Satisfasé Bo Nesesidat Spiritual
Sekreto 5
Satisfasé Bo Nesesidat Spiritual
KIKO BEIBEL TA SIÑA? “Bendishoná ta esnan ku ta tende e palabra di Dios, i ta ward’é.”—Lukas 11:28.
KIKO TA E PROBLEMA? Tin míles di religion, i hopi di nan ta siña maneranan pa satisfasé bo nesesidat spiritual ku no ta di akuerdo ku otro. Kon bo por sa kua di nan ta siña e bèrdat i realmente ta agradá Dios? Tin algun eskritor prominente ta pretendé ku no ta lógiko pa kere den Dios i sirbié, i ku esei ta asta perhudisial. E revista Maclean’s a resumí e punto di bista di un ateista prominente asin’akí: “E konsepto kristian akí, esta, ku tin algu ta eksistí mas ayá di siensia i di nos sentidonan . . . ta rebahá balor di e úniko bida ku nos tin i ta pone nos inkliná na violensia.”
KIKO BO POR HASI? Analisá e evidensia ku Dios ta eksistí. (Romanonan 1:20; Hebreonan 3:4) No laga ningun hende deskurashá bo di buska kontesta riba preguntanan importante, manera: Pakiko nos ta na mundu? Tin bida despues di morto? Pakiko tin asina tantu sufrimentu? Kiko Dios ta rekerí di mi? Pa bo por tin satisfakshon duradero den bida, bo mester haña kontesta konfiabel riba e preguntanan ei.
Sinembargo, no aseptá siegamente tur loke hende bisa bo. E Palabra di Dios ta animá bo pa usa bo “mente” pa komprobá pa bo mes kiko ta agradá Dios. (Romanonan 12:1, 2) Lo bo ser rekompensá pa bo esfuerso. Si bo traha tempu pa studia Beibel i apliká su konseho práktiko, lo bo evitá hopi problema, redusí ansiedat i disfrutá mas di bida. Esakinan no ta djis palabra bunita. Ta un promesa sigur. Miónes di hende di tur tipo di antesedente ku a siña e bèrdat tokante Dios i su propósito a benefisiá di esaki. *
Segun ku bo ta apliká e konseho sabí di Beibel i ta benefisiá di dje, bo deboshon na Dios lo bira mas grandi. Pakiko no aseptá e invitashon pa studia Beibel ku Testigunan di Yehova? Si bo hasié, lo bo tin e mesun sintimentu ku apòstel Pablo, kende a skirbi: “Sirbi Dios ta duna hopi benefisio, basta bo ta satisfecho ku loke bo tin.” (1 Timoteo 6:6, BPK)
[Nota]
^ par. 6 Por ehèmpel, lesa algun relato di bida real den La Atalaya di 1 di novèmber 2010, página 18 pa 21.
[Plachi na página 8]
Komprobá pa bo mes kiko ta agradá Dios
