Kon Bo Por Satisfasé Bo Nesesidatnan Spiritual

“DEN e último dékada, mas ku 300 buki tokante spiritualidat i su influensia riba trabou—for di e obra Jesus CEO te na The Tao of Leadership—a bira optenibel den librerianan,” segun U.S.News & World Report. E tendensia aki ta djis un refleho di e echo ku den hopi pais riku, tin un hamber kresiente pa orientashon spiritual den bida. Komentando riba esaki, e revista empresarial Training & Development a remarká: “Den e tempu aki den kua teknologia ta dirigí tur otro aspekto di nos bida, nos ta buskando un nifikashon mas profundo, un propósito den bida i mas satisfakshon personal.”

 Pero unda bo por haña guia spiritual satisfaktorio? Den pasado, hende tabata akudí na religionnan tradishonal pa yuda nan haña “un nifikashon mas profundo” i “un propósito” den bida. Awe, hopi hende a bira lomba pa religion tradishonal. Un enkuesta bou di 90 gerente i ehekutivo haltu a revelá ku “hende ta hasi un distinshon kla entre religion i interes den kosnan spiritual,” segun Training & Development. Esnan ku a partisipá den e enkuesta a mira religion komo “intolerante i kousante di desunion,” miéntras ku nan a mira interes den kosnan spiritual komo algu “universal i habrí pa tur hende.”

Meskos tambe hopi hóben den e sosiedatnan kaminda religion kasi no tin influensia mas, manera Oustralia, Nueva Zelandia, Reino Uní i Europa ta mira un distinshon entre religion i interes den kosnan spiritual. Profèser Ruth Webber a deklará den Youth Studies Australia: “Mayoria hóben ta kere den Dios, òf den un òf otro forsa sobrehumano, pero nan no ta duna iglesia mes tantu importansia ni no ta mir’é komo un medio pa yuda nan ekspresá nan interes den kosnan spiritual.”

Religion Berdadero Ta Promové Interes den Kosnan Spiritual

E duda aki pa ku religion ta komprendibel. Hopi organisashon religioso ta profundamente metí den intriga polítiko i hipokresia moral, i nan ta papa muhá ku e sanger inosente ku nan a drama den kantidat di gueranan religioso. Sin embargo, algun hende, den nan asko kontra organisashonnan religioso manchá pa hipokresia i falsedat, a kometé e eror di rechasá Beibel tambe, pensando ku Beibel ta tolerá e práktikanan ei.

Pero, Beibel mas bien ta kondená hipokresia i maldat. Hesus a bisa e lidernan religioso di su tempu: “Ai di boso, eskribanan i fariseonan, hipókritanan! Pasobra boso ta manera tumbanan blanchá ku di pafó ta mustra bunita, ma di paden nan ta yen di wesu di hende morto i di tur sorto di sushedat. Asina boso tambe di pafó ta parse hustu na hende, ma di paden boso ta yen di hipokresia i inikidat.”—Mateo 23:27, 28.

Ademas, Beibel ta animá kristiannan pa nan ta neutral den tur asuntu polítiko. En bes di manda hende kreyente mata otro, e ta bisa ku nan mester ta dispuesto pa muri pa otro. (Juan 15:12, 13; 18:36; 1 Juan 3:10-12) Na lugá di ta “intolerante i kousante di desunion,” religion berdadero, basá riba Beibel, ta “habrí pa tur hende.” Apòstel Pedro a bisa: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

Beibel—Un Guia Konfiabel pa Nos Salú Spiritual

Beibel ta bisa nos ku hende a wòrdu kreá den imágen di Dios. (Génesis 1:26, 27) Klaru ku esei no ta nifiká sí ku hende parse Dios na kurpa. Mas bien, hende tin e kapasidat pa reflehá e karakterístikanan di Dios su personalidat, manera e kapasidat pa komprondé kosnan spiritual i desaroyá un relashon spiritual ku Dios.

Siendo ku esei ta e kaso, ta lógiko pa asumí ku Dios lo duna nos tambe e medionan pa kumpli ku nos nesesidatnan spiritual, i tambe e guia apropiá ku por yuda nos distinguí entre loke ta benefisiá nos i loke ta perhudiká nos den sentido spiritual. Meskos ku Dios a krea nos kurpa ku un sistema di inmunidat asina maravioso, ku ta kombatí enfermedat i yuda nos keda salú, asina tambe el a ekipá nos ku un konsenshi, òf bos interno, ku por yuda nos tuma desishonnan korekto i evitá práktikanan ku ta perhudisial tantu den sentido físiko komo spiritual. (Romanonan 2:14, 15) Manera nos sa, pa nos sistema di inmunidat funshoná, mester aliment’é na un manera adekuá. Meskos tambe, pa nos konsenshi traha, nos tin ku aliment’é ku bon nutrishon spiritual.

Papiando di e klase di alimento ku por mantené nos spiritualmente saludabel, Hesus  a bisa: “Hende lo no biba di pan so, ma di tur palabra ku ta sali for di boka di Dios.” (Mateo 4:4) E palabranan di Yehova ta skirbí den su Palabra, Beibel, i nan ta “útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Ta na nos anto pa hasi esfuerso pa haña e nutrishon spiritual ei. N’e grado ku nos siña konosé Beibel i hasi esfuerso pa apliká su prinsipionan den nos bida, n’e mesun grado ei nos lo benefisiá tantu den sentido físiko komo spiritual.—Isaias 48:17, 18.

E Esfuerso Ta Bale La Pena?

Ta bèrdat ku tempu ta nesesario pa mehorá nos salú spiritual dor di studia Beibel; i ta parse ku tempu ta birando mas i mas skars. Pero e rekompensanan ta bal e esfuerso! Skucha pakiko algun profeshonal drùk ta haña ku sakamentu di tempu pa nan salú spiritual ta importante pa nan.

Marina (dòkter) ta bisa: “Ami nunka no a ègt interesá den kosnan spiritual sino te ora mi a kuminsá traha den un hospital i a kuminsá sinti e sufrimentu di otro hende profundamente. E ora ei mi a realisá ku mi mester a rekonosé i satisfasé mi nesesidat spiritual pa mi por ta felis i trankil, ya ku e hopi okupashonnan di bida i e atenshon konstante ku bo tin ku duna na preokupashon di hende por bira demasiado pa un hende di mi profeshon.

Awor mi ta studia Beibel ku Testigunan di Yehova. E estudio aki ta yuda mi analisá mi akshonnan i motivashonnan den un manera konstruktivo i entrená mi manera di pensa pa ta mas positivo. Esei ta yuda mi mantené mi balansa den bida. Mi karera ta duna mi un gran satisfakshon. Pero ta mi estudio di Beibel a mehorá mi salú emoshonal i yuda mi kontrolá sintimentunan negativo, redusí tenshon i tene mas pasenshi i kompashon ku hende. Ademas, aplikashon di prinsipio bíbliko a benefisiá mi matrimonio. Pero mas importante ku tur kos, mi a konosé Yehova i mi ta sinti na sierto grado e fluho liber di su spiritu, lokual a duna mi bida mas nifikashon.”

Nicholas (arkitekto) ta bisa: “Promé ku mi a studia Beibel ku Testigunan di Yehova, mi no tabata interesá mes den kosnan spiritual. Mi úniko meta den bida tabata pa logra éksito den e profeshon ku mi a skohe. Mi estudio di Beibel a siña mi ku bida ta enserá mas ku esei, i ku ta esnan ku ta hasi e boluntat di Yehova lo haña felisidat berdadero i duradero.

En bèrdat mi karera a duna mi un sentido di satisfakshon, pero ta Beibel a siña mi e importansia di hiba un bida simpel dor di enfoká riba kosnan spiritual. Dor di hasi esei, ami ku mi kasá a evitá hopi di e tenshon ku un estilo di bida materialista ta trese kuné. Tambe nos a haña hopi berdadero amigu pa medio di nos asosiashon ku personanan ku ta mira bida meskos ku nos ta mir’é.”

Vincent (abogado) ta bisa: “Un bon karera por duna bo sierto satisfakshon. Pero, mi a ripará ku hopi mas ta nesesario pa haña felisidat i  goso den bida. Promé ku mi a bira konsiente di e siñansa di Beibel riba e tópiko aki, mi ta kòrda kon diripiente mi a bin realisá ku eigenlijk bida no tin muchu sentido. Tur loke bo ta hasi ta: nase, krese i bira grandi, kasa, traha pa kria yu, eduká nan pa sigui presis e mesun siklo di bida, pa finalmente bira bieu i muri.

Ta despues ku mi a studia Beibel ku Testigunan di Yehova mi a bin risibí kontestanan satisfaktorio riba mi preguntanan tokante e propósito di bida. Mi estudio di Beibel a permití mi konosé Yehova komo persona i desaroyá un amor profundo p’e. Esaki ta duna mi e base pa mi keda semper ku un punto di bista spiritual saludabel segun ku mi ta hasi esfuerso pa biba na armonia ku loke mi sa ta su propósito. Awor, tantu ami komo mi kasá tin e satisfakshon di sa ku nos ta usando nos bida den e manera mas signifikativo posibel.”

Abo tambe por haña un sentido di propósito den bida dor di studia Beibel. Testigunan di Yehova ta kla pa yuda bo. Meskos ku Marina, Nicholas i Vincent, bo por haña e satisfakshon ku ta bini for di siña tokante Yehova i su propósito pa humanidat en general i pa abo personalmente. Lo bo haña no solamente e goso di kumpli ku bo nesesidatnan spiritual awor sino tambe lo bo haña e speransa di gosa di bida pa semper den perfekto salú físiko—un speransa ku ta habrí solamente pa esnan ku ta “rekonosé ku nan tin mester di Dios.”—Mateo 5:3, BPK.

Un manera pa bo buska Dios, òf mustra interes den kosnan spiritual, ta mediante orashon. Hesus a tuma tempu pa siña su disipelnan kon pa hasi orashon, dunando nan loke ta konosí komo e Orashon di Nos Tata. Kiko e orashon ei ta nifiká pa bo awe? Kon bo por benefisiá for di dje? E siguiente dos artíkulonan lo kontestá e preguntanan ei.

[Plachinan na página 6]

Marina

[Plachinan na página 7]

Nicholas

[Plachinan na página 7]

Vincent