“Nos Lo Mira Otro den e Reino di Dios”

“Kerido amigu! Rupert, awe nan a sentenciá mi na morto. No yora pa mi. Cu cariño mi ta pensa riba boso tur den e cas. Nos lo mira otro den e Reino di Dios.”

RIBA 8 di juni 1942, Franc Drozg a skirbi e palabranan aki poco promé cu soldánan nazi a tir’é. Pakico nan a ehecut’é?

Segun registronan den e Museo di Liberacion Nacional di Maribor, Slovenia, e smid di 38 aña aki a nenga di uni cu e Wehrmannschaft. Esaki ta paramilitar aleman cu tabata ocupá Slovenia. Franc tabata un Studiante di Bijbel of Bibelforscher, manera nan tabata yama Testigonan di Jehova den e área ei. El a haci loke Isaías 2:4 ta bisa, i no a apoyá e guera nazi, demostrando cu e ta un súbdito di e Reino di Dios.—Mateo 6:33.

Na Ptuj, caminda Franc a lanta, hende tabata conoc’é como un proclamadó celoso di e bon nobo di e Reino di Dios. (Mateo 24:14) Apesar di hopi contratempu, el a predicá e bon nobo sin stop te cu nan a arest’é na mei 1942.

E nazinan a persiguí hopi Testigo di Jehova slovenio di un forma masha pisá. Franc tabata un di e proménan cu a ser ehecutá pa motibu di su creencia. Mescos cu e cristiannan di promé siglo, el a ser fortalecí dor di e palabranan: “Nos tin cu drenta den e reino di Dios atrabes di hopi tribulacion.” (Echonan 14:22) Su confiansa den e existencia di e gobiernu celestial ei tabata bisto den su último palabranan: “Nos lo mira otro den e Reino di Dios.”

[Rekonosementu pa Potrèt na página 32]

Franc Drozg: Archivo di Potret di e Museo di Liberacion Nacional di Maribor, Slovenia; carta: Original ta den e Museo di Liberacion Nacional di Maribor, Slovenia