E Bèrdat Ta Duna Fruta den e Hendenan Ku Bo Ta Siña?

ORA ku e hóben Eric a anunsiá ku e no ke ta un Testigu di Yehova mas, su mayornan a keda kibrá. Nan no a ferwagt esei niun ora so. Na mucha, Eric a partisipá den e estudio di Beibel di famia, el a asistí na e reunionnan kristian i a sali prediká huntu ku e kongregashon. A parse ku e tabata den e bèrdat, na moda di papia. Pero awor ku el a bai for di kas, su mayornan a realisá ku e bèrdat di Beibel sí no tabata den dje. E realisashon ei tabata tantu un shòk komo un desepshon pa nan.

Otro rumannan tambe a sinti e mesun tristesa ora ku un studiante di Beibel stòp di studia diripiente. Na momentunan asina, hende hopi bes sa puntra nan mes: ‘Dikon mi no a mira e kos aki ta bin?’ Wèl, akaso ta posibel pa determiná promé ku un desaster spiritual tuma lugá si e bèrdat ta dunando fruta den e personanan ku nos ta siña? De echo, kon nos por ta sigur ku e bèrdat ta obrando den nos i tambe den e hendenan ku nos ta siña? Den Hesus su parábola bon konosí di e sembradó, el a bisa algun kos ku por yuda kontestá e preguntanan aki.

E Bèrdat Mester Yega Kurason

Hesus a bisa: “E simia ta e palabra di Dios. I e simia [sembrá] den bon tera ta esnan ku a tende e palabra ku un kurason onesto i bon, i ta retené esaki, i ta duna fruta ku perseveransia.” (Lukas 8:11, 15) Pues promé ku bèrdat di Reino por produsí resultado den nos studiantenan, e tin ku saka rais den nan kurason figurativo. Hesus ta sigurá nos ku meskos ku bon simia den bon tera, bèrdat divino mesora ta kuminsá obra i duna fruta unabes el a toka un bon kurason. Kiko nos mester tuma nota di dje?

Nos mester tuma nota di kualidatnan di kurason, no djis di aparensia eksterno. Un persona kisas ta mantené un rutina di adorashon, pero no ta semper esei ta revelá loke realmente ta tuma lugá den su kurason. (Jeremias 17:9, 10; Mateo 15:7-9) Nos tin ku wak mas profundo. Mester tin un kambio definitivo den e persona su deseo-, motivashon- i prioridatnan. E mester ta desaroyando e personalidat nobo, ku ta konforme e boluntat di Dios. (Efesionan 4:20-24) Un ehèmpel: Pablo a bisa ku ora ku e tesalonisensenan a tende e bon nobo, nan a asept’é mesora komo e palabra di Dios. Pero ta e perseveransia, fieldat i amor ku nan a manifestá despues, a konfirmá pa Pablo ku e bèrdat tabata ‘obra tambe den nan.’—1 Tesalonisensenan 2:13, 14; 3:6.

Klaru ku sea loke sea tin den kurason di un studiante, tardi òf trempan su komportashon lo revelá esei, manera e ehèmpel di Eric ta ilustrá. (Marko 7:21, 22; Santiago 1:14, 15) Desafortunadamente, te ora ku sierto mal karakterístikanan bira bisto den un persona su manera di anda, kisas ya ta muchu lat. Pues anto, e reto ta pa purba ripará debilidatnan spesífiko promé ku nan bira piedra di tropieso den sentido spiritual. Nos tin mester di un manera pa wak den e kurason figurativo. Kon nos por hasi esei?

Siña for di Hesus

Hesus, naturalmente, por a lesa kurason sin faya. (Mateo 12:25) Ningun di nos por hasi esei. Sin embargo, el a mustra nos ku nos tambe por ripará un persona su deseo-, motivashon- i prioridatnan. Meskos ku un dòkter kualifiká ta usa vários téknika di diagnostiká pa  saka afó kiko ta falta un pashènt su kurason literal, asina Hesus a usa e Palabra di Dios pa eksponé i “saka” afó kiko ta e “pensamentunan i intenshonnan di kurason,” asta ora ku ainda nan tabata skondí pa bista di hende en general.—Proverbionan 20:5; Hebreonan 4:12.

Por ehèmpel, na un okashon Hesus a yuda Pedro bira konsiente di un debilidat ku despues a bira un piedra di tropieso. Hesus tabata sa ku Pedro stim’é. De echo, Hesus a kaba di enkargá Pedro ku “e yabinan di e reino.” (Mateo 16:13-19) Sin embargo, Hesus tabata sa tambe ku Satanas tabatin bista riba e apòstelnan. Den e dianan nan dilanti, nan lo a bin bou di preshon intenso pa komprometé nan prinsipionan. Evidentemente Hesus a ripará ku algun di su disipelnan tabatin sierto debilidat den nan fe. P’esei e no a vasilá pa bisa spesífikamente kiko nan mester a traha ariba. Ban konsiderá kon el a introdusí e asuntu pa haña chèns di papia riba dje.

Mateo 16:21 ta bisa: “For di e tempu ei Hesukristu a kuminsá mustra su disipelnan ku e mester . . . sufri . . . i wòrdu matá.” Tuma nota ku Hesus a mustra nan, e no a djis bisa nan kiko lo bai pasa kuné. Muy probablemente el a usa versíkulonan di Beibel, manera Salmo 22:14-18 òf Isaias 53:10-12, ku ta indiká ku e Mesias lo mester a sufri i muri. En todo kaso, dor di lesa òf sita direktamente for di e Skritura, Hesus a duna Pedro i e otronan un chèns di reakshoná di kurason. Kon nan lo a reakshoná riba e prospekto di haña persekushon?

Sorprendentemente, maske Pedro semper a demostrá kurashi i selo, na e okashon aki su reakshon impulsivo a revelá un falta serio den su manera di pensa. El a bisa: “Sea bondadoso ku bo mes, Señor; abo apsolutamente lo no tin e destino aki.” Pedro su manera di pensa tabata klaramente mal dirigí, pasobra manera Hesus a señalá, Pedro ‘no a pensa pensamentu di Dios sino esun di hende,’ un falta serio ku lo por a hiba na konsekuensianan grave. Kiko Hesus a hasi e ora ei? Despues di a skual Pedro, Hesus a bis’é i tambe e restu di e disipelnan: “Si un hende kier bin mi tras, lag’é nenga su mes i tuma su staka di tormento i sigui mi kontinuamente.” Basando su palabranan riba pensamentunan ku nos ta haña den Salmo 49:8 i 62:12, el a rekordá su disipelnan bondadosamente ku nan prospekto eterno no tabata sinta serka hende, ku no por a perkurá salbashon, sino serka Dios.—Mateo 16:22-28, NW.

Ounke Pedro temporalmente a entregá na miedu i a nenga Hesus tres biaha, e kòmbersashon aki i otronan mas sin duda a yuda prepar’é pa un rekuperashon spiritual rápido. (Juan 21:15-19) Solamente 50 dia despues, Pedro ku kurashi a lanta para dilanti di e multitut di hende na Yerusalèm pa duna testimonio di Hesus su resurekshon. Den e simannan, lunanan i añanan ku a sigui, ku kurashi el a konfrontá vários aresto, sota i enkarselashon, poniendo asina un ehèmpel ekstraordinario di integridat sin miedu.—Echonan 2:14-36; 4:18-21; 5:29-32, 40-42; 12:3-5.

Kiko nos ta siña di esaki? Bo a tuma nota di loke Hesus a hasi pa eksponé i saka afó kiko tabatin den Pedro su kurason? Na promé lugá, el a skohe tekstonan apropiá pa enfoká Pedro su atenshon riba e área spesífiko di preokupashon. Kaba el a duna Pedro un chèns pa reakshoná di kurason. Por último, el a duna mas  konseho bíbliko pa yuda Pedro ahustá su manera di pensa i sinti. Kisas bo ta sinti ku e nivel aki di siña hende ta mas ayá di bo abilidat, pero laga nos konsiderá dos eksperensia ku ta ilustrá kon preparashon i konfiansa den Yehova por yuda kualke un di nos sigui e ehèmpel di Hesus.

Kon pa Saka Afó Kiko Tin den Kurason

Ora ku un tata kristian a haña sa ku su dos yu hòmbernan den klas 1 i klas 2 a kue mangel for di lèsenar di e maestro, el a pone nan sinta i a rasoná ku nan. En bes di djis ignorá e asuntu i bisa ku ta ‘ko’i mucha,’ e tata a konta: “Mi a purba saka afó kiko den nan kurason a motivá nan pa hasi e kos malu aki.”

E tata a pidi e muchanan pa kòrda riba loke a sosodé ku Akan, manera ta pará skirbí den Josué kapítulo 7. Mesora e muchanan a kapta e punto i a atmití nan fout. Nan konsenshi tabata molestiá nan kaba. Anto e tata a laga nan lesa Efesionan 4:28, ku ta bisa: “ Laga esun ku ta hòrta, no hòrta mas; ma mas bien, lag’é traha . . . pa e por tin algu pa kompartí ku esun ku ta den nesesidat.” Loke a reforsá e konseho bíbliko mas ainda ta ku e tata a laga e muchanan kompensá nan fout dor di kumpra mangel i dun’é na e maestro.

E tata a bisa: “Asina ku nos tabata ripará kualke mal inklinashon, nos a purba ranka nan ku rais ku tur, i remplasá nan ku motivashonnan bon i puru dor di rasoná ku e muchanan.” Dor di imitá Hesus ora di siña nan yunan, e mayornan aki definitivamente tabatin bon resultado den transkurso di tempu. Ámbos yu hòmber ku tempu a haña invitashon pa bira miembro di e personal di e ofisina prinsipal na Brooklyn Bètel, kaminda un di nan ainda ta sirbi despues di 25 aña.

Konsiderá kon un otro ruman muhé kristian a logra yuda su studiante di Beibel. E studiante tabata asistí na reunion i partisipá den sirbishi i ya a ekspresá e deseo di batisá. Sin embargo, parse ku e tabata dependé muchu riba su mes en bes di riba Yehova. E ruman muhé a konta: “Siendo un hende muhé soltero, el a bira mas independiente di loke el a realisá. Mi tabata preokupá ku e tabata riba kaminda pa haña un inzinking òf un kaida spiritual.”

Pues e Testigu a tuma e inisiativa pa rasoná ku e studiante riba Mateo 6:33, i a anim’é pa ahustá su prioridatnan, pone e Reino na promé lugá i konfia den Yehova pa laga e asuntu sali di e mihó manera. E ruman a puntra e studiante frankamente: “E echo ku bo ta biba riba bo mes tin biaha ta pone ku ta difísil pa bo dependé riba otro persona, inkluso riba Yehova?” E studiante a atmití ku kasi el a stòp di hasi orashon. E publikadó e ora ei a anim’é pa apliká e konseho ku tin na Salmo 55:22 i tira su karga riba Yehova pasobra, manera 1 Pedro 5:7 ta sigurá nos, “e ta perkurá pa boso.” E palabranan ei a konmové su kurason. E Testigu a bisa: “Esei tabata un di e poko biahanan ku mi a mir’é yora.”

Laga e Bèrdat Sigui Obra den Bo

Nos ta sinti gran goso ora nos mira e personanan ku nos ta siña reakshoná faborabel riba e bèrdat bíbliko. Pero pa nos esfuersonan pa yuda hende por tin éksito, nos mes mester ta un bon ehèmpel. (Hudas 22, 23) Nos tur tin ku sigui “traha riba [nos] salbashon ku temor i temblamentu.” (Filipensenan 2:12) Esei ta enserá ku regularmente nos tin ku laga e lus di e  Skritura bria riba nos propio kurason, en buska di aktitutnan, deseonan i kosnan ku nos gusta ku kisas nos mester korigí.—2 Pedro 1:19.

Por ehèmpel, bo selo pa aktividatnan kristian a mengua últimamente? Si ta asina, kon bin? Un motibu lo por ta ku bo ta dependé muchu riba bo mes. Kon bo por sa si ta asina? Lesa Hageo 1:2-11, i reflekshoná onestamente riba e manera ku Yehova a rasoná ku e hudiunan repatriá. Kaba puntra bo mes: ‘Mi ta demasiado preokupá ku siguridat finansiero i komodidat material? Realmente mi ta konfia ku Yehova lo perkurá pa mi famia si mi duna asuntunan spiritual prioridat? Òf mi ta sinti ku mi tin ku sòru pa mi mes promé?’ Si bo tin ku hasi ahuste den bo manera di pensa i sinti, no vasilá pa hasi nan. Konseho bíbliko, manera loke nos ta haña na Mateo 6:25-33, Lukas 12:13-21 i 1 Timoteo 6:6-12, ta perkurá e base pa un punto di bista balansá di nesesidatnan i poseshonnan material, un punto di bista ku ta garantisá nos Yehova su bendishon kontinuo.—Malakias 3:10.

E tipo di eksaminashon propio i onesto aki por laga bo mira kon serio e situashon ta. I emoshonalmente e por ta duru pa atmití ku nos tin sierto debilidatnan ora hende hala nos atenshon riba nan. Sin embargo, ora ku amorosamente bo tuma e inisiativa pa yuda bo yu, bo studiante di Beibel òf asta bo mes—sin importá kon personal òf delikado e asuntu kisas ta—por ta masha bon ku bo a dal e promé paso pa salba su bida òf di bo mes.—Galationan 6:1.

Pero kiko si ta parse ku bo esfuersonan no ta produsiendo bon resultado? No sea lihé pa entregá. Ahustá un kurason imperfekto por ta un asuntu delikado, e por tuma hopi tempu i tin biaha ta frustrante. Pero tambe e por ta rekompensador.

E hóben Eric, menshoná na prinsipio, ku tempu a rekobrá su sano huisio i a bolbe kuminsá “kana den bèrdat.” (2 Juan 4) Eric a bisa: “Ta te ora ku mi a realisá kiko mi a pèrdè, mi a bolbe bèk na Yehova.” Ku yudansa di su mayornan, Eric awor ta sirbi Dios fielmente. Ounke un tempu e no tabata kontentu ku e esfuersonan kontinuo di su mayornan pa pon’é eksaminá su propio kurason, awor e ta apresiá profundamente loke nan a hasi. E di: “Mi mayornan ta fantástiko. Nunka nan no a stòp di stima mi.”

Ta un ekspreshon di bondat amoroso pa laga e Palabra di Dios bria riba kurason di e personanan ku nos ta siña. (Salmo 141:5, NW) Sigui eksaminá e kurason di bo yunan i di bo studiantenan di Beibel pa wak si e personalidat kristian nobo di bèrdat ta sakando rais den nan kurason. Laga e bèrdat sigui obra den otro hende i den bo mes dor di manehá “e palabra di bèrdat na un manera korekto.”—2 Timoteo 2:15.

[Plachi na página 29]

Hesus su palabranan a revelá un debilidat den Pedro

[Plachi na página 31]

Usa e Beibel pa saka afó kiko tin den e kurason