“Venerashon di mama di Dios a haña un empuhe grandi ora . . . e paganonan a basha drenta e iglesia. . . . Loke pa míles di aña a forma e deboshon i e manera ku [e paganonan akí kombertí na kristianismo] tabata biba nan fe tabata venerashon di e diosa ‘gran mama’ i e ‘bírgen divino.’”​—The New Encyclopædia Britannica (1988), Volúmen 16, página 326 i 327.

“Lo bo konsebí den bo matris i duna lus na un yu hòmber, i lo bo yam’é Hesus. E lo ta grandi i lo wòrdu yamá Yu di e Haltísimo. . . . I pa e motibu ei esun santu ku tin ku nase lo wòrdu yamá e Yu di Dios.”​—Lèter skùin ta di nos; Lukas 1:​31-35.

E pasashi di e Skritura ei ta mustra bon kla ku Maria tabata mama di e “Yu di Dios,” i no di Dios mes. Akaso e por a karga den su barika Esun kende ‘shelu mes no por kontené’? (1 Reinan 8:27) Nunka e no a pretendé esei tampoko. Ta e siñansa di Trinidat a krea konfushon tokante e identidat di Maria. Ora e Konsilio di Efeso a proklamá na aña 431 di nos era ku Maria ta Theotokos (un palabra griego ku ta nifiká “Esun ku a duna lus na Dios”), òf “Mama di Dios,” esaki a habri kaminda pa hende venerá Maria. Pa hopi siglo e stat di Efeso, kaminda nan a tene e konsilio di iglesia akí, tabata e sentro di adorashon di imágen ku a konmemorá Artémis, diosa di fertilidat.

Pues den e forma ei hopi aspekto di e adorashon di e imágen di Artémis ku “a kai for di shelu,” manera e proseshonnan ku nan tabata tene, a keda integrá den adorashon di Maria. (Echonan 19:35) Un otro kustumber ku a slùip drenta den e siñansanan kristian tabata uso di imágen di Maria i di otro personahenan den adorashon.

Wak tambe e versíkulonan di Beibel akí: Mateo 13:​53-56; Marko 3:​31-35; Lukas 11:27 i 28