DURANTE un kampaña relámpago di predikashon di nuebe dia ku a kuminsá na ougùstùs i terminá na sèptèmber di aña 1929, mas ku 10.000 publikadó a prediká rònt Merka. Nan a laga un kantidat di 250.000 buki i tratado. Entre e predikadónan di Reino ei tabatin alrededor di mil pionero (e tempu ei, kolportùr). E kantidat akí a oumentá rápidamente! Sí, di aña 1927 pa 1929, e kantidat di pionero a bira tripel, loke tabata algu “kasi inkreibel” segun Boletin. *

Na final di aña 1929, a surgi un krísis finansiero. E dia di mas malu tabata djamars 29 di òktober 1929 (Black Tuesday). Debí ku e preisnan riba Bolsa di Balor di New York tabata baha asina lihé, henter e sistema ekonómiko di mundu a kai den loke nan a yama e Gran Depreshon. Míles di banko a bati bankarota. Boerderijnan a stòp di funshoná. Fábrikanan grandi a sera nan portanan. Miónes di hende a pèrdè trabou. Na 1933, e kantidat di kas ku nan a pone beslag riba dje na Merka a yega te na 1.000 kas pa dia.

Kon e predikadónan di tempu kompleto por a sobrebibí durante e krísis ei? Un manera tabata di traha nan kas riba wil. Un persona ku kas riba wil, òf trailer, no mester a paga hür ni belasting. Esaki a permití hopi pionero sigui den nan sirbishi ku ménos gastu posibel. * Durante e temporada di kongreso, nan kas móbil tabata fungi komo kamber di hotèl grátis. Na 1934, Boletin a inkluí plannan detayá ku ta mustra kon pa traha lugánan di biba chikitu i kómodo. Nan tabata isolá kontra friu i ekipá ku kosnan práktiko manera kama ku por a dobla sera i stof i un sistema di suministro di awa.

Rònt mundu, pioneronan ingenioso a kuminsá traha nan kas riba wil. Victor Blackwell ta kòrda: “Meskos ku Noe no tabatin eksperensia den traha boto, ami no tabatin ni saber ni eksperensia den trahamentu di trailer pa biba aden.” Pero el a logra traha ún.

Avery i Lovenia Bristow tambe tabatin un kas riba wil. Avery a bisa: “Mi tabata manera un morkoi den su kaska—unda ku mi a bai, mi kas tabata huntu ku mi.” Nan tabata traha pionero huntu ku Harvey i Anne Conrow, kendenan tabatin un kas móbil di kua e murayanan tabata kubrí ku asfaltpapier (un tipo di material di breu). Kada bes ku nan a muda di un lugá pa otro, pida di esaki tabata kita kai for di nan kas. Avery ta kòrda: “Nunka promé ni despues, hende a yega di mira un trailer asina.” Pero segun Avery, e pareha Conrow i nan dos yu hòmbernan tabata “e famia di mas felis ku hende a yega di konosé.” Harvey Conrow mes a skirbi: “Nunka nos no tabatin falta di nada i nos a sinti nos kompletamente safe den Yehova su sirbishi i bou di su kuido amoroso.” Algun tempu despues, tur e kuater miembronan di e famia Conrow a asistí na e Skol di Galaad i a haña asignashon pa bai sirbi komo misionero na Perú.

Henter e famia Battainos tambe tabata traha pionero. Ora ku Giusto i Vincenza Battainos a haña sa ku nan tabata bai haña yu, nan a transformá nan trùk, un Ford Modèl A di 1929, den un kas; pa nan, e kas akí tabata manera un “bunita hotèl” kompará ku e tèntnan  ku nan tabata biba aden promé. Huntu ku nan yu muhé chikitu, nan a sigui den nan asignashon ku nan tabata stima mashá: Nan tabata prediká na e italianonan ku tabata biba na Merka.

Hopi hende a skucha e bon notisia. Pero no ta tur ora e hendenan pober òf sin trabou por a duna sèn pa literatura basá riba Beibel ku nan tabata risibí. Na lugá di esei, nan tabata duna tur sorto di kos. Dos pionero a menshoná 64 diferente kos ku nan a haña serka hende ku a mustra interes. E lista di kos ku nan a menshoná tabata “manera un lista di inventario di un tienda.”

Fred Anderson a yega di prediká na un kunukero kende tabata interesá den algun di nos bukinan. El a duna Fred un brel ku tabata di su mama a kambio di esakinan. Na e siguiente boerderij, Fred a topa un otro hòmber ku a mustra interes den nos literatura pero ku a bisa ku e no por lesa nan pasobra e no tin brel. Anto Fred a dun’é e brel ku el a kaba di haña serka e hòmber su bisiña i algun buki. E hòmber gustosamente a kontribuí tantu pa e bukinan komo pa e brel ku tabata di gran yudansa p’e.

Herbert Abbott tabata kore ku un kouchi di galiña bashí den su outo. Dikon? Pasobra despues ku e haña un tres pa kuater galiña komo kontribushon pa literatura ku e laga, e tabata bende esakinan na marshe i usa e plaka pa yena su tanki di outo. El a skirbi: ‘Tabatin dia ku di bèrdat nos no tabatin kasi niun depchi, pero nos no a laga esaki stroba nos. Tanten ku nos tabatin gasolin den nos outo, nos tabata sigui prediká, konfiando den Yehova.’

Sí, konfiansa den Yehova i determinashon fuerte a yuda nos rumannan perseverá durante e añanan difísil ei. Durante un yobida fuerte, Maxwell i Emmy Lewis a logra sali for di nan trailer nèt promé ku un palu grandi a kai riba esaki i partié na dos. Maxwell a bisa: ‘Nunka nos no a laga insidentenan asin’akí stroba nos ni nunka e idea di entregá no a bini na nos mente. Tabatin hopi trabou nos dilanti i nos tabata determiná pa kumpli ku nan.’ Ku kurashi i ku yudansa di nan bon amigunan, Maxwell i Emmy a rekonstruí nan kas riba wil.

Awe tambe, durante e tempu difísil akí ku nos ta biba aden, miónes di Testigu di Yehova zelosamente ta desplegá e mesun spiritu di sakrifisio propio. Dikon? Pasobra meskos ku e pioneronan ei di pasado, nos ta determiná pa sigui prediká te ora Yehova bisa ku e trabou ta kla.