E Dunamentu Ku Sí Ta Trese Goso

GENIVAL, ku ta biba den un bario marginá den nortost di Brazil, tabata sostené su kasá i yunan ku e salario miserabel ku e tabata gana komo agente di siguridat di un hospital. Ounke no tabata fásil pa Genival, el a duna su diesmo religiosamente. “Algun biaha mi famia a pasa hamber,” e ta kòrda pasando man riba su barika, “pero mi kier a duna Dios lo mihó, maske ki sakrifisio esei a enserá.”

Despues ku Genival a pèrdè trabou, el a sigui paga su diesmo. Su pastor a rekomend’é p’e pone Dios na prueba dor di hasi un donashon grandi. E pastor a garantis’é ku Dios sigur-sigur lo drama su bendishon riba dje. Di manera ku Genival a disidí ku lo e bende su kas i entregá e plaka di benta na iglesia.

No ta Genival so ta duna ku e sinseridat ei. Hopi hende ku ta biba den pobresa ekstremo ta entregá nan diesmo religiosamente pasobra nan iglesianan ta siña nan ku esei ta un rekisito di Beibel. Esei ta bèrdat?

Dunamentu di Diesmo i e Lei

E mandamentu pa duna diesmo tabata parti di e Lei ku Yehova Dios a duna e 12 tribunan di Israel di antigwedat mas ku 3.500 aña pasá. E Lei ei a dekretá ku e hudiunan mester a entregá n’e tribu di Levi un désimo parti di e kultivo di tera i palu di fruta i un désimo parti di e oumento dje tounan di bestia. Dje manera ei nan lo a sostené e servisionan ku e levitanan tabata rindí n’e tabernakel.—Levítiko 27:30, 32; Numbernan 18:21, 24.

Yehova a sigurá e israelitanan ku e Lei ‘no tabata muchu difísil pa nan.’ (Deuteronomio 30:11) Tanten ku nan a warda e mandamentunan di Yehova fielmente, inkluso e dunamentu di diesmo, nan tabatin su promesa di kosecha abundante. I komo protekshon pa den tempu di berans, tur aña nan tabata apartá un diesmo. Normalmente nan tabata usa esei ora e nashon tabata bini huntu pa selebrá nan fiestanan religioso. Dje manera ei ‘e stranhero, e wèrfano i e biuda por a kome i keda satisfecho.’—Deuteronomio 14:28, 29; 28:1, 2, 11-14.

E Lei no a duna un kastigu spesífiko pa inkumplimentu ku e diesmo, pero kada israelita tabatin e obligashon moral fuerte pa sostené adorashon berdadero den e forma aki. Por sierto, Yehova a akusá e israelitanan ku a nenga di duna diesmo den tempu di Malakías di ta ‘hortando diesmo i ofrenda’ for di dje. (Malakías 3:8) Por lansa e mesun akusashon kontra kristiannan ku no ta paga diesmo?

Wèl, pensa riba lo siguiente. Normalmente leinan nashonal no ta bálido pafó di frontera di un pais. Por ehèmpel, e lei ku ta obligá shofùrnan na Inglatera kore na man robes no ta konta pa konduktornan na Fransia. Meskos tambe, e lei ku a eksigí diesmo tabata parti di un pakto eksklusivo entre Dios i e nashon di Israel. (Éksodo 19:3-8; Salmo 147:19, 20) Ta e israelitanan so tabata mará na e lei ei.

Ademas, ounke Dios mes no ta kambia nunka, su rekisitonan sí sa kambia tin biaha. (Malakías 3:6) Beibel ta bisa bon kla ku Hesus su morto komo sakrifisio na aña 33 E.K. a “kanselá” òf “abolí” e Lei i kuné e ‘mandamentu pa tuma e diesmonan.’—Kolosensenan 2:13, 14; Efesionan 2:13-15; Hebreonan 7:5, 18.

Kon Kristiannan Ta Duna

Pero di tur manera kontribushon finansiero tabata nesesario pa sostené adorashon berdadero. Hesus a manda su disipelnan pa ‘ta testigu te na e parti mas alehá di mundu.’ (Echonan 1:8) Segun ku e kantidat di kreyente a  oumentá, tabatin mester di mas maestro i superintendente kristian pa bishitá i fortalesé e kongregashonnan. Tin biaha mester a sòru pa biuda, wèrfano i otro personanan den nesesidat. Kon e kristiannan di promé siglo a kubri e gastunan enbolbí?

Rònt di aña 55 di nos era a hasi un yamada riba e kristiannan gentil na Europa i Asia Menor pa yuda e kongregashon pober na Hudea. Den apòstel Pablo su kartanan na e kongregashon na Korinto, e ta deskribí kon nan a organisá e kolekta “pa e santunan.” (1 Korintionan 16:1) Loke Pablo su palabranan ta revelá tokante kon kristiannan ta duna lo por sorprendé bo.

Apòstel Pablo no a preshoná su kompañeronan di fe pa duna. Al kontrario, ta e kristiannan di Masedonia ku tabata den hopi “aflikshon” i den “pobresa grandi” mester a ‘rog’é ku masha súplika pa e privilegio di por partisipá den e mantenshon di e santunan.’—2 Korintionan 8:1-4.

Ta bèrdat ku Pablo a animá e korintionan mas riku pa imitá nan rumannan generoso na Masedonia. Asina mes, un obra di referensia ta remarká ku ‘no ta un òrdu el a duna; mas bien, el a preferá pidi, sugerí, animá òf hasi un yamada riba otro. Si ta obligá e korintionan tabata, nan dunamentu lo no tabata algu spontáneo ni impulsá pa amor.’ Pablo tabata sa ku “Dios ta stima esun ku ta duna ku alegria,” no unu ku ta duna “kontra su gustu òf obligá.”—2 Korintionan 9:7.

Fe i konosementu abundante kombiná ku amor sinsero pa nan rumannan kristian lo a impulsá e korintionan pa duna na un manera spontáneo.—2 Korintionan 8:7, 8.

“Manera El A Proponé den Su Kurason”

En bes di duna un montante òf porsentahe spesífiko, Pablo a simplemente sugerí pa “riba e promé dia di tur siman, kada un . . . apartá un suma di plaka segun su entrada.” (Lèter skùin ta di nos; 1 Korintionan 16:2, New International Version) Dor di plania i reservá un suma riba un base regular, e korintionan lo no a sinti nan bou di preshon pa duna sin smak òf bou di impulso emoshonal ora Pablo a yega. Pa kada kristian, e desishon di kuantu pa duna tabata un asuntu personal, unu ku el a “proponé den su kurason.”—2 Korintionan 9:5, 7.

Pa por a kosechá generosamente, e korintionan tabatin ku sembra generosamente. Nunka Pablo a duna ni e idea ku nan mester a ‘duna te ora nan no tabata por mas.’ ‘Mi no kier pa e ta un aflikshon pa boso,’ Pablo a sigurá nan. E kontribushonnan tabata ‘aseptabel segun loke un hende tabatin, no segun loke e no tabatin.’ (2 Korintionan 8:12, 13; 9:6) Den un karta mas despues, e apòstel a spièrta: “Si un hende no proveé pa . . . esnan di su kas, el a nenga e fe i ta pió ku un inkrédulo.” (1 Timoteo 5:8) Pablo no a animá kristiannan pa duna numa sin tene kuenta ku e prinsipio aki.

 Ta notabel ku Pablo a supervisá un kolekta pa e santunan ku tabata den nesesidat, pero niun kaminda den e Skritura nos no ta lesa ku Pablo ni ningun otro apòstel a organisá kolekta òf risibí diesmo pa finansiá nan propio ministerio. (Echonan 3:6) Ounke semper Pablo tabata masha gradisidu pa e regalunan ku e kongregashonnan tabata manda p’e, el a sòru p’e no pone “un karga” riba su rumannan.—1 Tesalonisensenan 2:9; Filipensenan 4:15-18.

Dunamentu Boluntario Awe

Tur kos ta mustra ku durante promé siglo e siguidónan di Kristu tabata duna boluntariamente, i no den forma di un diesmo. Sin embargo, kisas bo ta puntra bo mes si ainda esaki ta un manera efikas pa finansiá e predikashon di e bon nobo i pa perkurá pa kristiannan ku ta den nesesidat.

Pensa riba lo siguiente. Na 1879 e editornan dje revista aki a deklará abiertamente ku nan lo “no bai roga ni pidi niun hende sosten finansiero.” E desishon ei a stroba e esfuersonan di Testigunan di Yehova pa plama e bèrdat di Beibel?

Aktualmente, Testigunan ta repartí Beibel, buki kristian i otro publikashonnan den 235 pais. Den kuminsamentu, pa luna nan tabata imprimí i distribuí 6.000 ehemplar di E Toren di Vigilansia (un revista edukashonal ku ta splika Beibel) den un solo idioma. Awendia nan ta imprimí dos biaha pa luna mas ku 24.000.000 ehemplar dje revista ei den 146 idioma. Pa organisá nan trabou mundial di edukashon bíbliko, e Testigunan a konstruí òf kumpra edifisio pa sirbi komo sukursal den 110 pais. Ademas, nan a konstruí míles di lugá di reunion lokal i tambe salanan di asamblea grandi pa akomodá esnan ku ta interesá pa risibí mas instrukshon for di Beibel.

Testigunan di Yehova ta duna prioridat na e nesesidatnan spiritual di hende, pero nan no ta neglishá e nesesidatnan material di nan kompañeronan di kreensia. Ora nan rumannan  ta sufri e efektonan di guera, temblor, sekura i tormenta, nan ta e proménan pa manda remedi, kuminda, paña i otro nesesidatnan. Nan ta finansiá esakinan ku e donashonnan ku kristiannan individual i kongregashonnan ta hasi.

Ademas di ta masha efikas, kontribushon riba un base boluntario ta kita tambe un karga for di esnan ku tin poko rekurso, manera Genival, menshoná anteriormente. Afortunadamente, promé ku Genival por a bende su kas, el a haña bishita di Maria, un Testigu di Yehova ku ta prediká full-time. “E kombersashon ei a skapa mi famia di bastante difikultat innesesario,” Genival ta rekordá.

Genival a bin mira ku e obra di Señor no ta dependé di diesmo. Es mas, dunamentu di diesmo no ta un rekisito bíbliko mas. El a haña sa ku Yehova ta bendishoná kristiannan ora nan ta duna generosamente, pero ku nan no ta obligá pa duna mas di loke nan por.

Dunamentu boluntario a trese berdadero goso pa Genival. E ta ekspres’é asin’aki: “Mi por laga di duna 10 porshento, pero mi ta kontentu ku mi kontribushon, i mi ta sigur ku Yehova tambe ta kontentu.”

[Kuadro/Plachinan na página 6]

E Promé Tatanan di Iglesia A Siña pa Duna Diesmo?

“E rikunan meimei di nos ta yuda e pobernan . . . Esnan ku ta bon pará, i ku ta dispuesto, ta duna loke kada un ta haña ta bon.”—The First Apology, Hustino Martir, rònt di 150 E.K.

“En bèrdat e hudiunan tabata dediká e diesmo di nan biennan na Dios, pero esnan ku a risibí libertat a apartá tur nan pertenensianan p’e propósitonan di Señor, . . . manera e pober biuda a hasi ora el a tira tur su medio di biba den e kaha di kontribushon di Dios.”—Against Heresies, Ireneo, rònt di 180 E.K.

“Ounke nos tin nos kaha di kontribushon, e no ta konsistí di plaka pa kumpra salbashon, komo si fuera religion tin su preis. Riba un dia di luna, ken ku ta deseá ta tira un donashon chikitu den dje; pero solamente si e kier, i solamente si e por: pasobra e no ta obligá; tur donashon ta boluntario.”—Apology, Tertuliano, rònt di 197 E.K.

“Segun ku Iglesia a krese i vários institushon a lanta, a bira nesesario pa traha leinan ku lo a garantisá sosten finansiero permanente i adekuá pa pastornan. A adoptá e pagamentu di diesmo for di e Lei Bieu . . . Aparentemente e promé menshon spesífiko di un lei riba e tema aki ta den e karta dje obispunan ku a bini huntu na Tours na aña 567 i den e [kanon] di e Konsilio di Macon na aña 585.”—The Catholic Encyclopedia.

[Rekonosementu]

Moneda, ariba na man robes: Pictorial Archive (Near Eastern History) Est.

[Plachi na página 4, 5]

Dunamentu boluntario ta trese goso

[Plachi na página 7]

Kontribushonnan boluntario ta finansiá e trabou di prediká, yudansa di emergensia i konstrukshon di lugá di reunion