Manehá ‘e Spada di Spiritu’ Ábilmente

‘Tuma e spada di spiritu, kual ta e Palabra di Dios.’​—EFE. 6:17.

1, 2. Kon nos mester reakshoná riba e nesesidat pa mas proklamadó di Reino?

ORA Hesus a mira e nesesidat spiritual di e multitut, el a bisa su disipelnan: “E kosecha ta masha grandi, ma trahadó ta poko. P’esei, pidi e Señor di kosecha pa manda trahadó na su kosecha.” Pero Hesus no a papia so, el a aktua tambe. P’esei, despues ku el a bisa e palabranan ei, “el a yama su diesdos disipelnan” i a manda nan bai ‘kosechá e kunuku,’ esta, prediká. (Mat. 9:​35-38; 10:​1, 5) I mas despues, el “a nombra setenta otro, i a manda nan dos-dos” bai hasi e mesun trabou.​—Luk. 10:​1, 2.

² Awe tambe tin un gran nesesidat di proklamadó di Reino. Durante e aña di sirbishi 2009, e asistensia na Memorial tabata 18.168.323. Esei ta 10 mion persona mas ku e kantidat di Testigu di Yehova rònt mundu. Sí, e kunukunan ta kla pa e kosecha tuma lugá. (Juan 4:​34, 35) P’esei, nos mester hasi orashon i pidi pa mas trahadó. Pero kon nos por aktua na armonia ku loke nos ta pidi? Wèl, nos por hasi esfuerso pa bira mas efikas segun ku nos ta partisipá ku entusiasmo den e trabou di prediká i hasi disipel.​—Mat. 28:​19, 20; Mar. 13:10.

3. Dikon Dios su spiritu santu ta esensial pa nos por bira predikadónan mas efikas?

³ E artíkulo anterior a splika ku nos mester sigui guia di Dios su spiritu santu pa nos por “papia e palabra di Dios ku tur frankesa,” esta, ku kurashi. (Echo. 4:31) E mesun spiritu ei por yuda nos bira predikadónan ábil. Pa nos por bira mas efikas den sirbishi, nos tin ku hasi bon uso di Yehova Dios su Palabra skirbí, Beibel, e hèrmènt ekselente ku el a duna nos. Beibel ta produkto di spiritu santu; su mensahe ta inspirá pa Dios. (2 Tim. 3:16) P’esei, ora nos ta usa Beibel ábilmente den nos sirbishi, nos ta permití spiritu santu guia nos. Pero promé ku nos konsiderá kon nos por hasi esei, laga nos wak kuantu poder e Palabra di Dios tin.

‘E Palabra di Dios Ta Poderoso’

4. Kon e mensahe di Dios, ku Beibel ta kontené, por kambia un persona?

⁴ Dios su palabra, òf mensahe, ta masha poderoso! (Heb. 4:12, BPK) Den sentido figurativo, e mensahe di Beibel ta mas skèrpi ku kualke spada ku hende a traha, pasobra, ta komo si fuera e ta penetrá entre wesu i manteka (tuti) di wesu. Ku otro palabra, e bèrdat di Beibel ta yega te na e parti mas paden di un persona i ta penetrá den su pensamentu- i emoshonnan i ta saka na kla ken e persona akí ta realmente. E bèrdat ei tin poder pa transformá hende; e por kambia un persona kompletamente. (Lesa Kolosensenan 3:10.) Sí, e Palabra di Dios por kambia bida di hende!

5. Den ki maneranan Beibel por guia nos, i ku ki resultado?

⁵ Es mas, Beibel ta un buki di sabiduria sin igual. E ta kontené informashon práktiko ku ta siña hende kon pa biba den e mundu kompliká i difísil akí. E Palabra di Dios ta iluminá nos pasonan i tambe e kaminda ku tin nos dilanti. (Sal. 119:105) E ta un gran yudansa ora di trata ku problema, ora di skohe amigu, entretenimentu, trabou, paña, etcetera. (Sal. 37:25; Pro. 13:20; Juan 15:14; 1 Tim. 2:9) Si  nos apliká prinsipionan bíbliko, nos por tin bon relashon ku otro hende. (Mat. 7:12; Fil. 2:​3, 4) I ora nos ta permití e Palabra di Dios iluminá e kaminda nos dilanti, nos por mira di antemano ki efekto nos desishonnan por tin riba nos den futuro. (1 Tim. 6:9) Ademas, e Skritura ta revelá Dios su propósito pa futuro, i esei ta yuda nos sigui un estilo di bida ku ta na armonia ku e propósito ei. (Mat. 6:33; 1 Juan 2:​17, 18) Pues, si un persona permití e prinsipionan di Dios guia su bida, lo e tin un bida yen di nifikashon.

6. Dikon Beibel ta un arma poderoso den nos lucha kontra Satanas?

⁶ Kòrda tambe ku Beibel ta un arma poderoso den nos guera kontra Satanas. Pablo a yama e Palabra di Dios ‘e spada di spiritu.’ (Lesa Efesionan 6:​12 i 17.) Ora nos presentá e mensahe di Beibel na un manera efikas, e por yuda hende sali for di gara di Satanas. Pues, e no ta un spada ku ta kita bida. Mas bien, e ta salba bida. P’esei, nos tin ku hasi esfuerso pa manehá e spada akí ábilmente.

Maneh’é Korektamente

7. Dikon ta importante pa nos siña usa ‘e spada di spiritu’ ábilmente?

⁷ Ta solamente si un sòldá a praktiká i a siña kon pa usa su armanan bon, e por usa nan ábilmente den guera. Esei ta konta tambe pa e uso di ‘e spada di spiritu’ den nos guera spiritual. Pablo a skirbi: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti [“manehá,” NW] e palabra di bèrdat na un manera korekto.”​—2 Tim. 2:15.

8, 9. Kiko lo yuda nos komprondé loke Beibel ta bisa? Duna un ehèmpel.

⁸ Kiko lo yuda nos ‘manehá e palabra di bèrdat korektamente’ den nos sirbishi? Pa nos por splika otro hende na un manera kla loke Beibel ta bisa, nos mes mester komprondé esaki bon promé. I pa nos por komprondé un versíkulo òf pasashi di Beibel, nos tin ku presta atenshon na su konteksto. E konteksto di un palabra, frase òf teksto, ta e palabranan, frasenan òf teksto promé òf despues di dje i ku ta yuda klarifiká su nifikashon.

⁹ Pa nos por komprondé un pasashi di e Skritura korektamente, nos tin ku tene kuenta ku e versíkulonan rònt di dje. Loke Pablo a bisa na Galationan 5:13 ta un ehèmpel di esaki. El a bisa: “Boso a wòrdu yamá pa libertat, rumannan; solamente, no usa boso libertat komo un oportunidat pa e karni, ma laga un sirbi otro pa medio di amor.” Di kua libertat Pablo tabata papia akinan? Akaso e tabata referí na libertat for di piká i morto, for di sklabitut na kreensianan falsu òf for di algu otro? E konteksto ta laga nos komprondé ku Pablo tabata papia di e libertat ku hende a haña debí ku Kristu a libra òf ‘redimí nan di e maldishon di Lei.’ (Gal. 3:​13, 19-24; 4:​1-5) Sí, esaki tabata un libertat nobo pa nan; e libertat ku nan por a disfrutá di dje pasobra nan tabata sigui  Kristu. E personanan ku a balorá e libertat ei tabata sirbi otro ku amor. Pero esnan ku no tabatin amor tabata kalumniá otro i pleita ku otro.​—Gal. 5:15.

10. Ki tipo di informashon nos mester konsiderá pa por komprondé e tekstonan di Beibel korektamente, i unda nos por haña e informashonnan ei?

¹⁰ Pa komprondé e nifikashon di un teksto di Beibel korektamente, nos mester konsiderá informashon adishonal, manera por ehèmpel, ken ta e eskritor, na ki tempu i bou di ki sirkunstansia a skirbi e buki bíbliko. Ademas, ta bon pa sa e propósito di e buki, i si ta posibel, kiko tabata e hendenan su tradishon, kondukta, norma- i balornan i práktikanan religioso den e tempu ei. *

11. Kiko nos tin ku tene kuenta kuné ora nos ta splika tekstonan bíbliko?

¹¹ Pa “manehá e palabra di bèrdat na un manera korekto,” nos tin ku hasi mas ku djis splika bèrdatnan bíbliko na un manera eksakto. Nos mester tene kuidou pa nos no usa Beibel pa intimidá hende. Sí, ounke nos por usa Beibel pa defendé e bèrdat, meskos ku Hesus a hasi ora Diabel a tent’é, Beibel no ta un arma pa intimidá ni fòrsa nos oyentenan pa aseptá nos siñansanan. (Deu. 6:16; 8:3; 10:20; Mat. 4:​4, 7, 10) P’esei, nos tin ku sigui e konseho di apòstel Pedro, kende a bisa: “Santifiká Kristu komo Señor den boso kurason, i sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sinembargo ku suavedat i reverensia.”​—1 Ped. 3:15.

12, 13. Kiko ta e kosnan fuertemente ankrá ku e bèrdat di e Palabra di Dios por tumba? Duna un ehèmpel.

¹² Kiko nos por logra ku e bèrdat di e Palabra di Dios ora nos ta us’é korektamente? (Lesa 2 Korintionan 10:​4 i 5.) Bèrdat bíbliko por tumba “fòrtinan,” esta, kosnan fuertemente ankrá. Esei ta nifiká ku e por desenmaskará doktrina falsu, práktikanan perhudisial i filosofia ku ta reflehá sabiduria di hende imperfekto. Nos por usa Beibel pa eliminá kualke idea ku ta “kontra e konosementu di Dios.” Ademas, nos por usa siñansanan bíbliko pa yuda otro hende ahustá nan manera di pensa pa e ta na armonia ku loke Beibel ta siña.

¹³ Tuma por ehèmpel, e kaso di un señora di 93 aña ku ta biba na India. For di chikitu nan a siñ’é di reenkarnashon, i e tabata kere den dje. Ora el a kuminsá studia Beibel via karta ku su yu hòmber ku tabata biba na un otro pais, mesora el a aseptá loke el a siña tokante Yehova i su promesanan. Pero, e siñansa di reenkarnashon tabata asina fuerte ankrá den su mente ku el a protestá ora su yu hòmber a skirbié tokante e kondishon di e mortonan. El a bisa e yu: “Mi no por komprondé e bèrdat di  bo Beibel! Tur religion ta siña ku nos tin algu inmortal den nos. Semper mi a kere ku e kurpa ta muri i ku un parti invisibel ta reenkarná bes tras bes den otro kurpa, mas o ménos 8.400.000 biaha. Kon por ta awor ku esaki no ta bèrdat? Esei ke men ku mayoria di religion ta robes?” ‘E spada di spiritu’ por tumba un kreensia ku ta asina fuertemente ankrá? Despues ku nan a sigui konsiderá e tópiko ei a base di Beibel, algun siman despues, e mama a skirbi: “Por fin mi a kuminsá komprondé é bèrdat tokante morto. Mi ta masha kontentu awor ku mi sa ku nos por bolbe topa nos sernan kerí ora e resurekshon tuma lugá. Mi ta spera ku e Reino di Dios bin lihé.”

Us’é pa Konvensé Hende

14. Dikon ta importante pa nos papia ku konvikshon?

¹⁴ Usa Beibel na un manera efikas no ta djis un asuntu di sita teksto. Pablo a papia ku ‘konvikshon,’ i nos tambe mester hasi esei awe. (Lesa Echonan 19:​8 i 9; 28:23.) Esaki ta importante, pasobra ora nos ta papia ku un persona tokante sierto siñansa bíbliko, nos ke yuda e persona ei kere den e siñansa i asept’é. Pero pa logra esaki, nos tin ku konvensé e persona, esta, yud’é komprondé ku loke nos ta bisa ta bèrdat. Nos por hasi esei den e siguiente maneranan.

15. Kon bo por hala atenshon na Beibel na un manera ku ta krea rèspèt p’e?

¹⁵ Hala atenshon na e Palabra di Dios na un manera ku ta krea rèspèt p’e. Ora bo ta introdusí un teksto di Beibel, hasié na un manera ku ta mustra ku ta masha importante pa haña sa kiko Dios ta pensa di un asuntu. Por ehèmpel, despues ku bo a hasi un pregunta i ku e doño di kas a kontestá, bo por bisa algu manera esaki: ‘Laga nos wak kon nos por haña sa kiko Dios ta pensa di e asuntu akí.’ Òf bo por puntra: ‘Kiko Dios tin di bisa di e asuntu akí?’ Un introdukshon asina ta enfatisá ku Beibel ta bini di Dios i ta yuda e oyente haña rèspèt pa Beibel. Ta importante pa nos hasi esei foral ora nos ta duna testimonio na un persona ku ta kere den Dios pero ku no sa kiko Beibel ta siña.​—Sal. 19:​7-10.

16. Kiko lo yuda bo splika tekstonan di Beibel korektamente?

¹⁶ No djis lesa e tekstonan di Beibel; splika nan. Pablo tabatin e kustumber di ‘splika i mustra [òf ‘duna prueba via referensianan di,’ NW]’ e kosnan ku e tabata siña hende. (Echo. 17:3) Hopi bes, un teksto di Beibel ta kontené mas ku ún punto, i kisas bo tin ku enfatisá e palabranan spesífiko ku ta apliká na loke boso ta konsiderando. Pa bo hasi esei, kisas bo por ripití e palabranan ku ta kontené e puntonan prinsipal òf bisa nan na un otro manera. Òf, bo por hasi pregunta pa yuda e doño di kas rekonosé e puntonan prinsipal. Kaba, splika e nifikashon di e parti ei di e teksto. Despues di esei, yuda bo oyente mira kon é personalmente por apliká e teksto.

17. Kon bo por usa e Skritura pa rasoná ku hende na un manera konvinsente?

¹⁷ Rasoná for di e Skritura na un manera konvinsente. Na un manera ku ta yega na kurason, Pablo a usa rasonamentu lógiko pa konvensé hende a base di “e Skrituranan.” (Echo. 17:​2, 4) Hasi esfuerso meskos kuné pa bo yega na kurason di bo oyente. Hasi preguntanan bondadoso ku ta reflehá interes personal den bo oyente pa bo por ‘saka afó’ loke tin den su kurason. (Pro. 20:5) Evitá di ta bòt den bo manera di papia. Presentá bo argumentonan na un manera kla i lógiko. I duna evidensia  konvinsente pa apoyá nan. Ademas, bo deklarashonnan mester ta firmemente basá riba e Palabra di Dios. Ta mihó bo usa ún teksto i bo splika i ilustrá e punto bon en bes di lesa dos òf tres teksto lihé tras di otro. Prueba adishonal tambe por yuda bo ta mas konvinsente. P’esei, tin biaha ta nesesario pa bo hasi investigashon i bin ku informashon adishonal. E señora di 93 aña ku nos a menshoná anteriormente mester a haña sa dikon e siñansa di un alma (òf spiritu) inmortal ta asina plamá. Ta ora el a komprondé di unda e doktrina ei a bin i kon el a drenta mayoria di religion di mundu, el a keda konvensí di loke Beibel ta siña tokante e tópiko i a aseptá esaki. *

Sigui Us’é Ábilmente

18, 19. Dikon nos tin ku sigui manehá ‘e spada di spiritu’ ábilmente?

¹⁸ Segun Beibel, “e mundu akí den su forma aktual ta pasando.” I hende malbado ta bayendo di malu pa pió. (1 Kor. 7:31; 2 Tim. 3:13) Pues, ta masha importante pa nos usa ‘e spada di spiritu, kual ta e Palabra di Dios,’ pa sigui tumba kosnan fuertemente ankrá.

¹⁹ Nos ta masha felis ku nos tin Beibel, e Palabra di Dios, i ku nos por usa su mensahe poderoso pa refutá siñansanan falsu i yega na kurason di hende sinsero. No tin nada ankrá ku ta mas fuerte ku e mensahe ei. P’esei, laga nos hasi esfuerso sinsero pa manehá ‘e spada di spiritu’ ábilmente den e trabou ku Dios a duna nos, esta, e predikashon di Reino.

[Nota]

Kiko Bo A Siña?

• Kuantu poder e Palabra di Dios tin?

• Kon nos por ‘manehá e palabra di bèrdat korektamente’?

• Kiko e mensahe di Beibel por hasi ku kosnan fuertemente ankrá?

• Kon bo por bira mas konvinsente den sirbishi?

[Preguntanan di Estudio]

[Kuadro/Plachi na página 20]

Kon pa Usa e Palabra di Dios pa Konvensé Hende

▪ Krea rèspèt pa Beibel

▪ Splika tekstonan di Beibel

▪ Rasoná na un manera konvinsente pa yega na kurason

[Plachi na página 19]

Bo tin ku siña usa ‘e spada di spiritu’ ábilmente