Kon Shelu Ta?

TIN hende ta pensa ku ta imposibel pa nos haña sa kon shelu ta, pasobra, segun nan, no tin niun hende ku a yega di baha for di shelu pa konta nos esei. Kisas nan ta lubidá ku Hesus a bisa: “Mi a baha for di shelu.” (Juan 6:38) Ademas, el a bisa algun lider religioso: “Boso ta di aki bou, ami ta di ariba.” (Juan 8:23) Kiko Hesus a bisa tokante shelu?

Hesus a konfirmá ku Yehova ta biba den shelu, pasobra el a yama Dios “mi Tata ku ta den shelu.” (Mateo 12:50) Pero, Hesus a usa e palabra “shelu” den mas ku ún sentido. Por ehèmpel, el a referí na e atmósfera di tera komo “shelu” ora el a bisa: “Mira e paranan di shelu.” (Mateo 6:26) Sinembargo, Yehova ta biba mas ayá di e atmósfera. Beibel ta bisa: “Ta E ta sinta mas ariba di e sírkulo di tera.”​—Isaias 40:22.

E “Tata ku ta den shelu” ta biba meimei di e streanan? E Skritura Santu ta yama e universo tambe “shelu.” Por ehèmpel, un salmista a skirbi: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje?”​—Salmo 8:​3, 4.

Nò, meskos ku un karpinté no tin nodi di biba den un kashi ku el a traha, Yehova Dios tampoko no ta biba den e universo ku el a krea. P’esei, ora Rei Salomon a dediká e tèmpel di Yerusalèm na Yehova, el a bisa: “Di bèrdat Dios lo biba riba tera? Mira, shelu i e shelu di shelunan no por kontené bo; kuantu ménos e kas akí ku mi a traha!” (1 Reinan 8:27) Si Yehova no ta biba den e shelu ku nos ta mira, ta den kua shelu e ta biba anto?

Ounke hende a usa teleskopnan poderoso pa studia shelu ku nos ta mira, i algun hende asta a bai den espasio, loke Beibel ta bisa ta keda sierto: “Ningun hende no a mira Dios nunka.” (Juan 1:18) Hesus a splika dikon ta asina ora el a bisa: “Dios ta [un] Spiritu.”​—Juan 4:24.

Spiritu ta un forma di bida mas elevá ku hende; e no tin kurpa di karni i sanger ku hende por mira ni sinti mediante nan sentidonan. Pues, ora Hesus a bisa ku e tabata biba huntu ku su Tata den “shelu,” e tabata ke men ku e tabatin un forma di bida mas elevá i glorioso ku kualke otro forma di bida. (Juan 17:5; Filipensenan 3:​20, 21) E lugá akí, kaminda Hesus tabata biba komo un spiritu, òf un persona spiritual, huntu ku su Tata, ta loke Beibel ta yama “shelu.” Kon e ta? Kiko ta sosodé einan?

Un Lugá di Aktividat Gososo

Beibel ta deskribí shelu komo un lugá di hopi aktividat, kaminda tin míles i miónes  di kriatura spiritual ta biba. (Daniel 7:​9, 10) Kada un di e kriaturanan spiritual ei tin nan propio personalidat. Kon nos por sa esei? Den henter e kreashon visibel, no tin ni dos kriatura ku ta eksaktamente meskos. P’esei, nos por ta sigur ku den shelu tambe tin un gran variedat. Ta masha remarkabel ku tur e personanan spiritual akí ta traha huntu den union. Esei ta kontrario na e situashon riba mundu awe, kaminda hende masha poko biaha ta kooperá ku otro.

Tuma nota kon Beibel ta deskribí loke ta tuma lugá den shelu. “Bendishoná SEÑOR [Yehova], boso, su angelnan, poderoso den fortalesa, ku ta ehekutá su palabra, obedesiendo e bos di su palabra! Bendishoná SEÑOR [Yehova], boso tur, su ehérsitonan, boso ku ta sirbié i ku ta hasi su boluntat.” (Salmo 103:​20, 21) Pues, ta hopi trabou ta tuma lugá den shelu. I nos por ta sigur ku ta trata di trabou ku ta duna hopi satisfakshon.

Angelnan tin un historia largu di sirbishi gososo ku ta bai bek te na un tempu promé ku Dios a krea e tera. Segun e Skritura, ora Yehova a funda e tera, e yunan di Dios “tabata kanta huntu” i “grita di alegria.” (Jòb 38:​4, 7) Un di Dios su yunan selestial tabatin asta e privilegio di por a traha huntu ku Dios den kreashon di tur otro kos. (Kolosensenan 1:​15-17) E deskripshon interesante akí di aktividat gososo ku ta tuma lugá den shelu kisas ta lanta pregunta den bo mente tokante shelu i humanidat.

Dios A Krea Hende pa Bai Shelu?

Siendo ku ta angelnan tabata sirbi Dios den shelu promé ku el a krea e tera, evidentemente e no a krea e promé hòmber i muhé pa biba den shelu. Mas bien, Dios a bisa e promé pareha humano: “Sea fruktífero i multipliká, i yena e tera.” (Génesis 1:28; Echonan 17:26) Adam tabata e promé kriatura ku Dios a krea ku e kapasidat di siña konos’é i sirbié fielmente. E mester a bira tata di un rasa humano ku lo a biba riba tera, pasobra “e shelunan ta e shelunan di SEÑOR, ma tera el a duna na e yunan di hende.”​—Salmo 115:16.

Normalmente, hende no ke muri pasobra morto no ta algu natural pa hende. Ora Dios a papia ku Adam tokante morto, El a menshon’é komo kastigu pa desobedensia. Pues, si Adam a obedesé Dios, lo e no a muri nunka.​—Génesis 2:17; Romanonan 5:12.

P’esei, no ta nada straño ku Dios no a papia ku Adam tokante baimentu di shelu. Pues, e no a traha tera komo un lugá kaminda hende ta pasa un periodo di prueba pa wak si nan ta kualifiká pa haña bida den shelu. Dios a krea hende pa biba pa semper riba tera, i e propósito ei lo kumpli! Beibel ta primintí ku “e hustunan lo heredá e tera, i lo biba den dje pa semper.” (Salmo 37:29) Ta klaru anto ku originalmente, Dios no a krea hende pa bai shelu. Pero, dikon Hesus a primintí su apòstelnan ku nan lo a bai shelu? Hesus tabata ke men ku tur bon hende lo bai shelu?