Miembronan Nobo di e Kuerpo Gobernante

DJARASON mainta, 24 di ougùstùs 2005, e famianan di Bètel di Merka i Canada, konektá ku otro via televishon, a tende un anunsio eksitante. Entrante promé di sèptèmber 2005, lo a agregá dos miembro nobo na e Kuerpo Gobernante di Testigunan di Yehova. Nan ta Geoffrey W. Jackson i Anthony Morris.

Ruman Jackson a kuminsá traha pionero na febrüari 1971 riba e isla di Tasmania, un estado di Oustralia. Na yüni 1974, el a kasa ku Jeanette (Jenny). Poko despues nan a haña e nombramentu pa sirbi komo pionero spesial. Di 1979 pa 2003, nan a sirbi komo misionero na Tuvalu, Samoa i Fidji, islanan den Oséano di Sur Pasífiko. Tempu ku pareha Jackson tabata riba e islanan aki, nan a duna un gran aporte tambe na e trabou di tradusí literatura bíbliko. Na aña 1992, Ruman Jackson a kuminsá sirbi den e Komité di Sukursal di Samoa, i for di 1996, den e Komité di Sukursal di Fidji. Na aprel 2003, e ku Jenny a bira parti di e famia di Bètel di Merka i a kuminsá traha na e Departamento di Servisionan di Tradukshon. Poko despues, Ruman Jackson a keda asigná komo ayudante di e Komité di Siñansa di e Kuerpo Gobernante.

Ruman Morris a drenta sirbishi di pionero na aña 1971 na Merka. Na desèmber di e aña ei el a kasa ku Susan, i nan a sigui traha pionero pa kasi kuater aña te ora nan promé yu hòmber, Jesse, a nase. Mas despues, nan a haña un otro yu hòmber, Paul. Ruman Morris a bolbe drenta den sirbishi di tempu kompletu na 1979 komo pionero regular. Su kasá Susan a djòin e ora ku nan yunan a kuminsá bai skol. E famia a sirbi kaminda tabatin mas nesesidat na Rhode Island i Nort Carolina, Merka. Na Nort Carolina, Ruman Morris a sirbi komo superintendente di sirkuito supstituto, i nan yu hòmbernan a drenta den sirbishi di pionero regular. Jesse ku Paul a haña invitashon pa bin traha na sukursal di Merka ora ku kada un a hasi 19 aña. Miéntras tantu, Ruman Morris a kuminsá ku trabou di sirkuito. Anto na aña 2002, e ku Susan a haña e invitashon pa bin Bètel pa kuminsá ku nan asignashon nobo dia promé di ougùstùs. Ruman Morris a bai traha na e Departamento di Sirbishi na Patterson i despues komo un ayudante di e Komité di Sirbishi di e Kuerpo Gobernante.

Fuera di e dos miembronan nobo aki, e Kuerpo Gobernante ta konsistí di C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; i D. Sydlik. Tur e miembronan di e Kuerpo Gobernante ta kristiannan ungí.