BO NÒMBER tin un nifikashon spesial? Den algun parti di mundu, nan tin e kustumber di duna yu nòmber ku tin sierto nifikashon. E nòmber ku e mayornan skohe sa reflehá nan kreensia, nan norma- i balornan òf e ekspektativanan ku nan tin en konekshon ku futuro di nan yu.

E kustumber di duna hende nòmber ku tin sierto nifikashon no ta nada nobo. For di den tempu di Beibel nan tabata duna un hende nòmber a base di e mensahe ku e nòmber a transmití i a base di e papel ku e persona lo a desempeñá den su bida. Por ehèmpel, e nòmber “Salomon” tabata derivá for di un palabra ku ta nifiká “Pas” i a indiká e papel ku lo el a desempeñá den su bida. Yehova a bisa su tata David: “Su nòmber lo ta Salomon, i lo mi duna pas i trankilidat na Israel den su dianan.”​—1 Krónikanan 22:9.

Na otro okashonnan Yehova a kambia e nòmber di un persona pa indiká e papel nobo ku lo e mester a desempeñá. Por ehèmpel, den kaso di e kasá steril di Abraham, esaki a haña e nòmber Sara, ku ta nifiká “Prensès.” Dikon? Yehova a splika Abraham: “Lo mi bendishon’é, i di bèrdat lo mi duna bo un yu hòmber pa medio di dje. E ora ei lo mi bendishon’é i e lo ta un mama di nashonnan; reinan di pueblonan lo sali for di dje.” (Génesis 17:16) Pues, ta bisto ku pa komprondé e papel nobo ku Sara lo a desempeñá, un hende mester a komprondé kiko su nòmber nobo a nifiká.

Laga nos enfoká awor riba e nòmber di mas importante, esta, Yehova. Kiko e ta nifiká? Ora Moisés a puntra Dios kiko ta Su nòmber, Yehova a kontest’é: “Ami ta esun ku mi ta.” (Eksodo 3:14) Hopi Beibel ta tradusí e kontesta di Yehova ku e palabranan ei, ma e tradukshon di Rotherham ta bisa: “Lo Mi Bira loke sea mi kier.” Ku e palabranan ei Yehova a indiká ku e ta un Dios ku por asumí masha hopi papel. Pa komprondé esaki mihó, laga nos wak un ehèmpel simpel: Kuantu papel un mama por asumí den transkurso di un dia? Dependiendo di e nesesidat ku su yunan tin, kisas e mester ta, entre otro, verplegster, kòki i maestra. Asina tambe ta ku Yehova, e por asumí vários papel; solamente e ta hasi nan na un nivel hopi mas elevá. E por bira loke sea ku e kier i loke ta nesesario pa kumpli ku su propósito amoroso pa humanidat. Pues, konosé Yehova na su nòmber ta nifiká ku nos ta komprondé e hopi papelnan ku e ta desempeñá i ta apresiá nan.

Lamentablemente, hende ku no konosé loke e nòmber di Dios ta nifiká no konosé su bunita personalidat tampoko. Ma pa medio di un estudio di Beibel bo por haña sa ku Yehova ta un Konsehero sabí, un Salbador poderoso i Esun ku ta perkurá tur kos generosamente, djis pa menshoná algun ehèmpel. Bo no ta haña ku e nifikashon di e nòmber di Yehova ta impreshonante?

Sinembargo, no ta tur hende ke pa nos siña konosé Dios na su nòmber. E siguiente artíkulo lo splika dikon.