Na Ki Tempu e Reino di Dios Lo Bin?

“SEÑOR, ta na e tempu aki bo ta bai restorá e reino pa Israel?” (Echonan 1:6) E apòstelnan tabata ansioso pa sa na ki tempu Hesus lo a establesé su Reino. Awe, mas o ménos 2.000 aña despues, ainda hende ta ansioso pa sa: Na ki tempu e Reino di Dios lo bin?

Siendo ku Hesus a hasi e Reino e tema di su predikashon, podisé bo ta ferwagt ku el a trata e pregunta aki. I el a hasié! El a papia ampliamente tokante un periodo di tempu spesífiko ku el a yama su “presensia.” (Mateo 24:37, NW) E presensia ei ta estrechamente ligá ku establesimentu di e Reino Mesiániko. Kiko e presensia aki ta? Laga nos konsiderá kuater echo verídiko ku Beibel ta revelá tokante e presensia di Kristu.

1. E presensia di Kristu lo a kuminsá hopi tempu despues di su morto. Hesus a duna un ilustrashon den kua el a kompará su mes ku un hòmber ku “a bai un tera leu pa risibí un reino.” (Lukas 19:12) Kon e ilustrashon profétiko aki a haña su kumplimentu? Wèl, Hesus a muri i a ser resusitá; kaba el a bai e “tera leu,” esta, shelu. Manera Hesus a profetisá den un ilustrashon similar, su regreso ku poder di rei lo tabata te “despues di hopi tempu.”—Mateo 25:19.

Algun aña despues ku Hesus a subi na shelu, apòstel Pablo a skirbi: “[Hesus], siendo ku el a ofresé ún sakrifisio so pa piká pa semper, a sinta na man drechi di Dios, sperando for di e tempu ei padilanti, te ora su enemigunan wòrdu hasí un banki pa su pianan.” (Hebreonan 10:12, 13) P’esei anto, tabatin un periodo di espera largu despues ku Hesus a yega shelu. Finalmente, e periodo di espera aki a terminá ora Yehova Dios a hasi su Yu e Rei di e Reino Mesiániko ku a ser primintí  hopi tempu pasá. Ta na e tempu ei e presensia di Kristu a kuminsá. Hende riba tera lo a mira e suseso emoshonante ei?

2. E presensia ta invisibel pa wowo di hende. Kòrda ku Hesus a splika kiko ta e señal di su presensia. (Mateo 24:3, NW) Si wowo di hende por a mira su presensia, lo no tabatin mester di un señal, no ta bèrdat? Laga nos ilustrá esei: Imaginá ku bo ta biahando pa bai un laman. Kisas bo ta mira bòrchi- òf señalnan ku ta indiká bo e kaminda. Pero unabes ku bo yega na kosta i ta pará kantu di laman ku e awanan inmenso ku ta yega te na horizonte bo dilanti, bo ta ferwagt di mira un señal òf un bòrchi ku un flecha grandi riba dje i ku ta bisa “Laman”? Klaru ku nò! Pakiko bo tin mester di un señal pa indiká algu ku bo por mira bon kla ku bo wowonan?

Hesus a deskribí e señal di su presensia, no pa indiká algu ku hende por a mira ku nan wowo sino, pa yuda nan diserní algu ku lo a pasa den shelu. P’esei Hesus a bisa: “Asina boso tambe, ora boso mira e kosnan aki ta sosodé, sabi ku e reino di Dios ta serka.” (Lukas 21:31) Kon anto e señal lo a mustra hende riba tera ku e presensia di Kristu a kuminsá?

3. E presensia di Hesus ta karakterisá pa un tempu di problemanan intenso riba tera. Hesus a bisa ku su presensia komo Rei den shelu lo ta karakterisá riba tera pa guera, hamber, temblor, pèst i maldat. (Mateo 24:7-12; Lukas 21:10, 11) Kiko lo a kousa tur e miseria aki? Beibel ta splika ku Satanas, “e prens di e mundu aki,” ta mashá rabiá pasobra e sa ku su tempu ta hopi kòrtiku awor ku Kristu su presensia komo Rei a kuminsá. (Juan 12:31; Revelashon 12:9, 12) Den nos tempu tin amplio evidensia visibel di e rabia di Satanas i di e presensia di Kristu. Spesialmente desde 1914, un aña ku historiadónan ta konsiderá komo un aña krusial, e evidensia aki a bira bisto riba un eskala mundial i sin presedente.

Tur e susesonan ei por parse mal notisia, pero esei no ta asina. Nan ta nifiká ku e Reino Mesiániko ta reinado awor den shelu. I lo no dura mashá ku e gobièrnu aki lo ehersé su gobernashon riba henter e tera. Pero kon hende por haña sa di e Reino ei pa nan por asept’é i bira su súpdito?

4. E presensia di Hesus ta karakterisá pa un trabou di prediká mundialmente. Hesus a bisa ku su presensia lo ta meskos ku “e dianan di Noe.” * (Mateo 24:37-39) Noe no tabata un trahadó di arka so; ademas di  esei, e tabata “un predikadó di hustisia.” (2 Pedro 2:5) Noe a spièrta e hendenan ku e huisio di Dios tabata na kaminda. Hesus a bisa ku durante su presensia, su siguidónan lo ta hasiendo algu similar riba tera. El a profetisá: “E evangelio [“bon nobo,” NW] aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:14.

Manera nos a mira den e artíkulo anterior, e Reino di Dios lo destruí tur gobièrnu di e mundu aki. E trabou di prediká ta hasi hende konsiente ku e gobièrnu selestial aki lo bai aktua i ta duna tur hende e oportunidat pa skapa e binidero destrukshon i bira súpdito di e Reino ei. P’esei anto, e pregunta klave ta: Kon abo lo reakshoná?

E Reino di Dios Lo Nifiká Bon Nobo pa Bo?

E mensahe ku Hesus a prediká ta kontené un speransa inkomparabel. Despues di e rebeldia den Eden míles di aña pasá, Yehova Dios a fiha komo su propósito pa forma un gobièrnu ku lo a rektifiká asuntunan i restorá hende fiel na e kondishon ku Dios tabatin na mente desde prinsipio, esta, pa nan biba pa semper den un paradeis riba tera. Akaso por tin algu mas emoshonante ku e konosementu di ku e gobièrnu aki—primintí hopi tempu pasá—ta gobernando awor den shelu? E no ta un konsepto òf idea vago i apstrakto, pero un realidat bibu!

Aworakí, Dios su Rei nombrá ta gobernando meimei di su enemigunan. (Salmo 110:2) Den e mundu korupto aki alehá di Dios, e Mesias ta kumpliendo ku e deseo di su Tata pa buska tur hende ku ke siña konosé Dios manera e ta realmente i ador’é ku “spiritu i bèrdat.” (Juan 4:24) Hende di tur rasa, edat i rango sosial por tin e speransa di biba pa semper bou di e gobernashon di e Reino di Dios. (Echonan 10:34, 35) Nos ta urgi bo pa aseptá e oportunidat maravioso aki ku tin bo dilanti. Siña tokante e Reino di Dios awor pa asina bo por disfrutá di bida bou di su gobernashon hustu pa semper!—1 Juan 2:17.

[Nota]

[Plachi na página 7, 8]

E mal notisianan ku nos ta tende tur dia ta prueba ku tin bon kosnan na kaminda

[Rekonosementu]

Arma: U.S. Army photo