TABATA ougùstùs 1936. Robert ku George Nisbet tabata na e kas real di Rei Sobhuza II di Swazilandia. Nan a kaba di presentá vários grabashon musikal i diskurso di Ruman Rutherford for di un outo ku tabatin tokadisko i loutspiker. Rei a keda masha kontentu! George a konta: “Nos a haña nos den pèrtá ora rei kier a kumpra e tokadisko, e diskonan i e loutspiker di e mensahe di Reino!”

Robert a pidié diskulpá nan, pero e artíkulonan ei no tabata na benta. Dikon nò? Pasobra nan tabata pertenesé na un otro persona. Rei kier a sa ta ken.

Robert a kontest’é: “Tur e kosnan akí ta di un otro Rei.” Ora Sobhuza a puntr’é ta ken e Rei ei tabata, Robert a bis’é: “Ta Hesukristu, e Rei di e Reino di Dios.”

“Ahan, esei ta un gran Rei!” Sobhuza a rekonosé ku masha rèspèt. “Mi no ke kue nada ku ta pertenesé na dje.”

Robert a skirbi: ‘Mi a keda masha impreshoná ku e personalidat di e Hefe Mayó, Rei Sobhuza. E tabata papia ingles perfektamente, sin arogansia òf orguyo, i e tabata masha franko i aserkabel. M’a sinta serka dje den su ofisina pa un 45 minüt, miéntras ku George a pone muzik toka pafó.’

Robert a sigui konta: ‘Mas despues riba e dia ei, nos a bishitá e Skol Nashonal Swazi, kaminda nos tabatin e eksperensia di mas interesante di tur. Nos a duna testimonio na e kabes di skol, i el a skucha nos atentamente. Nos a bis’é ku nos tin un tokadisko i a ofresé pa toka e diskonan pa henter e skol skucha, i el a reakshoná masha entusiasmá i a manda yama kasi 100 alumno. El a laga nan sinta abou riba yerba pa skucha. Nos a komprondé ku na e skol ei mucha hòmber tabata siña agrikultura, hardineria, karpinteria, konstrukshon, ingles i rekenen, miéntras ku mucha muhé tabata siña vaknan di kuido di hende i di kas, i otro fishinan útil.’ E wela di e Hefe Mayó a funda e skol ei. *

For di aña 1933 kaba, Rei Sobhuza tabata skucha ku plaser e pioneronan ku tabata bishitá su kas real. Na un okashon el a asta manda yama henter su kuerpo di wardaespalda di  100 guerero pa nan skucha un grabashon di e mensahe di Reino. Ademas, el a aboná riba nos revistanan i a aseptá vários publikashon. No a dura muchu ku e tabatin un biblioteka teokrátiko kasi kompleto! Es mas, el a keda ku tur e publikashonnan den e biblioteka apesar di e prohibishon ku gobièrnu kolonial britániko a imponé riba nos literatura durante Segundo Guera Mundial.

Rei Sobhuza II a sigui invitá e Testigunan na su kas real na Lobamba, i e tabata asta manda yama algun religioso pa bin skucha e diskursonan bíbliko. Un biaha, segun ku un Testigu lokal ku yama Helvie Mashazi tabata splika Mateo kapítulo 23, un grupo di religioso a bula lanta rabiá i a trata di obligá e ruman pa kai sinta. Pero rei a intervení i a pidi Ruman Mashazi pa sigui papia. De echo, rei a manda e presentenan hasi nota di tur e versíkulonan di Beibel menshoná den e diskurso!

Na un otro okashon, despues ku kuater pastor a skucha un diskurso ku un ruman hòmber pionero a duna, nan a deklará: “Nos no ta pastor mas; djawó padilanti nos ta Testigu di Yehova.” Anto nan a puntra e pionero si e tabatin mas di e bukinan manera esnan ku e Hefe Mayó tabatin.

For di añanan di 1930 te na su morto na 1982, e Hefe Mayó a demostrá rèspèt pa Testigunan di Yehova i no a permití hende persiguí nan pa motibu ku nan no tabata sigui e ritonan religioso di Swazilandia. Pues, e Testigunan tabatin hopi motibu pa ta gradisidu na dje, i p’esei nan a lamentá su morto sinseramente.

Na kuminsamentu di aña 2013, tabatin mas ku 3.000 predikadó di Reino na Swazilandia. E pais akí tin algu mas ku un mion habitante, i su proporshon ta 1 publikadó pa kada 384 habitante. E 90 kongregashonnan tin mas ku 260 pionero, i 7.496 persona a asistí na Memorial na 2012. Ta klaru ku tin un tremendo potensial pa mas oumento. Sin duda, e promé bishitanan den añanan di 1930 a pone un bon fundeshi pa esei na Swazilandia.​—For di nos archivo na Suráfrika.