Kon Balioso Bo Bida Ta?

MIÉNTRAS ku nan tabata sakrifiká kantidat di bida na Europa durante Promé Guera Mundial, tabata tumando lugá un esfuerso inkreibel pa salba bida na Antártika. E eksploradó ingles-irlandes Ernest Shackleton i su tripulashon a sufri un katástrofe ora ku nan barku, Endurance (Perseveransia), a keda plèchá dor di un masa flotante di eis i a senk. Shackleton te na sierto grado a logra hiba su hòmbernan na un refugio, e Isla Olefante den Oséano Sur Atlántiko. Pero ainda nan tabata den peliger ekstremo.

Shackleton a realisá ku nan úniko speransa pa sobrebibí tabata di manda buska yudansa na un haf di piskadó di bayena riba e isla Sur Georgia. Esei a keda 1.100 kilometer leu, i Shackleton tabatin solamente un boto di salbabida di shete meter largu ku el a logra lòs for di Endurance. Nan chèns di yega e haf tabata pinta skur.

Sin embargo, dia 10 di mei 1916, despues di 17 dia sumamente angustioso, Shackleton i un grupo chikí a yega Sur Georgia, pero e kondishon  teribel di laman a obligá nan baha na e banda robes di e isla. Pa por a yega nan destinashon final, nan tabatin ku hasi un kaminata trabahoso di 30 kilometer atraves di serunan deskonosí tapá ku sneu. Ounke e situashon a parse imposibel—ku temperatura ekstremadamente friu i sin e ekipo adekuá pa subi seru—Shackleton i su kompañeronan a yega nan destinashon, i ku tempu el a reskatá henter su tripulashon ku a noufragá. Dikon Shackleton a hasi tantu esfuerso asina? Biógrafo Roland Huntford a skirbi: “Su úniko ambishon [tabata] pa saka tur su hòmbernan na bida.”

“Ningun di Nan No Ta Falta”

Kiko a yuda e hòmbernan di Shackleton pa nan no sinti desesperashon total segun ku nan tabata di kremp ta warda riba Isla Olefante, un isla ku tabata djis “un pida área di baranka i eis desolá i inaksesibel ku a midi 20 mia [30 kilometer] di punta pa punta”? E konfiansa ku nan lider lo a kumpli ku su promesa di reskatá nan.

Awe humanidat su situashon ta hopi paresido na e hòmbernan desampará ei riba Isla Olefante. Hopi hende ta biba den kondishonnan inkreiblemente desfaborabel i ta lucha pa djis keda na bida. Sin embargo, nan por tin pleno konfiansa ku Dios lo “libra e afligínan” di opreshon i angustia. (Jòb 36:15) Bo por tin sigur ku Dios ta konsiderá tur hende su bida balioso. Yehova Dios, e Kreadó, ta bisa: “Sklama na mi den e dia di angustia; lo mi reskatá bo.”—Salmo 50:15.

Ta difísil pa bo kere ku e Kreadó ta konsiderá abo personalmente balioso, un solo persona entre e míles di miónes di hende ku tin riba tera? Wèl, tuma nota di loke profeta Isaias a skirbi tokante e míles di miónes di streanan den e míles di miónes di galaksianan ku tin den e inmenso universo rònt di nos. Nos ta lesa: “Hisa bo wowo wak ariba i mira ta ken a krea e streanan aki; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.”—Isaias 40:26.

Abo ta kapta loke esei ta nifiká? Nos galaksia Via Láktea—di kua nos sistema solar ta djis un parti chikí—ta kontené por lo ménos 100 mil mion strea. Anto kuantu galaksia mas tin? Ningun hende no sa sigur, pero algun eksperto ta kalkulá ku tin 125 mil mion. Ke men ku tin un kantidat inkreibel di strea! Sin embargo, Beibel ta bisa nos ku e Kreadó di universo konosé kada strea na nan nòmber.

“Asta e Drachinan di Kabei Riba Boso Kabes, Tur Ta Kontá”

Pero kisas un hende ta argumentá: ‘Djis pasobra un persona sa e nòmber di míles di miónes di strea—òf míles di miónes di hende—no nesesariamente ke men ku e ta interesá den kada un di nan.’ Por ehèmpel, un kòmpiuter ku sufisiente “memory” lo por registrá e nòmber di míles di miónes di hende. Pero ningun hende lo bisa ku e kòmpiuter ta interesá den kualke un di nan. Sin embargo, Beibel ta mustra ku Yehova Dios no solamente sa e nòmber di míles di miónes di hende sino ku tambe e ta interesá den kada un di nan. Apòstel Pedro a skirbi: ‘Tira tur boso preokupashon riba dje, pasobra e ta perkurá [òf, “interesá,” NW] pa boso.’—1 Pedro 5:7.

Hesukristu a deklará: “Dos mòfi no ta wòrdu bendí pa ún sèn? I ni un di nan lo no kai na suela si no ta e boluntat di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.” (Mateo 10:29-31)  Tuma nota ku Hesus no a bisa ku Dios simplemente lo ta na haltura di loke ta pasa ku mòfi òf ku hende. El a bisa: “Boso bal mas ku un kantidat di mòfi.” Dikon bo ta bal mas? Pasobra bo ta trahá “segun e imágen di Dios,” ku e kapasidat pa kultivá i desplegá kualidatnan moral, intelektual i spiritual ku ta reflehá Dios su propio kualidatnan elevá.—Génesis 1:26, 27.

“E Produkto di Aktividat Inteligente”

No sea gañá pa e deklarashonnan di hende ku ta nenga ku tin un Kreadó. Segun nan, ta forsanan siegu i impersonal di naturalesa a traha bo. Nan ta pretendé ku leu di ser kreá “segun e imágen di Dios,” bo ta meskos ku tur otro bida animal riba e planeta, inkluso mòfi.

Abo ta haña ku ta lógiko ku bida a yega di eksistí simplemente pa kasualidat òf mediante un forsa impersonal? Segun e biólogo molekular Michael J. Behe, e “prosesonan biokímiko inkreiblemente kompliká” ku ta goberná bida ta hasi e idea ei totalmente irasonabel. Tambe el a bisa ku e evidensia di biokímika ta hiba na e konklushon inevitabel ku “bida riba tera na su nivel mas fundamental . . . ta e produkto di aktividat inteligente.”—Darwin’s Black Kuadro—The Biochemical Challenge to Evolution (E Kaha Pretu di Darwin: E Reto Biokímiko di Evolushon).

Beibel ta bisa nos ku bida riba tera na tur nivel ta e produkto di aktividat inteligente. I tambe e ta bisa nos ku e Fuente di tur e aktividat inteligente aki ta Yehova Dios, e Kreadó di universo.—Salmo 36:9; Revelashon 4:11.

No laga e echo ku nos tin ku perseverá den un mundu yen di doló i sufrimentu deskurashá bo di kere ku e tera i tur bida ku tin riba dje tin un Kreadó i Diseñadó. Tene na mente dos bèrdat fundamental. Unu ta ku Dios no a diseñá e imperfekshon ku ta eksistí tur rònt di nos. E otro ta ku nos Kreadó tin bon motibu ku el a permití e imperfekshon aki temporalmente. Manera e revista aki a trata na vários okashon, Yehova Dios a permití maldat eksistí pa solamente un tempu limitá afin di resolvé unabes i pa semper e kuestionnan moral ku a surgi tempu ku hende pa promé bes a rechasá Dios su gobernashon supremo. *—Génesis 3:1-7; Deuteronomio 32:4, 5; Eklesiastés 7:29; 2 Pedro 3:8, 9.

‘Lo E Libra Esun den Nesesidat Ku Ta Sklama pa Yudansa’

Klaru ku maske hopi hende ta sufri di e kondishonnan miserabel djawe, tòg bida ta keda un regalo maravioso. I nos ta hasi tur loke ta na nos alkanse pa konserb’é. E bida den futuro ku Dios ta primintí ta hopi mas ku un lucha pa djis sobrebibí den kondishonnan severo i doloroso, manera loke e hòmbernan di Shackleton a eksperensiá riba Isla Olefante. Dios su propósito ta pa reskatá nos for di nos eksistensia aktual di doló i banidat, di manera ku nos por “gara loke ta bida berdadero,” e bida ku originalmente tabata e propósito di Dios pa su kreashon humano.—1 Timoteo 6:19.

Dios lo hasi tur esaki pasobra nos kada un ta balioso den su bista. El a hasi areglo pa su Yu, Hesukristu, perkurá e sakrifisio di reskate nesesario pa libra nos for di e piká, imperfekshon  i morto ku nos a heredá for di nos mayornan original, Adam ku Eva. (Mateo 20:28) Hesukristu a bisa: “Dios a stima mundu asina tantu, ku el a duna su Yu unigénito, pa ken ku kere den dje . . . tin bida eterno.”—Juan 3:16.

Kiko Dios lo hasi pa e hendenan kende nan bida aktualmente ta ser amargá dor di doló i opreshon? Dios su Palabra inspirá ta bisa relashoná ku su Yu: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia.” Dikon e lo hasi esaki? Pasobra “nan sanger [òf, nan bida] lo ta presioso den su bista.”—Salmo 72:12-14.

Pa siglonan humanidat ta lucha bou di e karga di piká i imperfekshon, i ta komo si fuera nan ta “keha” di hopi doló i sufrimentu. E úniko motibu pakiko Dios a permití esaki tabata pasobra e sa ku lo e por remediá kualke daño ku esei lo a trese kuné. (Romanonan 8:18-22) Denter di poko lo e trese e “restorashon di tur kos” mediante su gobernashon di Reino den man di su Yu, Hesukristu.—Echonan 3:21; Mateo 6:9, 10.

Esei ta enserá resurekshon di hende ku a sufri i muri den pasado. Nan ta safe den Dios su memoria. (Juan 5:28, 29; Echonan 24:15) Djis akí nan lo risibí bida “na abundansia,” bida eterno den perfekshon den paradeis riba tera, liber di doló i sufrimentu. (Juan 10:10; Revelashon 21:3-5) Tur hende na bida lo por disfrutá plenamente di bida i kultivá e kualidatnan i abilidatnan maravioso ku ta identifiká personanan kreá “segun e imágen di Dios.”

Abo lo t’ei pa disfrutá di e bida ku Yehova a primintí? Esei ta keda na bo. Nos ta urgi bo pa hasi uso di loke Dios a perkurá pa realisá tur e bendishonnan aki. E publikadónan di e revista aki gustosamente lo yuda bo hasi esei.

[Nota]

[Plachi na página 4, 5]

E hòmbernan noufragá tabatin konfiansa ku Shackleton lo a kumpli ku su promesa di reskatá nan

[Rekonosementu]

© CORBIS

[Plachi na página 6]

“Boso bal mas ku un kantidat di mòfi”