Yehova Ta Ripará Loke Abo Ta Hasi?

KON lo bo kontestá e pregunta ei? Hopi hende lo bisa: ‘Mi ta kere ku Dios a tuma nota di e hazañanan di hòmbernan manera Moisés, Gideon i David, pero mi ta duda ku e ta interesá den kualkier kos ku mi por hasi. Ami sigur no ta manera Moisés, Gideon òf David.’

Ta sierto ku algun hòmber fiel den tempu bíbliko a efektuá algun akto ekstraordinario di fe. Nan ‘a konkistá reinonan, a sera boka di leonnan, a paga e poder di kandela, i a skapa for di e filo di spada.’ (Hebreonan 11:33, 34) Sin embargo, tabatin otronan ku a desplegá nan fe den maneranan ménos espektakular. I Beibel ta sigurá nos ku Dios a ripará nan aktonan di fe tambe. Pa ilustrá esei, laga nos konsiderá e ehèmpelnan bíbliko di un wardadó di bestia, un profeta i un biuda.

Un Wardadó di Bestia Ta Ofresé Sakrifisio

Kiko bo ta kòrda di Abel, e di dos yu hòmber di Adam ku Eva? Podisé bo ta kòrda ku el a muri komo mártir, un eksperensia ku probablemente masha poko di nos lo pasa aden. Pero tin un otro motibu pakiko Dios a tuma nota di Abel mas promé.

Un dia Abel a skohe algun di su mihó bestianan for di su tou i a ofresé un sakrifisio na Dios. Pa hende awendia, kisas e sakrifisio ei ta algu masha simpel, pero Yehova sí a tuma nota di dje i a mustra ku el a aprob’é. Sin embargo, esei no ta tur kos. Kasi kuater mil aña despues, Yehova a inspirá apòstel Pablo pa skirbi tokante esaki den e buki di Hebreonan. Ounke hopi aña a pasa, Dios no a lubidá e simpel sakrifisio ei!—Hebreonan 6:10; 11:4.

Kiko a yuda Abel disidí ki tipo di sakrifisio e mester a ofresé? Beibel no ta bisa esei, pero Abel mester a pensa seriamente riba e asuntu ei. Dor ku e tabata un wardadó di bestia, no tabata straño ku el a ofresé algun bestia for di su tou. Sin embargo, tuma nota ku el a duna esnan mihó—esnan “vèt.” (Génesis 4:4) Ta posibel tambe ku el a meditá riba loke Yehova a bisa e kolebra den e hòfi di Eden: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Génesis 3:15; Revelashon 12:9) Ounke Abel no a komprondé ken ta “e muhé” ni su “simia,” kisas el a realisá ku e ‘machikamentu di hilchi’ di e simia di e muhé lo a enserá dramamentu di sanger. Siguramente el a rekonosé ku nada lo no tin mas balor ku un kriatura ku tin rosea di bida. En todo kaso, e sakrifisio ku el a ofresé tabata masha apropiá.

Meskos ku Abel, kristiannan djawe tambe ta ofresé sakrifisio na Dios. Nan ta ofresé, no e promé bestianan ku a nase den nan tou, sino “un sakrifisio di alabansa, esta, e fruta di lepnan ku ta hasi deklarashon públiko di [Dios  su] nòmber.” (Hebreonan 13:15, NW) Nos lepnan ta hasi deklarashon públiko ora nos ta kompartí nos fe ku otro hende.

Lo bo kier mehorá e kualidat di bo sakrifisio? Si ta asina, pensa seriamente riba e nesesidatnan di e hendenan den bo teritorio. Kiko ta preokupá nan? Den kiko nan ta interesá? Ki parti dje mensahe di Beibel lo atraé nan? Kada bes ku bo duna testimonio, analisá kon e kombersashon a bai pa asina bo por mehorá i bira mas efikas. I ora bo ta papia di Yehova, hasié ku konvikshon di henter bo kurason. Hasi bo sakrifisio un berdadero “sakrifisio di alabansa.”

Un Profeta Ta Prediká Serka Hende Ku No Ta Gusta e Mensahe

Awor konsiderá profeta Enok. Kisas e tabata e úniko Testigu di Yehova Dios. Abo tambe meskos ku Enok, ta e úniko den bo famia ku ta sirbi Yehova fielmente? Abo ta e úniko alumno den bo klas òf e úniko empleado na bo trabou ku ta pega na prinsipionan di Beibel? Si ta asina, podisé bo ta haña bo ku oposishon. Amigunan, famia, kompañeronan di trabou kisas ta preshoná bo pa kibra Dios su leinan. Nan lo por bisa: “Ningun hende lo haña sa nunka loke bo a hasi. Nos no ta bai reda riba bo.” Nan lo por insistí ku ta ko’i kèns bo ta hasi dor di preokupá ku normanan moral di Beibel, pasobra Dios no ta interesá den loke bo ta hasi. Dor ku nan no ta gusta ku bo no ta pensa ni hasi meskos ku nan, nan lo por hasi tur loke ta na nan alkanse pa kibra bo resistensia.

Nos tin ku atmití sí ku no ta fásil pa wanta preshon, pero e no ta imposibel. Pensa riba Enok, e di shete hòmber den e liña di desendensia di Adam. (Hudas 14) Pa e tempu ku Enok a nase, mayoria hende a pèrdè tur heful moral. Nan abla tabata bergonsoso; nan kondukta tabata “duru” òf ofensivo. (Hudas 15) Hopi kos ku nan tabata hasi ta meskos ku loke hopi hende djawe ta hasi.

Kon Enok a trata ku e asuntu? E kontesta riba e pregunta ei ta importante pa nos awe. Ounke e tempu ei Enok por tabata e úniko hende riba tera ku a adorá Yehova, en realidat e no tabata su so. Enok a kana ku Dios.—Génesis 5:22.

Tur loke Enok a buska den bida ta pa agradá Dios. E tabata sa ku kana ku Dios a nifiká mas ku djis hiba un bida moralmente limpi. Yehova tabata kier p’e prediká. (Hudas 14, 15) E mester a avisá e hendenan ku Yehova a ripará nan echonan malbado. Enok a sigui kana ku Dios pa mas ku 300 aña—hopi mas ku kualkier un di nos a perseverá. El a sigui kana ku Dios te na su morto.—Génesis 5:23, 24.

Meskos ku Enok, nos tambe a haña e tarea pa prediká. (Mateo 24:14) Fuera di duna testimonio di kas pa kas, nos ta purba alkansá nos famianan, nos relashonnan komersial i kompañeronan di klas ku e bon nobo. Sin embargo, sa sosodé ku nos ta vasilá pa duna testimonio ku kurashi. Esei sa ta e kaso ku bo? No desesperá. Imitá e promé kristiannan i resa pidi Dios kurashi. (Echonan 4:29, NW) Nunka lubidá ku tanten ku bo ta kana ku Dios, hamas bo ta realmente bo so.

Un Biuda Ta Prepará un Kuminda

Imaginá bo, un biuda ku Beibel no ta menshoná su nòmber ta risibí dos bendishon pasobra el a prepará un simpel kuminda! E no tabata un israelita, sino un stranhero ku a biba den siglo dies promé ku nos era, den e stat di Sarepta. Na  fin di un periodo largu di sekura i hamber, e biuda su suministro di kuminda tabata serka di kaba. Tur loke el a sobra tabata un man di hariña i sufisiente zeta p’e kushiná e último kuminda p’e mes i pa su yu hòmber.

Na e momento ei, un bishitante a yega. Tabata profeta Elias, i el a pidi e biuda dun’é for di esun tiki kuminda. Apénas tabatin sufisiente p’e biuda i su yu hòmber. Lo no a sobra nada p’e bishitante. Pero basá riba loke Yehova a bisa Elias, el a sigurá e biuda ku si e kompartí su kuminda kuné, e ku su yu hòmber lo no pasa hamber. Pa e biuda por a kere ku e Dios di Israel lo a tuma nota di dje, un biuda stranhero, e mester tabatin fe. Tòg, el a kere Elias i Yehova a rekompens’é. “E kòmchi di hariña no a bira bashí ni e butishi di zeta no a bira bashí, konforme e palabra di SEÑOR ku el a papia pa medio di Elias.” E señora i su yu hòmber tabatin un suministro regular di kuminda te ora e hamber a terminá.—1 Reinan 17:8-16.

Sin embargo, tabatin un otro bendishon ta spera e biuda. Algun tempu despues di e milager ei, su yu hòmber stimá a bira malu i muri. Duele a konmové Elias i el a roga Yehova pa duna e mucha hòmber bida atrobe. (1 Reinan 17:17-24) Esaki lo a nifiká un milager sin presedente. No tin registro di ningun hende ku a yega di ser resusitá promé ku esei! Yehova lo bolbe mustra miserikòrdia na e biuda stranhero aki? El a hasié. Yehova a duna Elias poder pa resusitá e mucha hòmber. Relashoná ku e señora privilegiá aki, Hesus a bisa despues: ‘Tabatin hopi biuda na Israel i tòg Elias a wòrdu mandá na Sarepta, na tera di Sidon, serka un muhé biuda.’—Lukas 4:25, 26.

Awe asta den paisnan industrialisá, e situashon ekonómiko ta leu for di stabil. Algun kompania grandi a kita trahadónan ku tabata leal na nan trabou pa hopi dékada. Dor ku un kristian tin chèns di pèrdè su trabou kisas e por sintié tentá pa dediká demasiado tempu na trabou, sperando ku su doño di trabou lo laga e sí keda. Esei por pone ku e tin tiki tempu pa asistí na reunionnan kristian, pa partisipá den e sirbishi di vèlt, òf pa perkurá pa e nesesidatnan emoshonal i spiritual di su famia. Sin embargo, e ta sinti ku e tin ku mantené su trabou kasi kueste loke kueste.

Un kristian ku ta den un situashon ekonómiko difísil asina, tin motibu pa ta preokupá. Awendia ta difísil pa haña trabou. Mayoria di nos no ta lucha pa bira riku, pero meskos ku e biuda di Sarepta, nos kier tin e kosnan nesesario pa bida. Sin embargo, apòstel Pablo ta rekòrdá nos ku Dios a bisa: “Nunka lo mi no bandoná bo, i nunka lo mi no laga bo desampará.” Ku tur konfiansa nos por bisa: “[Yehova] ta mi yudadó, lo mi no tin miedu. Kiko hende por hasimi?” (Hebreonan 13:5, 6) Pablo tabata dispuesto pa riska su bida pa e promesa ei, i semper Yehova a perkurá p’e. Dios lo hasi meskos pa nos, si nos no bandon’é.

Podisé nos ta pensa ku nunka nos lo por logra e hazañanan ku personanan spiritual manera Moisés, Gideon i David a logra, pero nos por imitá nan fe sí. I nos por kòrda riba e simpel aktonan di fe ku Abel, Enok i e biuda di Sarepta a efektuá. Yehova ta interesá den tur akto di fe—asta den esnan chikitu. Ora un studiante ku ta teme Dios nenga di aseptá droga for di su pareu, ora un empleado kristian rechasá avansenan inmoral na trabou, òf ora un Testigu di edat asistí fielmente na e reunionnan di kongregashon ounke e ta kansá i ta sufri kebrante di salú, Yehova ta ripará esei. I e ta keda kontentu!—Proverbionan 27:11.

 Abo Ta Ripará Loke Otronan Ta Hasi?

Sí, Yehova ta ripará loke nos ta hasi. P’esei, komo imitadónan di Dios, nos mester ta alerta pa rekonosé e esfuersonan ku otro hende ta hasi. (Efesionan 5:1) Pakiko no tira un bista mas djaserka riba e desafionan ku bo kompañeronan kristian ta enfrentá pa nan por asistí na reunionnan di kongregashon, pa partisipá den sirbishi di vèlt i asta pa kumpli ku nan aktividatnan di tur dia?

Anto, laga bo kompañeronan ku ta adorá Yehova huntu ku bo sa ku bo ta apresiá nan esfuerso. Nan lo keda kontentu ku bo ta ripará loke nan ta hasi. I bo interes den nan lo por sirbi komo un garantia pa nan ku Yehova tambe ta ripará loke nan ta hasi.