Resistí Satanas, i Lo E Hui For di Nos!

“Someté boso na Dios. Resistí Diabel i e lo hui for di boso.”—Santiago 4:7.

1, 2. (a) Ki karakterístika di Diabel a keda revelá den un deklarashon ku tin pará skirbí na Isaias kapítulo 14? (b) Ki preguntanan nos lo trata?

DIABEL ta arogansia en persona. Su orguyo a keda revelá den palabranan ku Dios su profeta Isaias a skirbi. Mas ku un siglo promé ku Babilonia a bira e poder mundial dominante, Isaias a skirbi lo siguiente komo si fuera ta e pueblo di Yehova tabata hasi e deklarashon aki kontra e “rei di Babilonia”: “Bo a bisa den bo kurason: ‘Lo mi subi na shelu; lo mi hasi mi trono mas haltu ku e streanan di Dios [esta, e reinan di e liña di desendensia real di David] . . . Lo mi hasi mi mes meskos ku e Haltísimo.’” (Isaias 14:3, 4, 12-15; Numbernan 24:17) E orguyo ku e “rei di Babilonia” a desplegá tabata similar na e aktitut di Satanas, “e dios di e mundu aki.” (2 Korintionan 4:4) Pero Satanas su arogansia lo terminá den desaster, meskos ku e dinastia di Babilonia a yega na un fin bergonsoso.

² Sin embargo, tanten ku Diabel ta eksistí, tin algun pregunta ku podisé ta preokupá nos. Por ehèmpel: Nos mester tin miedu di Satanas? Dikon e ta instigá hende pa persiguí kristiannan? Kon nos por evitá ku Diabel ta tuma bentaha riba nos?

Nos Mester Tin Miedu di Diabel?

3, 4. Dikon kristiannan ungí i nan kompañeronan no tin miedu di Diabel?

³ Un kos ku a fortalesé kristiannan ungí masha hopi ta e palabranan aki di Hesukristu: “No tene miedu di loke bo ta bai sufri. Mira, Diabel ta bai tira algun di boso den prizon, pa boso wòrdu poní na prueba, i boso lo sufri tribulashon dies dia largu. Sea fiel te na morto i lo mi duna bo e korona di bida.” (Revelashon 2:10) E ungínan i nan kompañeronan ku tin e speransa terenal no tin miedu di Diabel. E echo ku nan no tin miedu no ta pasobra di naturalesa nan tin kurashi. Nan no tin miedu pasobra nan tin temor respetuoso pa Dios i ta ‘tuma refugio den e sombra di su alanan.’—Salmo 34:9; 36:7.

⁴ E disipelnan di Hesukristu den promé siglo no tabatin miedu i nan a keda fiel te na morto apesar di e kosnan ku nan a sufri. Nan no a entregá na miedu debí na loke Satanas e Diabel lo por a hasi, pasobra nan tabata sa ku Yehova nunka lo a bandoná personanan ku a duna prueba di ta leal na dje. Di igual manera, kristiannan ungí i nan kompañeronan dediká ta determiná pa no kibra nan integridat na Dios apesar di persekushon intenso ku ta tuma lugá  awe. Sin embargo, apòstel Pablo a indiká ku Diabel lo por kousa morto. Esei mester duna nos miedu?

5. Kiko nos ta siña for di Hebreonan 2:14 i 15?

⁵ Pablo a bisa ku Hesus a “kompartí den karni i sanger” asina ku “pa medio di [su] morto e por a destruí esun ku tabatin poder riba morto [òf, “esun ku tin e medio pa kousa morto,” NW], esta, Diabel, i por a libra esnan ku pa miedu di morto tabata sometí na sklabitut henter nan bida.” (Hebreonan 2:14, 15) Satanas, komo “esun ku tin e medio pa kousa morto,” a tuma kontròl di Hudas Iskariot i a usa e lidernan hudiu i e romanonan pa ehekutá Hesus. (Lukas 22:3; Juan 13:26, 27) Sin embargo, Hesus ta libra humanidat pekaminoso for di e gara di Satanas i ta hasi posibel ku nos por haña bida eterno mediante su morto komo un sakrifisio.—Juan 3:16.

6, 7. Te na ki grado Satanas tin e medio pa kousa morto?

⁶ Te na ki grado Diabel tin e medio pa kousa morto? Wèl, for di komienso di Satanas su karera di maldat, su guia i mentiranan a kousa morto di hende. Ta asina pasobra Adam a peka i pues a pasa piká i morto pa e famia humano. (Romanonan 5:12) Ademas, Satanas su sirbidónan riba tera a persiguí adoradónan di Yehova, tin biaha te mata nan, manera nan a hasi den kaso di Hesukristu.

⁷ No opstante, nos no mester pensa ku Diabel por kousa morto di ken ku e kier. Dios ta protehá esnan ku ta pertenesé na Dje i nunka lo e no permití Satanas eksterminá tur adoradó berdadero for di riba tera. (Romanonan 14:8) Ta bèrdat ku Yehova ta permití persekushon bin riba henter su pueblo, i e ta permití algun di nos muri a konsekuensia di e atakenan di Diabel. Sin embargo, e Skritura ta ofresé nos e maravioso speransa di un resurekshon pa esnan ku ta den Dios su “buki di memoria.” Anto Diabel no por hasi apsolutamente nada pa stroba e restorashon maravioso ei di bida!—Malakias 3:16; Juan 5:28, 29; Echonan 24:15.

Dikon Satanas Ta Persiguí Nos?

8. Dikon Diabel ta trese persekushon riba e sirbidónan di Dios?

⁸ Si nos ta sirbidónan leal di Dios, tin un motibu básiko dikon Diabel ta trese persekushon riba nos. Su meta ta pa pone nos aktua kontra di nos fe. Nos tin un relashon presioso ku nos Tata selestial, i Satanas ke destruí esei. Esaki no mester sorprendé nos. Den Edén, Yehova a profetisá ku lo bai tin enemistat entre su “muhé” simbóliko i e “kolebra” i entre nan respektivo ‘simianan.’ (Génesis 3:14, 15) E Skritura ta identifiká Diabel komo “e kolebra di antigwedat” i ta revelá ku su tempu awor ta kòrtiku i su furia ta grandi. (Revelashon 12:9, 12) Segun ku e enemistat entre e dos  ‘simianan’ ta sigui, e hendenan ku fielmente ta sirbi Yehova por ferwagt ku nan lo ser persiguí. (2 Timoteo 3:12) Abo ta konsiente di e berdadero motibu tras di tal persekushon satániko?

9, 10. Diabel a lanta kua kuestion, i kon e kondukta di hende ta konektá ku esei?

⁹ Diabel a lanta e kuestion di soberania universal. Tambe el a lanta un otro kuestion ku ta konektá ku esei; el a kuestioná hende su integridat pa ku nan Kreadó. Satanas a trese persekushon riba e hòmber rekto Jòb. Dikon? Afin di kibra Jòb su integridat na Yehova. Jòb su esposa i su tres ‘konsoladónan miserabel’ a sirbi Diabel su propósito na e tempu ei. Manera e buki di Jòb ta mustra, Diabel a reta Dios, pretendiendo ku ningun hende lo no keda fiel na Dios si e permití Satanas tèst e persona ei. Pero Jòb a tene duru na su integridat, i asina el a duna prueba ku Satanas ta un mentiroso. (Jòb 1:8–2:9; 16:2; 27:5; 31:6) Diabel ta persiguí Testigunan di Yehova awe den un esfuerso pa kibra nan integridat i pa proba ku e tin rason.

¹⁰ Bon mira, e echo ku nos sa ku Diabel ta trese persekushon riba nos pasobra desesperadamente e ke kibra nos integridat na Dios, por yuda nos tene kurashi i ser fuerte. (Deuteronomio 31:6) Nos Dios ta e Soberano Universal, i lo e yuda nos mantené nos integridat. Laga nos semper purba hasi Yehova su kurason kontentu dor di ta wardadónan di integridat, i asina e por kontestá esun ku ta reproch’é sinfin, Satanas e Diabel.—Proverbionan 27:11.

“Libra Nos for di e Malbado”

11. Kiko e petishon: “No hiba nos den tentashon,” ke men?

¹¹ Ser un persona ku ta warda integridat no ta un asuntu fásil; e ta rekerí orashon sinsero. Foral e palabranan di e orashon modelo ta hopi útil. Den un parti di dje, Hesus a bisa: “No hiba nos den tentashon, ma libra nos for di e malbado.” (Mateo 6:13) Yehova no ta tenta nos pa kometé piká. (Santiago 1:13) Sin embargo, e Skritura tin biaha ta bisa komo si fuera ta Dios ta hasi òf kousa algu, ora ku de echo, simplemente e ta permití esei. (Ruth 1:20, 21) Pues, dor di resa manera Hesus a indiká, nos ta pidiendo Yehova pa no laga nos kai den tentashon. I lo e no hasi esei, pasobra nos tin e garantia bíbliko aki: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.”—1 Korintionan 10:13.

12. Dikon nos ta pidi den orashon: “Libra nos for di e malbado”?

¹² Despues di a menshoná tentashon den e orashon modelo, Hesus apropiadamente a bisa: “Libra nos for di e malbado.” Algun tradukshon di Beibel ta bisa: “Libra nos dje malu” (E Testament Nobo) òf “Warda nos di malo.” (Testament Nobo di Nos Senjor Hesu-Cristo) Sin embargo, den e Skritura e ekspreshon ‘libra for’ ta ser usá prinsipalmente relashoná ku hende, i e Evangelio di Mateo ta referí na Diabel komo “e Tentadó,” un persona. (Mateo 4:3, 11) Pues ta importante pa pidi den orashon pa nos ser librá for di “e malbado,” Satanas e Diabel. E ta purba manipulá nos pa nos kometé piká kontra Dios. (1 Tesalonisensenan 3:5) Ora nos ta hasi e petishon: “Libra nos for di e malbado,” nos ta pidiendo nos Tata selestial pa guia nos i yuda nos pa Diabel no tuma bentaha riba nos.

 No Laga Diabel Tuma Bentaha Riba Bo

13, 14. Dikon e korintionan tabatin ku kambia nan manera di trata un hòmber den e kongregashon ku anteriormente tabata inmoral?

¹³ Ora ku Pablo a urgi kristiannan na Korinto pa nan ta dispuesto pa pordoná, el a skirbi: “Ken ku boso pordoná algu, mi tambe ta pordoná; pasobra di bèrdat loke mi a pordoná, si mi a pordoná algu, mi a hasié pa boso motibu den e presensia di Kristu, pa Satanas no tuma bentaha riba nos; pasobra su trikinan no ta deskonosí pa nos.” (2 Korintionan 2:10, 11) Diabel por tuma bentaha riba nos den vários manera, pero dikon Pablo a deklará e palabranan sitá aki?

¹⁴ Mas promé Pablo a skual e korintionan pasobra nan a permití un hòmber inmoral keda den e kongregashon. Satanas lo mester tabata kontentu ku esei, ya ku reproche a bin riba e kongregashon pasobra nan a tolerá ‘inmoralidat ku no ta eksistí ni meimei di e paganonan.’ Ku tempu, e malechor a ser ekspulsá. (1 Korintionan 5:1-5, 11-13) Despues e hòmber a repentí. Si e korintionan a nenga di pordoná i restorá e hòmber ei, Diabel lo a tuma bentaha riba nan den un otro manera. Kon asina? Nan lo tabata severo i sin miserikòrdia, meskos ku Satanas mes. Si e hòmber arepentí mester a bira “desesperá dor di demasiado tristesa” i stòp di sirbi Dios kompletamente, ta foral e ansianonan lo a karga un parti di e responsabilidat pa esaki dilanti di e Dios miserikòrdioso, Yehova. (2 Korintionan 2:7; Santiago 2:13; 3:1) Klaru ku ningun kristian berdadero lo ke imitá Satanas dor di ser kruel, severo i sin miserikòrdia.

Protehá dor di e Armadura Ku Ta Bin di Dios

15. Ki guera nos ta bringa, i nos viktoria ta dependé di kiko?

¹⁵ Pa nos por ser librá for di Diabel, nos tin ku bringa un guera spiritual kontra e forsanan spiritual di maldat. Viktoria kontra tal spiritunan malbado poderoso ta dependé di si nos tin “e armadura kompletu di Dios” bistí. (Efesionan 6:11-18) E armadura aki ta inkluí “e korasa di hustisia.” (Efesionan 6:14) Rei Saul di Israel di antigwedat a desobedesé Dios i konsekuentemente el a pèrdè spiritu santu. (1 Samuel 15:22, 23) Pero si nos ta praktiká hustisia i tin e armadura spiritual kompletu bistí, nos lo tin Dios su spiritu santu i e protekshon nesesario kontra Satanas i su angelnan malbado, e demoñonan.—Proverbionan 18:10.

16. Kon nos por tin protekshon kontinuo kontra e forsanan spiritual di maldat?

¹⁶ Pa nos por tin protekshon kontinuo kontra e forsanan spiritual di maldat, nos tin ku, entre otro kosnan, lesa i studia e Palabra di Dios ku regularidat dor di hasi bon uso di publikashonnan ku ‘e fiel mayordomo’ ta perkurá. (Lukas 12:42) Di e manera ei nos lo ta yenando nos mente ku asuntunan spiritual saludabel, na armonia ku e konseho aki di Pablo: “Rumannan, tur loke ta berdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama, si tin algun birtut i si tin algu digno di alabansa, laga esakinan okupá boso mente.”—Filipensenan 4:8.

17. Kiko lo yuda nos pa ta proklamadónan efektivo di e bon nobo?

¹⁷ Yehova ta hasi posibel pa nos por tin nos “pianan bistí ku e ekipo di e bon nobo di  pas.” (Efesionan 6:15, NW) Partisipashon regular den reunionnan kristian ta ekipá nos pa proklamá e bon nobo di e Reino di Dios. Ki un gran goso nos ta haña dor di yuda otro hende siña e bèrdat di Dios i eksperensiá libertat spiritual! (Juan 8:32) “E spada di e spiritu, kual ta e Palabra di Dios,” ta indispensabel pa protehá nos mes kontra siñansanan falsu i pa “tumba kosnan fuertemente ankrá.” (Efesionan 6:17; 2 Korintionan 10:4, 5, NW) Uso ábil di Dios su Palabra skirbí, Beibel, ta yuda nos siña hende e bèrdat i ta protehá nos pa nos no kai pa e trikinan di Diabel.

18. Kon nos por “para firme kontra e trampanan di Diabel”?

¹⁸ Pablo a habri su konsiderashon di nos armadura spiritual bisando: “Sea fuerte den Señor, i den e forsa di su poder. Bisti e armadura kompletu di Dios, pa boso por para firme kontra e trampanan di Diabel.” (Efesionan 6:10, 11) E palabra griego tradusí komo “para firme” tin keber ku un sòldá ku ta mantené su posishon. Nos ta keda para firme den e guera spiritual, ounke Satanas ta usa vários trampa den su esfuerso pa perturbá nos unidat, korumpí nos siñansanan òf kibra nos integridat na Dios. Pero te asina leu e atakenan di Diabel no tabatin éksito, ni nan lo no tin éksito nunka! *

Resistí Diabel, i E Lo Hui for di Nos

19. Kua ta un manera ku nos por tuma akshon fuerte pa resistí Diabel?

¹⁹ Nos por tin éksito den nos guera spiritual kontra Diabel i e forsanan spiritual di maldat ku ta bou di su direkshon. Nos no tin nodi tembla di miedu pa motibu di Satanas, pasobra disipel Santiago a skirbi: “Someté boso na Dios. Resistí Diabel i e lo hui for di boso.” (Santiago 4:7) Un manera ku nos por tuma akshon fuerte pa resistí Satanas i e kriaturanan spiritual di maldat ku ta koperá kuné ta dor di no tin nada di hasi ku kosnan sobrenatural ni ku práktikanan di magia ni ku bruheria ni ku e hendenan ku ta partisipá den nan. E Skritura ta mustra bon kla ku sirbidónan di Yehova mester rechasá buskamentu di señal di algu ku ta bai pasa òf partisipá den astrologia, divinashon i spiritismo. Si nos ta keda okupá ku aktividatnan kristian i ta spiritualmente fuerte, nos no tin nodi tene miedu ku un hende lo hasi bruha pa nos.—Numbernan 23:23; Deuteronomio 18:10-12; Isaias 47:12-15; Echonan 19:18-20.

20. Kon nos por resistí Diabel?

²⁰ Nos ta “resistí Diabel” dor di pega na norma- i bèrdatnan bíbliko i dor di tuma un posishon firme kontra dje. Mundu ta na armonia ku Satanas pasobra e ta su dios. (2 Korintionan 4:4) P’esei nos ta rechasá e karakterístikanan di mundu, manera orguyo, egoismo, inmoralidat, violensia i materialismo. Nos sa ku Diabel a hui bai ora ku Hesus a resistí su atake dor di usa e Skritura durante e tentashon den desierto. (Mateo 4:4, 7, 10, 11) Di igual manera, Satanas lo ‘hui for di nos,’ tur derotá, si nos ta kompletamente sumiso na Yehova i ta dependé riba dje mediante orashon. (Efesionan 6:18) Ku e sosten di Yehova Dios i di su Yu stimá, ningun persona no por hasi nos daño permanente; nò, ni sikiera Diabel!—Salmo 91:9-11.

[Nota]

Kiko Ta Bo Kontesta?

• Nos mester tin miedu di Satanas e Diabel?

• Dikon Satanas ta trese persekushon riba kristiannan?

• Dikon nos ta pidi den orashon pa ser librá for di “e malbado”?

• Kon nos por tin éksito den bringa e guera spiritual?

[Preguntanan di Estudio]

[Plachi na página 26]

E siguidónan di Kristu den promé siglo no tabatin miedu i nan a keda fiel te na morto

[Plachi na página 27]

Diabel no por stroba e personanan ku ta den Yehova su memoria di ser resusitá

[Plachi na página 28]

Bo ta pidi den orashon pa bo ser librá for di “e malbado”?

[Plachi na página 29]

Bo tin “e armadura kompletu di Dios” bistí?