1, 2. (a) Menshoná algun di e responsabilidatnan di un wardadó di karné den Israel di antigwedat. (b) Den ki sentido mayornan ta manera wardadó di karné?

WARDADÓNAN di karné den Israel di antigwedat tabatin un bida pisá. Nan tabatin ku traha pafó, den solo kayente òf den friu, i tambe protehá nan tou kontra ladron i bestia salbahe. Ademas, nan tabata saminá e karnénan regularmente, i si un karné tabata malu òf heridá, nan tabata dun’é e kuido nesesario. Nan tabata masha pendiente di e lamchinan ya ku nan tabata mas delikado ku karné adulto.—Gén. 33:13.

² Den algun aspekto, mayornan kristian ta manera wardadó di karné. Nan tin ku demostrá e mesun kualidatnan ku un bon wardadó di karné tin pa por kumpli ku nan responsabilidat di lanta nan yunan “den e disiplina di Yehova i inkulká su manera di pensa den nan.” (Efe. 6:4) Akaso esei ta un tarea fásil? Nò! Muchanan tin ku lucha kontra nan propio inklinashonnan imperfekto. Anto riba dje, nan ta ser bombardiá ku ideanan ku Satanas ta promové. (2 Tim. 2:22; 1 Huan 2:16) Si bo tin yu, kon bo por pastoriá nan? Laga nos analisá tres kos ku bo por  hasi pa yuda bo yunan: (1) konosé nan, (2) alimentá nan i (3) guia nan.

3. Kiko ‘konosé e kondishon’ di bo yunan ta enserá?

³ Un bon wardadó ta saminá kada karné bon pa hasi sigur ku e ta bon di salú. Den un sentido figurativo, bo por hasi meskos ku bo yunan. Beibel ta bisa: “Sea sigur ku bo konosé kondishon di bo tounan di karné.” (Pro. 27:23) Pa bo hasi esaki, bo mester sa kiko bo yunan ta hasi, ta pensa i ta sinti. Kon bo por logra esei? Bo tin ku papia hopi ku bo yunan.

4, 5. (a) Kiko lo por yuda yunan papia mas habrí ku nan mayornan tokante loke nan ta pensa i sinti? (Wak e promé plachi.) (b) Kiko abo a hasi pa asina bo yunan por papia mas fásil ku bo?

⁴ Algun mayor a ripará ku ora nan yunan bira tiner, ta bira mas difísil pa komuniká ku nan ya ku tinernan tin e tendensia di sera den nan mes i kisas no gusta papia tokante loke nan ta pensa òf sinti. Si esei ta pasa ku bo yunan, kiko bo por hasi? En bes di obligá bo yu hòmber òf bo yu muhé pa tene kòmbersashonnan largu i formal ku bo, purba di papia kuné na momentonan relahá, òf informal. (Deu. 6:6, 7) Podisé lo bo tin ku hasi èkstra esfuerso pa boso hasi kosnan huntu. Boso por bai kana òf dal un keiru den outo, hunga un wega òf traha huntu riba algu ku mester hasi na kurpa di kas. Na momentonan informal asina un adolesente por sinti su mes mas kómodo i lo ta mas dispuesto pa ekspresá su mes.

⁵ Pero kiko si ainda bo yu no ke papia? Wèl, purba algu otro. Por ehèmpel, en bes di djis puntra bo yu muhé: “Kon a bai awé?,” kont’é kon a bai ku abo i kiko abo a hasi riba e dia ei. Lo e por sinti su mes mas kómodo e ora ei pa papia tokante kon su dia a bai. Òf pa bo por sa kiko e ta pensa di un tema, no puntr’é muchu dirèkt: “Kiko abo ta pensa di e tema akí?” Mas bien, bo por puntr’é: “Kiko bo amiganan ta pensa di e tema akí?” Kaba bo por puntr’é ki konseho lo e duna su amiganan.

6. Kon bo por laga bo yunan sinti ku bo tin tempu pa nan i ku bo ta dispuesto pa skucha nan?

⁶ Klaru ku si bo ke pa bo yunan komuniká ku bo, nan tin ku sinti ku bo tin tempu pa nan i ku bo ta dispuesto pa skucha nan. Si tur ora bai bo ta parse okupá, nan lo no konta bo nan problemanan. Awor kon bo por mustra bo yu ku bo ta dispuesto pa skuch’é? No limitá bo na djis bisa: “Bo por papia ku mi ki ora ku bo ke.” Bo yunan tiner mester sinti ku bo ta tuma nan problemanan na serio i ku lo bo no reakshoná eksagerá ora nan konta bo algu. Hopi mayor ta pone bon ehèmpel den esaki. Kayla, un mucha muhé di 19 aña, a bisa: “Mi por papia tur kos ku mi tata. E no ta interumpí mi ora mi ta papia ni e no ta husga mi; e ta gewon skucha. Anto despues, semper e ta duna mi masha bon konseho.”

7. Kon mayornan por ta balansá ora di papia tokante temanan delikado, manera salimentu ku e sekso opuesto, ku nan yunan, i no fada nan?

⁷ Asta ora bo tin ku papia tokante temanan delikado—por ehèmpel tokante salimentu ku e sekso opuesto—tene kuidou pa bo no enfatisá e peligernan so i lubidá di siña nan e manera korekto di mira e asuntu. Un ehèmpel: Suponé ku bo ta bai kome na un restorant i bo ta ripará ku tras di tur kuminda riba e menú nan a pone un spièrtamentu tokante e posibilidat di shuata. Kiko lo bo hasi? Kasi sigur bo ta bai for di einan i buska un otro restorant. Algu similar por sosodé ku bo yunan si nan bini serka bo pa konseho, i úniko kos ku tin riba bo “menú” ta un lista di spièrtamentu! Esei por fada nan i nan lo stòp di pidi bo konseho. (Lesa Kolosensenan 3:21.) Na lugá di hasi esei, trata di ta balansá. Un ruman muhé hóben ku yama Emily a bisa:  “Ora mi mayornan ta papia ku mi tokante salimentu ku mucha hòmber, nan no ta pinta esaki komo algu malu; mas bien, nan ta enfatisá e goso di siña konosé un persona i di haña un bon hende pa kasa kuné. Esaki a yuda mi sinti mi kómodo pa papia ku nan tokante e tema ei. Eigenlijk, si mi ta namorá un mucha hòmber, lo mi ke papia ku nan libremente tokante esei, en bes di skond’é pa nan.”

8, 9. (a) Dikon ta bon pa skucha bo yu ku pasenshi sin interumpié? (b) Abo tabatin éksito den skucha bo yunan?

⁸ Di akuerdo ku loke Kayla a bisa, mustra bo yunan ku bo ta dispuesto pa skucha nan; tene pasenshi ku nan ora nan ta konta bo algu. (Lesa Santiago 1:19.) Katia, un mama soltero, a atmití: “Ántes mi no tabatin niun tiki pasenshi ku mi yu muhé. Mi no tabata dun’é chèns di kaba di papia. Sea mi tabata muchu kansá pa skuch’é òf simplemente mi no tabata ke p’e kansa mi kabes. Awor ku m’a kambia mi aktitut, mi yu muhé tambe a kambia su aktitut. Awor e ta muchu mas habrí ku mi.”

⁹ Algu similar a pasa Ronald ku su yu muhé di 16 aña. Ronald a konta: “Na promé instante, ora el a bisa mi ku e tabata gusta un mucha hòmber di skol, mi a bira furioso. Pero mi a kòrda kon rasonabel i ku kuantu pasenshi Yehova ta trata ku su sirbidónan, i m’a pensa ku ta mihó mi duna mi yu muhé un chèns di ekspresá su mes promé ku mi korigié. Mi ta kontentu ku mi a hasi esei! Pa promé biaha m’a komprondé kiko mi yu muhé ta sinti. Ora el a kaba di papia, m’a ripará ku tabata mas fásil pa mi papia kuné ku kariño. Pa mi sorpresa, e tabata masha habrí pa aseptá mi konseho, i el a bisa mi ku e ta bai hasi ègt su bèst pa drecha su komportashon.” Ora bo ta kòmbersá regularmente ku bo yunan, bo tin mas chèns di haña sa kiko realmente nan ta pensa i sinti. E ora ei lo bo por tin mas influensia riba e desishonnan ku nan ta tuma den bida. *

10, 11. Kon bo por yuda bo yunan pa nan no desviá for di e bèrdat?

¹⁰ Un bon wardadó sa ku kualke karné por dual bai for di e tou. Kisas e karné ta kuminsá kome yerba ku ta keda un poko mas leu for di e tou. Anto pokopoko e ta keda bai mas leu te ku e ta pèrdè. Asina  por pasa ku mucha tambe. Nan por kuminsá desviá pokopoko for di e bèrdat. Kisas mal kompania òf entretenimentu degradá ta atraé nan. (Pro. 13:20) Kiko bo por hasi pa evitá ku esei ta sosodé?

¹¹ Si bo ripará algun punto débil den bo yunan, no pèrdè tempu. Yuda nan mesora pa nan mehorá den e aspektonan ei. Fortalesé tambe e bon kualidatnan kristian ku nan tin. (2 Ped. 1:5-8) Boso Adorashon Komo Famia ta un bon okashon pa hasi esei. Ora Nos Ministerio di Reino di òktober 2008 a deskribí e areglo di Adorashon Komo Famia, e artíkulo a bisa: “Un animashon ta bai na kabesnan di famia pa tuma e responsabilidat ku nan tin dilanti di Yehova na serio pa perkurá pa e famia tin un programa di estudio di Beibel riba un base regular i ku nan lo por saka benefisio for di dje.” Abo ta probechá plenamente di e areglo bondadoso akí pa pastoriá bo yunan? Bo por tin sigur ku bo yunan ta apresiá e esfuerso ku bo ta hasi pa yuda nan den sentido spiritual.—Mat. 5:3; Flp. 1:10.

12. (a) Kon hóbennan ta benefisiá di Adorashon Komo Famia ku ta tuma lugá riba un base regular? (Wak tambe e kuadro “ Nan Ta Apresi’é.”) (b) Kon abo personalmente a benefisiá di boso Adorashon Komo Famia?

¹² Wak kiko un tiner ku yama Carissa a bisa tokante e manera ku e programa di Adorashon Komo Famia a benefisiá su famia. E di: “Mi ta gusta ku nos tur por sinta huntu i papia. Esaki ta yuda nos sera mas ku otro i e ta krea dushi rekuerdo. Mi tata ta sòru pa semper nos tene nos Adorashon Komo Famia. Ta un animashon pa mira ku e ta tum’é masha na serio, i esaki ta pone ku ami tambe ke tum’é na serio. Tambe esei ta duna mi mas motibu pa respet’é komo tata i komo mi kabes spiritual.” Un ruman muhé hóben ku yama Brittney a bisa: “E Adorashon Komo Famia a yuda mi sera mas ku mi mayornan. E ta laga mi mira ku nan ta interesá den mi problemanan i ku nan ta preokupá pa mi. E ta yuda nos pa nos ta un famia fuerte i uní.” Ta bisto anto ku un di e kosnan prinsipal ku por hasi bo un bon wardadó ta ora bo ta alimentá bo yunan den sentido spiritual. Sí, siña nan stima Yehova, foral mediante e Adorashon Komo Famia. *

13. Kon mayornan por motivá nan yunan pa sirbi Yehova?

¹³ Un bon wardadó ta usa su garoti pa dirigí i defendé su tou. Un di su metanan prinsipal ta pa guia e karnénan na “un bon lugá di yerba bèrdè.” (Eze. 34:13, 14) Komo mayor, bo tambe tin e mesun meta spiritual? Bo por guia bo yunan pa sirbi Yehova i yuda nan sinti manera e eskritor di salmo ku a bisa: “Pa hasi bo boluntat, o mi Dios, ta un delisia pa mi; bo Lei ta den mi kurason.” (Sal. 40:8) Yunan ku desaroyá e tipo di apresio ei lo ke dediká nan bida na Yehova i batisá. Klaru ku pa nan dal un paso importante asina, nan mester ta sufisiente madurá i nan mester tin e deseo sinsero di sirbi Yehova.

14, 15. (a) Kiko mester ta e meta di mayornan kristian? (b) Dikon algun tiner kisas ta ekspresá duda den e bèrdat?

¹⁴ Pero kiko bo por hasi si bo yunan no ta parse di hasi progreso den nan relashon ku Yehova, i kisas asta ta kuestioná loke Testigunan di Yehova ta kere? Wèl, pone komo meta pa inkulká amor pa Yehova den nan kurason i tambe apresio pa tur loke el a hasi pa nan. (Rev. 4:11) E ora ei, ora nan ta asina leu, nan por disidí pa nan mes si nan lo adorá Yehova.

¹⁵ Pero kiko si bo yunan kuminsá ekspresá duda tokante e bèrdat? Kon bo por pastoriá nan i yuda nan mira ku sirbi  Yehova realmente ta e mihó manera di biba i lo hasi nan felis pa semper? Wèl, purba di saka afó kiko ta e motibu ku nan tin duda. Por ehèmpel, di bèrdat bo yu hòmber no ta di akuerdo ku loke Beibel ta bisa, òf ta djis kurashi e falta pa defendé e bèrdat dilanti di otro mucha? Di bèrdat bo yu muhé ta duda ku e normanan di Dios ta sabí, òf e ta djis sinti su mes so i rechasá pa otro mucha?

16, 17. Kon mayornan por yuda nan yunan kultivá un amistat personal ku Yehova?

¹⁶ Pero kon bo por yuda bo yu superá su dudanan tokante e bèrdat? Un sugerensia ku a duna hopi mayor bon resultado ta di saka afó kiko nan yu ta pensa. Kon asina? Wèl, nan a hasié preguntanan manera: “Bo ta haña ku ta fásil òf difísil pa ta un kristian? Kiko bo ta kere ta e bentahanan? Kiko ta e desbentahanan? Bo no ta haña ku e sakrifisionan ta tiki na komparashon ku e tantísimo benefisionan ku nos ta haña awor i esnan ku nos lo haña den futuro?” Klaru ku bo mester hasi e preguntanan akí ku bo mes palabra i ku un tono sinsero i kariñoso. No hasié manera un interogashon òf komo si fuera bo ta akusá nan di algu. Durante e kòmbersashon, lo bo por analisá Marko 10:29 i 30. Kisas algun hóben por pone riba papel e pro- i kontranan di ser un kristian. Podisé ora nan mira esei riba papel, nan lo ripará kiko ta e berdadero kousa di nan dudanan i esei lo yuda nan haña un solushon pa nan. Di otro banda, bo a studia e bukinan Beibel Ta Siña i “Amor di Dios” ku bo yunan? Si nos ta hasi esei ku hende interesá, kuantu mas nos tin ku hasi esei ku nos yunan!

¹⁷ Tardi òf trempan, bo yunan lo tin ku disidí pa nan mes si nan lo sirbi Yehova òf nò. No kere ku nan lo sigui bo fe outomátikamente. Bo yunan mester kultivá un amistat personal ku Yehova; nan mester hasi e bèrdat di nan mes. (Pro. 3:1, 2) Kiko si ta parse ku bo yu tin problema pa hasi esei? Dikon bo no ta bai bèk kuné na e kosnan básiko? Yud’é analisá loke e ta kere ku preguntanan manera: ‘Kon ami sa ku Dios ta eksistí? Kiko ta konvensé mi ku Yehova Dios realmente ta interesá den mi? Dikon mi ta kere ku e normanan di Yehova realmente ta bon pa mi?’ Mustra ku bo ta un bon wardadó i guia bo yunan ku pasenshi. Yuda nan komprobá pa nan mes ku sirbi Yehova ta e mihó kos ku nan por hasi ku nan bida. *—Rom. 12:2.

18. Kon mayornan por imitá Yehova, e Gran Wardador?

¹⁸ Tur kristian berdadero ke imitá e Gran Wardador, Yehova. (Efe. 5:1; 1 Ped. 2:25) Foral mayornan mester konosé e kondishon di nan tou, esta, nan yunan presioso. Nan tin ku hasi tur loke nan por pa guia nan yunan na e bendishonnan eterno ku Yehova tin prepará pa nan. Pues, mayornan, pastoriá boso yunan i sigui kria nan den e kaminda di e bèrdat!