. Pues, nan ta sirbi Dios aktivamente ku e bindishonnan ei na mente.

17, 18. Ki promesa di Yehova nos ta haña na Deuteronomio 28:2, i kiko e ta nifiká pa nos?

¹⁷ Na un okashon, Dios a bisa e desendientenan di Abraham, esta, e nashon di Israel: “Tur e bindishonnan akí [deskribí den e pakto di Lei] lo bin riba bo i lo alkansá bo, si bo obedesé SEÑOR bo Dios.” (Deu. 28:2) E mesun kos ta konta pa e sirbidónan di Dios awe. Pues, si bo ke haña Yehova su bindishon, sigui “obedesé” su bos. E ora ei su bindishonnan “lo bin riba bo i lo alkansá bo.” Pero kiko esaki ta enserá?

¹⁸ Obedesé Dios ta enserá analisá su Palabra kuidadosamente i tambe e alimento spiritual ku e ta proveé. (Mat. 24:45) E ta enserá tambe hasi e boluntat di Dios i obedesé su Yu. Hesus a bisa: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” (Mat. 7:21) Ademas, obedesé Dios ta nifiká someté bo mes boluntariamente na e kongregashon kristian ku El a establesé i sigui guia di e  ansianonan, esta, e “donnan den hende,” nombrá pa Dios.​—Efe. 4:8, NW.

19. Kon nos por bini na remarke pa haña bindishon?

¹⁹ Entre e “donnan den hende,” tin e miembronan di e Kuerpo Gobernante, kendenan ta representá henter e kongregashon kristian. (Echo. 15:​2, 6) De echo, e manera ku nos ta trata i kooperá ku e rumannan di Kristu ta di vital importansia, pasobra esei lo determiná kon nos lo ser husgá durante e benidero tribulashon grandi. (Mat. 25:​34-40) Pues, un manera ku nos por haña bindishon ta di apoyá e ungínan di Dios fielmente.

20. (a) Kiko ta un responsabilidat importante di “donnan den hende”? (b) Kon nos ta mustra ku nos ta balorá e rumannan akí?

²⁰ Miembronan di komité di Sukursal, superintendentenan biahero i ansianonan di kongregashon tambe ta “donnan den hende;” nan tur ta nombrá pa medio di spiritu santu. (Echo. 20:28) E responsabilidat prinsipal di e rumannan akí ta pa edifiká e pueblo di Dios ‘te ora tur yega na e unidat di fe i di e konosementu di e Yu di Dios, i bira hòmber madurá, na e midí di e estatura di e plenitut di Kristu.’ (Efe. 4:13) Ta sierto ku, meskos ku nos tur, nan tambe ta imperfekto. Apesar di esei, ora nos ta mustra apresio pa nan guia i kuido basá riba amor, nos ta risibí bindishon di Dios​—Heb. 13:7, 17.

21. Dikon ta urgente pa nos obedesé e Yu di Dios?

²¹ Pronto Kristu lo destruí e sistema malbado di Satanas. Ora esei tuma lugá, nos bida lo ta den man di Hesus, pasobra Dios a outoris’é pa guia i hiba e “multitut grandi,” ku Beibel ta papia di dje, “na fuentenan di e awa di bida.” (Rev. 7:​9, 16, 17) P’esei, laga nos hasi nos máksimo esfuerso awor pa someté nos mes boluntariamente i ku apresio na Yehova su Rei guiá pa spiritu santu.

Kiko Bo A Siña for di . . .

• Isaias 11:​1-5?

• Marko 1:40 i 41?

• Echonan 10:42?

• Génesis 22:18?

[Preguntanan di Estudio]

[Plachi na página 21]

Hesus su kompashon tabata bisto ora el a resusitá e yu muhé di Jairo

[Plachi na página 23]

Hesukristu ta dirigí e trabou di prediká di mas grandi den historia