Dios Su Leinan Ta pa Nos Benefisio

“O kuantu mi ta stima bo lei!”—SALMO 119:97.

1. Kiko ta e aktitut komun ku hende tin pa ku obedensia na Dios su leinan?

AWENDIA obedesé lei di Dios no ta algu popular. Hopi hende ta haña ku no tin sentido pa someté bo mes na un outoridat superior ku ta invisibel. Nos ta biba den un era di relativismo moral (kaminda normanan no ta fiho, sino ta kambia dependiendo di e hende òf gruponan ku ta atené nan mes na nan), un era ku no tin distinshon kla entre loke ta bon i loke ta malu. (Proverbionan 17:15; Isaías 5:20) Segun un enkuesta, “mayoria merikano kier disidí pa nan mes loke ta korekto, bon i importante.” I esei ta reflehá un manera di pensa ku ta komun awe den hopi sosiedat. E enkuesta a agregá ku nan ta preferá un “Dios ku no ta strèn. Nan no kier leinan strèn. Nan no kier superiornan ku konvikshonnan moral ni ningun otro konvikshon tampoko.” Un sosiólogo a remarká ku awendia “ta ferwagt di hende ku nan ta determiná pa nan mes kiko ta nifiká hiba un bida korekto i moralmente limpi.” El a sigui bisa: “Kualkier forma di outoridat superior mester adaptá su mandamentunan na e nesesidatnan di hende real.”

2. Den ki manera e promé menshon di lei den Beibel ta estrechamente ligá ku Dios su bendishon i aprobashon?

² Dor ku asina tantu hende ta kuestioná e balor di Yehova su leinan, nos mester fortifiká nos konvikshon ku e normanan di Dios ta pa nos benefisio. Ta interesante pa konsiderá e relato kaminda Beibel ta menshoná “lei” pa promé bes. Na Génesis 26:5 nos ta lesa e palabranan di Dios: “Abraham . . . a kumpli ku mi òrdu, mi mandamentunan, mi statutonan i mi leinan.” Yehova a ekspresá e palabranan aki siglonan promé ku el a duna e desendientenan di Abraham un kódigo di lei detayá. Kon Dios a rekompensá Abraham p’e echo ku el a obedesé Dios i Su leinan? Yehova Dios a primintié: “Den bo desendientenan tur e nashonnan di e tera lo ta bendishoná.” (Génesis 22:18) Pues, obedensia na lei divino ta estrechamente ligá ku Dios su bendishon i aprobashon.

3. (a) Ki sintimentu un salmista a ekspresá enkuanto e leinan di Yehova? (b) Kua preguntanan meresé nos atenshon?

³ Un dje salmistanan—probablemente un prens i futuro rei di Huda—a ekspresá un sintimentu ku normalmente no ta ser asosiá ku lei. El a deklará na Dios: “O kuantu mi ta stima bo lei!” (Salmo 119:97) Esaki no tabata djis un reakshon emoshonal. E tabata un ekspreshon di amor pa e boluntat di Dios, deskribí den su lei. Hesukristu, e Yu perfekto di Dios, a sinti meskos. Un profesia ku ta deskribí Hesus a bisa: “Pa hasi bo boluntat, o mi Dios, ta un delisia pa mi; bo lei ta den mi kurason.”  (Salmo 40:8; Hebreonan 10:9) Kiko di nos? Nos tin goso den hasi e boluntat di Dios? Nos ta konvensí ku e leinan di Yehova ta útil i benefisioso? Ki lugá obedensia na Dios su leinan ta okupá den nos adorashon, den nos bida diario, den nos relashon ku otro hende i ora di tuma desishon? Pa nos por stima Dios su lei, ta bon pa nos komprendé dikon Dios tin derecho di traha lei i imponé nan.

Yehova—E Dunadó di Lei Legítimo

4. Dikon Yehova ta e Dunadó di Lei legítimo i supremo?

⁴ Komo e Kreador, Yehova ta e Dunadó di Lei legítimo i supremo di universo. (Revelashon 4:11) Profeta Isaías a deklará: “SEÑOR ta nos Dunadó di Lei.” (Isaías 33:22) El a pone leinan físiko pa goberná tur loke el a krea, kosnan ku bida i kosnan sin bida. (Job 38:4-38; 39:1-12; Salmo 104:5-19) Komo un kreashon di Dios, hende ta sometí n’e leinan físiko di Yehova. I ounke hende tin boluntat liber i por rasoná, ta solamente ora e someté su mes na Dios su leinan moral i spiritual e ta felis.—Romanonan 12:1; 1 Korintionan 2:14-16.

5. Den ki sentido e prinsipio na Galationan 6:7 ta sierto den kaso di Dios su leinan?

⁵ Manera nos sa, Yehova su leinan físiko ta inkebrantabel. (Yeremías 33:20, 21) Si un persona bai kontra e leinan aki, manera por ehèmpel e lei di gravedat, e ta hañ’é ku e konsekuensianan. Asina tambe e leinan moral di Dios ta irevokabel, i hende no por pasa nan por haltu òf kibra nan sin haña kastigu. Nan ta ser implementá meskos ku su leinan natural, ounke kisas bo no ta mira nan resultado mesora. “Dios no ta laga hasi bofon di dje; pasobra loke un hende sembra, esaki tambe e lo kosechá.”—Galationan 6:7; 1 Timoteo 5:24.

E Alkanse di Yehova Su Lei

6. Te kon leu e leinan di Dios ta bai?

⁶ Un manera sobresaliente ku Dios a ekspresá su lei ta via e Lei di Moises. (Romanonan 7:12) Ku tempu Yehova Dios a remplasá e Lei di Moises ku “e lei di Kristu.” * (Galationan 6:2; 1 Korintionan 9:21) Komo kristian bou di “e lei perfekto, e lei di libertat,” nos ta komprendé ku no ta solamente pa sierto aspektonan di nos bida—tal komo nos kreensianan òf ritonan seremonial—Dios ta duna instrukshon. Su normanan ta kubri tur aspekto di bida, inkluso asuntunan di famia, tratonan di negoshi, kondukta pa ku hende dje sekso opuesto, aktitut pa ku kompañeronan kristian i partisipashon den adorashon berdadero.—Santiago 1:25, 27.

7. Duna ehèmpel di algun lei importante di Dios.

⁷ Por ehèmpel, Beibel ta bisa:“Ni fornikadó, ni adoradó di dios falsu, ni adúltero, ni sodomita, ni homoseksual, ni ladron, ni esnan golos pa plaka, ni buraché, ni blasfemadó, ni estafadó lo no heredá e reino di Dios.” (1 Korintionan 6:9, 10) Sí, adulterio i fornikashon no ta djis un “relashon amoroso.” Aktonan homoseksual no ta simplemente un “estilo di bida alternativo.” Nan ta violashon di e lei di Yehova. Esei ta e kaso tambe ku aktonan manera hòrtamentu, gañamentu i kalumnia. (Salmo 101:5; Kolosensenan 3:9; 1 Pedro 4:15) Santiago a kondená bromamentu i Pablo a konsehá nos pa evitá papiamentu di ko’i loko i chansanan bulgar. (Efesionan 5:4; Santiago 4:16) Pa kristiannan, tur e reglanan aki di kondukta ta parti dje lei perfekto di Dios.—Salmo 19:7.

8. (a) Kiko ta karakterisá Yehova su lei? (b) Kiko ta e nifikashon básiko di e palabra hebreo pa “lei”?

⁸ E reglanan básiko ei den e Palabra di Yehova ta mustra ku su lei ta hopi mas ku un simpel lista di statutonan legal impersonal. E ta forma e base pa un bida balansá i produktivo, i e ta benefisiá tur aspekto di nos kondukta. Dios su lei ta konstruktivo, étiko i instruktivo. (Salmo 119:72) E palabra “lei” ku e salmista a usa ta tradusí for dje palabra hebreo toh·ráh. Un eksperto di Beibel a bisa: ‘E palabra aki ta bini di  un verbo ku ta nifiká dirigí, guia, mek, pusha padilanti. P’esei anto su nifikashon lo ta un regla di kondukta.’ Pa e salmista e lei tabata un regalo di Dios. Nos tambe no mester tin tal apresio pa Dios su lei i pèrmití esaki influensiá nos estilo di bida?

9, 10. (a) Dikon nos tin mester di guia konfiabel? (b) Kua ta e úniko manera ku nos por logra un bida plasentero i eksitoso?

⁹ Tur kriatura tin mester di instrukshon i guia konfiabel. Esaki ta konta pa Hesus i e otro angelnan tambe, kendenan ta superior na hende. (Salmo 8:5; Huan 5:30; 6:38; Hebreonan 2:7; Revelashon 22:8, 9) Si e kriaturanan perfekto aki mes por saka benefisio for di guia divino, anto hende imperfekto lo saka muchu mas benefisio! Historia humano i nos eksperensia personal a duna prueba ku loke profeta Yeremías a bisa ta bèrdat: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.”—Yeremías 10:23.

¹⁰ Si nos kier tin un bida plasentero i eksitoso, nos tin ku akudí na Dios pa haña guia. Rei Sálomon a rekonosé e peliger di biba segun normanan personal, independiente dje guia di Dios. El a bisa: “Tin un kaminda ku ta parse bon den bista di hende, ma su fin ta e kaminda di morto.”—Proverbionan 14:12.

Motibunan pa Konsiderá Yehova Su Lei Komo un Tesoro

11. Pakiko nos mester tin e deseo pa komprendé Dios su lei?

¹¹ Ta bon pa nos kultivá un deseo profundo pa komprendé Yehova su lei. E salmista a ekspresá e anhelo ei ora el a bisa: “Habri mi wowo, pa mi por kontemplá kosnan maravioso for di bo lei.” (Salmo 119:18) Mas nos siña konosé Dios i su kamindanan, mas mihó nos lo komprondé e bèrdat di e palabranan di Isaías: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana. Mara bo a pone atenshon na mi mandamentunan!” (Isaías 48:17, 18) Yehova ta deseá sinseramente pa su pueblo evitá kalamidat i disfrutá di bida dor di presta atenshon na su mandamentunan. Laga nos analisá algun motibu prinsipal pakiko nos mester konsiderá Dios su lei komo un tesoro.

12. Den ki manera e echo ku Yehova konosé nos ta hasié e mihó Dunadó di Lei?

¹² Lei divino ta bini di Esun ku konosé nos mihó. Komo ku Yehova ta nos Kreador, ta lógiko ku e konosé nos dor èn dor. (Salmo 139:1, 2; Echonan 17:24-28) Ni amigunan íntimo, ni famia, ni nos mayornan no por konosé nos  bon manera Yehova. Sí, Dios konosé nos asta mihó ku nos mes! Esun ku a traha nos tin un komprendimentu inkomparabel di nos nesesidatnan spiritual, emoshonal, mental i físiko. Ora e ta dirigí su atenshon na nos, e ta desplegá un komprendimentu profundo di nos komposishon, deseonan i aspirashonnan. Yehova ta komprendé ku nos tin limitashon, pero tambe e sa kuantu kos di balor nos por logra. E salmista a bisa: “E sa di kiko nos ta trahá; e ta kòrda ku ta stòf nos ta.” (Salmo 103:14) Pues, nos por sinti un siguridat spiritual si nos hasi esfuerso pa kana na armonia ku su lei, i someté nos mes boluntariamente na su guia.—Proverbionan 3:19-26.

13. Dikon nos por ta sigur ku Yehova tin nos mihó interes na pechu?

¹³ Lei divino ta bini di Esun ku ta stima nos. Dios ta masha interesá den nos bienestar eterno. El a hasi un sakrifisio grandi, dunando su Yu komo “preis di reskate pa hopi.” (Mateo 20:28) Yehova a primintí ku lo e no laga nos ser ‘tentá mas ku nos por soportá.’ (1 Korintionan 10:13) Beibel ta sigurá nos ku Dios ‘ta pèrkurá pa nos.’ (1 Pedro 5:7) Yehova su interes den nos ta motivá pa amor. No tin ningun otro persona ku ta mas interesá kuné pa suministrá guia benefisioso pa e kreashon humano. E sa kiko ta bon pa nos i tambe e liña entre loke ta trese felisidat i loke ta trese sufrimentu pa nos. Ounke nos ta hende imperfekto i ta kometé eror, si nos sigui tras di hustisia, lo e demostrá su amor pa nos di tal forma ku esaki lo resultá den bida i bendishon.—Ezekiel 33:11.

14. Den ki manera importante Dios su lei ta distinto for di ideanan di hende?

¹⁴ Nos por konfia ku Dios su lei lo no kambia. Den e tempu turbulento ku nos ta bibando, Yehova ta un baranka di stabilidat ku a eksistí di eternidat te na eternidat. (Salmo 90:2) El a bisa di su mes: “Ami, SEÑOR, no ta kambia.” (Malakías 3:6) Dios su normanan ku ta pará skirbí den Beibel ta plenamente konfiabel—distinto di ideanan humano ku ta kambia konstantemente. (Santiago 1:17) Por ehèmpel, hopi aña largu sikólogonan a promové e idea di kria mucha na un manera hopi liberal, pero despues algun di nan a kambia di opinion i a atmití ku nan konseho tabata robes. Mundu su normanan i guia tokante e asuntu aki ta kambia konstantemente, komo si fuera suplá p’aki i p’aya dor di bientu. Sin embargo, Yehova su Palabra ta firme i konstante. Siglonan pasá Beibel a duna konseho enkuanto kon pa kria yu ku amor. Apòstel Pablo a skirbi: “Tatanan, no provoká boso yunan na rabia, ma lanta nan den e disiplina i instrukshon di Señor.” (Efesionan 6:4) Ta un konsuelo pa sa ku nos por dependé riba Yehova su normanan; nan lo no kambia!

Bendishonnan pa Hende Ku Ta Obedesé Dios Su Lei

15, 16. (a) Kiko lo ta e resultado si nos apliká e normanan di Yehova? (b) Den ki manera Dios su leinan por resultá di ta un guia sano pa matrimonio?

¹⁵ Mediante profeta Isaías, Dios a bisa: ‘Mi palabra ku ta sali for di mi boka lo alkansá su propósito.’ (Isaías 55:11) Nos tambe lo tin éksito sigur, logrando kosnan di balor i felisidat, basta nos hasi esfuerso sinsero pa sigui e normanan ku tin den su Palabra.

¹⁶ Wak kon Dios su lei ta sirbi komo un guia sano pa un matrimonio eksitoso. “Laga matrimonio wòrdu onrá pa tur hende,” Pablo a skirbi, “i laga e kama matrimonial ta sin mancha; pasobra Dios lo husga fornikadónan i adúlteronan.” (Hebreonan 13:4) Parehanan kasá mester mustra rèspèt i amor pa otro: “Laga  kada un di boso tambe stima su esposa manera su mes; i e esposa pèrkurá pa e respetá su esposo.” (Efesionan 5:33) Promé Korintionan 13:4-8 ta deskribí e klase di amor ku nan mester tin pa otro. E ta bisa: “Amor tin pasenshi, amor ta kariñoso i no ta yalurs; amor no ta gaba, i no ta arogante, e no ta komportá su mes indesente; e no ta buska su propio interes, e no ta wòrdu provoká, e no ta warda renkor, e no ta regosihá den inhustisia, ma ta regosihá den e bèrdat; tur kos e ta tapa, tur kos e ta kere, tur kos e ta spera, tur kos e ta soportá. Amor nunka no ta faya.” Un matrimonio den kua e klase di amor aki ta reina, lo no kibra.

17. Ki benefisio nos por saka dor di apliká Yehova su norma enkuanto uso di alkohòl?

¹⁷ Un otro evidensia ku Yehova su normanan ta benefisioso, ta e echo ku e ta kondená buracheria. Asta e ta taha pa hende “ta bisiá na hopi biña.” (1 Timoteo 3:3, 8; Romanonan 13:13) Hopi hende ku ta ignorá Dios su norma den e asuntu aki ta sufri di malesa ku bebementu di mas ta sea kousa òf empeorá. Dor ku algun hende a ignorá Beibel su konseho pa bebe na midí, nan a kai den e mal kustumber di bebe di mas djis pa “yuda nan relahá.” Bebementu di mas por trese hopi problema, entre otro, pèrdèmentu di rèspèt, relashonnan di famia tenso òf famia kibrá, malgastamentu di plaka i pèrdèmentu di empleo. (Proverbionan 23:19-21, 29-35) Pues, Yehova su norma enkuanto uso di alkohòl no ta un protekshon?

18. Dios su leinan ta útil den asuntunan finansiero? Splika.

¹⁸ E normanan di Dios a resultá útil tambe den asuntunan finansiero. Beibel ta urgi  kristiannan pa ta honesto i diligente. (Lukas 16:10; Efesionan 4:28; Kolosensenan 3:23) Pa motibu ku kristiannan ta sigui e konseho aki, hopi di nan a haña promoshon òf a keda ku nan trabou miéntras ku otro hende a pèrdè trabou. Tambe un persona por benefisiá finansieramente ora e evitá kustumber i adikshonnan ku Beibel ta kondená, manera wega di plaka, humamentu i droga. Sin duda bo por pensa riba otro ehèmpelnan ku ta mustra ku e normanan di Dios ta útil riba tereno ekonómiko.

19, 20. Dikon ta sabí pa aseptá Dios su leinan i kumpli ku nan?

¹⁹ Ta fásil pa hende imperfekto desviá for di Dios su norma i leinan. Kòrda e israelitanan na seru Sínai. Dios a bisa nan: “Si di bèrdat boso kier obedesé mi bos i warda mi aliansa, e ora ei boso lo ta un tesoro pekuliar riba tur pueblo.” Nan a kontestá: “Tur loke SEÑOR a bisa, nos lo hasi!” Sin embargo, nan a sigui un estilo di bida kompletamente kontrali na Dios su normanan! (Éksodo 19:5, 8; Salmo 106:12-43) Na kontraste ku nan, laga nos sí aseptá Dios su normanan i kumpli ku nan.

²⁰ Nos lo demostrá sabiduria i logra felisidat si nos pega estrechamente na e leinan inkomparabel ku Yehova a duna pa yuda guia nos bida. (Salmo 19:7-11) Pa nos por tin éksito den esaki, nos mester komprendé i tambe apresiá e balor dje prinsipionan di Dios. Esaki ta e tema di e siguiente artíkulo.

[Nota]

Bo Ta Kòrda?

• Dikon nos por tin konfiansa ku Dios su lei ta pa nos benefisio?

• Ki motibunan nos tin pa konsiderá Yehova su lei komo un tesoro?

• Den ki maneranan Dios su leinan ta benefisiá nos?

[Preguntanan di Estudio]

[Plachi na página 13]

Abraham a haña hopi bendishon pasobra el a obedesé Yehova su lei

[Plachi na página 15]

Ansiedatnan dje bida drùk djawe ta kita hopi hende su tinu for di Dios su lei

[Plachi na página 17]

Meskos ku un faro riba un baranka, Dios su lei ta stabil i inkambiabel