E “Tempu Stipulá” Ta Serka

MESKOS ku profeta Habakuk, e disipelnan di Hesus tabata anhelá e fin di tur sufrimentu. Ora nan a haña sa kiko e Reino di Dios lo hasi pa korigí kosnan riba tera, nan a puntra Hesus: “Ki tempu e kosnan akí lo sosodé, i kiko lo ta e señal di bo presensia [komo Rei] i dje konklushon dje sistema di kosnan?” (Mateo 24:3, NW) Hesus a bisa nan ku ta Yehova Dios so tabata sa e tempu eksakto ku e Reino lo tuma mando kompletu riba tera. (Mateo 24:36; Marko 13:32) Sinembargo, Hesus i otronan a profetisá sierto desaroyonan ku lo a mustra ki ora e tempu ei ta serka.​—Wak e kuadro na man drechi.

Bo no ta di akuerdo ku loke nan a profetisá ta komun i koriente awe? Hesus a profetisá tambe di un trabou di edukashon bíbliko ku lo a tuma lugá rònt mundu. El a bisa: “E evangelio akí di e reino lo wòrdu prediká den henter mundu komo un testimonio na tur nashon, i e ora ei e fin lo yega.”​—Mateo 24:14.

Esei ta eksaktamente loke ta tuma lugá awe. Testigunan di Yehova ta hasiendo e trabou ei. Den mas o ménos 236 pais, mas ku shete mion Testigu ta siña hende loke e Reino lo hasi i ta yuda nan kumpli ku e rekisitonan hustu di Dios, kende su boluntat ta pa kaba ku tur sufrimentu i doló. Sigui siña di e Reino di Dios, i lo bo tin e speransa di biba den un mundu sin sufrimentu—pa semper.

[Kuadro/Plachi na página 8]

Tekstonan Bíbliko Ku Ta Señalá na e Último Dianan

MATEO 24:6, 7; REVELASHON 6:4

• Guera manera nunka promé

MATEO 24:7; MARKO 13:8

• Temblornan grandi

• Skarsedat di kuminda

LUKAS 21:11; REVELASHON 6:8

• Pèst

MATEO 24:12

• Oumento di maldat

• Amor ta fria

REVELASHON 11:18

• Hende ta destruí, òf ruina, e tera

2 TIMOTEO 3:2

• Amor pa plaka

• Desobedensia na mayornan

• Hende ta stima nan mes demasiado

2 TIMOTEO 3:3

• Falta di amor

• Hende no ke yega na ningun akuerdo

• Falta di dominio propio den tur gremio di sosiedat

• Falta di amor pa loke ta bon

2 TIMOTEO 3:4

• Mas amor pa plaser ku pa Dios

2 TIMOTEO 3:5

• Hopi hende ta pretendé ku nan ta kristian

MATEO 24:5, 11; MARKO 13:6

• Hopi profeta falsu ta aktivo

MATEO 24:9; LUKAS 21:12

• Kristiannan berdadero ta ser persiguí

MATEO 24:39, NW

• Hende no ta hasi kaso di spièrtamentu bíbliko

[Plachi na página 8]

Rònt mundu, Testigunan di Yehova ta siña hende tokante e Reino di Dios