Buska e Guia di Dios den Tur Kos
Buska e Guia di Dios den Tur Kos
“E Dios aki ta nos Dios, pa semper i semper; e lo guia nos te na morto.”—SAL. 48:14.
1, 2. Dikon nos mester sigui e guia di Yehova en bes di konfia den nos propio sabiduria, i ki preguntanan ta surgi?
ORA nos sinta pensa riba kosnan perhudisial òf sin balor, fásilmente nos por gaña nos mes. (Pro. 12:11) Si di bèrdat nos ke hasi algu ku no ta apropiá pa un kristian, nos kurason hopi biaha lo purba konvensé nos di tur manera pa hasié tòg. (Jer. 17:5, 9) P’esei, e salmista a demostrá sabiduria ora ku el a pidi Yehova den orashon: “O manda bo lus i bo bèrdat, laga nan guia mi.” (Sal. 43:3) El a konfia den Yehova, no den su propio sabiduria limitá, i no tabatin un fuente mas mihó p’e akudí na dje pa guia. Meskos ku e salmista, lo ta bon pa nos buska e guia di Dios.
2 Pero dikon nos por tin e konfiansa ku e guia di Yehova ta mihó ku tur otro? Ki ora nos mester buska e guia ei? Kua ta e aktitutnan ku nos tin ku kultivá pa asina benefisiá di su guia, i kon Yehova ta guia nos awe? E artíkulo aki lo trata e preguntanan importante aki.
Pakiko Konfia den e Guia di Yehova?
3-5. Pa ki motibunan nos tin tur konfiansa den e guia di Yehova?
3 Yehova ta nos Tata selestial. (1 Kor. 8:6) E konosé kada un di nos kabalmente i por lesa asta nos kurason. (1 Sam. 16:7; Pro. 21:2) Rei David a bisa Dios: “Bo sa ki ora mi ta sinta i ki ora mi ta lanta; bo ta komprondé mi pensamentunan djaleu. Promé ku tin un palabra riba mi lenga, ya bo konosé esaki kaba, o SEÑOR.” (Sal. 139:2, 4) Ya ku Yehova konosé nos asina bon, ta kon nos por duda ku e sa kiko ta mihó pa nos? Ademas, Yehova tin tur sabiduria. E ta mira tur kos, ta wak mas profundo ku kualke hende i sa e resultado di kosnan for di nan prinsipio. (Isa. 46:9-11; Rom. 11:33) E ta “e úniko Dios sabí.”—Rom. 16:27.
4 Ademas, Yehova stima nos i semper ke loke ta mihó pa nos. (Juan 3:16; 1 Juan 4:8) Komo un Dios amoroso, e ta generoso ku nos. Disipel Santiago a skirbi: “Tur bon regalo i tur don perfekto ta for di ariba, i ta baha bin for di e Tata di lusnan.” (Sant. 1:17) Hende ku ta laga Dios guia nan ta benefisiá sin fin di su generosidat.
5 Por último, Yehova ta todopoderoso. Relashoná ku esaki, e salmista a bisa: “Esun ku ta biba bou di e protekshon di e Haltísimo lo permanesé den e sombra di e Todopoderoso. Lo mi bisa SEÑOR: ‘Mi refugio i mi fòrti, mi Dios, den kende mi ta konfia!’” (Sal. 91:1, 2) Ora nos ta sigui e guia di Yehova, de echo nos ta buska refugio serka e Dios ku no por faya. Asta si nos topa ku oposishon, Yehova ta sostené nos. Lo e no laga nos na kaya. (Sal. 71:4, 5; lesa Proverbionan 3:19-26.) Sí, Yehova sa kiko ta mihó pa nos; e ke loke ta mihó pa nos; i e tin e poder pa perkurá loke ta mihó pa nos. Lo ta hopi bobo di nos parti pa ignorá su guia! Pero ta ki ora nos tin mester di e guia ei?
Ki Ora Nos Tin Mester di Guia?
6, 7. Ki ora nos tin mester di e guia di Yehova?
6 Bon mirá, nos tin mester di e guia di Dios durante henter nos bida, for di hubentut te na behes. E salmista a bisa: “E Dios aki ta nos Dios, pa semper i semper; e lo guia nos te na morto.” (Sal. 48:14) Meskos ku e salmista, kristiannan sabí nunka ta stòp di akudí na Dios pa guia.
7 Klaru ku tin okashon ku nos ta sinti un nesesidat mas urgente pa yudansa. Tin biaha nos ta haña nos den “angustia,” kisas pa motibu di persekushon, un malesa grave òf pèrdèmentu inesperá di trabou. (Sal. 69:16, 17) Na okashonnan asina, ta un konsuelo pa akudí na Yehova ku e konfiansa ku lo e fortalesé nos pa perseverá i guia nos pa tuma bon desishon. (Lesa Salmo 102:17.) Sin embargo, nos tin mester di su yudansa na otro okashonnan tambe. Por ehèmpel, ora nos ta bai papia ku nos próhimo tokante e bon notisia di e Reino, nos tin mester di e guia di Yehova pa nos predikashon por ta efektivo. Anto ki ora ku nos tin ku tuma un desishon—sea ta tokante rekreo, paña i areglo personal, asosiashon, empleo, enseñansa eskolar òf kualke otro kos—nos lo aktua sabí solamente si nos sigui e guia i instrukshonnan di Yehova. De echo, den tur aspekto di nos bida nos tin mester di guia.
E Peligernan di No Buska Dios Su Guia
8. Kiko e echo ku Eva a kome di e fruta prohibí a impliká?
8 Pero kòrda ku nos mester ta dispuesto tambe pa sigui e guia di Yehova. Dios lo no obligá nos hasi esei si nos no ke. E promé hende ku a skohe pa no sigui e guia di Yehova tabata Eva, i loke a pasa kuné ta mustra kon serio un mal desishon asina por ta. Pensa tambe riba loke su akshon a impliká. Eva a kome di e fruta prohibí pasobra e kier tabata “manera Dios, konosiendo bon i malu.” (Gén. 3:5) Ku esei, el a pone su mes den Dios su lugá, tumando su propio desishonnan pa loke ta bon i malu en bes di sigui e guia i instrukshon di Yehova. Pues, el a bira lomba pa e soberania di Yehova. E kier tabata su propio doño. Su kasá, Adam, a sigui e mesun rumbo rebelde.—Rom. 5:12.
9. Si nos rechasá e guia di Yehova, kiko nos ta hasiendo realmente, i dikon esaki sigur no ta sabí pa hasi?
9 Awe ta meskos. Si nos no sigui e guia di Yehova, nos tampoko no ta rekonosé su soberania. Por ehèmpel, pensa riba un persona ku a kria e kustumber di wak pornografia. Si e ta asosiá ku e kongregashon kristian, e konosé e guia i instrukshon ku Yehova ta duna relashoná ku e asuntu aki: Kosnan impuru no mester wòrdu mentá mes, te pa sinta wak i gosa di nan yen di mal deseo. (Efe. 5:3) Un persona asina ku ta rechasá e guia i instrukshon di Yehova ta nenga e soberania di Yehova i ku e ta na kabes di henter su organisashon. (1 Kor. 11:3) Esei sigur no ta sabí pa hasi, pasobra manera Jeremias a bisa, “no ta keda na hende pa dirigí su pasonan.”—Jer. 10:23.
10. Dikon nos mester usa nos boluntat liber na un manera responsabel?
10 Kisas tin hende ta kuestioná e palabranan di Jeremias, ya ku nan ta haña ku unabes Yehova a duna nos boluntat liber, e no mester kritiká nos pasobra nos ta hasi uso di dje. Sin embargo, no lubidá ku boluntat liber ta un regalo pero tambe un responsabilidat. Nos tin ku rindi kuenta pa e kosnan ku nos ta bisa i hasi. (Rom. 14:10) Hesus a bisa: “For di abundansia di kurason boka ta papia.” El a bisa tambe: “For di kurason ta sali pensamentu malu, matamentu, adulterio, fornikashon, ladronisia, testimonio falsu, kalumnia.” (Mat. 12:34; 15:19) Pues, nos palabra- i akshonnan ta revelá kiko tin den nos kurason. Nan ta mustra ki tipo di hende realmente nos ta. Ta p’esei un kristian sabí ta buska e guia di Yehova den tur kos. Di e manera ei, Yehova ta hañ’é ‘rekto den kurason’ i lo “hasi bon” na dje.—Sal. 125:4.
11. Kiko nos ta siña for di e historia di Israel?
11 Kòrda riba e historia di Israel. Ora e nashon ei a tuma bon desishon, obedesiendo e mandamentunan di Yehova, el a protehá nan. (Jos. 24:15, 21, 31) Pero na vários okashon nan a hasi mal uso di nan boluntat liber. Den tempu di Jeremias, Yehova a bisa di e nashon ei: “Nan no a obedesé ni a inkliná nan orea, ma a kana segun nan mes konseho i den e kapricho di nan kurason malbado, i nan a bai atras i no dilanti.” (Jer. 7:24-26) Ki lástima! Laga nos nunka permití terkedat i korementu tras di plaser egoista pone nos rechasá e guia di Yehova i kana den nos propio konseho, i komo resultado nos lo “bai atras i no dilanti.”
Kiko Ta Nesesario pa Sigui e Konseho di Dios?
12, 13. (a) Ki kualidat ta pone ku nos ke sigui e guia di Yehova? (b) Dikon fe ta esensial?
12 Nos amor pa Yehova ta pone ku nos ke sigui su guia. (1 Juan 5:3) Sin embargo, Pablo a señalá un kos mas ku nos lo mester tin ora el a bisa: “Nos ta kana pa medio di fe, no pa medio di bista.” (2 Kor. 5:6, 7) Pakiko fe ta importante? Wèl, Yehova ta guia nos den “e kamindanan di hustisia,” pero e kamindanan ei no ta hiba na rikesa ni prestigio den e mundu aki. (Sal. 23:3) P’esei, nos wowo di fe mester ta fihá riba e rekompensanan spiritual inkomparabel ku nos ta haña dor di sirbi Yehova. (Lesa 2 Korintionan 4:17 i 18.) Ademas, fe ta yuda nos keda kontentu asta ora nos tin pa kubri nos nesesidatnan básiko so.—1 Tim. 6:8.
13 Hesus a indiká ku adorashon berdadero ta enserá sakrifisio propio, i esei tambe ta rekerí fe. (Luk. 9:23, 24) Algun adoradó fiel a hasi sakrifisionan grandi, wanta pobresa, opreshon, prehuisio i asta persekushon severo. (2 Kor. 11:23-27; Rev. 3:8-10) Ta un fe fuerte so por a yuda nan hasi esei ku goso. (Sant. 1:2, 3) Un fe fuerte ta duna nos e pleno konfiansa ku semper ta mihó pa sigui e guia di Yehova. Esei semper ta pa nos bienestar eterno. Nos no ta duda niun ora so ku e rekompensa pa esnan ku perseverá fielmente ta muchu mas grandi ku kualke sufrimentu temporal.—Heb. 11:6.
14. Dikon Hagar mester a desplegá humildat?
14 Konsiderá tambe e papel di humildat den sigui e guia di Yehova. E ehèmpel di Hagar, e kriá di Sara, ta demostrá esaki. Ora ku Sara a realisá ku e no por a haña yu, el a duna Hagar na Abraham, i Hagar a sali na estado di Abraham. E ora ei, Hagar a bira arogante pa ku su doño ku no por a haña yu. Komo resultado, Sara a kuminsá “trata duru kuné,” i Hagar a hui bai. Un angel di Yehova a topa Hagar i a bis’é: “Bai bèk serka bo shon, i someté bo mes na su outoridat.” (Gén. 16:2, 6, 8, 9) Pa Hagar por a aktua di akuerdo ku e instrukshon di e angel, lo e mester a kambia su aktitut arogante. Podisé lo el a preferá un otro konseho. Sin embargo, Hagar humildemente a hasi loke e angel a bis’é, i su yu hòmber, Ismael, a nase den e siguridat di e kampamentu di su tata.
15. Deskribí algun situashon den kua nos awe mester ta humilde pa nos por sigui e guia di Yehova.
15 Pa nos por sigui e guia di Yehova, kisas nos tambe mester humiá nos mes. Algun ruman kisas tin ku aseptá e punto di bista ku un sierto forma di rekreo ku nan ta gusta, no ta agradá Yehova. Un otro kristian kisas a ofendé un ruman i tin ku pidié despensa. Òf kisas el a kometé un eror i tin ku atmití esei. Kiko si un ruman a kometé un piká serio? E tin ku humiá su mes i konfesá e piká na e ansianonan. Un persona asta por ta ekspulsá. Pa e ser aseptá bèk den kongregashon, e tin ku repentí humildemente i bira for di su kaminda. Den e situashonnan aki i otronan similar, e palabranan di Proverbionan 29:23 ta un konsuelo: “Orguyo di un hende lo rebah’é, ma esun ku ta di spiritu humilde lo risibí onor.”
Kon Yehova Ta Guia Nos?
16, 17. Kon nos por saka máksimo probecho di Beibel komo e fuente di guia divino?
16 E fuente prinsipal di guia divino ta Beibel, Dios su Palabra inspirá. (Lesa 2 Timoteo 3:16 i 17.) Pa nos por saka máksimo probecho di e Palabra ei, lo ta sabí di nos parti pa no warda te ora un situashon difísil presentá pa e ora ei nos bai buska konseho den e Skritura. Na lugá di esei, nos lo hasi lesamentu di Beibel un kustumber di tur dia. (Sal. 1:1-3) Di e manera ei, nos ta familiarisá nos mes ku e palabranan inspirá ei. E pensamentunan di Dios ta bira nos pensamentunan, i nos lo ta kla pa enfrentá problemanan inesperá.
17 Ademas, ta importante pa nos meditá riba loke nos ta lesa den e Skritura i hasi orashon en konekshon ku esei. Ora nos ta meditá riba versíkulonan di Beibel, nos ta konsiderá kon nan lo por apliká den sierto situashonnan. (Sal. 77:12) Ora nos ta konfrontá problemanan serio, nos ta resa na Yehova i pidié yuda nos haña e guia ku nos tin mester. Anto e spiritu di Yehova lo yuda nos rekordá prinsipionan bíbliko útil ku nos a lesa den Beibel òf den publikashonnan basá riba Beibel.—Lesa Salmo 25:4 i 5.
18. Den ki maneranan Yehova ta usa e hermandat kristian pa guia nos?
18 Nos hermandat kristian ta un otro fuente balioso kaminda nos por haña e guia di Yehova. Un parti sumamente importante di e hermandat ei ta “e esklabo fiel i prudente” huntu ku e Kuerpo Gobernante ku ta represent’é. E “esklabo” ei ta produsí un suministro konstante di kuminda spiritual den forma di literatura imprimí i programanan pa reunion i asamblea. (Mat. 24:45-47; kompará Echonan 15:6, 22-31.) Ademas, den e hermandat kristian tin personanan maduro, spesialmente e ansianonan, ku ta kualifiká pa duna yudansa personal i konseho bíbliko. (Isa. 32:1) Hóbennan den un kas kristian tin un fuente adishonal balioso. Si nan mayornan ta kreyente, nan ta ordená pa Dios pa transmití su guia na nan, i e hóbennan semper ta haña e animashon pa buska e guia ei serka nan mayornan.—Efe. 6:1-3.
19. Ki bendishonnan nos ta haña pa motibu ku nos ta sigui buska e guia di Yehova?
19 Sí, den vários manera Yehova ta duna guia, i ta bon pa nos probechá plenamente di esei. Rei David tabata papia di un tempu ku Israel tabata fiel i el a bisa: “Den bo nos tatanan a konfia; nan a konfia i bo a libra nan. Na bo nan a sklama, i nan a wòrdu librá; den bo nan a konfia, i nan no a keda brongosá.” (Sal. 22:3-5) Si nos sigui e guia di Yehova ku tur konfiansa, nos tampoko lo ‘no keda brongosá.’ Nos lo no keda desapuntá den nos speransa. Si nos ‘laga nos kaminda den man di Yehova,’ en bes di konfia den nos propio sabiduria, e resultadonan lo ta bendishon riku for di awor. (Sal. 37:5,NW) Anto si nos perseverá fielmente den e kaminda ei, e bendishonnan lo ta eterno. Rei David a skirbi: “[Yehova] ta stima hustisia i no ta bandoná su santunan. Nan ta keda preservá pa semper . . . E hustunan lo heredá e tera, i lo biba den dje pa semper.”—Sal. 37:28, 29.
Bo Por Splika?
• Pakiko nos tin konfiansa den e guia di Yehova?
• Ora nos rechasá e guia di Yehova, kiko esei ta impliká?
• Den ki situashonnan asina un kristian tin mester di humildat?
• Kon Yehova ta guia nos awe?
[Preguntanan di Estudio]
[Plachinan na página 17]
Bo ta buska e guia di Yehova den tur aspekto di bo bida?
[Plachi na página 18]
Eva a bira lomba pa e soberania di Yehova
[Plachi na página 19]
Ki kualidat Hagar tabatin mester pa e sigui e instrukshon di e angel?