Kon Nos Sistema Solar Úniko A Bin na Eksistensia

TA UN kombinashon di hopi faktor ta hasi nos posishon den universo úniko. Nos sistema solar ta situá entre e dos brasanan den forma di spiral di e Via Láktea, den un region ku tin relativamente tiki strea. Kasi tur e streanan ku nos por mira anochi ta asina leu for di nos ku asta ora wak nan ku e teleskopnan di mas grandi ku tin, nan ta keda simplemente puntanan di lus. Ta akinan nos sistema solar lo mester ta?

Si nos sistema solar tabata serka di e sentro di e Via Láktea, nos lo a sufri di e efektonan dañino di ta meimei di un konsentrashon grandi di strea. Por ehèmpel, esei probablemente lo a perturbá e órbita di tera i konsekuentemente lo a afektá bida humano drástikamente. Manera e situashon ta awor, e sistema solar ta parse di tin presis e posishon korekto den e galaksia pa evitá e peliger aki i otronan, manera por ehèmpel e peliger di bira muchu kayente ora e pasa dor di nubianan di gas i e peliger di ser eksponé na streanan ku ta eksplotá i otro fuentenan di radiashon mortal.

Solo ta un tipo di strea ideal pa loke nos tin mester. E ta kima na un ritmo konstante, tin bida largu i no ta muchu grandi ni muchu kayente. Mayoria di strea den nos galaksia ta hopi mas chikí ku nos solo i nan no ta duna e tipo korekto di lus ni e kantidat korekto di kayente pa sostené bida riba un planeta paresido na tera. Ademas, mayoria di strea ta bou di influensia di e forsa di gravedat di un òf mas strea i nan ta drei rònt di otro. Na kontraste, nos solo ta independiente. Ta masha improbabel ku nos sistema solar lo a keda stabil si nos tabatin ku lucha ku e forsa di gravedat di dos òf mas solo.

Un otro faktor ku ta hasi nos sistema solar úniko ta e posishon di e planetanan gigante ku ta keda mas leu for di solo. Nan órbita ta un rònchi kasi perfekto i no ta ehersé un forsa di gravedat ku ta perturbá e movementu di e planetanan terestre ku ta mas serka di solo. * Mas bien, e planetanan mas leu di solo ta kumpli ku e funshon protektivo di apsorbá i desviá ophetonan peligroso. E sientífikonan Peter D. Ward i Donald Brownlee ta splika den nan buki Rare Earth—Why Complex Life Is Uncommon in the Universe (Tera Úniko—Dikon No Tin Forma di Bida Kompleho den Universo) ku e “presensia di e planetanan gigante di gas mas ayá di nos, manera Júpiter, ta stroba ku un kantidat muchu grandi di ophetonan manera asteroide i kometa ta dal den nos.” Sientífikonan a deskubrí otro sistemanan solar ku planetanan gigante. Pero mayoria di e gigantenan aki tin órbitanan ku lo a forma un peliger pa un planeta chikitu paresido na tera.

E Papel di Luna

Desde antigwedat, hende a atmirá nos luna. El a inspirá poëta- i músikonan. Por ehèmpel, un poëta hebreo di antigwedat a deskribí ku luna ‘ta establesí pa semper,’ i ta manera un ‘testigu fiel na shelu.’—Salmo 89:37.

Un manera importante ku luna ta influensiá bida riba tera ta pa medio di su forsa di gravedat ku ta kousa marea haltu i marea abou. Sientífikonan ta kere ku e fluktuashon di marea  di laman ta fundamental pa strom òf koriente di oséano, lokual na su turno ta sumamente importante pa nos klima.

Un otro propósito klave ku nos luna tin, ta ku su forsa di gravedat ta stabilisá e manera ku nos mundu ta drei rònt di su as segun ku e ta dal su buèlta rònt di solo. Segun e revista Nature, sin luna, e posishon skùin di e tera segun ku e ta drei rònt di su as lo a kambia konsiderablemente atraves di periodonan largu di tempu. Imaginá bo si e mundu no tabata drei rònt di su as den un posishon skùin òf ku sierto inklinashon. Nos lo no tabatin e kambionan plasentero di temporada i nos lo a sufri di skarsedat di áwaseru. E posishon skùin di tera ta evitá tambe ku temperaturanan ta bira muchu ekstremo pa nos sobrebibí. Astrónomo Jacques Laskar a konkluí: “Nos debe e stabilidat di nos klima aktual na presensia di un opheto eksepshonal: Luna.” Pa kumpli ku su papel stabilisador, nos luna ta grandi; relativamente mas grandi ku e lunanan di e planetanan gigante.

Ademas, un otro funshon di nos luna ta ku e ta sirbi komo lus pa anochi, manera e eskritor di e buki bíbliko di Génesis a menshoná.—Génesis 1:16.

Pa Kasualidat òf ku un Propósito?

Kon un hende mester splika e presensia simultáneo di vários faktor ku no solamente ta hasi bida riba tera posibel sino tambe agradabel? Parse ku tin solamente dos opshon. Di promé, ku tur e faktornan aki ta e resultado di puru kasualidat. Di dos opshon ta ku tin un propósito inteligente ku ta responsabel pa esaki.

Algun mil aña pasá, e Santu Skritura a deklará ku nos universo a ser diseñá i trahá pa un Kreadó, Dios Todopoderoso. Si esei ta bèrdat, kier men ku e kondishonnan ku ta eksistí den nos sistema solar no ta produkto di kasualidat sino di diseño ku un propósito. E Kreadó a duna nos un informe por eskrito, na moda di papia, di e pasonan ku el a dal pa hasi bida riba tera posibel. Podisé ta un sorpresa pa bo pa sa ku apesar ku e informe aki ta un 3.500 aña bieu, e susesonan ku e ta deskribí relashoná ku e historia di universo ta korespondé básikamente ku loke sientífikonan ta kere lo mester a tuma lugá. Bo ta haña e informe aki den e buki bíbliko di Génesis. Ban wak kiko e ta bisa.

Génesis Su Relato di Kreashon

“Na prinsipio Dios a krea e shelunan i tera.” (Génesis 1:1) E palabranan di introdukshon di Beibel ta referí na kreashon di nos sistema solar, inkluso nos planeta, i tambe na kreashon di e streanan den míles di miónes di galaksia ku ta forma nos universo. Segun Beibel, un tempu e superfisie di tera tabata “sin forma i bashí.” No tabatin kontinente ni tereno produktivo. Pero e siguiente palabranan ta enfatisá loke sientífikonan ta bisa ta e rekisito mas  importante pa un planeta ku ta sostené bida, esta, un abundansia di awa. E spiritu di Dios tabata “move riba superfisie di e awanan.”—Génesis 1:2.

Pa awa na superfisie keda líkido, un planeta mester ta na e distansia korekto for di su solo. E sientífiko planetario, Andrew Ingersoll, ta splika: “Mars ta muchu friu, Vénus ta muchu kayente, Tera ta nèt na e distansia ideal.” Di igual manera, pa vegetashon por krese, mester tin sufisiente lus. Anto ta remarkabel ku e relato bíbliko ta informá ku durante un periodo di kreashon mas promé, Dios a pone e lus di solo penetrá e nubianan skur di awa ku tabata tapa e oséano manera un “paña” rònt di un beibi.—Jòb 38:4, 9; Génesis 1:3-5.

Den e siguiente versíkulonan di Génesis, nos ta lesa ku e Kreadó a produsí loke Beibel ta yama “un firmamento.” (Génesis 1:6-8) E firmamento aki ta kontené gasnan ku ta forma e atmósfera di e tera.

Anto Beibel ta sigui splika ku Dios a kambia e superfisie sin forma di tera pa haña tereno seku. (Génesis 1:9, 10) Evidentemente, Yehova a pone e kapa di tera reis i move. Komo resultado, esei kisas a forma vayenan hundu i kontinentenan a subi for di oséano.—Salmo 104:6-8, NW.

Na un tempu no-spesifiká den pasado di tera, Dios a krea lima mikroskópiko den e oséanonan. Usando energia di solo, e organismonan aki di un solo sèl ku ta reprodusí nan mes, a kuminsá transformá kooldioxide den kuminda miéntras ku a la bes nan tabata manda oksígeno den atmósfera. E proseso maravioso aki a aselerá durante un di tres periodo di kreashon pa medio di e kreashon di vegetashon ku despues di tempu a kubri tera seku. Pues e kantidat di oksígeno den atmósfera a oumentá, lokual a hasi posibel pa hende i bestia sostené nan bida pa medio di halamentu di rosea.—Génesis 1:11, 12.

Pa hasi e tera produktivo, e Kreadó a laga un variedat di mikro-organismo biba den suela. (Jeremias 51:15) E kriaturanan chikiritiku aki ta yuda ku deskomposishon di materia morto i asina ta resiklá elementonan ku mata ta usa pa krese. Tiponan spesial di bakteria di suela ta optené nitrógeno for di aire i ta hasi e elemento masha importante aki disponibel pa mata di manera ku nan por krese. Un kos asombroso ta ku un man so di tera fértil por kontené seis mil mion mikro-organismo!

Génesis 1:14-19 ta deskribí formashon di solo, luna i strea den un di kuater periodo di kreashon. Na promé bista, por parse ku esaki ta kontradisí e splikashon bíbliko anterior. Sin embargo, tene na mente ku Moisés, e eskritor di Génesis, a skirbi e relato di kreashon komo si fuera for di punto di bista di un opservadó riba tera. Aparentemente, ta na e tempu ei numa luna, solo i streanan a bira visibel riba tera.

E relato di Génesis ta menshoná e aparishon di kriaturanan di laman den e di sinku periodo di kreashon i e aparishon di bestia di tera seku i di hende den e di seis periodo.—Génesis 1:20-31.

 Tera Ta Trahá pa Hende Disfrutá di Dje

Bo no ta haña ku bida riba tera, ku a kuminsá eksistí manera ta ser deskribí den e relato di Génesis, a ser trahá pa hende disfrutá di dje? Bo a yega di lanta un mainta ku shelu blou, hala e airu fresku aden i sinti bo kontentu di ta na bida? Podisé bo a dal un kaminata den un hardin i a disfrutá di e beyesa i holó di e flornan. Òf kisas bo a kana den un hòfi i a piki algun fruta sabroso. E delisianan ei lo tabata imposibel si no ta pa lo siguiente: (1) e awanan abundante di tera, (2) e kantidat korekto di kayente i lus for di solo, (3) nos atmósfera, ku su proporshon korekto di gasnan, i (4) tereno fértil.

Tur e rasgonan aki—ku bo no ta haña riba Mars, Vénus ni riba nos otro bisiñanan planetario—no ta produkto di puru kasualidat. Nan a ser ahustá presisamente pa hasi bida riba tera plasentero. Manera e siguiente artíkulo lo mustra, Beibel ta bisa tambe ku e Kreadó a diseñá nos bunita planeta pa eksistí pa semper.

[Nota]

[Kuadro na página 6]

“Si ami komo geólogo lo mester a splika en breve nos ideanan moderno di e orígen di tera i di e desaroyo di bida riba dje na un pueblo humilde di kunuku, manera e tribunan na ken e Buki di Génesis ta dirigí, lo mi no por a hasié mihó ku di sigui estrechamente e lenguahe di e promé kapítulo di Génesis.”—Geólogo Wallace Pratt.

[Kuadro/​Plachi na página 7]

IDEAL PA STUDIA UNIVERSO TAMBE

Si solo tabata posishoná un otro kaminda den nos galaksia, nos lo no tabatin asina un bon bista di e streanan. E buki The Privileged Planet ta splika: “Nos Sistema Solar ta ubiká . . . leu for di regionnan yen di stòf i ku demasiado lus, lokual ta laga nos tin un bista general ekselente di tantu streanan ku ta serka komo di partinan leu di universo.”

Ademas, luna su tamaño i distansia for di tera ta ideal pa luna tapa solo durante un eklipse solar. Eklipsenan solar ta susesonan inusual i impreshonante ku ta permití astrónomonan studia solo. E estudionan ei a yuda nan deskubrí hopi sekreto tokante e manera ku streanan ta bria.

[Plachi na página 5]

E masa di luna ta sufisiente grandi pa stabilisá e posishon skùin ku tera ta drei rònt di su as

[Plachinan na página 7]

Kiko ta hasi bida riba tera posibel? Su abundansia di awa, kantidat korekto di lus i kayente, atmósfera i tereno fértil

[Rekonosementu]

Globo: Basá riba NASA Photo; trigu: Pictorial Archive (Near Eastern History) Est.