Bo Ta Kòrda?

Bo a disfrutá di e edishonnan resien di E Toren di Vigilansia? Awèl, wak si bo por kontestá e siguiente preguntanan:

• Ki programa personal ku tin di haber ku e Sermon Riba Seru bo por sigui pa aliviá strès?

Tur dia bo por lesa un siñansa básiko di Hesus den e sermon ei òf otro kaminda den e Evangelionan. Dor di meditá riba e siñansa ei i wak kon bo por aplik’é personalmente, probablemente lo bo ripará ku bo felisidat ta oumentá i bo strès ta mengua.—15/12, página 12-14.

• Kua tres bon motibu tin pa ansianonan di kongregashon entrená sirbidónan ministerial pa karga mas responsabilidat?

Dor ku e kantidat di Testigunan di Yehova ta oumentá, tin mester di mas hòmber responsabel pa yuda personanan ku a kaba di batisá pa nan progresá. Edat òf problema ku salú tambe ta un strobansa pa algun ku tin hopi aña komo ansiano. I algun ansiano kapas tin otro responsabilidatnan fuera di esnan di nan kongregashon pa kumpli kuné. Dor di esei, nan lo no por hasi mes tantu ku nan tabata hasi ántes den nan kongregashon.—1/1, página 29.

• Den ki manera hende ta konfia den diosnan ku no ta real?

Hopi hende ta adorá e diosnan di nan religion, pero e diosnan aki ta simplemente diosnan morto. I meskos ku Baal no por a perkurá salbashon den tempu di Elías, nan tampoko no por perkurá salbashon. (1 Reinan 18:26, 29; Salmo 135:15-17) Otronan ta adorá personahenan di farándula òf deportistanan ku no por duna nan ningun speransa berdadero pa futuro. Na kontraste, Yehova sí ta eksistí di bèrdat i e ta kumpli ku su propósito.—15/1, página 3-5.

• Kiko nos por siña for dje manera ku Kain a reakshoná riba Dios su spièrtamentu?

Dios a duna nos boluntat liber, i nos por skohe pa hasi loke ta bon en bes di hasi malu manera Kain a hasi. E relato bíbliko ta mustra tambe ku Yehova ta kondená esnan ku no arepentí.—15/1, página 22-3.

• Dikon limpiesa ta importante foral den e tempu aki?

Bida di hende a kambia asina tantu ku hopi no ta sobra tempu pa limpia nan kas manera nan tabata hasi ántes. Hende ku no ta tene kuenta ku higiena ora di trata ku kuminda i awa ta pone salú di otronan na peliger. Ademas di limpiesa físiko, Beibel ta pone énfasis tambe riba limpiesa spiritual, moral i mental.—1/2, página 3-6.

• Relashoná ku testigunan pre-kristian Pablo a bisa ku nan lo “no wòrdu hasí perfekto sin nos.” Kon asina? (Hebreonan 11:40)

Den e binidero Milenio ku Beibel ta papia di dje, ora Kristu i su rumannan ungí den shelu ta sirbi komo rei i saserdote nan lo trese e benefisionan di e reskate pa hende ku resusitá. Ta e fielnan ei manera esnan ku Hebreonan kapítulo 11 ta menshoná, lo “wòrdu hasí perfekto” den e sentido ei.—1/2, página 23.

• Kiko Pablo tabata kier men ora el a bisa e hebreonan: “Boso no a resistí ainda te na e punto di drama sanger”? (Hebreonan 12:4)

E tabata kier men resistí te na morto. Tin ehèmpelnan históriko di hende ku a keda fiel te na morto. Ounke e hebreonan na ken Pablo a skirbi no a haña nan ku prueba dje ekstremo ei, nan mester a progresá na madures, edifikando nan fe pa wanta tur loke por a bini riba nan.—15/2, página 29.

• Dikon ta mihó pa evitá di bisa ku Yehova ta moderá su hustisia ku miserikòrdia?

Den algun idioma, “moderá” por nifiká suavisá òf restringí. Yehova ta un Dios di tantu hustisia komo miserikòrdia, i e ta desplegá e dos kualidatnan aki na armonia ku otro. (Éksodo 34:6, 7; Deuteronomio 32:4; Salmo 116:5; 145:9) Yehova no tin nodi suavisá ni moderá su hustisia ku miserikòrdia.—1/3, página 30.

• Ta apropiado pa un kristian laga balsamá kurpa di un ser kerí ku a muri?

E proseso di balsamá ta un medio pa konserbá un kadaver. Algun hende di ántes a sigui e kustumber aki pa motibunan religioso. Kristiannan berdadero sí lo no hasié p’e motibunan ei. (Eklesiástes 9:5; Echonan 24:15) E proseso di balsamá morto solamente ta posponé loke ta inevitabel, esta, ku e kurpa ta bolbe na stòf. (Génesis 3:19) Pero no tin nodi preokupá si lei ta manda pa balsamá e morto, si miembronan di famia ta deseá esei, òf si e ta nesesario pasobra algun di nan tin ku biaha distansia largu pa asistí n’e entiero.—15/3, página 29-31.

• Kua ehèmpelnan bíbliko ta siña nos ku Dios ta aseptá hende di tur nashon?

Yehova a manda profeta Yónas bai spièrta e ninivitanan, i Dios a urgi Yónas pa aseptá nan repentimentu. Ku palabra i ehèmpel, Hesus a animá hudiunan pa mustra amor na e samaritanonan. Tantu apòstel Pedro komo apòstel Pablo a yuda hiba e bon nobo na hende ku no tabata hudiu. E ehèmpelnan ei ta laga nos komprendé ku nos mester purba yuda hende di tur antesedente.—1/4, página 21-4.