Probechá di dje Pasobra Bo No Por Ward’é

TEMPU ta oro. Esei ta un dicho bon konosí. En realidat, tin un gran diferensia entre tempu i oro òf otro kos material. Bo no por warda tempu pa bo us’é den futuro manera bo por warda plaka, kuminda, kombustibel òf hopi otro kos. Kualke intento pa warda tempu dor di no probechá di dje ta en bano. Kiko lo sosodé si bo drumi ocho ora i purba warda restu di e dia dor di no hasi nada? Na final di e dia, e oranan ku bo no a probechá di dje a bai pèrdí.

Bo por kompará tempu ku un riu grandi ku tin un strom fuerte. Semper e ta bai den un solo direkshon. Bo no por par’é, ni bo no por usa kada gota ku ta pasa bai. Hopi siglo pasá, hende a kuminsá traha wil di awa na oriya di riu. Ku esakinan, nan tabata generá energia for di strom di awa pa pone piedra di mula, zag di palu, pòmp i ‘klophamer’ grandi traha. Meskos tambe, bo no por warda tempu, pero bo por probechá di dje sí pa hasi algu bon. Pero, pa bo por hasi esei, bo tin ku kombatí dos ladron prinsipal di tempu: posponementu di kos i potoshi. Laga nos kuminsá na konsiderá e asuntu di posponementu di kos.

Evitá di Posponé Kos

Un dicho konosí ta bisa: Nunka laga pa mañan loke bo por hasi awe. Sin embargo, algun hende ta gusta formul’é di otro manera; nan ta bisa: Nunka laga pa mañan loke bo por laga pa otro siman. Ora nan haña nan konfrontá ku un tarea difísil, nan ta mira posponementu komo un solushon fásil. “Posponé kos” ta nifiká keda sin hasi algu ku mester wòrdu hasí. Pa esun ku ta gusta posponé kosnan, esaki ta bira un kustumber. Ora e haña su mes ku hopi strès i preshon, e ta buska alivio dor di posponé e tarea i disfrutá di su “tempu liber” resien hañá te ora e preshon oumentá atrobe.

Tin biaha, kisas pa motibu di nos estado físiko i emoshonal, nos mester posponé algun òf asta tur nos kosnan di hasi. Ademas, de bes en kuando tur hende mester di un kambio den e rutina di tur dia. Ni e Yu di Dios no tabata un eksepshon. Hesus tabata hopi okupá den su ministerio, pero el a traha tempu tambe pa su mes i pa su disipelnan. (Marko 6:31, 32) Un kambio di rutina ta benefisioso. Sin embargo, posponementu di kos ta un otro asuntu; por lo general e ta perhudisial. Pensa riba e siguiente ehèmpel.

Un studiante hóben tin tres siman pa prepará pa un prufwèrk di wiskunde. E tin ku repasá  bastante nota i buki, i e ta sinti e preshon. E tin gana di posponé e preparashon, i e ta kai den e trampa ei. En bes di studia, e ta wak televishon. Dianan ta pasa sin ku e ta prepará su mes p’e prufwèrk. Anto finalmente, riba e anochi promé ku e prufwèrk, e ta hañ’é konfrontá ku tur e tarea. Sintá na su mesa, e ta kuminsá pasa dor di su notanan i bukinan.

Oranan ta pasa. Miéntras otro miembronan di e famia ta drumi, e ta fòrsa su mente pa purba kòrda un kantidat di ‘vergelijking,’ ‘cosinus’ i ‘wortel.’ Su siguiente dia na skol e ta lucha ku e preguntanan ku su mente kansá no ta prepará pa kontestá. E ta haña un mal punto. E tin ku studia e material di nobo i e tin chèns di keda sinta.

Posponementu di kos a sali e studiante aki karu. Pero tin un prinsipio di Beibel ku por yuda hende evitá e tipo di situashonnan aki. Apòstel Pablo a skirbi: “Mira bon kon boso ta kana, no manera hende bobo, ma manera hende sabí, hasiendo bon uso di boso tempu.” (Efesionan 5:15, 16) Aki Pablo a spièrta kristiannan pa usa nan tempu na un manera sabí pa kumpli ku nan debernan spiritual, pero e prinsipio por ta masha benefisioso den hopi aktividat importante di bida. Unabes ku por lo general nos por disidí na ki momento nos ta hasi un sierto tarea, nos lo haña mihó resultado i lo kaba mas lihé ku e trabou si nos skohe pa kuminsá n’e tempu mas kumbiniente. Manera e teksto ta mustra, esaki ta un karakterístika di “hende sabí.”

Ki ora ta e tempu mas kumbiniente pa e studiante hóben prepará pa e prufwèrk di wiskunde? Tal bes tur anochi lo e por dediká mas o ménos 15 minüt na repasá e material progresivamente. Den e manera ei lo e no tin nodi studia hopi e anochi promé, durante oranan largu ku lo e mester ta durmiendo. Riba e dia di e prufwèrk, lo e ta bon sosegá i kompletamente prepará, i lo tin mas chèns di haña un bon punto.

P’esei, ora bo haña un tarea pa hasi, determiná ki ora ta e tempu mas kumbiniente pa hasié i pega na esei. Asina lo bo evitá e trampa di posponé kos i su konsekuensianan. Tambe lo bo haña e satisfakshon di a hasi un bon trabou. Esaki ta spesialmente importante ora e tarea lo afektá otro hende, manera ta e kaso ku asignashonnan den e kongregashon kristian.

Eliminá Potoshi

Manera a ser menshoná anteriormente, e di dos kos ku por yuda nos probechá di nos tempu presioso ta di evitá potoshi. Nos ta konsiente ku ta tuma tempu pa atendé kosnan, pa organisá nan, pa usa nan, pa limpia nan, pa warda nan i pa buska nan. Mas kos ta eksigí mas tempu. Den un kuarto òf un kas ku tin yen di kos poné aki i aya ta frustrante pa traha i esaki ta tuma mas tempu ku den áreanan ku tin espasio liber i superfisie sin nada ariba. Ademas, segun ku mas i mas kos ta akumulá, ta tuma mas tempu pa haña un kos ku nos ta buska.

Ekspertonan di trabou di kas ta bisa ku kasi mitar di e tempu ku un hende ta dediká na hasi limpiesa ta bai pèrdí na “piki, hala i kita  potoshi i otro kos for di kaminda.” Probablemente e situashon ta meskos den otro áreanan di bida. Pues si bo ta deseá di hasi mihó uso di bo tempu, tira un bista rònt di bo. Tin hopi kos ta okupá bo espasio, stroba bo di move i, pió ainda, tumando tur bo tempu? Si ta asina, eliminá potoshi.

Kisas no ta fásil pa eliminá potoshi. Tal bes nos tin problema pa deshasí di kosnan ku tin sierto balor pa nos pero ku ta innesesario—ta komo si fuera nos ta pèrdè un bon amigu. P’esei kon bo por disidí si bo tin ku warda un kos òf deshasí di dje? Algun hende ta apliká e regla di un aña. Si bo no a usa un opheto pa un aña, deshasí di dje. Kiko bo por hasi si bo ta duda ainda pa deshasí di dje despues di un aña? Ward’é un kaminda pa seis luna mas. Ora bo wak e atrobe i realisá ku un aña i mei a pasa sin ku bo a us’é, lo ta mas fásil pa sali for di dje. En todo kaso, e kos importante ta pa redusí potoshi pa hasi mihó uso di bo tempu.

Klaru ku no ta kos di kas òf trabou so ta forma ‘potoshi.’ Hesus a papia di “e preokupashonnan di e mundu aki i e engaño di rikesa” ku por “hoga e palabra” di Dios i pone un persona “keda sin duna fruta” relashoná ku e bon nobo. (Mateo 13:22) Un persona por okupá su bida ku asina tantu aktividat i kos di hasi ku ta bira difísil p’e saka e tempu nesesario pa mantené un rutina i ekilibrio spiritual, lokual ta sumamente importante. Konsekuentemente, e por bai atras spiritualmente i ku tempu pèrdè su chèns di drenta e mundu nobo ku Dios a primintí, ora ku lo tin tur tempu pa hasi loke ta trese berdadero satisfakshon i delisia.—Isaias 65:17-24; 2 Pedro 3:13.

Bo ta sinti ku konstantemente bo ta purba organisá bo tempu pa por logra hasi tur loke bo ta kere ku bo mester hasi—sea ta kosnan relashoná ku bo trabou, kas, outo, hòbi, biahe, ehersisio, aktividat sosial òf yen di otro aktividatnan interesante? Si ta asina, tal bes ta tempu pa pensa riba kon bo por redusí potoshi den sentido spiritual.

Un otro dicho konosí ta, tempu no ta para warda bo. En bèrdat, tempu ta kore nònstòp den un solo direkshon meskos ku un strom di awa fuerte. Bo no por bir’é bèk ni ward’é; unabes el a pasa, el a pasa bai pa semper. Ma dor di sigui algun prinsipio simpel di Beibel i dal un par di paso práktiko, nos por probechá di e tempu ku nos tin mester pa hasi “e kosnan ku ta ekselente” pa nos benefisio eterno i “pa e gloria i alabansa di Dios.”—Filipensenan 1:10, 11.

[Plachi na página 8, 9]

Nos por probechá di tempu meskos ku di un strom fuerte pa hasi loke ta bon

[Plachi na página 9]

Ki ora ta e tempu kumbiniente pa e prepará pa su prufwèrk?

[Plachi na página 10]

Traha den un área yen di kos poné aki i aya ta frustrante i ta tuma hopi tempu