E Profesia di Oseas Ta Yuda Nos Kana ku Dios

“Nan lo kana tras di SEÑOR.”—OSEAS 11:10.

1. Ki drama simbóliko nos ta haña den e buki di Oseas?

BO TA gusta dramanan ku personahenan fasinante i historia intrigante? E buki bíbliko di Oseas ta kontené un drama simbóliko. * E drama ta bai tokante e bida di famia di Dios su profeta Oseas i tin keber ku e enlase matrimonial figurativo ku Yehova a forma ku Israel di antigwedat mediante aliansa di e Lei di Moisés.

2. Kiko nos sa di Oseas?

² Den Oseas kapítulo 1 nos ta haña e marko di sirkunstansia di e drama aki. Oseas aparentemente tabata biba den e teritorio di e reino di dies tribu di Israel (yamá tambe Efrain, basá riba nòmber di e tribu dominante). Oseas a profetisá durante e reinado di e último shete gobernantenan di Israel i di e reinan di Huda, Uzias, Jotam, Akaz i Ezekias. (Oseas 1:1) Pues Oseas a profetisá pa por lo ménos 59 aña. Ounke e buki ku ta karga su nòmber a keda kompletá djis despues di aña 745 promé ku nos era, e ta al kaso awe ya ku miónes di hende ta siguiendo un rumbo manera esun profetisá den e palabranan: “Nan lo kana tras di SEÑOR.”—Oseas 11:10.

Loke un Resúmen Ta Revelá

3, 4. Splika brevemente kiko Oseas kapítulo 1 te ku 5 ta trata.

³ Un resúmen breve di Oseas kapítulo 1 te ku 5 lo fortalesé nos determinashon pa kana ku Dios dor di ehersé fe i sigui un proseder ku ta na armonia ku su boluntat. Ounke e habitantenan di e reino di Israel a bira kulpabel di adulterio spiritual, Dios lo a tene miserikòrdia ku nan si nan a repentí. Esaki a keda ilustrá na e manera ku Oseas a trata ku su esposa, Gomer. Despues di a haña un yu ku Oseas, Gomer aparentemente a haña dos yu ilegítimo. Sin embargo, Oseas a tum’é bèk, meskos ku Yehova tabata dispuesto pa mustra miserikòrdia na israelitanan ku a repentí.—Oseas 1:1–3:5.

⁴ Yehova tabatin un kaso hudisial kontra Israel pasobra no tabatin fieldat, kariño ni konosementu di Dios den e tera. Lo el a eksigí kuenta i kastigá tantu Israel—ku a praktiká idolatria—komo e reino rebelde di Huda. Sin embargo, ora ku Dios su pueblo lo tabata den “aflikshon,” nan lo a buska Yehova.—Oseas 4:1–5:15.

E Drama Ta Desaroyá

5, 6. (a) Kon ekstenso fornikashon tabata den e reino di dies tribu di Israel? (b) Dikon e spièrtamentu duná na Israel di antigwedat ta importante pa nos awe?

⁵ Dios a ordená Oseas: “Bai, tuma pa bo mes un esposa prostituta i haña yunan di prostitushon, pasobra e tera a kometé prostitushon na gran manera i a bandoná SEÑOR.” (Oseas 1:2) Kon ekstenso prostitushon òf fornikashon tabata den Israel? Beibel ta bisa nos: “Un spiritu di prostitushon a hasi [e pueblo di e reino di  dies tribu] dual, i nan a kometé prostitushon dor di bandoná nan Dios. . . . Boso yu muhénan ta kometé prostitushon, i boso brùitnan ta kometé adulterio. . . . E hòmbernan mes ta bai ku prostituta i ta ofresé sakrifisio huntu ku prostitutanan di tèmpel.”—Oseas 4:12-14.

⁶ Tur kaminda den Israel tabatin fornikashon, tantu den sentido literal komo spiritual. P’esei Yehova lo pidi kuenta i “kastigá” e israelitanan. (Oseas 1:4; 4:9) E spièrtamentu aki ta importante pa nos pasobra Yehova lo pidi kuenta i kastigá hende ku awe ta práktika inmoralidat i partisipá den adorashon impuru. Sin embargo esnan ku ta kana ku Dios ta kumpli ku su normanan pa adorashon limpi i ta konsiente ku “ningun fornikadó . . . no tin herensia den e reino di Kristu i Dios.”—Efesionan 5:5; Santiago 1:27.

7. Kiko Oseas su matrimonio ku Gomer a simbolisá?

⁷ Ora ku Oseas a kasa ku Gomer, aparentemente Gomer tabata bírgen, i e tabata un esposa fiel ora ku el “a haña un yu hòmber p’e.” (Oseas 1:3) Manera a keda presentá den e drama simbóliko, poko despues ku e israelitanan a ser librá for di sklabitut den Egipto na aña 1513 promé ku nos era, Dios tambe a sera un aliansa ku nan ku tabata manera un kontrakt pa un matrimonio limpi. Dor di bai di akuerdo ku e aliansa, Israel a primintí di ta fiel na su doño “esposo,” Yehova. (Isaias 54:5) Sí, e matrimonio figurativo aki entre Israel ku Dios a keda simbolisá dor di Oseas su matrimonio limpi ku Gomer. Pero ban wak kon kos a kambia!

8. Kon e reino di dies tribu di Israel a originá, i kiko bo por bisa di su adorashon?

⁸ Oseas su esposa “a konsebí atrobe i a duna lus na un yu muhé.” Probablemente Gomer a konsebí tantu e yu muhé ei den adulterio komo un otro yu mas despues. (Oseas 1:6, 8) Siendo ku Gomer a representá Israel, kisas bo ta puntra: ‘Kon Israel a bin kai den prostitushon?’ Na aña 997 promé ku nos era, dies tribu di Israel a separá nan mes for di e tribunan di Huda i Benjamin ku tabata den zùit. Den e reino di dies tribu di Israel den nort nan a instituí adorashon di bisé pa asina e hendenan no bai Huda pa adorá Yehova na su tèmpel na Yerusalèm. Adorashon di e dios falsu Baal, ku a inkluí orgianan seksual, a bira ankrá den Israel.

9. Manera Oseas 1:6 a profetisá, kiko a pasa ku Israel?

⁹ Ora ku Gomer su di dos yu a nase, ku probablemente tabata un yu ilegítimo, Dios a bisa Oseas: “Yam’é Lo-ruhama, [ku ta nifiká “No A Mustra Kompashon na Dje”] pasobra lo mi no tin kompashon mas ku e kas di Israel, pa mi no pordoná nan nunka mas [òf, “pasobra definitivamente lo mi kita nan,” NW].” (Oseas 1:6) Yehova ‘a kita nan’ ora ku e asirionan a hiba e israelitanan den koutiverio na aña 740 promé ku nos era. Sin embargo, Dios a mustra kompashon ku e reino di dos tribu di Huda i a libra nan pero no pa medio di bog, spada, bataya, kabai òf koredó di kabai. (Oseas 1:7) Den un solo anochi na aña 732, ún angel a mata 185.000 sòldá asirio ku tabata menasá e stat kapital di Huda, esta, Yerusalèm.—2 Reinan 19:35.

Yehova Su Kaso Hudisial Kontra Israel

10. Kiko Gomer su komportashon adúltero a ilustrá?

¹⁰ Gomer a bandoná Oseas i a bira “un esposa prostituta,” bibando den adulterio ku un otro hòmber. Esaki a ilustrá kon e reino di Israel  a sera aliansanan polítiko ku nashonnan ku tabata praktiká idolatria i a kuminsá dependé riba nan. En bes di Israel duna mérito na Yehova pa e bendishonnan material ku el a risibí, nan a atribuí esakinan na e diosnan di e nashonnan ei i a violá nan aliansa matrimonial ku Dios dor di partisipá den adorashon falsu. P’esei no ta straño ku Yehova tabatin un kaso kontra e nashon aki ku a kometé adulterio spiritual!—Oseas 1:2; 2:2, 12, 13.

11. Kiko a pasa ku e aliansa di Lei ora ku Yehova a permití Israel i Huda bai den eksilio?

¹¹ Ki kastigu Israel a haña pa motibu ku el bandoná su Doño Esposo? Dios a pon’é bai “den desierto” di Babilonia, e nashon ku a konkistá Asiria, kaminda anteriormente e israelitanan a keda eksiliá na aña 740 promé ku nos era. (Oseas 2:14) Pues anto, ora ku Yehova a kousa e fin di e reino di 10 tribu, e no a anulá su aliansa matrimonial ku e nashon di Israel original di 12 tribu. De echo, ora ku Dios a laga e babilonionan destruí Yerusalèm na aña 607 i a permití e pueblo di Huda bai den koutiverio, e no a abolí e aliansa di Lei di Moisés mediante kua e Israel di 12 tribu a drenta den un matrimonio figurativo kuné. Ta te despues ku e lidernan hudiu a rechasá Hesukristu i a laga mat’é na aña 33 di nos era, e relashon aki a ser abolí.—Kolosensenan 2:14.

Yehova Ta Konsehá Israel Seriamente

12, 13. Kiko ta e idea prinsipal di Oseas 2:6-8, i kon e palabranan ei a apliká na Israel?

¹² Dios a konsehá Israel seriamente pa “kita su prostitushon,” pero Israel kier a bai tras di su amantenan. (Oseas 2:2, 5) Yehova a bisa: “P’esei mira, lo mi sera su kaminda ku sumpiña; i lo mi traha un muraya kontra dje, asina ku e no por haña su bereanan. I e lo kore tras di su amantenan, ma e lo no alkansá nan; i e lo buska nan, ma lo no haña nan. E ora ei e lo bisa: ‘Lo mi bai bèk serka mi promé esposo, pasobra e tempu ei tabata mihó pa mi ku awor!’ Pasobra e no sa ku ta ami a dun’é e maishi, e biña nobo i e zeta, i ku ta ami a kubrié ku plata i oro, ku nan a usa pa Baal [òf, ku “nan a forma den un imágen di Baal,” NW nota na pia di página].”—Oseas 2:6-8.

¹³ Ounke Israel a buska e yudansa di nashonnan ku anteriormente tabata su “amantenan,” ningun di nan no por a yud’é. E tabata rondoná komo si fuera pa un tranké impenetrabel di sumpiña, di manera ku nan no por a yega serka pa dun’é yudansa. Despues ku Asiria a sitia Israel su kapital Samaria pa tres aña, e stat a kai na aña 740, i e reino di dies tribu nunka mas a ser restablesé. Ta solamente algun persona entre e israelitanan den koutiverio lo a realisá kon bon kos tabata tempu ku nan antepasadonan tabata sirbi Yehova. E restu ei lo a rechasá adorashon di Baal i trata di drenta di nobo den un aliansa ku Yehova.

Un Otro Bista Riba e Drama

14. Kon bin Oseas a reanudá relashon matrimonial ku Gomer?

¹⁴ Pa komprondé mas plenamente e konekshon entre Oseas su asuntunan familiar i Israel su relashon ku Yehova, konsiderá e palabranan aki: “SEÑOR a bisa mi: ‘Bai atrobe, stima un muhé ku ta stimá dor di su esposo, maske ku e  ta un adúltera.’” (Oseas 3:1) Oseas a kumpli ku e mandamentu aki dor di kumpra Gomer bèk for di e hòmber ku e tabata biba kuné. Despues, Oseas a papia ku su esposa firmemente: “Bo mester keda serka mi pa hopi dia. Bo no mag di ta un prostituta, ni bo no mag di ta íntimo ku ningun hòmber.” (Oseas 3:2, 3) Gomer a reakshoná faborablemente riba e disiplina, i Oseas a reanudá relashon matrimonial kuné. Kon esaki ta apliká na Dios su trato ku e pueblo di Israel i Huda?

15, 16. (a) Bou di ki sirkunstansia Dios su nashon ku a ser disipliná lo por a haña su miserikòrdia? (b) Kon Oseas 2:18 a kumpli?

¹⁵ Miéntras ku e eksiliadonan for di Israel i Huda tabata den koutiverio na Babilonia, Dios a usa su profetanan pa “papia kariñosamente” ku nan pa asina toka nan kurason. Pa Dios su pueblo haña su miserikòrdia, nan tabatin ku manifestá repentimentu i bai bèk na nan Doño Esposo, meskos ku Gomer a regresá na su esposo. E ora ei Yehova lo a saka su nashon—ku a ser disipliná i ku tabata manera un esposa—for di e “desierto” di Babilonia i lo el a tres’é bèk na Huda i Yerusalèm. (Oseas 2:14, 15) El a kumpli ku e promesa ei na aña 537 promé ku nos era.

¹⁶ Dios a kumpli tambe ku e promesa aki: “Den e dia ei lo mi traha tambe un aliansa pa nan ku e bestianan di mondi, e paranan di shelu i e bestianan ku ta lastra abou na suela. I lo mi kita bog, spada i guera for di riba tera, i lo hasi nan drumi den siguridat.” (Oseas 2:18) E restu hudiu ku a regresá nan tera a biba den siguridat, nan no tabatin nodi tin miedu di bestia. E profesia aki tabatin un kumplimentu adishonal na aña 1919 di nos era, ora ku e restu di Israel spiritual a ser librá for di ‘Babilonia e Grandi,’ e imperio mundial di religion falsu. Awor nan ta biba den siguridat i ta den un paradeis spiritual huntu ku nan kompañeronan, kendenan tin e speransa di biba pa semper riba tera. No tin karakterístikanan manera di bestia entre e kristiannan berdadero aki.—Revelashon 14:8; Isaias 11:6-9; Galationan 6:16.

Tuma e Lèsnan na Pechu

17-19. (a) Ki kualidatnan di Dios nos ta ser animá pa imitá? (b) Ki efekto Yehova su miserikòrdia i kompashon mester tin riba nos?

¹⁷ Dios ta miserikòrdioso i tin kompashon, i ta asina nos mester ta. Esaki ta un lès ku e promé kapítulonan di Oseas ta siña nos. (Oseas 1:6, 7; 2:23) E echo ku Dios tabata dispuesto pa mustra miserikòrdia na israelitanan ku a repentí ta na armonia ku e proverbio inspirá: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.” (Proverbionan 28:13) Un otro konsuelo pa malechornan ku repentí ta e palabranan di e salmista: “E sakrifisionan di Dios ta un spiritu kibrá; un kurason repentí i kibrá, o Dios, bo no ta despresiá.”—Salmo 51:17.

 ¹⁸ E profesia di Oseas ta enfatisá e kompashon i miserikòrdia di e Dios ku nos ta adorá. Asta si algun hende desviá for di su kamindanan hustu, nan por repentí i bira bèk. Si nan hasi esei, Yehova lo risibí nan gustosamente. El a demostrá miserikòrdia na miembronan ku a repentí di e nashon di Israel, un nashon ku kua anteriormente el a drenta den un matrimonio figurativo. Ounke ku nan a desobedesé Yehova i ‘a hasi Esun Santu di Israel tristu, e tabata miserikòrdioso i a kòrda ku ta karni nan tabata.’ (Salmo 78:38-41) Tal miserikòrdia mester motivá nos pa sigui kana ku Yehova, nos Dios yen di kompashon.

¹⁹ Maske ku den Israel tabata reina kasonan di matamentu, hòrtamentu i adulterio, Yehova a “papia kariñosamente kuné” pa toka su kurason. (Oseas 2:14; 4:2) Segun ku nos ta reflekshoná riba Yehova su miserikòrdia i kompashon, esei mester toka nos kurason i fortalesé nos apego personal na dje. P’esei laga nos puntra nos mes: ‘Kon mi por ta mas mihó den imitá Yehova su miserikòrdia i kompashon den mi trato ku otro hende? Si un ruman kristian ku a ofendé mi pidi mi pordon, mi ta mesun kla pa pordoná manera Dios ta kla pa pordoná?’—Salmo 86:5.

20. Duna un ehèmpel ku ta mustra ku nos mester tin konfiansa den e speransa ku Dios ta duna.

²⁰ Dios ta duna berdadero speransa. Por ehèmpel, el a primintí: “Lo mi dun’é . . . e vaye di Akor komo un porta di speransa.” (Oseas 2:15) Yehova su organisashon di antigwedat ku tabata manera un esposa, tabatin e speransa sigur di ser restorá na su tera, kaminda “e vaye di Akor” tabata situá. Kumplimentu di e promesa ei na aña 537 promé ku nos era, ta duna nos bon motibu pa alegrá den e speransa sigur ku Yehova ta pone nos dilanti.

21. Ki papel konosementu ta hunga den nos kanamentu ku Dios?

²¹ Pa sigui kana ku Dios, nos tin ku sigui haña konosementu di dje i aplik’é den nos bida. Tabatin gran falta di konosementu di Yehova den Israel. (Oseas 4:1, 6) Sin embargo, tabatin hende ku a duna hopi balor na e instrukshon ku a bin for di Dios, nan a aktua na armonia kuné i a haña gran bendishon. Oseas tabata un di nan. Esei tambe tabata e kaso ku e 7.000 israelitanan ku den tempu di Elias no a dobla rudia pa Baal. (1 Reinan 19:18; Romanonan 11:1-4) Nos gratitut pa Dios su instrukshon lo yuda nos sigui kana kuné.—Salmo 119:66; Isaias 30:20, 21.

22. Kon nos mester mira apostasia?

²² Yehova ta ferwagt ku e hòmbernan ku ta hiba delantera den su pueblo ta rechasá apostasia. Sin embargo, Oseas 5:1 ta bisa: “Tende esaki, o saserdotenan! Paga tinu, o kas di Israel! Skucha, o kas di rei! Pasobra e huisio ta toka boso, pasobra boso tabata un trampa na Mizpa, i un reda habrí riba Tabor.” Lidernan apóstata tabata un trampa i un reda pa e israelitanan, sedusiendo nan pa praktiká idolatria. Seru Tabor i un lugá ku yama Mizpa probablemente tabata sentronan di tal adorashon falsu.

23. Kon bo a benefisiá dor di analisá Oseas kapítulo 1 te ku 5?

²³ Te asina leu, e profesia di Oseas a mustra nos ku Yehova ta un Dios miserikòrdioso ku ta duna speransa i ta bendishoná esnan ku ta apliká su instrukshon i ta rechasá apostasia. Meskos ku e israelitanan di pasado ku a repentí, laga nos buska Yehova i semper hasi esfuerso pa agrad’é. (Oseas 5:15) Dor di hasi esei nos lo kosechá loke ta bon i nos lo tin e goso i pas inkomparabel ku tur hende ku ta kana fielmente ku Dios ta eksperensiá.—Salmo 100:2; Filipensenan 4:6, 7.

[Nota]

Kon Lo Bo Kontestá?

• Kiko Oseas su matrimonio ku Gomer a simbolisá?

• Dikon Yehova tabatin un kaso hudisial kontra Israel?

• Ki lès den Oseas kapítulo 1 te ku 5 a impreshoná bo?

[Preguntanan di Estudio]

[Plachi na página 18]

Bo sa ken e esposa di Oseas a representá?

[Plachi na página 19]

E asirionan a konkistá e habitantenan di Samaria na aña 740 promé ku nos era

[Plachi na página 20]

Hende yen di goso ta regresá nan tera