“E Esena di e Mundu Aki Ta Kambiando”

“Ma esaki mi ta bisa, rumannan, tempu ta kòrtiku.”—1 KORINTIONAN 7:29.

1, 2. Ki kambionan bo a mira durante bo bida?

KI KAMBIONAN den mundu abo a mira durante bo bida? Bo por menshoná algun di nan? Por ehèmpel, tin e progreso ku hende a hasi riba tereno médiko. Grásias na investigashon den e kampo ei, den algun pais awor e edat promedio ku hende ta biba, a subi. Na prinsipio di siglo 20 nan tabata biba ménos ku 50 aña i awor nan ta biba riba 70 aña! Pensa tambe riba e maneranan ku nos a benefisiá di e uso apropiá di radio, televishon, telefon selular i mashin di faks. Otro avansenan importante ku nos no mester pasa por haltu ta esnan ku a tuma lugá riba tereno di edukashon, transporte i den asuntunan di derecho humano, kuanan tur ta kos ku a drecha bida di miónes di hende.

² Klaru ku no ta tur kambio tabata positivo. Ta imposibel pa nos ignorá e efektonan devastador di oumento di kriminalidat, e deterioro di norma i balor moral, e oumento drástiko di uso di droga, di divorsio, di inflashon i e kresiente menasa di terorismo. En todo kaso, lo bo ta probablemente di akuerdo ku loke apòstel Pablo a skirbi hopi tempu pasá: “E esena di e mundu aki ta kambiando.”—1 Korintionan 7:31, NW.

3. Kiko Pablo tabata ke men ora el a skirbi ku “e esena di e mundu aki ta kambiando”?

³ Den e idioma griego original, e palabranan ku Pablo a usa ta nifiká ku el a kompará mundu ku un esenario di teatro. E aktornan riba e esenario ei—personanan famoso riba tereno polítiko, religioso i kultural—ta subi esenario, hunga nan respektivo ròlnan, anto kaba ta baha bai pa otro hende subi. Esaki ta tumando lugá pa siglonan kaba. Den pasado, un dinastia por tabata na mando pa dékadanan —asta siglonan—i tabata tuma hopi tempu pa un kambio sosodé. Awendia sí no ta asina, ya ku rumbo di historia por kambia den un fregá di wowo ora nan asesiná un lider prominente! Sí, den e tempu turbulento aki, nos no sa kiko mañan lo trese.

4. (a) Ki punto di bista balansá kristiannan mester tin relashoná ku susesonan mundial? (b) Kua dos área di evidensia konvinsente nos lo konsiderá awor?

⁴ Si mundu ta un esenario i su lidernan ta e aktornan, anto kristiannan ta e públiko ku ta para wak, e espektadornan. * Sin embargo, dor ku kristiannan “no ta di mundu,” nan no ta preokupá nan mes demasiado ku e aktuashon òf asta ku e karakter individual di e aktornan. (Juan 17:16) Mas bien, nan ta wak ansiosamente si tin indikashonnan ku ta mustra ku e drama ta yegando su kulminashon—un final katastrófiko—pasobra nan sa ku e sistema aki tin ku terminá promé ku Yehova introdusí e mundu nobo di hustisia tan sperá. * P’esei laga nos analisá dos área di evidensia ku ta demostrá ku nos ta bibando den e tempu di e fin i ku e mundu nobo ta serka. Nan ta (1) kronologia bíbliko i (2) e situashon mundial ku ta bai atras.—Mateo 24:21; 2 Pedro 3:13.

Porfin Ta Solushoná un Misterio!

5. Kiko ta ‘e tempunan stipulá di e paganonan,’ i dikon nan ta interesá nos?

⁵ Kronologia ta un estudio di e relashon ku tin entre tempu i susesonan. Hesus a papia di un tempu durante kua e lidernan di mundu lo tabata e aktornan prinsipal riba esenario, sin ku e Reino di Dios lo a interferí. Hesus a yama e periodo ei “e tempunan [stipulá] di e paganonan.” (Lukas 21:24) Na fin di e ‘tempunan stipulá’ ei Dios su Reino selestial lo a bini na poder, ku Hesus komo su Gobernante legítimo. Na prinsipio, Hesus lo a goberná “meimei di [su] enemigunan.” (Salmo 110:2) Kaba, segun Daniel 2:44, e Reino lo a “garna i pone un fin” na tur gobièrnu humano, i lo e dura pa semper.

6. Ki ora ‘e tempunan stipulá di e paganonan’ a kuminsá, kuantu nan a dura, i ki ora nan a terminá?

⁶ Ki ora ‘e tempunan stipulá di e paganonan’ lo a terminá i e gobernashon di e Reino di Dios lo a kuminsá? E kontesta, ku tabata “seyá te na e tempu di e fin,” tin di hasi ku kronologia bíbliko. (Daniel 12:9) Segun ku e “tempu” ei tabata aserká, Yehova a dal paso pa revelá e kontesta na un grupo di studiante di Beibel humilde. Ku yudansa di Dios su spiritu santu, nan a bin komprondé ku ‘e tempunan stipulá di e paganonan’ a kuminsá ku destrukshon di Yerusalèm na aña 607 promé ku nos era i ku e tabata un periodo di 2.520 aña. A base di esei nan a kalkulá ku aña 1914 a marka fin di ‘e tempunan stipulá di e paganonan.’ Tambe nan a bin realisá ku 1914 tabata komienso di e fin di e sistema di kosnan aki. Komo un studiante di Beibel, bo por usa e Skritura pa splika kon ta kalkulá e fecha di 1914? *

7. Kua ta e tekstonan bíbliko ku ta yuda nos kalkulá komienso, durashon i fin di e shete periodo di tempu menshoná den buki di Daniel.

⁷ Nos ta haña un indikashon skondí den e buki di Daniel. Siendo ku Yehova a usa Rei Nabukodonosor di Babilonia pa destruí Yerusalèm na komienso di ‘e tempunan stipulá di e paganonan’ na aña 607, Yehova a revelá mediante e gobernante ei ku e nashonnan lo a sigui goberná pa un total di shete periodo di tempu simbóliko sin ku Dios ta intervení. (Ezekiel 21:26, 27; Daniel 4:16, 23-25) Kon largu e shete periodo di tempu ei tabata? Segun  Revelashon 11:2, 3, i 12:6, 14, tres tempu i mei ta 1.260 dia. Pues, shete tempu ta dòbel esei, esta, 2.520 dia. Esei ta tur kos? Nò, pasobra Yehova a duna profeta Ezekiel, kende a biba mesun tempu ku Daniel, e regla pa interpretá e simbolismo: “Mi a stipulá esaki pa bo . . . un dia pa kada aña.” (Ezekiel 4:6) P’esei e shete periodo di tempu lo ta en realidat 2.520 aña. Si nos kuminsá konta e periodo di 2.520 aña for di aña 607 promé ku nos era, nos por konkluí ku e tempu stipulá lo mester a terminá na aña 1914.

“E Tempu di e Fin” Ta Keda Konfirmá

8. Ki evidensia bo por indiká ku ta mustra ku e situashon di mundu a empeorá desde 1914?

⁸ Susesonan mundial for di 1914 en adelante a konfirmá ku e komprondementu menshoná ariba, basá riba kronologia bíbliko, ta korekto. Hesus mes a bisa ku “fin” di e sistema aki lo ta marká pa guera, hamber i pèst. (Mateo 24:3-8; Revelashon 6:2-8) Anto esei sigur tabata e kaso desde 1914. Apòstel Pablo a agregá mas informashon, bisando ku lo tin un diferensia bisto den e aktitut di hende pa ku otro. El a duna un deskripshon eksakto di e kambionan ku nos tur a mira.—2 Timoteo 3:1-5.

9. Kiko opservadónan tin di bisa tokante e situashon di mundu desde 1914?

⁹ Di bèrdat “e esena di e mundu aki” a kambia asina hopi desde 1914? Den e buki The Generation of 1914 (E Generashon di 1914), Profèser Robert Wohl a bisa: “Esnan ku a sobrebibí e guera nunka por a kita for di nan mente e konvikshon ku na ougùstùs 1914 un mundu a terminá i un otro a kuminsá.” Konfirmando esaki, Dr. Jorge A. Costa e Silva, direktor di salú mental di e Organisashon Mundial di Salú, a skirbi: “Nos ta biba den tempu di kambionan ekstraordinariamente rápido, loke finalmente ta generá nivelnan di ansiedat i strès nunka bisto den historia humano.” Bo tambe a eksperensiá esei personalmente?

10. Kon Beibel ta splika pakiko e situashon di mundu a empeorá desde 1914?

¹⁰ Ken ta e malechor tras di e situashon di mundu ku ta empeorá? Revelashon 12:7-9 ta desenmaskará e kulpabel: “Tabatin guera den shelu, Miguel [Hesukristu] i su angelnan tabata hasi guera kontra e dragon [Satanas e Diabel]. I e dragon i su angelnan tabata hasi guera, i nan no a prevalesé, i no tabatin lugá mas pa nan den shelu. I e gran dragon a wòrdu tirá abou, . . . kende ta gaña henter mundu.” Pues, Satanas e Diabel ta esun ku ta kousa problema, i e echo ku nan a sak’é for di shelu na 1914 a nifiká “ai di tera i laman, pasobra Diabel a baha bin serka boso ku gran furia, sabiendo ku ta ked’é solamente un poko tempu mas.”—Revelashon 12:10, 12.

Loke Lo Pasa den e Último Esena

11. (a) Ki métodonan Satanas ta usa pa gaña “henter mundu”? (b) Apòstel Pablo a hala atenshon na ki esfuerso spesial di Satanas?

¹¹ Sabiendo ku su fin ta yegando serka, Satanas  for di 1914 a oumentá su esfuerso pa gaña “henter mundu.” Komo e gañadó maestro, Satanas ta traha tras di kortina, i ta pone riba esenario komo su aktornan, lidernan mundial i personanan ku hopi influensia. (2 Timoteo 3:13; 1 Juan 5:19) Un di su metanan ta pa laga humanidat kere ku su manera di goberná por trese berdadero pas pa nan. Por lo general, su propaganda tin éksito, pasobra hende ta keda optimista apesar di kresiente evidensia ku kosnan ta bayendo di malu pa pió. Apòstel Pablo a profetisá ku djis promé ku Dios destruí e sistema di kosnan aki, lo tin un manifestashon notabel di propaganda satániko. El a skirbi: “Miéntras ku nan ta bisa: ‘Pas i siguridat!’ pèrdishon lo bin riba nan diripiente, manera doló di parto riba un muhé na estado.”—1 Tesalonisensenan 5:3; Revelashon 16:13.

12. Ki esfuersonan kontinuo tabatin pa trese pas den nos tempu?

¹² Den último añanan, polítikonan ku frekuensia a usa e frase “pas i siguridat” pa deskribí vários plan humano. Nan a asta designá aña 1986 komo Aña Internashonal di Pas, ounke e aña ei no a kumpli ku su nòmber. Ta e esfuersonan aki di lidernan mundial ta e kumplimentu kompletu di 1 Tesalonisensenan 5:3, òf Pablo tabata referí na un suseso spesífiko asina dramátiko ku henter mundu lo a tuma nota di dje?

13. Ora Pablo a profetisá e gritu di “Pas i siguridat!,” ku kiko el a kompará e destrukshon ku lo sigui, i kiko nos por siña for di esaki?

¹³ Komo ku hopi biaha ta te despues ku profesianan di Beibel a kumpli òf segun ku nan ta kumpli nos por komprondé nan plenamente, nos lo tin ku warda mira kiko ta bai pasa. Pero ta interesante sí ku Pablo a kompará e destrukshon repentino despues di e gritu di “Pas i siguridat!” ku doló di parto di un muhé na estado. Durante un periodo di nuebe luna, un mama na estado pokopoko ta bira mas konsiente di e beibi ku ta kresiendo den su barika. Kisas e por tende e beibi su kurason bati òf e ta sintié ta move den su barika. Podisé e beibi ta asta dal e mama skòp. E señalnan ta bira mas i mas kla te ora ku riba un dia e mama ta sinti un doló fuerte, lokual ta indiká ku e momentu tan sperá—e nasementu di e beibi—a yega. P’esei, sea kual sea e manera ku e gritu profetisá di “Pas i siguridat!” kumpli, lo e hiba na un suseso repentino i doloroso, pero ku al final lo ta un bendishon: destrukshon di maldat i komienso di un sistema mundial nobo.

14. Den ki órden general susesonan futuro lo tuma lugá, hibando na ki resultado?

¹⁴ Pa kristiannan ku ta para wak komo espektador, e binidero destrukshon lo ta algu ku ta inspirá temor. Promé, e reinan di tera (e parti polítiko di e organisashon di Satanas) lo ataká e apoyadónan di Babilonia e Grandi (e parti religioso) i destruí nan. (Revelashon 17:1, 15-18) Pues, den un kambio sorprendente di akontesimentu, e reino di Satanas lo bira dividí kontra su mes, i un parti lo ataká e otro parti, i Satanas lo no por hasi nada pa evitá esei. (Mateo 12:25, 26) Yehova lo pone den kurason di e reinan di tera “pa ehekutá su propósito,” esta, kaba ku su atversarionan religioso for di riba tera. Despues ku nan destruí religion falsu, Hesukristu lo enkabesá su ehérsitonan selestial pa kaba kompletamente ku loke ta resta di e organisashon di Satanas: e elementonan komersial i polítiko. Por último, lo saka Satanas mes for di akshon. Ku esei, e kortina di e esenario mundial lo baha, i e drama ku tin hopi tempu ta hunga, lo yega na su fin.—Revelashon 16:14-16; 19:11-21; 20:1-3.

15, 16. Ki impakto e rekordatorio ku ‘e tempu ku a resta ta kòrtiku’ mester tin riba nos bida?

¹⁵ Ki tempu tur e kosnan aki lo sosodé? Nos no sa e dia ni e ora. (Mateo 24:36) Pero loke sí nos sa ta ku “tempu ta kòrtiku.” (1 Korintionan 7:29) P’esei ta importante pa nos hasi bon uso di e tempu ku ta resta. Kon? Manera apòstel Pablo a splika, nos mester usa nos tempu pa hasi e kosnan mas importante, a  kosto di kosnan innesesario, i laga kada dia konta. Pakiko? “Pasobra e dianan ta malu.” I dor ku nos ta ‘komprondé kiko ta Yehova su boluntat’ pa nos, nos lo no malgastá e tiki tempu balioso ku a resta.—Efesionan 5:15-17; 1 Pedro 4:1-4.

¹⁶ Unabes ku nos sa ku henter e sistema di kosnan aki lo ser eliminá, ki efekto esei mester tin riba kada un di nos personalmente? Apòstel Pedro a skirbi pa nos benefisio: “Komo ku tur e kosnan aki lo wòrdu destruí di e manera aki, ki sorto di hende boso mester ta den un kondukta santu i deboto.” (2 Pedro 3:11) En bèrdat esaki ta e sorto di hende ku nos mester ta! Na armonia ku Pedro su konseho sabí, nos tin ku (1) vigilá nos kondukta pa nos por tin sigur ku e ta santu i (2) hasi sigur ku nos obranan di deboshon i selo den Yehova su sirbishi semper ta reflehá nos amor profundo p’e.

17. Kontra ki trampanan di Satanas kristiannan fiel mester vigilá?

¹⁷ Amor pa Dios lo yuda nos pa no pega nos kurason na e mundu aki debí na e kosnan atraktivo ku e tin. En bista di loke ta spera e sistema di kosnan aktual, ta peligroso pa nos namorá di e enkanto i luho di e estilo di bida mundano i opseshoná ku plaser. Ounke nos ta biba i traha den mundu, nos mester hasi kaso di e konseho sabí pa no hasi uso kompletu di mundu. (1 Korintionan 7:31) De echo, nos tin ku hasi nos bèst pa protehá nos mes pa asina e propaganda di mundu no gaña nos. E mundu aki lo no logra solushoná su problemanan. Lo e no sigui mantené su mes pa tempu indefiní. Dikon nos por ta sigur di esaki? Pasobra e Palabra inspirá di Dios ta bisa esei: “E mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”—1 Juan 2:17.

Lo Mihó Tin Ku Bin Ainda!

18, 19. Kua ta e kambionan ku bo ta anhelá pa mira den e mundu nobo, i dikon lo ta bale la pena ku bo a warda?

¹⁸ Pronto Yehova lo baha e kortina riba Satanas i su apoyadónan. Despues di esei, ku e bendishon di Dios, fiel sobrebibientenan di e fin di e sistema aki lo kuminsá traha pa trese kambionan riba “esenario” ku lo dura pa semper. Lo no tin guera mas pa daña e esenario mundial; Dios lo “hasi gueranan stòp te na e fin di tera.” (Salmo 46:9) Na lugá di skarsedat di kuminda, “lo tin abundansia di maishi den e tera.” (Salmo 72:16) Ayó prizon, warda di polis, malesanan transmití seksualmente, magnatenan di narkotráfiko, tribunal di divorsio, proseduranan di bankarota i terorismo.—Salmo 37:29; Isaias 33:24; Revelashon 21:3-5.

¹⁹ Dios lo hasi e grafnan konmemorativo bashí, i míles di miónes di hende resusitá—mas aktor—lo subi esenario. Ki un goso lo tin segun ku un generashon di hende ta topa otro generashon i ora ku sernan kerí ku tabata separá for di otro pa hopi tempu ta bolbe brasa otro kalurosamente! Ku tempu, tur hende ku ta na bida lo ta adorá Yehova. (Revelashon 5:13) Ora ku kaba di hasi tur kambio, lo hisa e kortina pa revelá un paradeis mundial. Kon lo bo sinti segun ku bo ta mira e esena? No tin duda ku lo e konmové bo pa deklará: ‘Mi a warda hopi riba esaki, pero tabata bale la pena!’

[Nota]

Kon Lo Bo Kontestá?

• Kon e palabranan di apòstel Pablo ku “e esena di e mundu aki ta kambiando” a resultá bèrdat den nos tempu?

• Kon kronologia di Beibel ta indiká ki ora tabata fin di ‘e tempunan stipulá pa e paganonan’?

• Kon e kambionan den e situashon di mundu ta konfirmá ku 1914 a marka e komienso di “e tempu di e fin”?

• Ki efekto e echo ku ‘e tempu ku a resta ta kòrtiku’ mester tin riba nos?

[Preguntanan di Estudio]

[Plachi na página 20]

Porfin e misterio a keda solushoná!