Bendishon Riku pa Esnan Ku Ta Kana den e Kamindanan di Yehova

BO A yega di subi un seru? Si ta asina, probablemente lo bo a sinti komo si fuera bo ta riba dak di mundu. Ki dushi tabata pa respirá e aire fresku, pa mira kosnan na distansia leu i pa apsorbá e bunitesa di naturalesa! Podisé e ansiedatnan di e mundu eibou a parse di ménos importansia.

Masha poko hende ta hasi e tipo di ekskurshonnan aki. Pero si bo ta un kristian dediká, kisas pa algun tempu kaba bo tin un estilo di bida ku por ser kompará ku un paseo den un paisahe yen di seru. Sin duda, meskos ku e salmista di antigwedat, bo a resa pidi: “Hasi mi konosé bo kamindanan, o SEÑOR; siña mi bo bereanan.” (Salmo 25:4) Bo ta kòrda kon bo a sinti ora ku bo a subi e seru dje kas di Yehova pa promé bes i kuminsá kana den e lugánan haltu? (Mikéas 4:2; Habakuk 3:19) Fuera di tur duda, no a dura mashá ku bo a realisá ku si bo kana den e kamindanan elevá aki di adorashon puru bo ta haña protekshon i goso. Bo a kuminsá haña e mesun sintimentunan ku e salmista ku a bisa: “Bendishoná ta e pueblo ku konosé e zonidu gososo! Nan ta kana, o SEÑOR, den e lus di bo semblante.”—Salmo 89:15.

Sin embargo, sa sosodé ku esnan ku ta kana den terenonan yen di seru tin ku lucha ku subidanan haltu i stèil. Nan pianan ta kuminsá hasi doló i nan ta kansa. Nos tambe por haña nos ku difikultat den nos sirbishi na Dios. Podisé últimamente nos pianan a kuminsá bira pisá. Kon nos por bolbe haña nos vigor i goso? E promé paso ta: Rekonosé e superioridat di Yehova su kamindanan.

Yehova Su Leinan Elevá

Yehova su kamindanan ta ‘mas haltu ku esnan di hende,’ i su adorashon a ser ‘establesí komo hefe di e serunan halsá mas haltu ku e seritunan.’ (Isaías 55:9; Mikéas 4:1) Yehova su sabiduria ta “e sabiduria di ariba.” (Santiago 3:17) Su leinan ta superior na tur otro. Por ehèmpel, tempu ku e kananeonan tabata hasi sakrifisio kruel di mucha, Yehova a duna e israelitanan leinan ku tabata moralmente elevá i karakterisá pa kompashon. El a bisa nan: “No faboresé e pober, ni onra esun poderoso. . . . “E stranhero . . . mester ta pa boso manera un yu di tera meimei di boso; stim’é manera bo mes.”—Levítiko 19:15, 34.

Diesinku siglo despues, Hesus a duna mas ehèmpel di Yehova su ‘lei glorioso.’ (Isaías 42:21) Den e Sermon Riba Seru el a bisa su disipelnan: “Stima boso enemigunan, . . . i hasi  orashon pa esnan ku ta . . . pèrsiguí boso, pa boso por ta yunan di boso Tata ku ta den shelu.” (Mateo 5:44, 45) “P’esei, tur loke boso kier pa hende hasi pa boso, hasi meskos pa nan.” I el a agregá: “Pasobra esaki ta e Lei i e Profetanan.”—Mateo 7:12.

E leinan elevá aki ta influensiá kurason di hende reseptivo, i ta motivá nan pa imitá e Dios ku nan ta adorá. (Efesionan 5:1; 1 Tesalonisensenan 2:13) Pensa un ratu riba e transformashon ku a tuma lugá den kaso di Pablo. E promé bes ku Beibel a papia di dje tabata ora el ‘a konsentí ku e morto’ di Esteban i a trata di “destruí e iglesia” kruelmente. Djis un par di aña despues el a trata e kristiannan na Tesalónika ku kariño manera “un mènchi [ku] ta kuida su mes yunan ku ternura.” Siñansa divino a kambia Pablo di un persiguidó pa un kristian kariñoso. (Echonan 8:1, 3; 1 Tesalonisensenan 2:7) Nos por ta sigur ku e tabata kontentu ku e siñansa di Kristu a kambia su personalidat. (1 Timoteo 1:12, 13) Kon un gratitut asina por yuda nos sigui kana den e kaminda elevá di Dios?

Kana ku Apresio

Subidónan di seru ta disfrutá di bistanan espektakular ku serunan haltu ta ofresé. Tambe nan ta siña disfrutá di kosnan chikitu ku nan ta topa na kaminda, manera un baranka straño, un flor bunita òf e ratiku ku nan haña un animal salbahe mira. Den sentido spiritual nos mester ta atento pa ripará e rekompensanan—grandi i chikitu—ku esnan ku ta kana ku Dios ta risibí. Eseinan por duna nos brio atrobe i transformá un paseo di kansansio den un kaminata yen di energia. E ora ei nos lo ta di akuerdo ku e palabranan di David: “Laga mi tende bo miserikòrdia den mainta, pasobra den bo mi ta konfia; siña mi e kaminda ku mi mester kana.”—Salmo 143:8.

Mary, kende tin hopi aña den e kaminda di Yehova, ta bisa: “Ora mi ta opservá Yehova su kreashon, mi ta mira no solamente e diseño kompliká sino tambe Dios su personalidat amoroso. Sea ku ta un animal grandi, un para òf un insekto, kada un ta un mundu chikitu masha fasinante. E mesun goso nos ta haña segun ku bèrdatnan spiritual ta bira mas i mas kla atraves di añanan.”

Kon nos apresio por krese? Di un banda, dor di no mira loke Yehova ta hasi pa nos komo algu gewoon. Pablo a skirbi: “Hasi orashon sin stòp; sea gradisidu den tur kos.”—1 Tesalonisensenan 5:17, 18; Salmo 119:62.

Studio personal ta yuda nos kultivá un spiritu gradisidu. Pablo a urgi e kristiannan di Kolósas pa: “Kana den [union ku Kristu Hesus], . . . i abundá den gradisimentu.” (Kolosensenan 2:6, 7) Dor di lesa Beibel i meditá riba loke nos ta lesa, nos fe ta bira mas fuerte i nos ta haña un relashon mas estrecho ku e Outor di Beibel. Tur su páginanan ta kontené tesoro ku por insitá nos pa “abundá den gradisimentu.”

Nos kaminda ta bira mas fásil tambe ora nos ta sirbi Yehova huntu ku nos rumannan. Un salmista a bisa di su mes: “Mi ta kompañero di tur esnan ku ta teme bo.” (Salmo 119:63) Algun di nos momentunan mas felis ta esnan ku nos ta pasa na asambleanan kristian òf otro kaminda huntu ku nos rumannan. Nos ta rekonosé ku nos presioso famia kristian rònt mundu ta debe su eksistensia na Yehova su kamindanan elevá.—Salmo 144:15b.

Fuera di apresio, un sentido di responsabilidat lo fortalesé nos pa sigui progresá riba Yehova su kamindanan elevá.

 Kana na un Manera Responsabel

Hende ku tin un sentido di responsabilidat ta rekonosé ku ora nan ta subi seru, nan mester tene kuidou pa nan no pèrdè òf desviá i bai muchu na rant di barankanan stèil. Komo ku nos tin boluntat liber, Yehova ta duna nos un grado rasonabel di libertat den loke nos ta hasi den bida. Pero pa usa e libertat ei bon, nos mester tin un sentido di responsabilidat pa nos por kumpli ku nos obligashonnan kristian.

Por ehèmpel, Yehova ta konfia ku su sirbidónan ta kumpli ku nan obligashonnan na un manera responsabel. E no ta fiha pa nos kuantu energia i tempu nos mester dediká na aktividatnan kristian ni kuantu nos mester kontribuí finansieramente òf den otro manera. Al kontrario, Pablo su palabranan na e korintionan ta konta pa nos tur: “Laga kada un hasi manera el a proponé den su kurason.”—2 Korintionan 9:7; Hebreonan 13:15, 16.

Dunamentu kristian na un manera responsabel ta enserá kompartí e bon nobo ku otro hende. Tambe nos ta mustra ku nos ta responsabel dor di kontribuí ku e obra mundial di Reino. Un ansiano ku yama Gerhardt ta splika ku e ku su kasá a oumentá nan kontribushonnan konsiderablemente despues ku nan a bishitá un asamblea na Europa Oriental. “Nos a ripará ku nos rumannan einan tin masha poko kos material; pero nan ta apresiá nos literatura bíbliko asina tantu,” el a bisa, “ku nos a disidí ku nos ta bai duna mas tantu posibel na nos rumannan ku ta den nesesidat den otro paisnan.”

Kon pa Oumentá Nos Awante

Pa bo por kana den seru bo mester tin resistensia. Hende ku ta kana ta train ki ora ku nan tin chèns, i nan ta hasi kaminatanan kòrtiku pa prepará nan mes pa kaminatanan largu. Di mes manera, Pablo a rekomendá nos pa keda okupá den aktividatnan teokrátiko pa nos por keda den bon kondishon spiritual. Pablo a bisa ku esnan ku ta deseá di “kana na un manera digno di Señor,” i ser “fortifiká ku tur poder,” mester “duna fruta den tur bon obra.”—Kolosensenan 1:10, 11.

Bon motivashon ta duna e persona ku ta subi seru perseveransia. Kon asina? Ora e tin un meta kla na bista manera un seru ku ta keda na un distansia, i e ta enfoká riba dje, esei ta stimul’é pa sigui padilanti. I ora e yega na sitionan ku e ta rekonosé segun ku e ta hasi su kaminata, e por kalkulá kuantu mas e falta pa yega su meta final. Ora e wak bèk riba e distansia ku el a kana kaba, e ta haña un satisfakshon.

Asina tambe nos speransa di biba pa semper ta sostené nos i motivá nos. (Romanonan 12:12) Miéntras nos ta kana den e kamindanan di Yehova, nos ta haña satisfakshon ora nos ta pone metanan kristian i despues ta logra nan. I nos ta haña un goso profundo ora nos reflekshoná riba nos hopi añanan di fiel sirbishi òf ora nos opservá e kambionan ku nos a hasi den nos personalidat!—Salmo 16:11.

Pa por kubri distansia grandi i konserbá energia, ta bon pa kana na un ritmo konstante. Di mes manera, un bon rutina ku ta enserá sirbishi di fèlt i asistensia regular na reunion lo yuda nos move padilanti pa logra nos meta. P’esei Pablo a animá su kompañeronan kreyente: “Laga nos sigui riba e kaminda ku nos a rekoré kaba.”—Filipensenan 3:16, Beibel na papiamentu koriente.

Klaro ku no ta nos so ta kana riba e kamindanan di Yehova. Pablo a skirbi: “Laga nos konsiderá kon pa stimulá otro pa stima i hasi bon obra.” (Hebreonan 10:24) Si nos ta den kompania ku otro hende spiritual, lo bira mas fásil pa nos sigui kana firme riba e kaminda huntu ku nos rumannan.—Proverbionan 13:20.

Finalmente, i loke ta mas importante, nunka nos mester lubidá e poder ku Yehova ta duna. Hende ku tin Yehova komo nan fortalesa, lo “bai di forsa pa forsa.” (Salmo 84:5, 7) Ounke de bes en kuando nos tin ku pasa dor di situashonnan difísil, ku yudansa di Yehova nos por logra.