Siña un Lès for di Oyevar

“ASTA oyevar ku ta bula na shelu konosé su temporadanan, . . . ma mi pueblo no konosé e ordenansa di SEÑOR.” (Yeremías 8:7) Ku e palabranan ei profeta Yeremías a proklamá Yehova su huisio kontra e pueblo apóstata di Huda, ku a bandoná Yehova nan Dios i a bai adorá diosnan straño. (Yeremías 7:18, 31) Dikon Yeremías a usa oyevar pa siña e hudiunan infiel un lès?

E israelitanan tabatin kustumber di mira oyevar, i spesialmente e oyevar blanku, ora nan tabata bula pasa dor di paisnan ku Beibel ta papia di dje. Oyevar ta un para grandi, pia largu, ku ta kana buska kuminda den awa plat. Su nòmber hebreo ta e forma femenino di un palabra ku ta nifiká “esun leal; esun di bondat amoroso.” Esaki ta un nòmber masha apropiá, pasobra distinto for di mayoria otro para, un pareha di oyevar ta keda huntu pa restu di nan bida. Despues di pasa e lunanan di wenter den regionnan mas kayente, mayoria oyevar ta bini bèk aña tras aña, hopi bes na e mesun nèshi ku nan a usa anteriormente.

Tin mas maneranan remarkabel ku e oyevar su komportashon instintivo ta un bon ehèmpel di lealtat. Tantu e machu komo e hembra ta yuda brui e webunan i alimentá nan yunan. E buki Our Magnificent Wildlife (Nos Naturalesa Magnífiko) ta splika: “Komo mayor, oyevar ta ekstraordinariamente fiel. Na Alemania un oyevar machu a dal den kabel di koriente i a muri. Su par a sigui brui e webunan su so durante 3 dia, i a bandoná e nèshi un biaha so djis un ratu pa bai buska kuminda. . . . Den un otro kaso, ora nan a tira un oyevar hembra mata, e tata a sigui kria e yunan.”

En bèrdat, oyevar ta kumpli ku e nifikashon di su nòmber—“esun leal”—dor ku debí na su instinto e ta keda fiel na su par henter su bida i ta kuida su yunan ku ternura. Pues, oyevar a sirbi komo un bon ehèmpel pa e israelitanan infiel i kabesura.

Pa hopi hende awe, lealtat i fieldat ta ideanan antikuá; atmirabel pero impráktiko. E oumento di divorsio, abandono, froude i otro formanan di engaño ta demostrá ku hende no ta duna balor mas na lealtat. Na kontraste, Beibel sí ta duna hopi balor na lealtat ku ta ser motivá pa amor i bondat. E ta enkurashá kristiannan pa “bisti e hende nobo, ku a wòrdu kreá segun Dios den hustisia i santidat [“lealtat,” NW] bèrdadero.” (Efesionan 4:24) Sí, e personalidat nobo ta yuda nos ser leal, pero tambe nos por siña un lès di lealtat for di e oyevar.