Hóbennan—Boso Ta Progresá Spiritualmente?

“OUNKE mi tabata bai e reunionnan kristian, mi no tabatin un deseo profundo pa sirbi Yehova,” Hideo ta bisa di e tempu ku e tabata bai skol sekundario. “Hopi bes mi a imaginá mi mes komo un hóben popular bou di mi amigunan di skol i ku ta kana broma riba kaya ku mucha muhé. Mi no tabatin metanan spesífiko ni mi no tabatin gana di hasi niun progreso spiritual.” Meskos ku Hideo, tin hopi hóben ku aparentemente t’ei djis pa t’ei numa, sin niun deseo di logra un meta ku ta bale la pena òf pa hasi kualkier progreso.

Si bo ta hóben, probablemente bo ta masha entusiasmá ora bo ta hasi deporte òf ta okupá bo ku un hòbi. Pero, ora ta trata di aktividatnan spiritual, kisas bo no ta sinti meskos. Bo ta kere ku bo por sinti bo entusiasmá ku metanan spiritual? Wak e palabranan aki di e salmista: “E testimonio di SEÑOR ta fiel, e ta hasi hende simpel bira sabí. . . . E mandamentunan di SEÑOR ta puru, nan ta iluminá wowo.” (Salmo 19:7, 8) E Palabra di Dios por dirigí hende “simpel” òf sin eksperensia p’e aktua sabí, na moda di papia ‘poniendo su wowo bria.’ [NW] Sí, bo por keda fasiná i enkantá ku kos spiritual tambe. Pero kiko bo mester hasi pa bo sinti asina? Unda bo tin ku kuminsá?

Ser Motivá pa Sirbi Dios

Na promé lugá, bo mester ta motivá pa sirbi Dios. Tuma por ehèmpel e kaso di e hóben Rei Josias di Huda. Ora a deskubrí e buki di e Lei di Yehova den e tèmpel, Josias a laga nan les’é p’e i a keda profundamente konmoví pa loke el a tende. Dor di esei, “Josias a kita tur e abominashonnan for di tur e paisnan ku tabata pertenesé na e yunan di Israel.” (2 Krónikanan 34:14-21, 33) Lesamentu di e Palabra di Dios a motivá Josias pa hasi mas pa e adelanto di adorashon puru.

Abo tambe por desaroyá un deseo pa sirbi Yehova si bo lesa Beibel regularmente i meditá riba loke bo ta lesa. Esei ta loke a motivá Hideo. El a sera mashá ku un pionero di mas edat, esta, un Testigu di Yehova ku ta sirbi tempu kompletu. E pionero tabata studia Beibel ku smak i a hasi esfuerso pa apliká su siñansanan den su bida. Su ehèmpel komo pionero a animá Hideo mashá, i Hideo a kuminsá hasi meskos i a desaroyá un deseo fuerte pa sirbi Dios i otro hende. Su progreso spiritual a resultá den un bida ku propósito.

 Algu ku por motivá hóbennan ta di lesa Beibel tur dia. Takahiro ta splika: “Ki ora ku mi subi mi kama i realisá ku mi no a lesa mi Beibel ainda pa e dia ei, mi ta lanta atrobe i hasié. Dor di esei, mi a sinti e guia di Yehova. Lesamentu di Beibel tur dia a kontribuí hopi na mi progreso spiritual. Determiná pa partisipá mas tantu ainda den Yehova su sirbishi, mi a kuminsá traha pionero regular djis despues ku mi a kaba skol sekundario. I mi ta gust’é masha tantu.”

Fuera di lesa Beibel, kiko mas por yuda bo fortalesé bo motivashon pa alabá Yehova? Tomohiro su mama a siñ’é e bèrdat di Beibel. E ta bisa: “Ta te ora mi a studia e buki Bida sí tin un propósito di kaft pa kaft ku mi 19 aña di edat, mi a sinti ku e amor di Yehova i Hesus su sakrifisio di reskate a konmové mi profundamente. E apresio ei p’e amor di Dios a motivá mi pa hasi mas den sirbishi di Yehova.” (2 Korintionan 5:14, 15) Un estudio personal diligente di Beibel a animá hopi hóben meskos ku Tomohiro pa progresá spiritualmente.

Kiko bo por hasi si despues di tur esei ainda bo no tin un deseo di kurason pa sirbi Yehova? Na ken bo por akudí pa haña yudansa? Apòstel Pablo a skirbi: “Pasobra ta Dios ta esun ku ta obra den boso, tantu pa kier komo pa hasi.” (Filipensenan 2:13) Si bo pidi Yehova yuda bo, lo e duna bo su spiritu santu libremente, lokual lo duna bo poder pa bo no solamente “hasi” sino tambe haña e deseo, esta e “kier” pa hasi. Esaki ta nifiká ku e spiritu santu di Dios lo oumentá bo deseo pa hasi bo bèst den Yehova su sirbishi i lo yuda bo krese spiritualmente. P’esei, konfia tur ku tin den e poder di Yehova i fortifiká bo kurason!

Pone Bo Propio Metanan

Unabes bo ta determiná pa sirbi Yehova mas plenamente, bo tin ku pone metanan personal pa bo por progresá spiritualmente. Mana, un hobensita kristian, a bisa: “Ponementu di meta a yuda mi hopi. En bes di bai atras, mi por a bai dilanti ku kurashi. Ku mi metanan na mente, mi a hasi orashon sinsero na Yehova p’e guia mi, i mi por a progresá sin ser distraí.”

Bo metanan mester ta realístiko i alkansabel. Un meta rasonabel lo por ta pa lesa un kapítulo di Beibel pa dia. Tambe bo por kuminsá un proyekto di investigashon. Pa ilustrá esaki ku algu ku ta disponibel na spañó òf hulandes, lo bo por studia e kualidatnan di Yehova ku ta menshoná bou di e suptema “Kualidatnan pa nòmber” (òf den órden alfabétiko) bou di e tema prinsipal “Yehova” den e Indèks di Publikashonnan Watch Tower. Tin rònt di 40 punto ku bo por konsiderá, i sin duda e investigashon aki lo hala bo mas serka Yehova i stimulá bo pa hasi mas p’e. Otro metanan alkansabel ta entre otro, komentá por lo ménos un biaha durante kada reunion kristian den kua e ouditorio por partisipá, siña konosé por lo ménos un miembro di e kongregashon na kada reunion, i no laga niun dia pasa sin hasi orashon na Yehova i papia ku otro hende tokante dje.

Si bo no a inskribí ainda den e Skol di Ministerio Teokrátiko, esei lo ta un bon meta pa bo. Bo ta partisipando den e trabou di prediká kaba? Si ainda bo no ta sali den sirbishi, pakiko no hasi esfuerso pa bira un publikadó no-batisá. Di mes, e siguiente paso lo ta di tuma bo relashon ku Yehova na serio i dediká bo bida na dje. Hopi hóben ta hasi esfuerso pa kumpli ku nan dedikashon dor di buska pa drenta den e sirbishi di tempu kompletu.

 Ounke ta bon pa bo tin meta den bida, tene kuidou ku e spiritu di kompetensia. Lo bo haña mas goso den loke bo ta hasi ora bo no ta kompará bo mes ku otro hende.—Galationan 5:26, NW; 6:4.

Kisas bo ta haña ku bo no tin eksperensia i ku ta difísil pa pone metanan rasonabel. Wèl, sigui e konseho bíbliko: “Inkliná bo orea i tende e palabranan di hende sabí.” (Proverbionan 22:17) Pidi bo mayornan òf otro kristiannan maduro yuda bo. Klaro ku mayornan i otro personanan mester ta rasonabel, i un fuente di animashon den e asuntu aki. Si hóbennan sinti nan bou di preshon pa purba alkansá un meta ku otro hende a pone pa nan, nan por pèrdè nan goso. I esei por daña henter e propósito di pone meta. Esei ta loke a sosodé ku un mucha muhé. El a konta: “Mi mayornan a pone un meta tras di otro pa mi. Por ehèmpel, partisipá den e Skol di Ministerio Teokrátiko, sali den sirbishi di vèlt, batisá i bira pionero. Mi a hasi bastante esfuerso pa alkansá kada un di nan. Ora mi a alkansá un meta, mi mayornan no a elogiá mi. En bes di esei, nan a duna mi mas meta pa traha ariba. Esei a pone ku semper mi a sinti mi fòrsá pa alkansá meta. Mi a kansa i mi no tabatin niun satisfakshon.” Dikon esaki a bai robes? Tur e metanan tabata válido, pero nan no a sali di dje mes. Pa bo por logra, abo mester ta motivá pa tuma e inisiativa pa pone meta pa bo mes!

Pensa riba Hesukristu. Ora el a bini na tera, e tabata sa loke su Tata, Yehova, tabata spera di dje. Hasi e boluntat di Yehova no tabata djis un meta pa Hesus, sino un tarea spesífiko pa kumpli kuné. Kon Hesus a mira su asignashon? El a bisa: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:34) Hesus tabatin goso den hasi e boluntat di Yehova i kumpli ku loke su Tata a spera di dje. Esei tabata manera kuminda pa Hesus—el a haña plaser i satisfakshon den kaba e trabou ku e mester a hasi. (Hebreonan 10:5-10) Abo tambe por haña goso ora bo ta bon motivá pa hasi loke bo mayornan ta animá bo pa hasi.

No Kansa di Hasi Bon

Unabes bo tin un meta na mente, traha duru pa alkans’é. Galationan 6:9 ta bisa: “No laga nos kansa di hasi bon, pasobra na debido tempu nos lo kosechá, si nos no desmayá.” No konfia solamente riba bo mes forsa òf abilidat. Kasi sigur lo bo topa ku opstákulo i tin biaha asta bo por sinti ku bo a frakasá un ratu. Pero Beibel ta garantisá nos: “Den tur bo kamindanan rekonos’é [Dios], i e lo dirigí bo bereanan.” (Proverbionan 3:6) Yehova lo sostené bo segun ku bo ta traha duru pa alkansá bo metanan spiritual.

Sí, dor di desaroyá e deseo di sirbi Yehova i dor di hasi esfuerso pa alkansá metanan spiritual, lo bo por hasi ‘bo progreso bisto pa tur hende.’ (1 Timoteo 4:15) E ora ei lo bo por gosa di un bida ku propósito den e sirbishi di Dios.

[Plachi na página 9]

Lesa Beibel i meditá riba loke bo a lesa lo motivá bo pa sirbi Yehova

[Plachi na página 10]

Hesus a kumpli ku loke su Tata a spera di dje