Hesus​—Loke Hende Ta Bisa di Dje

“Hesus di Názarèt . . . sin duda ta e figura ku tabatin mas influensia den historia.” —H. G. Wells, historiadó ingles.

“Kristu ta . . . úniko entre tur e héroenan den historia.” —Philip Schaff, teólogo i historiadó di orígen suiso.

KEN ta kualifiká pa ser yamá e hòmber mas importante ku a yega di biba? Kon nos por determiná importansia di un hende? A base di e don militar ku e tin, su forsa físiko óf kapasidat mental? Òf mester determiná esei a base di e influensia ku su palabranan i echonan tabatin riba hende i e ehèmpel ku el a pone pa nan?

Tuma nota di loke historiadó, sientífiko, erudito, eskritor, lider polítiko i otronan—tantu den pasado komo den tempu aktual—a bisa di e nazareno, Hesukristu:

“Lo bo tin ku nenga echonan konkreto pa keda sin atmití ku Hesus di Názarèt tabata e persona ku tabatin mas influensia, no solamente den e último dos mil añanan sino tambe den henter historia humano.”—Reynolds Price, un merikano ku ta eskritor i erudito bíbliko.

“Un hòmber ku tabata kompletamente inosente a ofresé su mes komo un sakrifisio pa e bienestar di otro hende, inkluso su enemigunan i a bira e reskate pa mundu. Esei tabata un akto perfekto.”—Mohandas K. Gandhi, lider polítiko i spiritual di India.

“Komo mucha, mi a haña edukashon di Beibel i di Talmut. Mi ta un hudiu, pero mi ta haña e figura sobresaliente di Názarèt fasinante.”—Albert Einstein, sientífiko di orígen aleman.

“Segun mi, Hesukristu su personalidat ta esun mas sobresaliente den henter historia, komo Yu di Dios i tambe komo Yu di Hende. Tur loke El a yega di bisa i hasi tin balor pa nos awe, i esei ta algu ku bo no por bisa di ningun otro hende, sea na bida òf morto.”—Komentario di Sholem Asch, outor di orígen polako, ku a sali den Christian Herald; lèter skùin ta di nan.

“Pa trintisinku aña di mi bida mi tabata un nihilista, un hòmber ku no tabata kere den nada. Sinku aña pasá mi a wòrdu konvensí ku Hesus ta real. Mi a kere den e doktrina di Hesukristu i henter mi bida a kambia diripiente.”—Count Leo Tolstoy, novelista i filósofo ruso.

“[Hesus su] bida a kousa mayor impakto riba e planeta akí i su influensia ta sigui krese.”—Kenneth Scott Latourette, historiadó i outor merikano.

“Nos tin ku asumí ku e historia di Hesus su bida ta algu ku a ser inventá? En realidat, mi amigunan, no ta parse ku ta asina. Al kontrario, e historia di Sócrates, ku ningun hende no ta tribi di kuestioná, no ta asina bon dokumentá manera esun di Hesukristu.”—Jean-Jacques Rousseau, filósofo franses.

Pues klaramente, si tin un hende ku ta meresé di ta nos ehèmpel den bida, esei ta Hesukristu. Pablo ta urgi nos pa ‘fiha wowo’ riba Hesus. E tabata un hòmber eduká di promé siglo ku Hesus a skohe pa bira Su siguidó i pa papia di Dje ku e nashonnan. (Hebreonan 12:2; Echonan 9:3) Kiko nos por siña di Hesus su bida? Kon nos por benefisiá di su bida?