“Laga Boso Kondukta Ta Ekselente Meimei di e Paganonan”
“Laga Boso Kondukta Ta Ekselente Meimei di e Paganonan”
“Onra tur hende; stima e rumannan.”—1 PEDRO 2:17.
1, 2. (a) Ki komentario un koresponsal di korant a duna tokante Testigunan di Yehova? (b) Pakiko Testigunan di Yehova ta purba mantené normanan haltu di kondukta?
VÁRIOS aña pasá, un koresponsal di korant na Amarillo, Texas, Merka, a bishitá diferente misa den e área i a publiká e resultadonan di su investigashon. Tabatin un grupo ku a impreshon’é ya ku el haña ku esaki tabata diferente. El a bisa: “Tres aña largu mi a bai e kongresonan anual di Testigunan di Yehova na Amarillo Civic Center. Ora mi tabata den nan, nunka mi a mira un di nan sende un sigaria, habri un bleki di serbes òf papia palabra malu. Nan tabata e multitut di hende mas limpi i ku mihó komportashon ku mi a yega di topa. Tambe nan a sobresalí pa nan bistí modesto i bon manera.” Otro korant i revistanan tambe a yega di bisa meskos di Testigunan di Yehova. Pakiko e Testigunan ta risibí elogio regularmente for di hende ku no tin mesun kreensianan ku nan?
2 Hende sa elogiá e pueblo di Dios pa nan bon kondukta. Ounke por lo general norma i balornan ta bayendo atras, Testigunan di Yehova ta mira normanan haltu di kondukta komo un obligashon, komo parti di nan adorashon. Nan sa ku nan akshonnan ta duna otro hende un impreshon di ken ta nan Dios Yehova i nan rumannan kristian; ku nan bon komportashon nan ta biba e bèrdat ku nan ta prediká. (Huan 15:8; Tito 2:7, 8) Laga nos mira anto kon nos por mantené nos bon kondukta i asina sigui tene na haltu e ekselente reputashon di Yehova i di su Testigunan, i mira tambe ki benefisio nos por saka ora nos hasi esei.
E Famia Kristian
3. Kontra kiko famianan kristian tin mester di protekshon?
3 Tuma por ehèmpel nos komportashon den famia. E buki Die Neuen Inquisitoren: Religionsfreiheit und Glaubensneid (E Inkisidornan Nobo: Libertat di Religion i Envidia Religioso) di Gerhard Besier i Erwin K. Scheuch, ta deklará: “Pa [Testigunan di Yehova] e famia ta algu ku mester di un protekshon spesial.” E deklarashon ei ta sierto, i awe tin hopi peliger kontra kua e famia mester di protekshon. Tin yunan ku ta “desobedesido na mayornan” i adultonan ku ta “sin amor” òf ku ta “sin dominio propio.” (2 Timoteo 3:2, 3) Parehanan ta bringa ku otro, mayornan ta maltratá òf neglishá nan yunan, i muchanan ta lanta kontra nan grandinan, usa droga, kai den inmoralidat òf bai for di kas. Tur esaki ta e resultado di e influensianan destruktivo di ‘e spiritu di mundu.’ (Efesionan 2:1, 2) Nos tin ku protehá nos famia kontra e spiritu ei. Kon? Dor di sigui e konseho i instrukshonnan ku Yehova tin pa miembronan di famia.
4. Ki responsabilidat miembronan di un famia kristian tin pa ku otro?
4 Parehanan kristian ta rekonosé ku nan tin obligashonnan emoshonal, spiritual i físiko pa ku otro. (1 Korintionan 7:3-5; Efesionan 5:21-23; 1 Pedro 3:7) Mayornan kristian tin responsabilidat pisá pa ku nan yunan. (Proverbionan 22:6; 2 Korintionan 12:14; Efesionan 6:4) I segun ku muchanan den kasnan kristian ta krese, nan ta siña ku nan tambe tin obligashonnan. (Proverbionan 1:8, 9; 23:22; Efesionan 6:1; 1 Timoteo 5:3, 4, 8) Pa e miembronan di famia por kumpli ku nan obligashonnan, nan mester hasi esfuerso, mustra determinashon i un spiritu di amor i sakrifisio propio. Na e grado ku nan tur ta kumpli ku e obligashonnan ku Dios a duna nan, na e mesun grado ei nan ta un bendishon pa otro i p’e kongregashon. Mas importante ainda, nan ta onra Esun ku a originá famia, Yehova Dios.—Génesis 1:27, 28; Efesionan 3:15.
E Hermandat Kristian
5. Ki bendishonnan nos asosiashon ku nos rumannan kristian ta trese pa nos?
5 Komo kristiannan, nos tambe tin un responsabilidat pa ku otro rumannan den e kongregashon i, al fin i al kabo, tambe pa ku nos “rumannan den henter mundu.” (1 Pedro 5:9) Nos bienestar spiritual ta dependé prinsipalmente di e relashon ku nos tin ku e kongregashon. Huntu ku nos rumannan spiritual, nos ta disfrutá di asosiashon kristian i di e alimento spiritual di “e esklabo fiel i prudente” ku ta fortalesé nos. (Mateo 24:45-47) Si nos tin problema, nos por bai serka nos rumannan pa haña bon konseho basá riba prinsipionan bíbliko. (Proverbionan 17:17; Eklesiástes 4:9; Santiago 5:13-18) Ora nos ta den nesesidat, nos rumannan no ta bandoná nos. Esta un berdadero bendishon di por ta parti di e organisashon di Dios!
6. Kon Pablo a mustra ku nos tin un responsabilidat pa ku otro kristiannan?
6 Sin embargo, nos no ta den e kongregashon djis pa risibí; nos tin ku duna tambe. Sí, Hesus a bisa: “Ta mas bendishoná pa duna ku pa risibí.” (Echonan 20:35) Apòstel Pablo a resaltá e spiritu di duna ora el a skirbi: “Laga nos tene firme na e konfeshon di nos speransa sin vasilá, pasobra Esun ku a primintí ta fiel; i laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.”—Hebreonan 10:23-25.
7, 8. Kon nos ta demostrá un aktitut di duna tantu den nos kongregashon komo pa ku otro kristiannan den otro pais?
7 Den e kongregashon, nos ta hasi “konfeshon di nos speransa” ora nos ta duna komentario durante e reunion òf partisipá den otro maneranan den e programa. E esfuersonan ei sigur ta animá nos rumannan. Tambe nos ta animá nan ku nos kòmbersashonnan promé i despues di reunion. Na okashonnan asina nos por fortalesé esnan ku ta débil, enkurashá esnan ku ta falta ánimo i esnan enfermo. (1 Tesalonisensenan 5:14) Kristiannan sinsero ta duna den un manera generoso. P’e motibu ei hopi persona ku asistí na nos reunionnan pa promé bes ta keda impreshoná ku e amor ku nan ta mira entre nos.—Salmo 37:21; Huan 15:12; 1 Korintionan 14:25.
8 Pero nos amor no ta limitá na nos kongregashon so. E amor ei ta ekstendé na henter e asosiashon di nos rumannan rònt mundu. P’e motibu ei, por ehèmpel, tin un kaha di kontribushon pa e Fondo di Salon di Reino den tur Salon di Reino. Kisas nos mes Salon di Reino ta den un kondishon ekselente, pero nos sa ku míles di otro kristiannan den otro paisnan no tin un lugá adekuá pa nan tene reunion. Ora nos ta kontribuí pa e Fondo di Salon di Reino, nos ta mustra e amor ku nos tin pa personanan asina maske kisas nos no konosé nan personalmente.
9. Pa ki motibu básiko Testigunan di Yehova ta stima otro?
9 Pakiko Testigunan di Yehova stima otro? Wèl, Hesus a manda nan hasi esei. (Huan 15:17) I e amor ku nan tin pa otro ta un evidensia ku e spiritu di Dios ta obra riba kada un di nan i tambe komo grupo. Amor ta parti di e “fruta di spiritu.” (Galationan 5:22, 23) Segun ku Testigunan di Yehova ta studia Beibel, asistí na reunionnan kristian i hasi orashon konstante na Dios, di naturalesa nan ta kuminsá mustra amor apesar ku nan ta biba den un mundu kaminda e ‘amor di hopi hende a fria.’—Mateo 24:12.
Kon pa Trata ku e Mundu Rònt di Nos
10. Ki responsabilidat nos tin pa ku e mundu rònt di nos?
10 Ora Pablo a papia di “e konfeshon di nos speransa,” e ta pone nos kòrda riba un responsabilidat adishonal. E konfeshon òf deklarashon públiko aki tin di haber ku e obra di prediká e bon nobo na esnan ku ainda no ta nos rumannan kristian. (Mateo 24:14; 28:19, 20; Romanonan 10:9, 10, 13-15) E obra di prediká ei ta un otro akto di duna. Pa partisipá den dje nos mester tin tempu i energia. Tambe nos mester prepará, entrená nos mes i usa nos rekursonan personal. Sin embargo, Pablo a skirbi: “Mi ta debedó tantu di griego komo di bárbaro, tantu di e sabínan komo di esnan ku no ta sabí. P’esei, di mi parti, mi ta ansioso pa prediká e evangelio na boso tambe ku ta na Roma.” (Romanonan 1:14, 15) Meskos ku Pablo, laga nos no ta pichiri ora nos ta paga e “debe” aki.
11. Kua dos prinsipionan bíbliko ta determiná kon nos relashon ku mundu mester ta, pero apesar di esei, kiko nos tin ku rekonosé?
11 Nos tin mas responsabilidat pa ku esnan ku no ta nos rumannan? Sigur ku sí. Klaro ku nos ta rekonosé ku “henter mundu ta bou di kòntròl di e malbado.” (1 Huan 5:19) Nos sa ku Hesus a bisa di su disipelnan: “Nan no ta di mundu, meskos ku ami no ta di mundu.” Sin embargo, nos ta biba den mundu, nos ta gana nos pan di kada dia den dje i benefisiá di e servisionan ku e ta duna. (Huan 17:11, 15, 16) P’esei nos tin nos obligashonnan pa ku e mundu rònt di nos. Kiko eseinan ta? Apòstel Pedro a kontestá e pregunta ei. Djis promé ku e destrukshon di Yerúsalèm, el a skirbi un karta n’e kristiannan den e área di Asia Menor, i un pasashi den e karta ei ta yuda nos mantené un relashon balansá ku e mundu rònt di nos.
12. Den ki sentido kristiannan ta “peregrinonan i stranheronan,” i komo tal, for di kiko nan mester apstené nan mes?
12 Pa kuminsá, Pedro a bisa: “Stimánan, mi ta roga boso komo peregrinonan i stranheronan pa apstené boso di pashonnan karnal, kualnan ta bringa kontra e alma.” (1 Pedro 2:11) Den sentido spiritual, kristiannan berdadero ta “peregrinonan i stranheronan” pasobra e berdadero enfoke den nan bida ta e speransa di bida eterno. Pa esnan ungí ku spiritu esei lo ta un bida den shelu i pa e “otro karnénan” esei lo ta den un paradeis riba tera. (Huan 10:16; Filipensenan 3:20, 21; Hebreonan 11:13; Revelashon 7:9, 14-17) Pero, kiko ta deseonan (pashonnan) karnal? Esakinan ta enserá kosnan manera e deseo di ta riku, e deseo pa prominensia, deseonan seksual inmoral i e deseonan deskribí komo “envidia” i “golosidat.”—Kolosensenan 3:5; 1 Timoteo 6:4, 9; 1 Huan 2:15, 16.
13. Kon deseonan karnal ta “bringa kontra [nos] alma”?
13 E deseonan ei realmente ta “bringa kontra [nos] alma.” Nan ta kaba ku nos relashon ku Dios i asina pone nos speransa kristian (nos “alma,” òf bida) na peliger. Por ehèmpel, si nos kultivá interes den kosnan inmoral, kon nos por presentá nos mes komo “sakrifisionan bibu i santu, aseptabel pa Dios”? Si nos kai den e trampa di materialismo, nos ta ‘buskando promé e reino’? (Romanonan 12:1, 2; Mateo 6:33; 1 Timoteo 6:17-19) E mihó kos ku nos por hasi ta di sigui e ehèmpel di Moises, bira lomba pa e tentashonnan di mundu, i pone sirbishi na Yehova na promé lugá den nos bida. (Mateo 6:19, 20; Hebreonan 11:24-26) Esei ta un faktor importante pa alkansá un relashon balansá ku mundu.
‘Mantené un Kondukta Ekselente’
14. Pakiko nos ta trata na mantené un kondukta ekselente komo kristian?
14 Den e siguiente palabranan di Pedro nos por haña un otro guia vital: “Laga boso kondukta ta ekselente meimei di e paganonan, asina ku ora nan kalumniá boso komo malechor, nan por, pa medio di boso bon obranan ku nan ta opservá, glorifiká Dios den e dia di bishitashon.” (1 Pedro 2:12) Komo kristiannan, nos ta trata di ta ehemplar. Na skol nos ta traha duru. Na trabou nos ta diligente i onesto, asta ora nos doño di trabou ta parse irasonabel. Den un kas dividí pa loke ta religion, e esposo òf esposa kreyente ta hasi un esfuerso spesial pa sigui prinsipionan kristian. No ta semper fásil, pero nos sa ku nos kondukta ehemplar ta agradá Yehova i hopi bes e tin un bon efekto riba hende ku no ta Testigu.—1 Pedro 2:18-20; 3:1.
15. Kon nos por sa ku e norma haltu di kondukta dje Testigunan di Yehova ta ser rekonosé ampliamente?
15 Mayoria Testigu di Yehova ta logra tene nan na normanan ehemplar i bo por mira esei den komentarionan publiká den otro fuentenan atraves di añanan. Por ehèmpel, Il Tempo di Italia a skirbi: “Hende ku tin kolega di trabou ku ta Testigunan di Yehova ta deskribí nan komo trahadónan onesto, asina konvensí di nan fe ku nan ta parse di ta opseshoná kuné; no opstante, nan ta meresé rèspèt pa nan integridat moral.” Herald di Buenos Aires, Argentina, a bisa: “Testigunan di Yehova a duna prueba atraves di añanan ku nan ta siudadanonan ku ta traha duru, serio, prudente i ku tin temor di Dios.” E erudito ruso Sergei Ivanenko a deklará: “Rònt mundu Testigunan di Yehova ta konosí komo hende ku ta sigui lei impekablemente i partikularmente komo hende ku ta paga belasting konsiensialmente.” E gerente di un lugá ku Testigunan di Yehova a usa pa tene nan kongreso na Zimbabwe a bisa: “Mi ta mira algun Testigu piki papel bentá abou i limpia tualèt. E sala di ekshibishon ta keda mas limpi ku promé. Boso teenagernan ta muchanan ku prinsipio. Mara henter mundu ta Testigu di Yehova.”
Sumishon Kristian
16. Ki relashon nos tin ku outoridatnan, i pakiko?
16 Pedro a papia tambe tokante nos relashon ku outoridatnan. E ta bisa: “Someté boso mes pa kousa di Señor na tur institushon humano, sea na un rei komo esun den outoridat, òf na gobernadónan komo esnan ku rei ta manda pa kastigá malechornan i pa elogiá esnan ku ta hasi bon. Pasobra asina ta e boluntat di Dios, ku dor di hasi bon boso por silensiá e ignoransia di hende bobo.” (1 Pedro 2:13-15) Nos ta masha gradisidu pa e benefisionan ku nos ta risibí di un gobièrnu ordená, i bou di e guia di Pedro su palabranan, nos ta obedesé su leinan i paga nos belasting. Ounke nos ta rekonosé e derecho ku Dios a duna gobièrnunan pa kastigá kibradó di lei, e motibu prinsipal pakiko nos ta someté nos na outoridat ta “pa kousa di Señor.” Esei ta e boluntat di Dios. Ademas, nos no kier trese reproche riba e nòmber di Yehova dor di ser kastigá pa malecho.—Romanonan 13:1, 4-7; Tito 3:1; 1 Pedro 3:17.
17. Ora “hende bobo” oponé nos, kiko nos por ta sigur di dje?
17 Desafortunadamente, algun “hende bobo” ku tin outoridat ta persiguí nos òf ta oponé nos den otro maneranan—manera dor di fomentá kampañanan di difamashon kontra nos. Pero, na Yehova su debido tempu, nan mentiranan lo ser desenmaskará, i nan “ignoransia” lo ser silensiá na un manera efikas. Nos historia di kondukta kristian ta papia pa su mes. Esei ta e motibu pakiko funshonarionan di gobièrnu hopi bes ta elogiá nos komo hasidó di loke ta bon.—Romanonan 13:3; Tito 2:7, 8.
Esklabo di Dios
18. Komo kristiannan, den ki maneranan nos por evitá di hasi mal uso di nos libertat?
18 Awor Pedro ta duna e spièrtamentu: “Aktua komo hende liber, i no usa boso libertat komo un kapa pa maldat, ma us’é komo esklabonan di Dios.” (1 Pedro 2:16; Galationan 5:13) Awe, e konosementu ku nos tin di e bèrdat di Beibel ta libra nos for di siñansa religioso falsu. (Huan 8:32) Ademas, nos tin un boluntat liber, i nos por tuma nos propio desishonnan. Ma nos no ta hasi mal uso di nos libertat. Ora nos ta tuma desishon tokante asosiashon, paña, forma di areglá nos kurpa, dibertishon—asta kos di kome i di bebe—nos ta kòrda ku kristiannan berdadero ta esklabo di Dios, i ku nos no ta agradá nos mes. Nos ta skohe pa sirbi Yehova en bes di ta esklabo di nos mes deseonan karnal òf di último moda i tendensianan di mundu.—Galationan 5:24; 2 Timoteo 2:22; Tito 2:11, 12.
19-21. (a) Kon nos ta mira esnan ku ta okupá puestonan di outoridat? (b) Kon algun a mustra ku nan ta “stima [nan] rumannan”? (c) Kiko ta nos responsabilidat di mas importante?
19 Pedro ta sigui bisa: “Onra tur hende; stima e rumannan, teme Dios, onra rei.” (1 Pedro 2:17) Ta Yehova Dios mes ta permití hende okupá vários posishon di outoridat, p’esei nos ta mustra onor apropiá na e personanan ei. Nos por asta hasi orashon relashoná ku nan, pa nan por laga nos kumpli ku nos ministerio na pas i deboto na Dios. (1 Timoteo 2:1-4) Pero, na mesun tempu, nos ta “stima e rumannan.” Nos ta traha semper p’e benefisio di nos rumannan kristian, no pa perhudiká nan.
20 Por ehèmpel, ora violensia étniko tabata ruinando un nashon afrikano, e kondukta kristian di Testigunan di Yehova a resaltá. E korant Reformierte Presse di Suisa a informá: “Na 1995, e organisashon yamá Derechonan Afrikano . . . por a proba ku tur iglesia, liber di Testigunan di Yehova, a partisipá [den e konflikto].” Ora notisia di e susesonan trágiko a alkansá otro paisnan, mesora Testigunan di Yehova na Europa a manda alimento i yudansa médiko pa nan rumannan i otro hende den e pais afligí ei. (Galationan 6:10) Nan a hasi kaso di e palabranan di Proverbionan 3:27: “No laga di hasi bon na esnan ku meresé esaki, si ta den bo poder pa hasié.”
21 Pero tin un responsabilidat asta mas importante ku e onor ku nos ta debe na kualkier outoridat dje mundu aki i asta mas ku e amor ku nos tin ku mustra na nos rumannan. Kiko esei ta? Pedro a bisa: “Teme Dios.” Nos debe Yehova hopi mas ku nos debe kualkier ser humano. Di ki sentido? I kon nos por balansá nos obligashonnan na Dios ku loke nos debe outoridatnan? E siguiente artíkulo lo kontestá e preguntanan aki.
Bo Ta Kòrda?
• Ki responsabilidat kristiannan tin den famia?
• Kon nos por mustra ku nos tin un aktitut di duna den e kongregashon?
• Ki responsabilidat nos tin pa ku outoridatnan di e mundu aki?
• Kiko ta algun benefisio ku nos ta haña dor di mantené un norma haltu di kondukta?
[Preguntanan di Estudio]
[Plachi na página 9]
Kon e famia kristian por ta un fuente di gran goso?
[Plachi na página 10]
Pakiko Testigunan di Yehova stima otro?
[Plachi na página 10]
Nos por mustra ku nos ta stima nos rumannan ounke nos no konosé nan personalmente?