Un Tempu pa Skohe

“Dios a krea hende segun su mes imágen; segun e imágen di Dios el a krea hende; hòmber i muhé el a krea nan.”​—Génesis 1:27.

E PALABRANAN bon konosí ei, den e promé kapítulo di Beibel, ta referí na un di e obranan mas maravioso ku Dios a efektuá “apropiá na su tempu,” esta, e kreashon di un pareha humano perfekto, Adam i Eva. (Eklesiastés 3:11) Komo nan Kreador, Yehova Dios a bisa nan: “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.”​—Génesis 1:28.

Ku e palabranan ei, Dios a hasi su propósito konosí na e promé pareha humano. Nan mester a multipliká, kuida e tera i kombertié den un paradeis global pa nan mes i nan desendientenan biba riba dje. Dios no a pone un dia pa nan muri. En bes di esei, Dios a pone un futuro maravioso nan dilanti. Si nan a skohe bon i a keda obedesidu na Dios, nan lo por a biba pa semper den pas i felisidat perfekto.

 Pero e promé pareha no a skohe bon, i komo resultado di esei, tur hende ta bira bieu i muri. De echo, e patriarka Jòb a rekonosé: “Hende ku a nase di muhé ta biba poko dia i ta yen di problema.” (Jòb 14:1) Kiko a bai robes?

Beibel ta splika: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Ta klaru ku e “ún hende” ei tabata Adam, kende deliberadamente a skohe pa desobedesé Dios su mandamentu simpel i kla. (Génesis 2:17) Debí ku Adam a skohe robes, el a pèrdè e oportunidat di biba pa semper riba un tera paradísiko. Adam a pone ku su desendientenan tambe a pèrdè un herensia presioso, i el a pasa pa nan e kondenashon di piká i morto. A parse ku di ningun manera hende no por a haña bèk loke a bai pèrdí. Pero hende realmente ta sin speransa?

Un Tempu pa Hasi Tur Kos Nobo

Míles di aña despues, e salmista a ser inspirá pa skirbi: “E hustunan lo heredá e tera, i lo biba den dje pa semper.” (Salmo 37:29) Pa duna nos e siguransa ku Dios su promesa hasí den e hòfi di Edén lo kumpli, e Palabra di Dios ta deskribí na un manera konmovedor loke Dios lo hasi pronto: “E lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” Despues, Dios mes ta bisa: “Mira, mi ta hasi tur kos nobo.”​—Revelashon 21:​4, 5.

Siendo ku tin un tempu stipulá pa tur kos, ta lógiko pa puntra: Ki dia e tempu pa hasi tur kos nobo ta bini pa e promesanan maravioso di Dios kumpli? E editornan di e revista akí, Testigunan di Yehova, ta hasi hopi esfuerso pa laga hende sa ku nos ta bibando den loke Beibel ta yama “e último dianan” i ku e tempu pa Dios tuma akshon pa “hasi tur kos nobo” ta serka. (2 Timoteo 3:1) Nos ta animá bo pa investigá Beibel i siña tokante e bunita speransa akí ku bo tambe por tin. Nos ta animá bo tambe pa aseptá e invitashon akí: ‘Buska Yehova, miéntras ku e por wòrdu hañá; yam’é, miéntras ku e ta serka.’ (Isaias 55:6) En bes di ta predeterminá, bo bida i speransa eterno ta den bo mes man!

[Komentario na página 8]

“Mira, mi ta hasi tur kos nobo”