1, 2. (a) Ki konseho Yehova a inspirá Sálomon pa duna hóbennan? (b) Dikon kristiannan di 50 i piku aña, i mas grandi, tambe lo mester ta interesá den e konseho di Sálomon?

 YEHOVA a inspirá Rei Sálomon pa bisa hóbennan: “Kòrda . . . riba bo Kreador den e dianan di bo hubentut, promé ku e dianan malu bini.” Kiko e tabata ke men ku “e dianan malu”? Esaki ta referí na e dianan di behes. Sálomon a usa palabranan poétiko fasinante pa deskribí e difikultatnan di behes: man ku ta tembla, pia ku ta nenga, djente ku ta kai, wowo ku ta bira skur, orea ku no ta tende bon, kabei blanku i lomba doblá. Un hende no tin nodi di warda te ora e yega na e etapa ei di su bida p’e kuminsá sirbi Yehova.—Lesa Eklesiástes 12:1-5.

² Hopi kristian di 50 i piku aña, i mas grandi, ainda tin basta energia. Kisas nan tin un poko kabei blanku, pero probablemente nan salú no ta dje malu ei manera Sálomon a deskribí. Akaso e kristiannan mas grandi akí por benefisiá di e konseho inspirá ku Sálomon a duna hóbennan, esta, di ‘kòrda riba nan Kreador’? Kiko presis e konseho ei ta nifiká?

3. Kiko ta nifiká ‘kòrda riba bo Kreador’?

 ³ Podisé nos tin basta aña ta sirbi Yehova, pero de bes en kuando ta bon pa nos para ketu un ratu i pensa riba kon magnífiko nos Kreador ta. Bida ta masha impreshonante. E diseño di kreashon ta asina kompliká ku hende no por komprond’é. Yehova a traha un variedat asina grandi di kosnan maravioso ku tin masha hopi manera ku nos por disfrutá di bida. Ora nos meditá riba e kreashon di Yehova, nos ta haña mas apresio pa su amor, su sabiduria i su poder. (Sal. 143:5) Pero ‘kòrda riba nos Kreador’ ta nifiká tambe ku nos ta reflekshoná riba nos obligashonnan pa kuné. Ora nos meditá riba e kosnan ei, nos ta bira mas determiná pa demostrá nos gratitut na nos Kreador i hasi tur loke nos por den su sirbishi tanten ku nos ta na bida.—Ekl. 12:13.

4. Ki pregunta kristiannan ku tin hopi aña di eksperensia por hasi nan mes, i dikon?

⁴ Si bo tin hopi aña di eksperensia komo adulto, hasi bo mes e pregunta importante akí: ‘Kiko lo mi hasi ku mi bida awor, miéntras ku ainda mi tin forsa i energia?’ Komo un kristian ku eksperensia, bo tin oportunidatnan ku otro hende no tin. Por ehèmpel, bo por siña rumannan mas yòn loke bo a siña for di Yehova. Bo por kompartí ku otro hende e eksperensianan maravioso ku bo tabatin den bo sirbishi na Dios i asina fortalesé nan fe. Rei David a pidi Dios dun’é oportunidat pa hasi esei. El a skirbi: “O Dios, bo a siña mi for di mi hubentut . . . I asta ora mi bira bieu, ku kabei blanku, o Dios, no bandoná mi, te ora mi deklará bo poder na e generashon akí, bo poder na tur esnan ku ta bini.”—Sal. 71:17, 18.

5. Kon kristiannan di un poko mas edat por kompartí loke nan a siña ku esnan mas yòn?

⁵ Kon lo bo por kompartí e sabiduria ku bo a haña atraves di añanan? Kisas bo por invitá rumannan mas yòn na bo kas pa nan por tin un poko asosiashon edifikante. Òf bo por pidi nan traha huntu ku bo den sirbishi di vèlt i laga nan mira kon bo ta disfrutá di bo sirbishi na Yehova. Eliú di antigwedat a bisa: “Edat mester papia, i kantidat di aña mester deklará sabiduria.” (Yòb 32:7) Apòstel Pablo a urgi muhénan kristian pa animá otro hende mediante nan ehèmpel i palabra. El a skirbi: ‘Muhénan di mas edat mester ta maestra di loke ta bon.’—Tito 2:3.

6. Dikon nos tin mester di rumannan ku tin hopi aña di eksperensia?

⁶ Si bo ta un kristian ku eksperensia, tin hopi kos ku bo por hasi pa yuda otro rumannan. Pensa un ratu riba e kosnan ku bo ta komprondé awor ku bo no tabata sa un 30 òf 40 aña pasá. Bo sa kon pa apliká prinsipionan di Beibel den vários situashon den bida. Sin duda, bo tin e abilidat di yega na kurason di hende ku e bèrdat di Beibel. Si bo ta un ansiano, bo sa kon pa yuda rumannan ku a dal un paso robes. (Gal. 6:1) Kisas bo a siña kon pa supervisá aktividatnan di kongregashon, departamentonan di asamblea òf konstrukshon di Salòn di Reino. Òf bo sa kon pa animá dòkternan pa usa tratamentunan ku no ta rekerí uso di sanger. Asta si bo no tin hopi tempu den e bèrdat, bo tin eksperensia di bida, i esaki ta algu balioso. Por ehèmpel, bo a kria yu? Esei ta un kos ku sigur a yuda bo desaroyá abilidatnan masha útil. Kristiannan di mas edat por ta di gran balor pa e pueblo di Yehova pasobra nan por siña, guia i fortalesé e rumannan.—Lesa Yòb 12:12.

7. Ki entrenamentu útil kristiannan di mas edat por duna esnan mas yòn?

 ⁷ Den ki manera mas lo bo por usa bo abilidatnan pa yuda otro rumannan? Kisas bo por mustra esnan mas yòn kon pa kuminsá i dirigí un estudio di Beibel. Si bo ta un ruman muhé, lo bo por yuda mamanan yòn siña kon pa keda aktivo den e sirbishi di Yehova miéntras ku nan ta kuida nan yunan chikí. Si bo ta un ruman hòmber, lo bo por siña e mucha hòmbernan kon pa duna parti ku entusiasmo i kon nan por ta mas efektivo komo predikadó di e bon notisia. Lo bo por mustra nan kon bo ta animá rumannan di edat avansá ora bo bishitá nan. Te na ora mes ku bo no tin e forsa di ántes, bo tin bon oportunidat pa entrená e rumannan mas yòn. E Palabra di Dios ta bisa: “Gloria di hende yòn ta nan forsa, i onor di hende bieu ta nan kabei blanku.”—Pro. 20:29.

8. Kiko apòstel Pablo a hasi ora el a bira mas grandi?

⁸ Apòstel Pablo a keda hopi okupá den e sirbishi di Yehova asta ora el a bira mas grandi. Pa ora el a sali for di prizòn na Roma, rònt di aña 61 di promé siglo, el a sirbi komo misionero pa basta aña kaba i a pasa den hopi prueba. Lo e por a skohe pa hiba un bida mas trankil i sigui prediká na Roma. (2 Kor. 11:23-27) E rumannan na Roma sigur lo a keda hopi kontentu si el a keda serka nan i apoyá nan. Pero Pablo a mira ku den otro pais tabatin hopi mas nesesidat di predikadó. Pues, el a disidí di reanudá su aktividat komo misionero. Huntu ku Timoteo i Tito, el a bai Efeso, despues nan a sigui pa Kreta i probablemente pa Masedonia. (1 Tim. 1:3; Tito 1:5) Nos no sa si el a bishitá Spaña, pero e tabatin plan di bai einan sí.—Rom. 15:24, 28.

9. Ki tempu Pedro a muda pa bai sirbi kaminda tabatin mas nesesidat di predikadó? (Wak e promé plachi.)

⁹ Apòstel Pedro kisas tabatin riba 50 aña ora el a bai biba kaminda tabatin mas nesesidat di predikadó. Kon nos por sa? Wèl, si e tabatin kasi e mesun edat ku Hesus, òf si e tabata un poko mas bieu, esei a nifiká ku ora el a reuní ku e otro apòstelnan na Herúsalèm na aña 49, lo e tabatin rònt di 50 aña. (Echo. 15:7) Poko tempu despues di e reunion ei, Pedro a bai biba na Babilonia, muy probablemente pa prediká na e kantidat grandi di hudiu ku tabatin den e área ei. (Gal. 2:9) E tabata biba einan ora el a skirbi su promé karta inspirá, rònt di aña 62. (1 Ped. 5:13) No ta fásil pa bai biba na un otro pais, pero Pedro no a laga e echo ku su edat a subi strob’é di eksperensiá e goso di sirbi Yehova plenamente.

10, 11. Konta e eksperensia di un ruman di mas edat ku a bai sirbi kaminda tin mas nesesidat di predikadó.

¹⁰ Awe, hopi kristian di 50 i piku aña, i mas grandi, ta ripará ku nan sirkunstansianan di bida a kambia i ku nan por partisipá den maneranan nobo di sirbi Yehova. Algun a bai biba kaminda tin mas nesesidat di predikadó. Esei ta loke Robert ku su kasá a hasi. El a konta: “Ami ku mi kasá tabatin rònt di 55 aña ora ku nos a realisá kuantu oportunidat tabatin nos dilanti. Nos úniko yu no tabata na kas mas i nos mayornan a muri i laga un herensia chikitu pa nos. Mi a kalkulá ku si nos bende nos kas, nos lo por a kaba di paga e hipotek i keda ku sufisiente plaka pa biba di dje te ora mi kuminsá kobra mi penshon. Nos a tende ku hopi hende na Bolivia tabata aseptá estudio di Beibel i ku kosto di bida den e pais ei tabata abou. Pues, nos a disidí di bai biba einan. Pero no tabata fásil pa adaptá na nos ambiente nobo. Tur kos tabata kompletamente diferente for di loke nos a kustumbrá kuné na Norteamérika.  Pero nos a haña un bon rekompensa pa tur nos esfuerso.”

¹¹ Robert a agregá: “Awor henter nos bida ta drei rònt di aktividatnan di kongregashon. Algun di e hendenan ku nos a studia Beibel kuné a batisá. Nos a studia ku un famia pober ku ta biba den un pueblito un poko leu. Pero tur siman, e famia ei ta bini stat pa e reunionnan apesar ku e biahe ta difísil. Bo por imaginá kon kontentu nos ta ora nos ta mira e progreso di e famia ei? I e yu mayó asta a kuminsá traha pionero!”

12, 13. Despues ku Brian a baha ku penshon, kiko e ku su kasá a hasi?

¹² Kongregashonnan i gruponan di otro idioma por benefisiá masha hopi di e ehèmpel di rumannan di mas edat. Ademas, e tipo di teritorionan ei por ta masha dushi pa traha aden. Por ehèmpel, Brian di Inglatera a skirbi ku despues ku el a baha ku penshon ku 65 aña di edat, e ku su kasá a sinti ku nan bida a bira laf. El a konta: “Nos yunan no tabata na kas mas, i masha poko biaha nos tabata haña hende interesá ku nos por a studia Beibel kuné. Un dia m’a topa un yònkuman chines ku tabata hasi investigashon na e universidat lokal. El a aseptá un invitashon pa asistí na nos reunion, i mi a kuminsá studia Beibel kuné. Despues di algun siman, el a kuminsá bini ku un kolega chines. Dos siman despues, el a bini ku un di tres kolega i despues ku un di kuater.

¹³ Ora ku un di sinku kolega chines a pidi un estudio di Beibel, mi a pensa: ‘No ta pasobra mi tin 65 aña mi tin ku baha ku penshon for di e sirbishi di Yehova.’ Pues, mi a puntra mi kasá, ku ta dos aña mas yòn ku mi, si lo e kier a siña chines. Nos a usa un kurso di idioma riba kasèt pa siña chines. Esei tabata dies aña pasá. E predikashon den teritorio di otro idioma a laga nos sinti nos yòn atrobe. Te asina leu, nos a studia Beibel ku 112 chines! Mayoria di nan a yega di bini reunion. Un di nan ta sirbi awor komo pionero den kongregashon.”

14. Kiko kristiannan di mas edat no mester lubidá, i kon e ehèmpel di Pablo por ta un animashon pa nan?

¹⁴ Aunke hopi ruman di 50 i piku aña tin bon oportunidat pa partisipá den  maneranan nobo di sirbi Yehova, no ta tur por hasié. Algun di nan tin problema ku salú, i otronan tin ku kuida nan mayornan di edat òf yunan ku ta dependé di nan. No lubidá ku Yehova ta apresiá loke sea bo por hasi den su sirbishi. Pues, en bes di kunsumí pasobra tin kosnan ku bo no por hasi, disfrutá di loke bo por hasi. Pensa riba e ehèmpel di apòstel Pablo. Pa vários aña e tabata prezu den su kas i no por a sigui hasi su biahenan di misionero. Pero ki ora ku un hende a bishit’é, el a papia ku nan tokante e Skritura i a fortalesé nan fe.—Echo. 28:16, 30, 31.

15. Dikon rumannan di edat ta realmente balioso?

¹⁵ Yehova ta apresiá tambe loke rumannan di edat avansá por hasi den su sirbishi. Aunke Sálomon a indiká ku “e dianan malu” no ta e mihó etapa di bida, Yehova ta apresiá loke kristiannan di edat avansá ta logra hasi pa alab’é. (Luk. 21:2-4) E kongregashonnan tambe ta apresiá e bunita ehèmpel di fe i perseveransia ku e rumannan di edat akí ta demostrá.

16. (a) Menshoná algun privilegio ku Ana probablemente no por a disfrutá di dje. (b) Pero kiko sí Ana por a hasi pa adorá Dios?

¹⁶ Den Beibel nos ta lesa di un señora di edat avansá ku tabata yama Ana, kende a sigui alabá Yehova fielmente den su behes. E tabata biuda i tabatin 84 aña di edat tempu ku Hesus a nase. Probablemente e no a biba sufisiente largu pa bira un disipel di Hesus ni pa ser ungí ku spiritu santu ni pa bai prediká e bon notisia di e Reino. Ma Ana a disfrutá di e kosnan ku sí e por a hasi. Por ehèmpel, tur mainta i tur anochi e tabata bai na e patio di e tèmpel. I segun ku e saserdote tabata ofresé siensia na Yehova, Ana, huntu ku e multitut di hende presente einan, tabata hasi orashon silensiosamente durante mas o ménos mei ora. Beibel ta bisa ku “nunka e no tabata falta tèmpel i tabata rindi sirbishi sagrado di dia i anochi.” (Luk. 2:36, 37) Un di e biahanan ku e tabata na tèmpel, el a mira Hesus komo bebi i a kuminsá “papia tokante e mucha ku tur esnan ku tabata spera e liberashon di Herúsalèm.”—Luk. 2:38.

17. Kon nos lo por yuda rumannan di edat avansá, òf esnan ku ta malu, partisipá den adorashon berdadero?

¹⁷ Awe, nos mester ta atento pa yuda rumannan di edat avansá òf esnan ku ta malu. Tin hopi ruman hende grandi ku lo tin masha gana di ta huntu ku nos na reunion òf na asamblea, pero ku no por asistí. Kon e kongregashon por yuda? Den algun lugá, nan a hasi posibel pa e rumannan ei skucha e reunionnan via di telefòn. Na otro lugá, kisas esaki no ta posibel. Asta si kristiannan di edat no por bai reunion, tòg nan por yuda apoyá adorashon berdadero. Por ehèmpel, nan por pidi den orashon pa kosnan por bai bon ku e kongregashon.—Lesa Salmo 92:13, 14.

18, 19. (a) Kon kristiannan di edat avansá por animá otro rumannan? (b) Ken por tuma na pechu e konseho pa “kòrda . . . riba bo Kreador”?

¹⁸ Kisas rumannan di edat avansá no ta realisá kuantu nan ta animá e otro rumannan. Tuma e ehèmpel di Ana. Pa años, e tabata bai e tèmpel fielmente. Probablemente e no a realisá ku su ehèmpel i su amor pa Yehova lo a ser inkluí den Beibel i ku siglonan despues ainda e ta animá otro hende. Asina tambe, bo rumannan nunka lo lubidá bo amor pa Yehova. Pues, no ta un sorpresa ku e Palabra di Dios ta bisa: “Kabei blanku ta un korona di gloria; den e kaminda di hustisia e ta wòrdu hañá”!—Pro. 16:31.

¹⁹ Tin un límite na loke nos tur por hasi den e sirbishi di Yehova. Pero esnan entre nos ku ainda tin un poko forsa i energia, laga nan tuma na pechu e palabranan inspirá akí: “Kòrda . . . riba bo Kreador . . . promé ku e dianan malu bini.”—Ekl. 12:1.