Kiko Lo Bo Tin Gana di Puntra Dios?

RÒNT mundu tin hende ku tin pregunta importante tokante bida. Abo tambe ta un di nan? Hopi di nan a plantia nan preguntanan na instruktornan religioso pero nan no a haña kontestanan satisfaktorio. Otronan a kana rònt ku e preguntanan aki den nan mente. Algun a resa pa haña guia. Ta realmente posibel pa bo haña kontesta for di Dios riba asuntunan ku ta konfundí bo? At’akí algun dje preguntanan ku hopi hende a bisa ku nan lo tin gana di hasi Dios:

Dios, ta ken bo ta realmente?

Hende ta mira Dios manera nan kultura òf e religion di nan mayornan a siña nan. Òf kisas nan a forma nan propio opinion. Tin hende ta usa un nòmber pa Dios; otronan simplemente ta yam’é Dios. Esei ta realmente importante? Akaso ta eksistí un solo Dios berdadero ku ta revelá na nos ken e ta i kon su nòmber ta?

Dikon tin asina tantu sufrimentu?

Bo por haña ku un persona ku a hiba un bida inmoral òf deskabeyá ku a kousa daño na su salú òf pon’é keda planbarí, ta keha. Pero podisé e sa masha bon ta dikon e ta sufri.

Sin embargo, tin hopi hende ta sufri masha pisá sin ku ta nan falta. Algun di nan tin malesanan króniko. Otronan ta lucha kontra desbentahanan aparentemente insuperabel pa nan por tin un dak riba nan kabes i sufisiente kuminda pa nan famia. Miónes di nan ta víktima di krímen, guera, violensia pa loko, desaster natural òf inhustisia na man di hende den puesto di outoridat.

Ta di komprondé anto ku hopi hende ta puntra: ‘Dikon e kondishonnan ei a plama tur kaminda asina? Dikon Dios ta permití tur e sufrimentu aki?’

 Kiko mi ta hasi riba e mundu aki? Kiko ta e propósito di bida?

Hopi bes e preguntanan aki ta lanta dor di e frustrashon ku un hende ta sinti pasobra su aktividatnan diario no ta dun’é berdadero satisfakshon, i esaki ta e kaso di hopi hende. Miónes di otronan ta kere ku di un manera òf otro Dios a duna kada hende un destino. Pero ta asina? Si di bèrdat Dios tin un propósito spesial pa bo, sin duda lo bo kier sa kiko esei ta.

Di tur buki na mundu, tin unu ku ta bisa bon kla ku e ta inspirá pa Dios. I manera lo bo spera di un mensahe ku realmente ta bini di Dios pa henter humanidat, e buki aki ta disponibel den hopi mas idioma ku kualkier otro buki ku a yega di ser skirbí. Ta trata di e Beibel Santu. Den dje e Kreadó di shelu i tera, Dios mes, ta revelá ken e ta i kon ta su nòmber. Abo sa su nòmber? Bo sa kiko Beibel ta bisa tokante e klase di Persona ku Dios ta? Bo sa kiko e ta bisa ku Dios ta ferwagt di bo?

 [Rekonosementu pa Potrèt na página 2]

KAFT: Chad Ehlers/Index Stock Photography

[Rekonosementu pa Potrèt na página 3]

Seru: Chad Ehlers/Index Stock Photography