‘E Palabra di Dios Ta Aktivo’
Informe di Proklamadónan di Reino
‘E Palabra di Dios Ta Aktivo’
RIBA e isla tropikal di Karibe, Hamaika, mayoria hende konosé Beibel. De echo, kasi tur kas tin un Beibel King James Version, i sierto hendenan a mira pa nan mes ku “e palabra di Dios ta bibu i aktivo.” (Hebreonan 4:12) E siguiente eksperensia ta mustra ku e poder aktivo di Beibel por kambia hende su bida.
Un hòmber ku yama Cleveland a kaba di yega kas for di trabou ora ku un Testigu di Yehova a yega na su porta. E Testigu a kompartí un par di punto kuné den Beibel, i despues a lag’é ku e yudansa pa studia Beibel titulá Conocimentu cu Ta Hiba na Bida Eterno. Cleveland no por a imaginá su mes ki efekto e Palabra di Dios lo a bai tin den su bida.
Cleveland tabata hasi orashon tres biaha pa dia pa pidi Dios yud’é haña sa kon ta e manera korekto pa ador’é. Cleveland tabata konvensí ku su mayornan no tabata adorá Dios na e manera korekto, pero despues di a investigá otro religionnan el a keda desilushoná. Apesar ku el a yega di tende di Testigunan di Yehova, e tabata duda ku ta nan tin e bèrdat. Tòg Cleveland a aseptá pa studia Beibel ku e Testigunan ku a bishit’é. Pakiko? Pa el a mustra nan ku Testigunan ta robes!
Den poko tempu Cleveland a siña ku e relashonnan inmoral ku e tabatin ku dos diferente hende muhé no a agradá Dios. (1 Korintionan 6:9, 10) Despues di apénas dos studio el a tuma kurashi i kibra su relashon ku e hende muhénan. El a kuminsá asistí na reunionnan kristian na Salòn di Reino tambe. Pero esaki a resultá di ta otro prueba.
Cleveland tabata hopi aktivo den e tim di futbòl di su bario, i e partidonan tabata strob’é di bai reunion. Kiko lo e hasi? Apesar ku su coach, su amigunan i e otro hendenan di su tim a pone hopi preshon riba dje, Cleveland a disidí di bandoná e tim di futbòl. Sí, e Palabra di Dios a bira aktivo den dje i a influensi’é pa bira un mihó persona!
E poder dje Palabra di Dios tabata bisto tambe ora Cleveland a kuminsá kompartí su konosementu bíbliko ku otro hende. (Echonan 1:8) Komo resultado, dos dje hendenan ku tabata den su tim di ántes a kuminsá asistí na reunion di Testigunan di Yehova. Despues ku Cleveland a kualifiká pa bira publikadó dje bon nobo, el a risibí hopi goso di por usa e Palabra di Dios den e ministerio pa yuda otro hende.
E Palabra di Dios a sigui motivá Cleveland, i ku tempu el a simbolisá su dedikashon na Yehova dor di batisá den awa, i e tin e privilegio di por sirbi komo minister di tempu kompleto i komo sirbidó ministerial den kongregashon.
Na Hamaika meskos ku rònt mundu, míles di hende a bin haña sa ku di bèrdat e Palabra di Dios “ta bibu i aktivo.”
[Mapa/Plachi na página 8]
(Pa e teksto den su formato kompleto, wak e publikashon)
HAMAIKA
[Rekonosementu]
Mapa i globo: Mountain High Maps® Copyright © 1997 Digital Wisdom, Inc.