Djis un Kustumber òf Ta Soborno?

NA ALGUN skol na Polonia kaminda nan ta duna enseñansa superior, studiantenan tin kustumber di pone plaka huntu pa nan kumpra regalo pa nan dosentenan, ku e speransa di haña mihó punto pa eksamen. Nada straño anto ku un hóben kristian ku yama Katarzyna a hañ’é den un situashon difísil. E tabata puntra su mes: “Kiko mi tin ku hasi, duna plaka òf nò?” Su kompañeronan di skol a rasoná: “Ta un kustumber normal. Bo no ta pèrdè nada, al kontrario bo ta gana hopi. Ta dikon bo ta duda anto?”

Katarzyna a bisa: “Mi tin ku atmití ku durante mi promé aña, mi a duna plaka. Ta despues mi a bin realisá ku di e manera aki mi a koperá ku pasamentu di plaka bou di mesa, un kos ku Beibel ta kondená.” El a kòrda riba tekstonan bíbliko ku ta mustra ku Yehova ta desaprobá fuertemente di soborno òf pasamentu di plaka bou di mesa. (Deuteronomio 10:17; 16:19; 2 Krónikanan 19:7) Katarzyna a agregá: “Mi a mira kon fásil ta pa entregá na preshon di bo pareunan. Mi a bolbe pensa riba e asuntu i desde e tempu ei nunka mas mi no a partisipá den e kustumber aki.” Durante e último tres añanan, apesar ku otro studiantenan ta hasi bofon di dje, e por a splika algun di nan ku e no ta partisipá den duna plaka pa e “regalonan” aki pa motibu di su konvikshonnan ku ta basá riba Beibel.

Algun studiante a akusá Katarzyna ku e tin un aktitut egoista i antisosial. El a bisa: “Te ainda tin algun di nan ku no ta trata mi bon. Di otro banda, hopi di nan ta respetá mi punto di bista, loke ta pone mi sinti mi bon.” Katarzyna a bira konosí komo un Testigu di Yehova ku ta pone prinsipionan di Beibel na práktika den su bida diario.