David a skirbi ku e “no a mira e hustu desampará, ni su desendientenan ta pidi pan.” (Sal. 37:25) Esaki tabata un deklarashon general ku el a hasi basá riba su propio eksperensia. E tabata sa bon ku Yehova semper a kuid’é. Ma e palabranan di David no ta nifiká ku Dios su sirbidónan nunka a pasa ni lo pasa miseria.

David mes a pasa algun biaha den momentonan masha difísil. Por ehèmpel, ora e tabata hui di Saul, e no tabatin kasi nada di kome. El a pidi pan pa su mes i pa e hòmbernan ku tabata huntu kuné. (1 Sam. 21:1-6) Pues, den e situashon krítiko ei, aunke David no tabatin nada di kome, e no tabata kana pidi pan riba kaya manera un limosnero. Al kontrario, e tabata sa ku Yehova lo a sòru p’e.

Na Mateo 6:33, Hesus ta sigurá nos ku Dios lo satisfasé e nesesidatnan di su sirbidónan fiel ku ta pone e interesnan di Reino na promé lugá den nan bida. Hesus a bisa: “Sigui buska anto promé e Reino i e hustisia di Dios, i lo e duna boso tur e kosnan akí [manera kuminda, kos di bebe i paña].” Pero tambe Hesus a indiká na un otro okashon ku su “rumannan” lo por pasa hamber debí na persekushon. (Mat. 25:35, 37, 40) Esei ta loke a pasa ku apòstel Pablo. Tabatin biaha ku el a pasa hamber i set.—2 Kor. 11:27.

Yehova ta bisa nos ku nos lo ser persiguí di vários manera. Podisé e ta permití nos pasa miseria miéntras ku nos ta yuda refutá e akusashonnan di Satanas. (Yòb 2:3-5) Pensa, por ehèmpel, riba nos rumannan ku tabata enkarselá den kamponan di konsentrashon nazi. Un di e métodonan diabóliko ku e persiguidónan tabata usa pa purba di kibra nan integridat tabata di keda sin duna nan sufisiente kuminda. Pero e Testigunan fiel a keda obedesidu na Yehova, i é no a bandoná nan. Ta bèrdat ku el a permití nan pasa den e prueba akí, meskos ku e ta permití tur kristian enfrentá tur sorto di prueba. Ma no tin duda ku Yehova ta sostené tur hende ku ta sufri pa kousa di su nòmber. (1 Kor. 10:13) Nos por tene na mente e palabranan di Filipensenan 1:29: “Boso a haña e privilegio di no solamente pone fe den Kristu, sino tambe di sufri p’e.”

Yehova a primintí ku lo e ta ku su sirbidónan. Por ehèmpel, na Isaías 54:17 e ta sigurá nos: “Ningun arma ku wòrdu formá kontra bo lo no prosperá.” E promesa akí i otronan similar ta garantisá e siguridat di e pueblo di Dios komo grupo. Pero, na nivel individual, un kristian lo por pasa den prueba, i asta muri.