Ora un ser kerí di nos muri, ta normal ku nos ta yora pasobra nos lo sinti su falta. Pero den kaso di Hesus, aunke e tabatin kariño pa Lázaro, e no a yora pasobra Lázaro a muri. Mas bien, awa a basha for di su wowo pasobra el a sinti duele di esnan ku a pèrdè nan ser kerí, manera e konteksto di e relato di Huan ta mustra.—Huan 11:36.

Ora Hesus a tende ku Lázaro tabata malu, e no a bai mesora serka dje pa kur’é. E relato ta bisa: “Ora [Hesus] a tende ku Lázaro tabata malu, tòg el a keda dos dia mas kaminda e tabata.” (Huan 11:6) Dikon Hesus no a bai mesora? E tabatin un motibu. El a bisa: “E malesa akí no ta hiba finalmente na morto, ma na e gloria di Dios, pa e Yu di Dios por ser glorifiká pa medio di dje.” (Huan 11:4) Pues, Hesus su meta tabata pa usa e morto di Lázaro pa “e gloria di Dios.” Kon asina? Hesus tabata a punto di bai hasi un milager espektakular: E tabata bai lanta su amigu stimá for di morto.

Ora Hesus tabata papia ku su disipelnan na e okashon ei, el a kompará morto ku soño. Ta p’esei mes el a bisa nan ku e tabata ‘bai einan pa lanta Lázaro.’ (Huan 11:11) Pa Hesus, lanta Lázaro for di morto tabata manera ora un mayor ta lanta su yu for di soño. P’esei, Hesus no tabatin motibu pa sintié tristu pasobra Lázaro a muri.

Dikon Hesus a yora anto? Atrobe, e konteksto ta duna nos e kontesta. Ora ku Hesus a topa Maria, ruman muhé di Lázaro, i a mira kon e i e otro hendenan tabata yora, “el a suspirá profundamente i a keda mashá konmoví.” Sí, ora Hesus a mira kon tristu nan tabata, el a sinti asina tantu duele di nan ku el a kuminsá “suspirá profundamente.” Ta p’esei ‘awa tabata basha for di su wowo.’ Hesus a bira masha tristu mes ora el a mira kon su amigunan stimá tabata sufri.—Huan 11:33, 35.

E relato akí ta mustra nos ku Hesus tin e poder pa duna bida i salú na nos sernan kerí atrobe den e binidero mundu nobo. Ademas, e ta laga nos mira ku Hesus tin kompashon ku esnan ku pèrdè nan sernan kerí pa motibu di e morto heredá for di Adam. Un otro lès ku nos por siña for di e relato akí ta ku nos mester tene kompashon ku esnan ku ta tristu pa motibu di morto di nan sernan kerí.

Hesus tabata sa ku e ta bai resusitá Lázaro. Pero su amor i kompashon profundo pa su amigunan a pone ku awa a basha for di su wowo. Di mes manera, nos kompashon por motivá nos pa “yora ku esnan ku ta yora.” (Rom. 12:15) E echo ku un persona ta yora pasobra e ta tristu pa motibu di morto di un ser kerí, no ta nifiká ku e no tin fe den e speransa di resurekshon. P’esei, ora Hesus a yora aunke e tabata sa ku lo el a bai resusitá Lázaro, el a pone un bon ehèmpel: El a mustra kon nos por mustra kompashon pa hende ku ta tristu pa motibu di morto di nan ser kerí.