“E Spiritu Ta Investigá . . . e Profundidatnan di Dios”

“E spiritu ta investigá tur kos, asta e profundidatnan di Dios.”​—1 KOR. 2:10.

1. Pablo a papia di ki funshon di spiritu santu na 1 Korintionan 2:10, i ki pregunta ta lanta?

NOS por ta masha gradisidu pa e manera ku e spiritu santu di Yehova ta obra! E Skritura ta deskribié komo un ayudante i un regalo di Dios, i ta indiká ku e ta duna testimonio i ta intersedé òf boga pa nos. (Juan 14:16, NW; Echo. 2:38; Rom. 8:​16, 26, 27) Apòstel Pablo a papia di un otro funshon sumamente importante di spiritu santu: “E spiritu ta investigá tur kos, asta e profundidatnan di Dios.” (1 Kor. 2:10) Sí, Yehova ta usa su spiritu santu pa revelá bèrdatnan spiritual profundo. Kon leu nos lo a yega den nos komprondementu di e propósito di Yehova sin e yudansa akí? (Lesa 1 Korintionan 2:​9-12.) Awor bon, den ki forma ‘e spiritu ta investigá e kosnan profundo di Dios’? Pa medio di ken Yehova a revelá e kosnan akí den promé siglo? Kon spiritu santu ta investigá e kosnan profundo akí den nos tempu, i pa medio di ken e ta hasié?

2. Menshoná dos manera den kua spiritu santu lo a obra.

² Hesus a indiká dos manera den kua spiritu santu lo a obra. Djis promé ku su morto, el a bisa su apòstelnan: “Esun ku lo yuda boso, esta Spiritu Santu ku Tata lo manda den mi nòmber, lo siña boso tur kos i rekordá boso tur loke Ami a bisa boso.” (Juan 14:26, BPK) Pues, na promé lugá, spiritu santu lo a fungi komo un maestro, esta, lo el a yuda nan komprondé kosnan ku nan no a kapta anteriormente.  Anto na di dos lugá, lo el a yuda nan kòrda i apliká siñansa di Beibel korektamente.

Den Promé Siglo

3. Kon Hesus a indiká ku “e profundidatnan di Dios” lo a keda revelá progresivamente?

³ Hesus mes a siña su disipelnan hopi bèrdat ku tabata nobo pa nan. Ma ainda nan tabatin hopi mas di siña. El a bisa e apòstelnan: “Ainda mi tin hopi kos mas di bisa boso, ma boso no por soportá nan awor. Ma ora ku e, e spiritu di bèrdat, bini, e lo guia boso den tur bèrdat.” (Juan 16:​12, 13) Pues, Hesus a indiká ku pa medio di spiritu santu e kosnan profundo di Dios lo a keda revelá progresivamente.

4. Riba dia di Pentekòste di aña 33, kon spiritu santu a fungi komo un maestro pa Pedro i tambe a yud’é kòrda?

⁴ “E spiritu di bèrdat” a bini riba dia di Pentekòste di aña 33 i a keda dramá riba mas o ménos 120 kristian ku a reuní na Yerusalèm. E suseso ei a bai kompañá ku evidensia ku nan por a mira i tende. (Echo. 1:​4, 5, 15; 2:​1-4) E disipelnan a kuminsá papia den vários idioma tokante “e echonan poderoso di Dios.” (Echo. 2:​5-11) Awor tabata e momento pa algu nobo keda revelá. Mas promé, profeta Joel a bisa ku Yehova lo a drama su spiritu santu den e forma akí. (Joel 2:​28-32) Pues, e hendenan tabata mira e profesia akí kumpli nan dilanti na un manera ku ningun di nan no a ferwagt, i apòstel Pedro a splika e nifikashon di loke a kaba di tuma lugá. (Lesa Echonan 2:​14-18.) Di manera ku spiritu santu a fungi komo un maestro, ya ku el a laga Pedro komprondé ku loke a pasa ku e disipelnan tabata un kumplimentu di e profesia di Joel. Tambe spiritu santu a yuda Pedro kòrda loke el a siña, pasobra Pedro por a sita no solamente e palabranan di Joel, sino tambe for di dos salmo di David. (Sal. 16:​8-11; 110:1; Echo. 2:​25-28, 34, 35) Loke tur e hendenan ku a bini huntu a mira i tende en bèrdat tabata parti di e kosnan profundo di Dios.

5, 6. (a) Despues di Pentekòste di aña 33, ki pregunta importante relashoná ku e aliansa nobo mester a ser kontestá? (b) Ken a trese e asuntunan akí dilanti, i kon nan a tuma desishon?

⁵ Ma ainda tabatin hopi asuntu ku e kristiannan di promé siglo mester a komprondé mas mihó. Por ehèmpel, algun asuntu relashoná ku e aliansa nobo ku a drenta na vigor riba dia di Pentekòste no tabata muchu kla. Ta pa hudiu i hende ku a bira hudiu so e aliansa nobo tabata? Òf hende di e nashonnan pagano tambe por a bira parti di dje i ser ungí ku spiritu santu? (Echo. 10:45) Hende hòmber di e paganonan mester a ser sirkunsidá promé i kumpli tambe ku Lei di Moisés? (Echo. 15:​1, 5) Tabata trata akí di preguntanan masha importante. Nan tabatin mester di spiritu santu pa investigá e kosnan profundo akí di Dios. Pero, pa medio di ken e spiritu ei lo a obra?

⁶ Esei tabata pa medio di e rumannan ku tabata dirigí e obra. Ta nan a trese kada un di e asuntunan akí dilanti pa haña mas klaridat. Por ehèmpel, Pedro, Pablo i Barnabas tabata na e reunion di e kuerpo gobernante den kua a trata e asuntu di sirkunsishon i a konta kon Yehova a dirigí su atenshon na e paganonan insirkunsidá. (Echo. 15:​7-12) Ku yudansa di spiritu santu, e kuerpo gobernante a konsiderá e evidensia akí den lus di loke e Skritura Hebreo a trese dilanti i a yega na un desishon. Despues nan a informá e kongregashonnan por eskrito tokante e desishon ei.​—Lesa Echonan 15:​25-30; 16:​4, 5; Efe. 3:​5, 6.

7. Pa medio di kiko bèrdatnan profundo a keda revelá?

⁷ Mas despues, hopi otro asuntu a keda klarifiká pa medio di e skrituranan inspirá di Juan, Pedro, Santiago i Pablo. Pero na dado momento, despues ku e Skritura Griego Kristian a keda kompletá, a bini un fin na don di profetisá i na revelashon milagroso. (1 Kor. 13:8) E spiritu lo a sigui fungi komo un maestro pa e kristiannan i yuda nan kòrda loke nan a siña? Lo el a sigui yuda nan investigá e kosnan profundo di Dios? Sí! Segun profesia, esei lo a tuma lugá.

 Den Tempu di Fin

8, 9. Ken lo a “bria” ku disernimentu spiritual den tempu di fin, i den ki sentido?

⁸ Un angel a profetisá loke lo a sosodé den tempu di fin: “Esnan ku tin disernimentu lo bria manera e splendor di e firmamentu di shelu, i esnan ku ta guia hopi hende na hustisia lo bria manera e streanan pa semper i semper. . . . I konosementu lo oumentá.” (Dan. 12:​3, 4) Ken ta esnan ku lo tin disernimentu i ku lo bria? Hesus a duna un indikashon di esei den su komparashon di e trigu i e yerba shimaron. Papiando di e “fin di mundu,” el a deklará: “E ora ei e hustunan lo bria manera solo den e reino di nan Tata.” (Mat. 13:​39, 43) Den Hesus su splikashon, el a bisa ku “e hustunan” tabata “e yunan di e reino,” es desir, e kristiannan ungí.​—Mat. 13:38.

⁹ Ta tur kristian ungí lo a “bria”? Den un sentido sí, pasobra nan tur lo tabatin ku prediká, hasi disipel i fortalesé otro na reunionnan kristian, poniendo asina un ehèmpel pa tur otro kristian. (Zak. 8:23) Ma algu mas lo a sosodé den tempu di fin: kosnan profundo lo mester a keda revelá. Por ehèmpel, lo mester a klarifiká e profesia di Daniel ku lo a permanesé “seyá” te na e tempu di fin. (Dan. 12:9) Pero den ki forma e spiritu lo a investigá e kosnan profundo akí, i pa medio di ken lo a saka nan na kla?

10. (a) Pa medio di ken spiritu santu ta revelá bèrdatnan profundo den e último dianan? (b) Splika kon e nifikashon di e gran tèmpel spiritual di Yehova a keda klarifiká.

 ¹⁰ Den nos tempu, ora e momento yega pa klarifiká un asuntu spiritual, spiritu santu ta yuda rumannan ku tin puesto di responsabilidat na e sede mundial i ku ta aktua komo representante di “e esklabo fiel i prudente” diserní bèrdatnan profundo ku te awor nan no a komprondé. (Mat. 24:45; 1 Kor. 2:13) E Kuerpo Gobernante den su totalidat ta evaluá si mester ahustá splikashon di un asuntu. (Echo. 15:6) E ora ei nan ta yega na un desishon i, si ta nesesario, nan lo publiká e splikashon nobo pa benefisio di tur kristian. (Mat. 10:27) Si den transkurso di tempu mester klarifiká mas kos, nan ta hasi esaki tambe na un manera franko.—Wak e kuadro “Kon e Spiritu A Revelá e Nifikashon di e Tèmpel Spiritual?”

Benefisiá di e Papel Ku Spiritu Santu Ta Desempeñá Awe

11. Kon tur kristian awe ta benefisiá di e echo ku spiritu santu ta revelá e kosnan profundo di Dios?

¹¹ Tur kristian fiel ta benefisiá di e echo ku spiritu santu ta revelá e kosnan profundo di Dios. Meskos ku e kristiannan di promé siglo, awe e ta yuda nos komprondé e informashon ku nos ta studia, pa despues kòrd’é i pon’é na práktika. (Luk. 12:​11, 12) No ta nesesario pa nos tin bon skol pa por komprondé e bèrdatnan spiritual profundo ku ta keda publiká den nos literatura. (Echo. 4:13) Kon nos por komprondé nan mas mihó? Laga nos konsiderá algun sugerensia.

12. Ki ora nos tin ku pidi Dios duna nos spiritu santu?

¹² Pidi Dios duna nos spiritu santu. Promé ku nos sinta analisá un informashon di Beibel, nos tin ku pidi Dios pa laga spiritu santu guia nos. Asta ora nos so ta bai studia òf ta un ratu so nos ta studia, nos tin ku hasi esaki. E orashonnan humilde ei sigur lo hasi e kurason di nos Tata selestial kontentu. Manera Hesus a indiká, Yehova lo duna nos su spiritu santu generosamente si nos pidié di kurason.​—Luk. 11:13.

13, 14. Kon preparashon pa reunion ta yuda nos komprondé e kosnan profundo di Dios?

¹³ Prepará pa e reunionnan. E esklabo fiel tin e tarea di duna nos “kuminda na su debido tempu.” E ta kumpli ku esei pa medio di e publikashonnan bíbliko ku e ta prepará i pa medio di e programanan di reunion ku e ta organisá, den kua nos ta studia esakinan. I ora e esklabo pidi ‘henter e asosiashon di ruman’ pa analisá sierto informashon, semper e ta hasi esei pa motibunan di peso. (1 Ped. 2:17, NW; Kol. 4:16; Hudas 3) Nos ta kooperá ku spiritu santu ora nos ta hasi nos bèst pa sigui e rekomendashonnan ku e “esklabo” ta duna.​—Rev. 2:29.

¹⁴ Ta bon tambe pa ora nos ta prepará pa e reunionnan, nos kustumbrá buska e tekstonan bíbliko menshoná i purba komprondé ki relashon nan tin ku e tema ku nos ta analisando. Asina, pokopoko pero sigur, nos lo haña un komprondementu mas profundo di Beibel. (Echo. 17:​11, 12) Ora nos buska un teksto di Beibel i les’é, e ta keda grabá den nos mente, i spiritu santu por yuda nos kòrd’é. Ademas, ora nos mira riba ki parti di e página di Beibel un  sierto versíkulo ta, nos lo keda kòrda unda nos a mir’é, i despues lo ta mas fásil pa haña e teksto ei bèk dia nos tin mester di dje.

15. Dikon nos mester keda al dia ku lesamentu di tur loke ta keda publiká, i kon nos por logra esei?

¹⁵ Keda al dia ku lesamentu di e publikashonnan. Tur loke keda publiká, inkluso e material ku nos no ta analisá na nos reunionnan, a ser prepará pa nos benefisio. Asta e revistanan ku nos ta laga den man di hende a ser prepará ku nos na mente. * Den e mundu drùk akí, hopi biaha nos ta haña nos ta warda riba un hende òf riba algu. Si nos tin huntu ku nos un publikashon ku nos no a kaba di lesa òf no a kuminsá kuné mes, nos por probechá di e momentonan ei pa lesa algu for di dje. Algun ruman ta keda al dia ku e publikashonnan skuchando grabashon di esakinan ora nan ta kana òf ora nan ta den outo. No lubidá ku tur e informashon akí a ser prepará kuidadosamente i skirbí den un forma ku kualke hende por lesa i disfrutá di dje. E ta duna nos a la bes mas apresio pa kosnan spiritual.​—Hab. 2:2, NW.

16. Pakiko ta bon pa skirbi e preguntanan ku bini na nos mente ora nos ta lesa, anto investigá nan mas despues?

¹⁶ Meditá. Ora bo ta lesa Beibel òf e publikashonnan basá riba dje, tuma tempu pa pensa riba e informashon. Segun ku bo ta sigui kuidadosamente e ideanan presentá den e artíkulo, por surgi algun pregunta. Skirbi esakinan i investigá nan mas despues. Por lo general, ta ora un asuntu lanta nos kuriosidat, nos ta investig’é mas a fondo. E komprondementu akí ku nos ta haña ta bira manera un “tesoro” pa nos, ku nos por rekurí na dje ora nos mester.​—Mat. 13:52.

17. Kon abo a programá bo estudio personal òf di famia?

¹⁷ Fiha un ora pa adorashon komo famia. E Kuerpo Gobernante a animá nos tur pa dediká tur siman un anochi, òf otro ora di dia, na estudio personal òf di famia. Nos programa nobo di reunion ta hasi posibel pa nos sigui e konseho akí. Kiko abo ta konsiderá durante e ora di Adorashon Komo Famia? Algun ruman ta lesa Beibel, buska informashon riba algun versíkulo ku a lanta pregunta i ta skirbi un splikashon breve di esaki den nan Beibel. Hopi famia ta tuma tempu pa pensa riba kon nan komo famia por apliká e informashon ku nan ta studia. Algun kabes di famia ta skohe informashon ku nan ta haña ta nesesario pa e famia konsiderá òf ta trata tema òf pregunta ku miembronan di e famia mes ta deseá di analisá. Segun ku tempu ta pasa, sin duda mas tópiko lo bini na bo mente. *

18. Pakiko nos no tin nodi di keda sin studia e bèrdatnan mas profundo di e Palabra di Dios?

¹⁸ Hesus a bisa ku spiritu santu lo ta un ayudante. Pues nos no tin motibu pa keda sin studia e bèrdatnan mas profundo di e Palabra di Dios. E bèrdatnan ei ta parti di e presioso “konosementu di Dios,” i nos ta haña e invitashon pa investigá nan. (Lesa Proverbionan 2:​1-5.) Nan ta revelá hopi di “loke Dios a prepará pa esnan ku ta stim’é.” Pues, segun ku nos ta hasi esfuerso pa siña mas tokante e Palabra di Yehova, spiritu santu lo yuda nos, pasobra “e spiritu ta investigá tur kos, asta e profundidatnan di Dios.”​—1 Kor. 2:​9, 10.

[Nota]

Kon Lo Bo Kontestá?

• Den ki dos manera e spiritu ta yuda nos investigá “e profundidatnan di Dios”?

• Pa medio di ken spiritu santu a revelá bèrdatnan profundo den promé siglo?

• Kon spiritu santu ta klarifiká bèrdatnan bíbliko den nos tempu?

• Kiko abo por hasi pa benefisiá di e papel ku spiritu santu ta desempeñá?

[Preguntanan di Estudio]

[Kuadro na página 26]

Kon e Spiritu A Revelá e Nifikashon di e Tèmpel Spiritual?

Un di ‘e kosnan profundo di Dios’ ku a keda revelá den promé siglo tabata ku e tabernakel, i tambe e tèmpelnan ku tabatin despues den Yerusalèm, a simbolisá algu muchu mas grandi. Pablo a yama esaki “e tabernakel berdadero, kual Señor a lanta, i no hende.” (Heb. 8:2) Esaki tabata un gran tèmpel spiritual ku a representá e manera pa aserká Dios, lokual a bira posibel pa medio di e sakrifisio i saserdosio di Hesukristu.

“E tabernakel berdadero” a kuminsá eksistí na aña 29 ora Hesus a ser batisá i Yehova a asept’é komo esun ku mester a bira un sakrifisio perfekto. (Heb. 10:​5-10) Despues ku Hesus a muri i resusitá, el a drenta e Santísimo di e tèmpel spiritual i a presentá e balor di su sakrifisio “den e presensia di Dios.”​—Heb. 9:​11, 12, 24.

Den un otro karta, apòstel Pablo a bisa ku e kristiannan ungí ta “krese pa bira un tèmpel santu den Señor.” (Efe. 2:​20-22) Akaso e tèmpel akí lo tabata meskos ku “e tabernakel berdadero” ku Pablo a deskribí despues den su karta na e Hebreonan? Pa hopi aña e rumannan a kere ku sí. A parse nan ku Yehova tabata prepará e kristiannan ungí riba tera pa nan bira e “piedranan” di su tèmpel den shelu.​—1 Ped. 2:5.

Sinembargo, rònt di aña 1971, representantenan di e esklabo fiel a kuminsá komprondé ku e tèmpel ku Pablo a menshoná den su karta na e efesionan no por tabata e gran tèmpel spiritual di Yehova. Si “e tabernakel berdadero” tabata formá pa kristian ungí resusitá, lo e no por a eksistí sino te ora nan a kuminsá resusitá durante e “binida [òf, “presensia,” NW] di Señor.” (1 Tes. 4:​15-17) Pero ora Pablo a referí na e tabernakel, el a bisa: “Esaki ta un símbolo pa e tempu aktual.”​—Heb. 9:9.

Ora a kompará e pasashinan akí kuidadosamente ku otro i ku otro tekstonan di Beibel, a bira bisto ku e tèmpel spiritual no ta algu ku ta den proseso di konstrukshon i ku e kristiannan ungí no ta e “piedranan” ku ta ser formá riba tera pa bira parti di e tèmpel ei. Mas bien, kristian ungí ta sirbiendo den e patio i den e Lugá Santu di e tèmpel spiritual i ta ofresé tur dia “un sakrifisio di alabansa” na Dios.​—Heb. 13:15.

[Plachi na página 27]

Kon nos por komprondé ‘e kosnan profundo di Dios’ mas mihó?