Nos Lektornan Ta Puntra

 Unda e Bataya di Armagedón Lo Tuma Lugá?

E bataya di Armagedón lo no tuma lugá na un kampo di bataya spesífiko. Mas bien, henter e tera lo ta e kampo di bataya. Dikon? Pasobra e dos partidonan kontra otro lo ta asina grandi ku no tin ún solo sitio ku por kontené nan.

Armagedón ta konosí tambe komo “e guera di e gran dia di Dios Todopoderoso.” Yehova Dios lo usa su Yu, Kristu Hesus, pa forma un ehérsito angelikal pa bringa kontra e forsanan aliá di tur e gobernantenan malbado riba tera.—Revelashon 16:14; 19:11-16.

Di un manera òf otro e podernan satániko lo lòk e nashonnan pa drenta den e bataya. Beibel ta papia di “spiritunan di demoñonan” ku ta sali bai serka “e reinan [gobernantenan] di henter mundu, pa reuní nan . . . na e lugá ku na lenga hebreo yama Armagedón.”—Revelashon 16:14-16.

No tin ningun otro buki di Beibel ku a stimulá e imaginashon di asina tantu lesadó di Beibel manera e buki di Revelashon. Hopi lesadó ku ta haña ku mester komprondé e buki di Revelashon literalmente a señalá e sitio eksakto kaminda nan ta kere ku e bataya lo kuminsá, i tur nèrvioso nan ta vigilá susesonan den e region ei. E idea di ku Armagedón ta referí na un lugá spesífiko a bin padilanti asta den un komentario griego riba Revelashon, esun di mas bieu ku ta eksistí awe i skirbí pa Oekumenio den siglo 6 di nos era.

John F. Walvoord, eks-presidente di e Seminario Teológiko di Dallas, a menshoná un punto di bista ku ta popular serka klero fundamentalista. El a bisa ku Armagedón ta “e último bataya suisida di un lucha mundial desesperá ku ta konsentrá den Medio Oriente.” Walvoord ta identifiká “‘e Seritu di Meguido,’ un seru chikí ku ta keda den parti nort di Palestina na final di un vaye hanchu,” komo e punto sentral di e binidero guera grandi aki.

Sin embargo, e buki di Revelashon no ta un mapa di kaminda ku ta dirigí nos na un lugá literal ku yama Armagedón. De echo, su palabranan di introdukshon na e idioma griego original ta deklará ku e relato ta presentá den forma di señal. P’esei, Testigunan di Yehova for di hopi tempu pasá a deklará den nan publikashon Estudio di e Skritura, Volúmen IV: “Nos no ta ferwagt ningun aglomerashon literal di hende na e Seritu di Meguido.”

E susesonan históriko ku a tuma lugá na Meguido ta representá un situashon sin salida, un kondishon sin eskape pa e enemigunan di Dios. Pues, na Armagedón, Dios lo hasi sigur ku tur korupshon i maldat, sin importá na unda e por ta riba e planeta aki, ta ser aplastá i eliminá.—Revelashon 21:8.

Hende ku ta stima Yehova Dios i su Yu, Hesukristu, no tin nodi teme Armagedón. E bataya di Dios ta dirigí solamente kontra e hendenan ku e ta husga di ta malbadonan inkoregibel. E destrukshon ku Dios su guera lo kousa lo ta selektivo. Beibel ta bisa: “Yehova sa kon pa libra hende deboto na dje.” (2 Pedro 2:9, NW) Un promesa alentador na Salmo 37:34 ta bisa: “Spera riba SEÑOR i sigui su kaminda, i e lo halsa bo pa heredá e tera; ora ku e malbadonan wòrdu kòrta kitá afó, abo lo mira esaki.”