Hañando Tesoro Spiritual na Guinea

PA SIGLONAN, eksploradónan a riska nan bida i salú en buska di tesoro i rikesa. Esnan intrépido ku a yega Guinea, na Wèst Afrika, a haña dos tipo di rikesa masha distinto for di otro: material i spiritual. E pais aki ku ta riku na djamanta, oro, heru i bouksit di alto kalidat (for di kua nan ta saka aluminio), tin un poblashon di mas ku nuebe mion persona.

Apesar ku e religionnan di kristiandat no ta predominá den e pais, adorashon ta algu importante, i hopi hende ta duna gran balor na tesoro spiritual. Kiko presis e tesoronan aki ta? Nan ta e sirbidónan fiel di Yehova, deskribí na Hageo 2:7 komo “e rikesa di tur nashon,” òf “e kosnan deseabel di tur e nashonnan” [NW].

Tesoronan Spiritual

Pa koba den profundidat di e tera en buska di tesoronan skondí ta rekerí bastante esfuerso. Di igual manera, den e ministerio kristian, esfuerso sinsero ta nesesario pa haña rikesa spiritual. Na Guinea, e trabou di prediká e Reino a kuminsá den kurason di e pais na prinsipio di dékada di 1950 i a yega e kapital, Conakry, te na prinsipio di dékada di 1960. Awor tin alrededor di 900 Testigu di Yehova den 21 kongregashon i grupo rònt e pais.

Misioneronan a yega na aña 1987 i nan a bai traha huntu ku e úniko kongregashon ku tabatin na Conakry. Awor tin mas ku 20 misionero den e kapital i den interior. Ku masha entusiasmo nan ta enkurashá e kongregashonnan i ta partisipá huntu ku e rumannan lokal den e ministerio.

 Luc, kende ta biba na Conakry, tabatin goso ora ku e tabata studia Beibel ku Albert, un dòkter hóben. Albert a buska bèrdat religioso den vários iglesia, i e tabata enbolbí den práktikanan spiritista. E tabata bisti un rench’i dede ku el a haña serka un montadó ku a garantis’é ku e renchi lo dun’é suerte. Despues ku Albert a hañ’é ku hopi desepshon den su búskeda di e religion berdadero, el a benta e renchi afó i a pidi den orashon: “Dios, si bo ta eksistí, hasi posibel pa mi por siña konosé bo i sirbi bo. Sino, mi ta bai biba gewon segun mi propio deseonan.” Poko despues, Albert tabata di bishita na kas di su ruman muhé i el a tende kon un Testigu di Yehova tabata studia Beibel ku su subrina. No a tarda hopi ku nan a hasi areglo pa Luc kuminsá studia Beibel ku Albert.

Tur siman, Luc gustosamente tabata kana mas ku sinku kilometer ida i buèlta pa kondusí e estudio. Ounke Luc no tabatin hopi skol, Albert ku sí tabata un graduado di universidat, a keda hopi impreshoná ku Luc su fe firme den e Skritura i su manera práktiko di apliká e informashon bíbliko. Albert a keda masha felis ora el a haña sa ku e sufrimentu di humanidat no ta Dios su falta, sino mas bien, ku Yehova su propósito ta pa pone fin na tur sufrimentu i transformá e tera aki den un paradeis. (Salmo 37:9-11) Bèrdatnan bíbliko huntu ku e kondukta ekselente ku el a opservá entre e miembronan di e kongregashon a toka Albert su kurason.

Sin embargo, meskos ku un artesano ábil ku hopi kuidou i esfuerso tin ku kòrta un djamanta brutu pa e por bria, asina Albert tabatin ku kita vários kapa di mal aktitut di mundu afin di armonisá su bida ku e normanan hustu di Dios. El a stòp di konsultá montadó, di bebe demasiado alkohòl i di hunga wega di plaka. Loke Albert a haña mas difísil tabata pa stòp di huma. Ora ku finalmente el a pidi Yehova intensamente den orashon pa yud’é, el a logra. Seis luna despues el a legalisá su matrimonio. Su kasá tambe a kuminsá studia Beibel. Awor ámbos ta sirbidónan batisá di Yehova.

 Martin ta un otro djamanta spiritual. El a kuminsá studia Beibel na Guéckédou ora ku e tabatin 15 aña. Su mayornan katóliko tabata kontra pa e asistí na e reunionnan di Testigunan di Yehova. Nan a destruí Martin su literatura bíbliko, nan a batié i a kore kuné for di kas. Meskos ku djamanta ta ser formá dor di someté karbon na preshon ekstremo, asina Martin su amor pa bèrdat bíbliko a bira firme debí na e oposishon ku el a konfrontá. Ku tempu, su mayornan a bira mas suave i el a bolbe na kas. Kiko a pone ku e aktitut di su mayornan a kambia? Nan a nota un diferensia grandi entre e komportashon di Martin i komportashon di su rumannan mas chikí, kendenan a desaroyá un aktitut rebelde i a kuminsá praktiká inmoralidat seksual. Konvensí ku Martin su religion nobo tabata bon p’e, su tata gustosamente a risibí miembronan di e kongregashon na su kas. Martin su mama a gradisí e rumannan hopi biaha pa tur loke nan a hasi pa yuda su yu. Martin a batisá ku 18 aña, mas despues el a asistí na e Skol di Entrenamentu Ministerial i awor e ta sirbi komo pionero spesial.

Rikesa Spiritual Importá

Miéntras ku Guinea ta eksportá gran parti di su rekursonan natural, algun di su rikesanan spiritual a ser “importá.” Hopi hende a bin biba einan for di otro nashonnan afrikano, por lo general pa motibunan ekonómiko. Otro personanan a bin pa skapa di gueranan largu i kruel.

Ernestine, di Camerun, a bin Guinea 12 aña pasá. El a studia ku Testigunan di Yehova i tabata asistí na e reunionnan aña den aña afó, sin batisá. Na aña 2003, su wowo a yena ku awa ora ku el a mira e boutismo na un asamblea di sirkuito di Testigunan di Yehova. El a sinti su mes hopi kulpabel i a bisa Yehova den orashon: “Mi tin 51 aña awor, i mi no a hasi nada pa bo. Mi ke sirbi bo.” Despues, Ernestine a aktua na armonia ku su orashon humilde. El a splika e hòmber ku e tabata biba  kuné ku nan por a keda huntu solamente si nan a kasa legalmente. E hòmber a bai di akuerdo, i despues Ernestine a yora lágrimanan di alegria na su propio boutismo na novèmber 2004.

For di prinsipio di dékada di 1990, Guinea a risibí míles di refugiado for di Liberia i Sierra Leone, inkluso sentenáres di sirbidó di Yehova. Asina ku e rumannan yega na un kampo di refugiado, nan ta hasi areglo pa tene e reunionnan regularmente, nan ta organisá e trabou di prediká i ta traha un Salòn di Reino. Tin hende a bira sirbidó di Yehova den e kamponan di refugiado. Isaac ta un di nan. Despues ku el a batisá, a surgi e posibilidat pa Isaac bolbe bèk na su empleo anterior na un kompania grandi na Liberia. En bes di aseptá esei, el a skohe pa keda den e kampo di refugiado di Lainé komo un pionero regular. El a splika: “Awor mi no tin ku pidi pèrmit di un bas pa asistí na reunion ni pa bai asamblea. Mi ta liber pa sirbi Yehova.” Na desèmber 2003, a tene un kongreso di distrito den e kampo aislá aki pa e 150 Testigunan ku tabata biba entre e 30.000 refugiadonan. Felismente, 591 persona a asistí, inkluso 9 persona surdu ku a sigui e programa den idioma di seña. Diesdos persona a batisá. E rumannan a keda ku masha apresio pa e esfuerso ku a ser hasí pa perkurá un bankete spiritual pa nan.

“Kosnan Deseabel” Ta Hasi Kambionan Nesesario

Pa buskadónan di oro ku djamanta, ningun opstákulo no ta parse muchu grandi pa surpasá. P’esei ta konmovedor pa mira e esfuerso ku personanan nobo ta hasi pa surpasá tur opstákulo afin di sirbi Yehova. Konsiderá e kaso di e mucha muhé Zainab.

Na edat di 13 aña, Zainab a hañ’é fòrsá ta traha komo katibu. Nan a hib’é Guinea for di su kas ku tabata den un otro pais di Wèst Afrika. Na edat di 20 aña el a tende e mensahe di Beibel. E tabata ansioso pa apliká loke el a siña.

Pa Zainab tabata difísil pa asistí na e reunionnan kristian pa adorashon. Pero el a apresiá e reunionnan mashá i tabata determiná pa no pèrdè nan. (Hebreonan 10:24, 25) E tabata skonde su bukinan pafó ya asina e por a pasa kue nan riba kaminda pa bai reunion. Na vários okashon, su “doñonan” a batié kruelmente pasobra el a asistí na e reunionnan spiritual aki.

Despues sirkunstansianan a kambia, i Zainab a ser librá for di sklabitut. Mesora el a kuminsá asistí na tur reunion, lokual a yud’é hasi progreso rápido. El a haña oferta di un trabou ku un salario haltu, pero el a nenga esei pasobra e trabou lo a strob’é di asistí na reunion pa haña instrukshon kristian. El a inskribí den e Skol di Ministerio Teokrátiko, el a bira un publikadó di Reino no-batisá i despues a simbolisá su dedikashon na Yehova mediante boutismo den awa. Djis despues di esei, el a kuminsá den e sirbishi di pionero ousiliar. Seis luna despues, el a apliká pa sirbi komo pionero regular.

Un persona interesá a deklará despues di a asistí na un par di reunion: “Mi no ta sinti ku mi ta pober ora mi t’aki.” Miéntras ku hopi hende ta interesá solamente den e rikesanan material di Guinea, esnan ku ta stima Yehova ta buska ansiosamente e rikesanan spiritual. Sí, “e kosnan deseabel di tur e nashonnan” ta akudiendo na Yehova su adorashon puru djawe!

[Plachi na página 8]

GUINEA - 2005

Máksimo di Testigu: 883

Estudio di Beibel: 1.710

Asistensia na Memorial: 3.255

[Mapa na página 8]

(Pa e teksto den su formato kompleto, wak e publikashon)

GUINEA

Conakry

SIERRA LEONE

LIBERIA

[Plachi na página 9]

Albert i Luc

[Plachi na página 9]

Salòn di Reino na Conakry

[Plachi na página 10]

Ernestine

[Plachi na página 10]

Martin

[Plachi na página 10]

Zainab

[Rekonosementu pa Potrèt na página 8]

USAID