Kiko e Dia di Yehova Lo Revelá?

“E dia di Yehova lo bini manera ladron, . . . i tera i e obranan den dje lo ser deskubrí.”​—2 PED. 3:10, NW.

1, 2. (a) Kon e mundu malbado ku nos ta biba aden lo haña su fin? (b) Ki preguntanan nos lo konsiderá?

E MUNDU malbado akí ku nos ta biba aden ta fundá riba un mentira grandi, esta, ku hende por goberná tera ku éksito sin e yudansa di Yehova. (Sal. 2:​2, 3) Pero algu basá riba mentira por dura pa semper? Di ningun manera! Sinembargo, nos no tin nodi di warda te ora ku e mundu di Satanas kaba ku su mes. Dikon? Pasobra Dios lo destruyé na su debido tempu i na su manera, teniendo kuenta sigur ku su prinsipionan di hustisia i amor.​—Sal. 92:7; Pro. 2:​21, 22.

² Apòstel Pedro a skirbi: “E dia di Yehova lo bini manera ladron, den kua shelu lo pasa bai ku un boroto inmenso, pero e elementonan, intensamente kayente, lo ser disolvé, i tera i e obranan den dje lo ser deskubrí.” (2 Ped. 3:10) Kiko “shelu” i “tera” ta representá den e versíkulo akí? Kiko ta “e elementonan” ku lo ser disolvé? I kiko Pedro tabata ke men ora el a bisa ku “tera i e obranan den dje lo ser deskubrí”? Ora nos haña kontesta riba e preguntanan akí, nos lo ta mihó prepará pa enfrentá e susesonan spantoso ku ta bai tuma lugá den futuro serkano.

E Shelu i Tera Ku Lo Pasa Bai

3. Kiko e “shelu” den 2 Pedro 3:10 ta representá, i kon lo e pasa bai?

³ Ora Beibel ta usa e palabra “shelu” den sentido simbóliko, esaki hopi biaha ta referí na gobièrnu, ya ku nan tin un posishon elevá riba nan siudadanonan. (Isa. 14:​13, 14; Rev. 21:​1, 2) Pues, e “shelu [ku] lo pasa bai” ta representá e gobièrnunan di e mundu alehá for di Dios. E echo ku nan ta pasa bai ku “un boroto inmenso”—òf ku “un klap enorme,” segun un otro tradukshon—kisas ta indiká ku nan destrukshon lo ta rápido.

4. Kiko e “tera” ta representá, i kon lo e ser destruí?

⁴ E “tera” ta representá e mundu di humanidat alehá for di Dios. Den tempu di Noe tambe tabatin un mundu malbado asina, i riba òrdu di Yehova el a ser destruí den e Diluvio. I di e mesun manera, “e shelunan i e tera aktual pa medio di [Dios] su palabra ta wòrdu reservá pa kandela, wardá pa e dia di huisio i destrukshon di hendenan impio.” (2 Ped. 3:7) Pero kontrali na e Diluvio—ku a destruí tur e malbadonan pareu, den un solo biaha—e binidero destrukshon lo tuma lugá den etapa, òf fase, durante e periodo konosí komo “e gran tribulashon.” (Rev. 7:14) Durante e promé fase, Dios lo impulsá e gobernantenan di e mundu akí pa destruí ‘Babilonia e Grandi.’ Di e manera ei, lo e demostrá su despresio pa tur e religionnan ku a kometé prostitushon spiritual. (Rev. 17:​5, 16; 18:8) Anto den e guera di Armagedón, esta, e fase final di e gran tribulashon, Yehova Dios lo usa su Yu, Kristu Hesus, pa kaba ku e restu di e mundu di Satanas.​—Rev. 16:​14, 16; 19:​19-21.

“E Elementonan . . . Lo Ser Disolvé”

5. Kiko ta un di “e elementonan” ku Pedro a referí na dje?

⁵ Kiko “e elementonan” ku “lo ser disolvé” ta? Segun un dikshonario bíbliko, e palabra griego pa “elementonan” ta referí na “kosnan básiko” òf “prinsipionan fundamental.”  Ademas, segun e dikshonario, hende “tabata usa e palabra akí pa referí na e lèternan di álfabèt, ya ku nan ta e parti básiko òf fundamental di idioma.” Pues, “e elementonan” ku Pedro a menshoná ta referí na e kosnan fundamental ku ta pone ku e mundu tin karakterístika, aktitut, kustumber i meta ku ta desagradá Dios. Un di “e elementonan” ei ta “e spiritu di mundu,” ku ‘ta obra den e yunan di desobedensia.’ (1 Kor. 2:12; lesa Efesionan 2:2. *) E spiritu, òf aire, ei ta plamá den henter e mundu di Satanas. E ta impulsá hende pa pensa, plania, papia i aktua na maneranan ku ta reflehá e mentalidat di Satanas, “e gobernante di e outoridat di aire,” kende ta masha orguyoso i rebelde.

6. Kon e spiritu di mundu ta manifestá su mes?

⁶ Pues, sea konsientemente òf inkonsientemente, personanan afektá pa e spiritu di mundu ta permití Satanas influensiá nan mente i kurason, i p’esei nan ta imitá su aktitut i manera di pensa. Komo konsekuensia, nan ta hasi loke nan ke, sin tene kuenta ku e boluntat di Dios. Den ki situashon ku nan haña nan mes aden, nan ta reakshoná a base di orguyo òf egoismo; nan ta rebeldiá kontra outoridat i ta entregá nan mes totalmente na ‘deseo di karni i deseo di wowo.’​—Lesa 1 Juan 2:​15-17. *

7. Dikon nos tin ku protehá nos kurason?

⁷ Pues, ta masha importante pa nos protehá, òf warda, nos kurason! Un manera pa hasi esei ta di sigui prinsipio bíbliko ora nos ta skohe nos amistatnan, loke nos ta lesa òf entretené nos mes kuné òf e websitenan ku nos ta bishitá riba Internet. (Pro. 4:23) Apòstel Pablo a spièrta: “Mira pa ni un hende no kohe boso prezu dor di filosofia i engaño bano, segun tradishon di hende, segun e prinsipionan elemental di mundu, i no segun Kristu.” (Kol. 2:8) E spièrtamentu akí ta bira mas urgente segun ku e dia di Yehova ta yega mas serka, pasobra e ‘kayente’ sin presedente di e dia ei lo dirti tur “e elementonan” di e mundu di Satanas i saka na kla ku nan no por resistí e kayente di e rabia di Dios. Esaki ta pone nos kòrda riba e palabranan di Malakias 4:1, ku ta bisa: “E dia ta bini; e lo kima manera fòrnu; i tur e hendenan arogante i kada hasidó di maldat lo ta bagas; i e dia ku ta bini lo sende nan na kandela . . . asina ku ni nan rais ni nan rama lo no keda.”

“Tera i e Obranan den Dje Lo Ser Deskubrí”

8. Den ki sentido e tera i e obranan den dje lo ser “deskubrí”?

⁸ Kiko Pedro tabata ke men ora el a skirbi ku “tera i e obranan den dje lo ser deskubrí”? E palabra “deskubrí” por ser tradusí tambe komo “eksponé” òf “saka na kla.” Pues, Pedro tabata ke men ku durante e gran tribulashon, Yehova lo desenmaskará e mundu di Satanas. Sí, Yehova lo mustra bon kla ku e mundu di Satanas ta kontra Dios i su Reino, i ku esaki meresé destrukshon. Isaias 26:21 a profetisá tokante e tempu ei: “SEÑOR ta serka di sali for di su lugá di biba, pa kastigá e habitantenan di tera pa nan inikidat; i tera lo revelá e sanger ku el a drama, i lo no tapa su mortonan mas.”

9. (a) Kiko nos mester rechasá, i dikon? (b) Kiko nos mester kultivá, i dikon?

⁹ E personanan ku a permití e mundu i su spiritu malbado forma nan lo demostrá durante e dia di Yehova ken nan ta realmente; nan lo bai asina leu di mata otro. Muy probablemente, e gran variedat di entretenimentu violento ku ta asina popular awe ta preparando mente di hopi hende pa e tempu ora ku “man di esun lo lanta kontra man di e otro.” (Zak. 14:13) P’esei, ta masha importante pa nos rechasá tur pelíkula, buki, wega di vidio  òf kualke otro aktividat ku por pone nos desaroyá orguyo, amor pa violensia òf otro karakterístikanan ku Dios ta odia. (2 Sam. 22:28; Sal. 11:5) Na lugá di esei, laga nos kultivá e fruta di spiritu, pasobra e kualidatnan ei sí lo resistí e kayente di e rabia di Yehova i yuda nos sobrebibí.​—Gal. 5:​22, 23.

“Shelunan Nobo i un Tera Nobo”

10, 11. Kiko e “shelunan nobo” i e “tera nobo” ta representá?

¹⁰ Lesa 2 Pedro 3:13. Kiko e “shelunan nobo” ta referí na dje? E ta referí na Dios su Reino selestial ku el a establesé na aña 1914 ora “e tempunan di e paganonan” a terminá. (Luk. 21:24) E gobièrnu akí ta konsistí di Kristu Hesus i su 144.000 ko-gobernantenan, di kua mayoria a risibí nan rekompensa selestial kaba. E buki di Revelashon ta deskribí e skohínan akí komo “e stat santu, Yerusalèm Nobo, [ku] ta baha for di shelu, for di Dios, prepará manera un brùit dòrná pa su esposo.” (Rev. 21:​1, 2, 22-24) Meskos ku Yerusalèm tabata e sede di e gobièrnu di Israel di antigwedat, asina Yerusalèm Nobo i su Brùidehòm ta forma e gobièrnu di e sistema nobo. E stat selestial akí lo no “baha” literalmente “for di shelu.” Mas bien, e ta baha den e sentido ku e ta tuma mando di e asuntunan riba tera.

¹¹ E “tera nobo” ta referí na un sosiedat nobo riba tera, ku lo konsistí di hende ku a someté nan mes boluntariamente na e Reino di Dios. For di awor e pueblo di Dios ta disfrutá di un paradeis den sentido spiritual. Pero den futuro, por fin e paradeis spiritual ei lo ta den e bunita ambiente ku e meresé, pasobra henter e tera, òf “e mundu ku ta bini,” lo ta un paradeis. (Heb. 2:5) Kon nos por forma parti di e sistema nobo ei?

Prepará pa e Gran Dia di Yehova

12. Dikon e dia di Yehova lo shòk mundu?

¹² Tantu Pablo komo Pedro a profetisá ku e dia di Yehova lo bini manera “ladron”—ketu-ketu i inesperá. (Lesa 1 Tesalonisensenan 5:​1 i 2.) Asta kristiannan berdadero, kendenan ta den ekspektativa di e dia ei, lo keda sorprendí ku el a yega asina diripiente. (Mat. 24:44) Sinembargo, e mundu di hende alehá for di Yehova lo no keda sorprendí so. Dikon? Pablo a skirbi: “Miéntras ku nan ta bisa: ‘Pas i siguridat!’ pèrdishon lo bini riba nan diripiente, manera doló di parto riba un muhé na estado; i nan lo no skapa.”​—1 Tes. 5:3.

13. Kon nos por evitá ku e gritu “Pas i siguridat!” ta gaña nos?

¹³ E gritu “Pas i siguridat!” lo ta djis un mentira mas inspirá pa demoño, ma esaki lo no gaña e sirbidónan di Yehova. Pablo a skirbi: ‘Boso no ta den skuridat, ku e dia ei lo sorprendé boso manera un ladron, pasobra boso tur ta yunan di lus i yunan di dia.’ (1 Tes. 5:​4, 5) Pues, laga nos keda den e lus, leu for di skuridat di e mundu di Satanas! Pedro a spièrta e kristiannan ku maestronan falsu lo lanta den kongregashon, i p’esei el a skirbi: “Stimánan, sabiendo esaki di antemano, tene kuidou, pa boso no wòrdu lastrá hibá pa medio di e eror di hòmbernan malbado, i boso kai for di boso mes firmesa.”​—2 Ped. 3:17.

14, 15. (a) Kon Yehova ta onra nos? (b) Ki palabranan inspirá nos mester tuma masha na serio?

 ¹⁴ Tuma nota ku Yehova no ta djis bisa nos “tene kuidou” i despues ta laga nos pa nos kuenta. Mas bien, den su bondat, e ta duna nos e onor di tin konosementu “di antemano,” esta, un kuadro general di loke lo sosodé den futuro.

¹⁵ Pero lamentablemente, tin algun ruman ku últimamente ta reakshoná na un manera indiferente òf asta ku bofon i duda ora nos haña rekordatorio pa keda alerta. Kisas nan ta bisa: ‘Nos tin años ta tende e mesun spièrtamentu ei.’ Sinembargo, e personanan ei mester kòrda ku ora nan ta hasi e tipo di remarkenan ei, nan, de echo, ta kuestioná no solamente e esklabo fiel, sino tambe Yehova i su Yu. Ta Yehova a bisa: ‘Sigui sper’é.’ (Hab. 2:3, BPK) Hesus tambe a bisa: ‘Sea alerta, pasobra boso no sa ki dia boso Señor ta bini.’ (Mat. 24:42) Ademas, Pedro a bisa: “Ki sorto di hende boso mester ta den un kondukta santu i deboto, sperando i purando [òf, “teniendo bon na mente,” NW] e binida di e dia di Dios!” (2 Ped. 3:​11, 12) Pues, e esklabo fiel i su Kuerpo Gobernante ta tuma e palabranan sinsero ei masha na serio!

16. Ki aktitut nos mester evitá, i dikon?

¹⁶ Bon mirá, ta e “esklabo malbado” ta esun ku ta bisa ku e Shon ta tarda. (Mat. 24:48) E esklabo malbado ei ta forma parti di e grupo ku 2 Pedro 3:​3 i 4 ta deskribí. E versíkulonan ei ta bisa: “Den e último dianan bofonadónan lo bini ku nan bofon, siguiendo nan mes pashonnan.” De echo, nan ta hasi bofon di e personanan ku ta tene e dia di Yehova bon na mente. Sí, en bes di enfoká riba e interesnan di Reino, e hasidónan di bofon ei ta konsentrá riba nan mes i riba nan propio pashonnan òf deseonan egoista. Laga nos nunka desaroyá un aktitut rebelde i peligroso asina. Mas bien, laga nos “konsiderá e pasenshi di nos Señor komo salbashon.” I un manera pa hasi esei ta di keda okupá den e trabou di prediká e Reino i di hasi disipel. Ademas, nos no tin nodi di ta demasiado preokupá tokante e tempu ku sierto susesonan mester tuma lugá, pasobra ta Yehova Dios ta esun ku ta disidí esei.​—2 Ped. 3:15; lesa Echonan 1:​6 i 7.

Pone Konfiansa den e Dios di Salbashon

17. Kon kristiannan fiel a reakshoná riba Hesus su instrukshon pa hui for di Yerusalèm, i dikon?

¹⁷ Na aña 66 di nos era, e ehérsito romano a invadí Hudea. Siguiendo Hesus su instrukshon, e kristiannan fiel a hui for di Yerusalèm asina ku e oportunidat a presentá. (Luk. 21:​20-23) Dikon nan a aktua mesora i sin vasilá? Ta bisto ku nan a keda tene e spièrtamentu di Hesus bon na mente. Komo ku Kristu a spièrta nan di antemano, nan tabata sa ku nan  desishon lo a trese hopi difikultat pa nan. Pero tòg nan a hui mesora, pasobra nan tabatin sigur ku Yehova nunka lo laga hende ku keda fiel na dje desampará.​—Sal. 55:22.

18. Ki efekto e palabranan di Hesus, na Lukas 21:​25-28, tin riba bo punto di bista di e binidero gran tribulashon?

¹⁸ Nos tambe mester pone pleno konfiansa den Yehova, pasobra ta e so por salba nos di e tribulashon di mas grandi den historia humano. Despues ku e gran tribulashon kuminsá, pero promé ku Yehova ehekutá su huisio riba e restu di mundu, lo yega un momento ku hende lo “desmayá di miedu i [pa motibu di] e ekspektativa di e kosnan ku ta bini riba mundu.” Sinembargo, miéntras ku e enemigunan di Yehova ta tembla di miedu, su fiel sirbidónan sí lo no tin miedu. Al kontrario, nan lo ta masha kontentu, pasobra nan sa ku nan redenshon, òf liberashon, ta serka.​—Lesa Lukas 21:​25-28.

19. Kiko nos lo trata den e siguiente artíkulo?

¹⁹ Esta un futuro emoshonante ta spera esnan ku keda separá for di mundu i su “elementonan”! Pero, manera e siguiente artíkulo ta bai splika, si nos ke haña bida, nos tin ku hasi mas ku djis evitá loke ta malu. Nos tin ku kultivá kualidatnan ku ta agradá Yehova i hasi obranan ku ta aseptabel den su bista.—2 Ped. 3:11.

[Nota]

Bo Por Splika?

• Kiko “e shelunan i e tera” aktual ta representá?

• Kiko “e elementonan” ta?

• Kiko e ‘shelu nobo i tera nobo’ ta representá?

• Dikon nos ta pone pleno konfiansa den Dios?

[Preguntanan di Estudio]

[Plachi na página 13]

Kon bo por protehá bo kurason i keda separá for di mundu?

[Plachi na página 14]

Kon nos ta demostrá ku nos ta “konsiderá e pasenshi di nos Señor komo salbashon”?