Nos Realmente Por Siña Konosé Dios?

“Esaki ta bida eterno, ku nan por konosé . . . e úniko dios berdadero.”—JUAN 17:3.

“O PROFUNDIDAT di e rikesanan, tantu di e sabiduria komo di e konosementu di Dios!” apòstel Pablo a deklará. El a agregá: “Ki inskudriñabel su huisionan ta i insondeabel su kamindanan!” (Romanonan 11:33) Akaso nos tin ku konkluí for di e palabranan aki ku hende no tin e kapasidat pa deskubrí e sabiduria i konosementu di Dios? Es desir, ku ta imposibel pa siña konosé Dios i su propósito?

E personanan ku ta sigui e filosofia religioso konosí komo via negativa ta kere ku ta imposibel pa siña konosé Dios. The Encyclopedia of Religion ta deklará tokante e filosofia aki: “Dios ta surpasá tur loke nos por sa di dje. . . . No por duna Dios un nòmber ni por definié. Kualke nòmber òf definishon ta imponé límite, i Dios ta surpasá . . . nan. . . . E no ta un opheto di konosementu, pasobra e ta surpasá konosementu.” *

Segun e revista Newsweek, hopi persona den sosiedatnan kaminda religion kasi no tin influensia mas, ta lèn den direkshon di “un tipo nobo di kredo” ku, de echo ta enserá ku “tin solamente ún bèrdat, i e bèrdat aki ta ku no tin bèrdat.”

Sin embargo, hopi hende ainda no a haña kontesta riba nan preguntanan tokante e propósito di bida. Nan ta opservá e problemanan teribel di pobresa, malesa i violensia. Pa nan, e insiguridat di bida por ta sumamente frustrante. Kisas nan ta anhelá di haña kontesta, pero komo ku nan no ta haña esaki, nan ta konkluí ku no tin kontesta. Konsekuentemente, hopi hende asina ta hala pia for di religion organisá i ta buska nan propio manera di aserká Dios, i esei ta si nan ta kere ainda ku e ta eksistí.

E Punto di Bista Bíbliko

Hende ku tin un opinion faborabel di Beibel i ku ta inkliná na aseptá Hesukristu komo e Bosero di Dios, lo mester ta interesá pa sa e punto di bista bíbliko. Podisé bo ta kòrda ku un biaha Hesus a papia di dos kaminda, unu  hanchu i espasioso “ku ta hiba na destrukshon” i unu chikitu i smal “ku ta hiba na bida.” El a splika kon pa identifiká e hendenan ku tabata riba kada un di e kamindanan ei, bisando: “Na nan fruta boso lo konosé nan.” Ki tipo di fruta? Loke nan ta bisa, no loke nan ta hasi. Manera Hesus a klarifiká: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” Djis deklará ku nos ta kere den Dios no ta sufisiente. Nos tin ku hasi e boluntat di Dios. Lógikamente, nos mester sa promé kiko presis ta e boluntat di Dios.—Mateo 7:13-23.

Hesus a mustra bon kla ku ta posibel pa hende siña konosé Dios. El a bisa:“Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Pues ta bisto anto ku nos por gana e sabiduria i konosementu ku Dios ta revelá, basta nos hasi esfuerso pa buska nan. E regalo ku Dios ta duna esnan ku hasi e esfuerso ei ta bida eterno, pues definitivamente ta bale la pena buska nan.

[Nota]

[Plachi na página 4]

Hesus a bisa ku un kaminda smal ta hiba na bida