Matrimonio i Kriamentu di Yu den e Tempu di Fin Aki

“Tempu ta kòrtiku.”​—1 KOR. 7:29.

1. (a) Ki kambionan awe ta entre e kosnan “trabahoso”? (b) Pakiko e kambio den norma- i balornan den famia mester preokupá nos?

E PALABRA DI DIOS a predisí ku “e tempu di e fin” lo ta karakterisá pa guera, temblor, hamber i pèst. (Dan. 8:​17, 19; Luk. 21:​10, 11) Beibel a spièrta nos tambe ku e tempu krusial aki den historia humano lo ta un époka di kambionan sosial grandi. Un di e kosnan “trabahoso” di e “último dianan” krítiko aki ta problema den bida di famia. (2 Tim. 3:​1-4) Pakiko e kambionan aki ta preokupá nos? Pasobra nan ta asina ekstenso i asina impaktante ku nan por afektá kristiannan djawe su punto di bista di matrimonio i di kriamentu di yu. Den ki manera?

2. Kon mundu en general ta mira matrimonio i divorsio?

² Awendia ta masha fásil pa haña divorsio, i el a bira algu komun. Den hopi pais, e porsentahe di divorsio ta oumentando rápidamente. Sin embargo, nos mester tene bon kla na mente ku Yehova Dios su punto di bista di matrimonio i divorsio ta kompletamente distinto for di esun di mayoria di hende den e mundu rònt di nos. Kiko ta Yehova su punto di bista anto?

3. Kon Yehova i Hesukristu ta mira matrimonio?

 ³ Yehova Dios ta ferwagt di hende kasá ku nan ta keda fiel na nan promesa matrimonial. Ora el a uni e promé hòmber i muhé den matrimonio, el a deklará ku “un hòmber . . . lo uni ku su esposa [i] nan lo bira ún karni.” Hopi tempu despues, Hesukristu a ripití e deklarashon ei i a agregá: “P’esei loke Dios a uni, no laga ningun hende separá.” Hesus a bisa mas aleu: “Ken ku divorsiá su esposa, si no ta pa motibu di inmoralidat seksual, i kasa ku otro muhé, ta kometé adulterio.” (Gén. 2:24; Mat. 19:​3-6, 9) Pues, tantu Yehova komo Hesus ta mira matrimonio komo un union di bida largu ku ta terminá solamente ora un di e kasánan fayesé. (1 Kor. 7:39) Siendo ku matrimonio ta sagrado, nos no mester mira divorsio komo algu gewon. De echo, e Palabra di Dios ta deklará ku Yehova ta odia divorsio ku no tin base bíbliko. *​—Lesa Malakias 2:​13-16; 3:6.

Un Matrimonio Responsabel

4. Pakiko algun hóben kristian ta lamentá ku nan a kore kasa muchu lihé?

⁴ E mundu malbado den kua nos ta biba ta opseshoná ku sèks. Tur dia nos ta ser inundá ku un ola di imágen sensual. Nos no por ignorá e efekto ku esakinan por tin riba nos, spesialmente riba nos hóbennan stimá den kongregashon. Kon un hóben kristian mester reakshoná riba e influensia insaludabel aki, lokual por lanta deseo seksual den dje asta kontra di su boluntat? Algun a purba dil ku e situashon aki dor di kasa na un edat masha yòn, ku e speransa ku asina nan lo no haña nan enbolbí den inmoralidat seksual. Ma djis despues ku nan a kaba di kasa, vários di nan a lamentá e desishon ei. Dikon? Unabes e novedat di ta kasá a pasa, nan a realisá ku nan tin masha poko kos en komun ku nan kasá den asuntunan di bida di tur dia. Nada straño anto ku e parehanan ei ta haña nan e ora ei ku un problema serio.

5. Kiko lo yuda parehanan keda fiel na nan promesa matrimonial? (Mira tambe e nota na pia di página.)

⁵ Ora bo kasa ku un hende—asta si ta un ruman kristian—ku ta resultá di ta hopi diferente for di loke bo a ferwagt, kosnan por bira difísil. (1 Kor. 7:28) Sin embargo, maske kon difísil e situashon ta, kristiannan berdadero sa ku un divorsio ku no tin apoyo di Beibel no ta un solushon aseptabel pa problemanan relashoná ku un matrimonio infelis. P’esei, esnan ku ta sigui traha duru pa konserbá nan matrimonio pa motibu ku nan ke keda fiel na nan promesa matrimonial ta meresé rèspèt i yudansa amoroso di e kongregashon kristian. *

6. Kon hóbennan kristian mester mira kasamentu?

⁶ Bo ta yòn i no a kasa ainda? Si ta asina, kon bo mester mira kasamentu? Bo por evitá hopi doló di kurason si bo warda te ora bo ta físikamente, mentalmente i spiritualmente prepará pa kasa promé ku bo kuminsá un relashon romántiko ku un kristian di e sekso opuesto. Klaru ku Beibel no ta stipulá un edat pa kasa. * Ma e ta mustra sí ku lo ta bon pa bo warda te ora bo a pasa e tempu den bida ora deseo seksual ta masha fuerte. (1 Kor. 7:​36, NW) Pakiko? Pasobra deseo seksual fuerte por stroba bo di mustra sano huisio i pone bo tuma desishonnan imprudente ku despues por resultá den doló di kurason. Kòrda ku e konseho sabí di Yehova tokante matrimonio ku tin den Beibel ta pa bo benefisio i felisidat.​—Lesa Isaias 48:​17 i 18.

Kriamentu di Yu na un Manera Responsabel

7. Kiko algun pareha yòn ta pasa aden, i dikon esaki por trese tenshon den e matrimonio?

⁷ Algun pareha ku kasa yòn ta haña yu miéntras ku nan mes apénas a pasa adolesensia. Nan no a haña chèns realmente di konosé otro bon promé ku nan beibi nase, kende awor ta rekerí atenshon 24 ora pa dia. Ta masha natural pa e mama duna su atenshon prinsipalmente na e  beibi resien nasí, lokual por pone e esposo yòn bira yalurs. Ademas, pasa anochinan sin drumi pa atendé e beibi por krea tenshon den e relashon di e pareha i bira un karga pa nan. Nan ta realisá diripiente ku nan a pèrdè gran parti di nan libertat. Awor nan no por bai tur kaminda i no tin e libertat mas pa hasi kosnan manera nan tabata hasi un tempu. Kon nan tin ku mira e kambio aki den nan situashon?

8. Kon kristiannan mester mira kriamentu di yu, i dikon?

⁸ Meskos ku nos mester dal paso pa kasa na un manera responsabel, nos tin ku mira kriamentu di yu tambe komo un responsabilidat i privilegio ku Dios a duna hende. Kualke ahuste ku yegada di un beibi por pone un pareha kristian hasi den nan bida, nan mester hasi nan máksimo esfuerso pa efektuá e ahustenan aki na un manera responsabel. Siendo ku Yehova a duna hende e kapasidat pa haña yu, mayornan tin ku mira e beibi resien nasí komo ‘un herensia di Yehova.’ (Sal. 127:3) Un mama i tata kristian lo hasi esfuerso pa kumpli ku nan debernan komo “mayornan den [union ku] Señor.”​—Efe. 6:1.

9. (a) Kiko kriamentu di yu ta enserá? (b) Kiko e esposo por hasi pa yuda su esposa keda spiritualmente fuerte?

⁹ Kriamentu di yu ta eksigí añanan di sakrifisio propio. E ta un invershon grandi di tempu i energia. Un esposo kristian mester komprondé ku despues ku un beibi nase, su esposa pa vários aña probablemente lo no por konsentrá durante reunion i lo por tin ménos oportunidat pa su estudio personal di Beibel i meditashon. Esaki por debilit’é spiritualmente. Ser un mayor responsabel ta rekerí pa e esposo hasi tur loke ta rasonablemente na su alkanse pa yuda kuida e yu. Lo e por purba kompensá pa loke su esposa kisas ta pèrdè na reunion dor di trata algun punto di e programa kuné despues na kas. Tambe lo e por yuda wak e beibi pa duna su esposa oportunidat pa partisipá mas plenamente den predikashon di e Reino.​—Lesa Filipensenan 2:​3 i 4.

10, 11. (a) Kon yunan ta ser lantá den e “instrukshon” di Yehova? (b) Pakiko hopi mayor kristian ta meresé elogio?

¹⁰ Kriamentu di yu na un manera responsabel ta enserá muchu mas ku duna e yu kuminda, paña, dak i kuido di salú. Spesialmente den e tempu peligroso aki di e fin, muchanan tin ku siña for di chikitu e prinsipionan moral ku mester guia nan den bida. Yunan mester ser lantá “den e disiplina i instrukshon” di Yehova. (Efe. 6:4) E “instrukshon” aki ta enserá inkulká e pensamentunan di Yehova den e mente di un mucha for di su tierno infansia i sigui te den e añanan krítiko di adolesensia.​—2 Tim. 3:​14, 15.

¹¹ Ora Hesus a bisa su siguidónan ku nan mester “hasi tur e nashonnan disipel,” sin duda e tabatin na mente tambe ku mayornan mester yuda nan yunan bira disipel. (Mat. 28:​19, 20) Pa motibu di e preshonnan ku e mundu aki ta pone riba hóbennan, esei ta un reto. P’esei, mayornan ku logra kria nan yunan pa bira kristiannan dediká ta ègt meresé e elogio sinsero di tur ruman den kongregashon. Ku nan fe i fieldat komo mayornan responsabel, nan a “vense” e influensia di mundu.​—1 Juan 5:4.

Keda Soltero òf sin Haña Yu pa un Propósito Noble

12. Pakiko algun kristian ta disidí di keda soltero pa un tempu?

¹² Ya ku “tempu ta kòrtiku” i “e mundu aki den su forma aktual ta pasando,” e Palabra di Dios ta konsehá nos seriamente pa pensa riba e bentahanan di solteria. (1 Kor. 7:​29-31) Pues, algun kristian ta opta pa keda soltero henter nan bida òf ta disidí di keda soltero pa un par di aña promé ku nan kasa. Nan meresé elogio pasobra nan no ta probechá di e libertat ku solteria ta duna nan pa kore tras di interesnan egoista. Hopi ta keda soltero pa por sirbi Yehova ‘sin ser distraí [NW].’ (Lesa 1 Korintionan 7:​32-35.) Algun kristian soltero ta sirbi komo pionero òf bètelita. Vários otro ruman soltero ta purba hasi nan mes mas útil pa Yehova su organisashon dor di kumpli ku e rekisitonan pa asistí na e Skol di Entrenamentu Ministerial. De echo, rumannan ku a sirbi den e sirbishi di tempu kompletu e añanan ku nan tabata soltero i despues a disidí di kasa hopi biaha ta haña ku nan matrimonio ta benefisiando ainda di e lèsnan balioso ku nan a siña den e promé añanan ei.

13. Dikon algun pareha kristian ta opta pa no haña yu?

 ¹³ Den algun parti di mundu tin un otro desaroyo den bida di famia ta tumando lugá—vários pareha ta opta pa no haña yu. Algun ta hasi esei pa motibunan ekonómiko; otronan pasobra nan ke keda liber pa traha un karera lukrativo. Den kristiannan tambe tin parehanan ku ta opta pa no haña yu. Sin embargo, hopi bes nan ta hasi esei pa ta mas liber pa sirbi Yehova. Esaki no ke men ku e parehanan ei no tin un bida matrimonial normal. Mas bien, nan ta dispuesto pa duna mas prioridat na interesnan di Reino ku na algun di e privilegionan ku matrimonio ta trese kuné. (1 Kor. 7:​3-5) Algun di e parehanan ei ta sirbi Yehova i nan rumannan den e trabou di sirkuito i di distrito òf na Bètel. Otronan ta sirbi komo pionero òf misionero. Yehova lo no lubidá nan trabou i e amor ku nan ta mustra pa su nòmber.​—Heb. 6:10.

“Tribulashon den e Bida Aki”

14, 15. Ki “tribulashon den e bida aki” mayornan kristian por haña nan kuné?

¹⁴ Apòstel Pablo a bisa kristiannan kasá ku nan lo haña “tribulashon den e bida aki.” (1 Kor. 7:28) Esaki por enserá problema ku salú di e pareha, di nan yunan òf di nan mayornan di edat. Lo e por enserá tambe difikultat i doló di kurason en konekshon ku kriamentu di nan yunan. Manera nos a menshoná na kuminsamentu di e artíkulo aki, Beibel a profetisá ku “e último dianan” lo trese “tempunan trabahoso.” Un di e kosnan trabahoso lo ta e kuestion di yunan ku ta “desobedesidu na mayornan.”​—2 Tim. 3:​1-3.

¹⁵ Kriamentu di yu ta un desafio serio pa mayornan kristian. Nos no ta imün pa e efektonan negativo di e “tempunan trabahoso” aki. P’esei, mayornan kristian tin ku hiba un lucha kontinuo kontra e influensia mortal ku “e mundu aki” por tin riba nan yunan. (Efe. 2:​2, 3) I no ta semper nan ta gana e bataya! Ora un yu hòmber òf yu muhé di un famia kristian stòp di sirbi Yehova, esei en bèrdat ta “tribulashon” pa e mayornan ku a hasi nan esfuerso pa lant’é den e bèrdat di Dios.​—Pro. 17:25.

“Lo Tin un Gran Tribulashon”

16. Ki “tribulashon” Hesus a profetisá di dje?

¹⁶ Sin embargo, kualke “tribulashon” ku nos por haña en konekshon ku matrimonio i hañamentu di yu lo ta nada na komparashon ku un otro tribulashon muchu mas grandi. Ora Hesus a profetisá tokante su presensia i e fin di e sistema di kosnan aki, el a deklará: “Lo tin un gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.” (Mat. 24:​3, 21) Mas despues Hesus a revelá ku un multitut grandi lo sobrebibí e “gran tribulashon” aki. Sin embargo, e mundu di Satanas lo sigui bringa te na final kontra Yehova su Testigunan pasífiko i lansa un último atake kontra nan. Esei sin duda lo ta un tempu difísil pa nos tur—tantu adulto komo mucha.

17. (a) Pakiko nos por enfrentá futuro ku konfiansa? (b) Kiko mester influensiá nos punto di bista di matrimonio i di kriamentu di yu?

¹⁷ No opstante, nos no mester tin un miedu eksagerá di futuro. Mayornan ku ta fiel na Yehova por spera di haña protekshon huntu ku nan yunan chikitu. (Lesa Isaias 26:​20 i 21; Sof. 2:​2, 3; 1 Kor. 7:14) Pero pa aworakí, laga e echo ku nos ta konsiente di e dianan krítiko den kua nos ta biba influensiá nos punto di bista di matrimonio i di kriamentu di yu den e tempu di fin aki. (2 Ped. 3:​10-13) Den e manera ei, nos bida—sea nos ta soltero òf kasá, ku òf sin yu—lo trese onor i gloria pa Yehova i pa e kongregashon kristian.

[Nota]

Komo Repaso

• Pakiko hóbennan kristian no mester kore kasa muchu lihé?

• Kiko kriamentu di yu ta enserá?

• Pakiko hopi kristian ta keda soltero, òf si nan ta kasá, ta opta pa no haña yu?

• Ki “tribulashon” mayornan kristian por haña nan kuné?

[Preguntanan di Estudio]

[Plachi na página 27]

Pakiko ta sabí pa hóbennan kristian warda te ora nan ta mas grandi pa kasa?

[Plachi na página 27]

Den vários manera un esposo por yuda su kasá partisipá mas plenamente den aktividatnan spiritual

[Plachi na página 27]

Pakiko algun pareha kristian ta opta pa no haña yu?