Spiritu Santu​—Kiko E Ta?

UN BIAHA Hesus a puntra su disipelnan: “Suponé ku un tata entre boso, si su yu pidié un piská, lo e dun’é un kolebra? Òf si e pidié un webu, lo e dun’é un skòrpion?” (Lukas 11:​11, 12) E muchanan di Galilea tabata gusta kome webu i piská i tabata determiná pa pidi nan tatanan eksaktamente loke nan tabata ke.

Hesus a bisa ku nos mester keda pidi pa spiritu santu, meskos ku un yu ku tin hopi hamber ta sigui pidi kuminda. (Lukas 11:​9, 13) Ora nos komprondé kiko spiritu santu ta, esei ta yuda nos mira kon importante ta pa nos tin esaki den nos bida. P’esei, laga nos wak primeramente kiko Beibel ta siña nos tokante spiritu santu.

“Poder di e Haltísimo”

E Skritura ta mustra bon kla ku spiritu santu ta e poder ku Dios ta usa pa kumpli ku su boluntat. Ora angel Gabriel a informá Maria ku lo e haña un yu apesar ku e tabata bírgen, e angel a bis’é: “Spiritu santu lo bin riba bo, i e poder di e Haltísimo lo sombra bo; i pa e motibu ei esun santu ku tin ku nase lo wòrdu yamá e Yu di Dios.” (Lukas 1:35) Segun e palabranan di Gabriel, tin un konekshon entre spiritu santu i “e poder di e Haltísimo.”

Tin otro kaminda den Beibel ku e mesun idea ta bini padilanti. Profeta Mikeas a bisa: “Ami ta yen di poder—ku e spiritu di SEÑOR.” (Mikeas 3:8) Hesus a primintí su disipelnan: “Boso lo risibí poder ora spiritu santu bin riba boso.” (Echonan 1:8) I apòstel Pablo a papia di “e poder di spiritu santu.”​—Romanonan 15:​13, 19.

Pues, na ki konklushon nos por yega? Tin un relashon estrecho entre spiritu santu i e poder di Dios. Mediante spiritu santu Yehova ta usa su poder. Simplemente bisá, spiritu santu ta Dios su poder den akshon, òf su forsa aktivo. Esaki ta un forsa sumamente asombroso! Nos no por kaba di komprondé ta kuantu poder tabata nesesario pa krea henter e universo. Mediante profeta Isaias, Yehova a sugerí pa nos reflekshoná riba lo siguiente: “Hisa bo wowo wak ariba i mira ta ken a krea e streanan akí; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.”​—Isaias 40:26.

Pues, Beibel ta indiká ku e universo i e armonia i órden ku tin den dje ta eksistí debí na e ‘grandesa di e forsa,’ òf poder, di Dios Todopoderoso. Ta opvio  ku Dios su forsa aktivo ta inmenso, i nos eksistensia ta dependé di dje.​—Wak e kuadro “Spiritu Santu den Akshon.”

Ademas di usa su spiritu santu en konekshon ku kosnan inmenso, manera kreashon di universo, Yehova por us’é tambe na fabor di hende. Den Beibel tin hopi ehèmpel ku ta mustra kon Dios su forsa aktivo a duna su sirbidónan riba tera poder.

‘E Spiritu di Yehova Ta Riba Mi’

Hesus su ministerio ta duna nos un bista fasinante di e manera ku Dios su spiritu santu por duna su sirbidónan  poder. Hesus a bisa e pueblo di Názarèt: “E spiritu di SEÑOR ta riba mi.” (Lukas 4:18) Kiko Hesus a logra ku yudansa di “poder di e spiritu”? (Lukas 4:14) El a kura tur sorto di malesa, kalma laman, alimentá míles di hende ku un par di pan i piská, i asta el a lanta hende for di morto. Apòstel Pedro a bisa ku e “milagernan, maravianan i señalnan ku Dios a hasi pa medio di [Hesus]” a duna prueba ku e tabata “un hòmber aprobá pa Dios.”​—Echonan 2:22.

Aktualmente e milagernan ei no ta tuma lugá ku yudansa di spiritu santu. No opstante, e por hasi kosnan remarkabel pa nos. Yehova ta duna su spiritu santu gustosamente na su sirbidónan, manera Hesus a primintí su disipelnan. (Lukas 11:13) P’esei, apòstel Pablo por a bisa: “Pa tur kos mi tin e forsa mediante esun ku ta duna mi poder.” (Filipensenan 4:13, NW) Spiritu santu por tin e efekto ei riba bo? E siguiente artíkulo lo kontestá e pregunta ei.

[Kuadro/​Plachi na página 5]

Dikon Spiritu Santu No Ta un Persona?

Beibel ta kompará spiritu santu ku awa. Ora Dios a primintí su pueblo bendishonnan pa futuro, el a bisa: “Lo mi basha awa riba e tera ku tin set, i koridanan di awa riba e tera seku; lo mi basha mi spiritu riba bo yunan, i mi bendishon riba bo desendientenan.”​—Isaias 44:3.

Ora Dios a basha spiritu santu riba su sirbidónan, nan tabata “yen di spiritu santu” òf “yená ku spiritu santu.” Beibel ta bisa ku Hesus, Juan Boutista, Pedro, Pablo, Barnabas i e disipelnan ku a reuní riba e dia di Pentekòste di aña 33 di nos era tabata yen di, òf yená ku, spiritu santu.​—Lukas 1:15; 4:1; Echonan 4:8; 9:17; 11:22, 24; 13:9.

Pensa un ratu riba lo siguiente: Ta posibel pa “basha” un persona riba vários otro hende? Lo bo bisa ku un persona por ‘yena’ henter un grupo di hende? Esei no ta lógiko. Ta bèrdat ku Beibel ta referí na e echo ku hende a yena ku sabiduria, komprondementu, òf asta ku konosementu, pero ningun momento e no ta bisa ku un hende a ser yená ku un otro hende.​—Eksodo 28:3; 1 Reinan 7:14; Lukas 2:40; Kolosensenan 1:9.

E palabra griego pa “spiritu” ta pnéu·ma, ku ta transmití tambe e idea di un poder invisibel. Segun Expository Dictionary of New Testament Words di Vine, e palabra pnéu·ma “primeramente ta referí na bientu . . . tambe na rosea; despues di esei, spesialmente na e spiritu, ku meskos ku bientu, ta invisibel, algu ku bo no por mishi kuné i ta poderoso.”

Pues, ta bisto anto ku spiritu santu no ta un persona. *

[Nota]

[Rekonosementu]

Photodisc/SuperStock