E Flanèl di Lana i Spiritualidat
E Flanèl di Lana i Spiritualidat
REI LOUIS IX di Fransia a bistié. Sir Thomas More ku yudansa di esun di dje tabata keda 19 pa 20 ora pa dia lantá durante vários luna, tempu ku e tabata studia lei den su hubentut. De echo, ta konosí ku More tabatin unu bistí durante mayor parti di su bida. Anto ora ku Thomas Becket, Arsobispu di Canterbury, a ser asesiná na Katedral di Canterbury, e hendenan a keda sorprendí di hañ’é ku unu bistí bou di su paña. Kiko e personahenan históriko aki tabatin en komun? Nan a purba dominá nan deseo- i pashonnan dor di kastigá nan kurpa bistiendo un flanèl di lana.
E flanèl di lana tabata un paña gròf trahá di lana di kabritu ku hende tabata bisti pegá na nan kurpa di manera ku e tabata iritá e karni i feila e kueru, kousando gran inkomodidat. Ademas, fásilmente e flanèl tabata yena ku pieu. Historiadónan ta bisa ku Thomas Becket tabata bisti su flanèl di lana, huntu ku karson djabou di e mesun material, te ora ku “e tabata pèstá ku pieu i pruga.” Despues di siglo 16, hende tin biaha tabata usa waya fini di sumpiña (prikkeldraad) na lugá di lana di kabritu. E tipo di flanèl ei trahá di waya tabata kousa asta mas inkomodidat pa esun ku bistié.
Segun un dikshonario, e propósito di e flanèl di lana, meskos ku otro formanan di kastigá kurpa, tabata pa “dominá e deseonan pekaminoso di e karni i asina stimulá e desaroyo di un aktitut i estilo di bida mas orientá riba kosnan spiritual.” No ta personanan asétiko so tabata bisti e flanèl; tabata konosí ku laikonan tambe, inkluso esnan den posishonnan gubernamental, a us’é. Te ku awe tin sierto órdennan religioso ku ta sigui e kustumber aki.
Akaso bistimentu di un flanèl di lana òf priva bo mes di nesesidatnan físiko ta hasi bo un persona orientá riba kosnan spiritual? Nò, spiritualidat no ta dependé di e tipo di práktikanan ei. De echo, apòstel Pablo tabata kontra di “trato severo di e kurpa.” (Kolosensenan 2:23) * Berdadero spiritualidat ta bin mas bien di buska e konosementu di Dios mediante un estudio diligente di su Palabra i di apliká e konosementu ei den bo bida.
[Nota]
^ par. 5 Pa un konsiderashon mas detayá di e tópiko aki, wak e Spièrta! di 8 di òktober 1997, “E Punto di Bista Bíbliko: Asetismo Ta e Klave pa Sabiduria?”
[Rekonosementu pa Potrèt na página 32]
Rei Louis IX, ariba: For di e buki Great Men and Famous Women; Thomas Becket, meimei: For di e buki Ridpath’s History of the World (Vol. IV); Thomas More, abou: For di e buki Heroes of the Reformation, 1904