Jehova Ta Mustra Nos Con pa Conta Nos Dianan

“Mustra nos exactamente con pa conta nos dianan di tal manera cu nos por trece un curason di sabiduria aden.”—SALMO 90:12.

1. Pakico ta apropiado pa pidi Jehova mustra nos con pa “conta nos dianan”?

JEHOVA DIOS ta nos Creador i Dunador di Bida. (Salmo 36:9; Revelacion 4:11) P’esei ningun otro hende por ta den un mihó posicion pa mustra nos con pa usa nos añanan di bida na un manera sabí. Tabata apropiado anto p’e salmista pidi Dios den oracion: “Mustra nos exactamente con pa conta nos dianan di tal manera cu nos por trece un curason di sabiduria aden.” (Salmo 90:12) Salmo 90, caminda nos ta haña e peticion ei, sigur merecé un análisis mas a fondo. Pero promé, laga nos haña brevemente un cuadro general dje cantica inspirá pa Dios aki.

2. (a) Ken ta ser mencioná como e compositor di Salmo 90, i na ki tempu lo el a ser skirbí? (b) Con Salmo 90 mester influenciá nos punto di bista di bida?

² E título di Salmo 90 ta yam’é “un oracion di Moises, e homber dje Dios berdadero.” Dor cu e salmo aki ta enfatisá con pasahero bida di hende ta, probablemente Moises a compon’é despues cu e israelitanan a ser librá for di sclabitud na Egipto i durante nan biahe di 40 aña den desierto, tempu cu miles di morto a caba cu un generacion sin fe. (Númeronan 32:9-13) Sea cual sea e caso, Salmo 90 ta mustra cu bida di hende imperfecto ta masha corticu. Ta claro anto cu nos mester usa nos dianan precioso na un manera sabí.

3. Kico básicamente ta e contenido di Salmo 90?

³ Salmo 90, versículo 1 pa 6 ta identificá Jehova como nos lugá di biba eterno. Versículo 7 pa 12 ta mustra kico nos mester haci pa usa nos añanan di bida pasahero na un manera aceptabel p’e. I manera versículo 13 pa 17 ta expresá, nos ta deseá sinceramente di ricibí Jehova su bondad amoroso i bendicion. Naturalmente e salmo aki no ta aplicá directamente  na nos experencianan personal como sirbidó di Jehova. No obstante, cada un di nos mester tuma nota dje actitud di debocion na Dios cu e salmo aki ta expresá den forma di un oracion i imit’é. P’esei laga nos analisá Salmo 90 mas a fondo for dje punto di bista di un persona dedicá na Dios.

Jehova—Nos “Berdadero Lugá di Biba”

4-6. Den ki sentido Jehova ta “un berdadero lugá di biba” pa nos?

⁴ E salmista ta cuminsá cu e palabranan: “O Jehova, bo mes a resultá di ta un berdadero lugá di biba pa nos durante generacion tras generacion. Promé cu e cerunan mes a nace, of cu abo a producí e tera i e tereno productivo manera cu dolor di parto, sí, for di tempu indefiní pa tempu indefiní bo ta Dios [of E Divino].”—Salmo 90:1, 2, nota na pia di página.

⁵ E “Dios eterno,” Jehova, ta “un berdadero lugá di biba,” of un refugio spiritual, pa nos. (Romanonan 16:26) Nos ta sinti nos sigur pasobra como e “Tendedor di oracion” semper e ta dispuesto pa yuda nos. (Salmo 65:2) Dor cu nos ta tira nos ansiedadnan riba nos Tata celestial pa medio di su Yu stimá, ‘e pas di Dios cu ta surpasá tur pensamentu lo warda nos curason i nos facultadnan mental.’—Filipensenan 4:6, 7; Mateo 6:9; Juan 14:6, 14.

⁶ Nos tin un siguridad spiritual pasobra den un sentido figurativo, Jehova ta “un berdadero lugá di biba” pa nos. Tambe e ta soru pa “cuartonan interior” cu ta sirbi como refugio spiritual. Eseinan probablemente ta masha ligá cu e congregacionnan di su pueblo caminda wardadónan amoroso ta duna un contribucion grandi na nos sentido di siguridad. (Isaías 26:20; 32:1, 2; Echonan 20:28, 29) Ademas, algun di nos ta pertenecé na famianan cu tin un historia largu di sirbishi na Dios i cu a mira personalmente cu e ta ‘un berdadero lugá di biba durante generacion tras generacion.’

7. Den ki sentido e cerunan a “nace” i tera a ser producí manera cu “dolor di parto”?

⁷ Jehova a existí promé cu e cerunan a “nace” of promé cu tera a ser producí manera cu “dolor di parto.” Mirá for di un punto di bista humano, bastante esfuerso tabata necesario pa producí e tera aki cu tur su rasgonan, kímica i mecanismonan complicá. I dor di bisa cu cerunan a “nace” i cu tera a ser producí cu “dolor di parto,” e salmista ta mustra gran respet pa tur e trabou cu Jehova su creacion a encerá. Nos tambe no mester tin e mésun respet i gratitud p’e obra dje Creador?

Semper Jehova Ta Cla pa Yuda Nos

8. Kico e declaracion cu Jehova ta Dios “for di tempu indefiní pa tempu indefiní” ta nificá?

⁸ “Sí, for di tempu indefiní pa tempu indefiní bo ta Dios,” e salmista a canta. “Tempu indefiní” por referí na cosnan cu tin un fin pero sin un duracion specífico. (Éxodo 31:16, 17; Hebreonan 9:15) Pero na Salmo 90:2 i na algun otro caminda den e Scritura Hebreo, “tempu indefiní” ta nificá “eterno.” (Eclesiástes 1:4) Nos mente no por comprendé con Dios por a existí semper. Sin embargo, Jehova no tabatin principio i lo no tin fin. (Habacuc 1:12) Semper lo e ta bibu i cla pa yuda nos.

9. Cu kico e salmista ta compará mil aña di existencia humano?

⁹ Bou di inspiracion e salmista a bisa cu pa e Creador eterno mil aña di existencia humano ta ekivalente na un tempu masha corticu. Dirigiendo su mes na Dios, el a skirbi: “Bo ta pone hende mortal bai bek na materia garná, i bo ta bisa: ‘Bai bek, yunan di hende.’ Pasobra mil aña den bo bista ta djis manera e dia di ayera ora el a pasa, i manera un warda di anochi.”—Salmo 90:3, 4.

10. Den ki sentido Dios ta pone hende “bai bek na materia garná”?

¹⁰ Hende ta mortal, i Dios ta pon’é “bai bek na materia garná.” Es decir, hende ta bolbe “na stòf,” esta tera garná of puiru. Den un sentido, Jehova ta bisa: ‘Bolbe n’e stòf di suela for di cua bo a ser trahá.’ (Génesis 2:7; 3:19) Esaki  ta conta pa nos tur—sea cu nos ta fuerte of débil, ricu of pober—pasobra niun hende imperfecto ‘di ningun manera por rescatá sikiera un ruman, ni duna Dios un rescate p’e, pa e biba pa semper.’ (Salmo 49:6-9) Pero nos ta masha gradicidu cu ‘Dios a duna su Yu unigénito, pa tur cu ehercé fe den dje por haña bida eterno.’—Juan 3:16; Romanonan 6:23.

11. Pakico nos por bisa cu un tempu largu pa nos ta masha corticu pa Dios?

¹¹ For dje punto di bista di Jehova, asta Metúsalem di 969 aña di edad a biba ménos cu un dia. (Génesis 5:27) Pa Dios, mil aña ta manera ayera—un lapso di tempu di apénas 24 ora—ora el a pasa. Tambe e salmista ta mencioná cu pa Dios mil aña ta manera un vigilante su warda di cuater ora na un campamentu durante anochi. (Huesnan 7:19) Ta claro anto cu un tempu largu pa nos ta masha corticu p’e Dios eterno, Jehova.

12. Den ki sentido Dios ta “bari” hende “bai cuné”?

¹² Na contraste cu Dios su existencia eterno, e bida humano actual en berdad ta corticu. E salmista ta bisa: “Bo a bari nan bai cuné; nan ta bira djis un soño; mainta nan ta net manera yerba berde cu ta cambia. Mainta e ta saca flor i tin cu cambia; anochi e ta marchitá i ta seca sigur.” (Salmo 90:5, 6) Moises a mira miles di israelita muri den desierto, ‘barí’ dor di Dios manera den un diluvio. Un otro version di Bijbel ta bisa: “Bo ta bari hende bai cuné den e soño di morto.” (New International Version) Di otro banda, e duracion di bida di hende imperfecto ta “djis un soño” corticu—comparabel cu e soño di un anochi.

13. Den ki sentido nos ta “net manera yerba berde,” i ki efecto esaki mester tin riba nos manera di pensa?

¹³ Nos ta ‘net manera yerba berde cu mainta ta saca flor’ pero cu pa anochi a marchitá dor dje calor intenso di solo. Sí, nos bida ta mes pasahero cu yerba cu ta marchitá riba un solo dia. P’esei, laga nos no desperdiciá e tesoro precioso aki. Mas bien, nos mester busca e guia di Dios pa sa con nos tin cu usa e añanan cu a sobra nos den e sistema di cosnan aki.

Jehova Ta Yuda Nos “Conta Nos Dianan”

14, 15. Con Salmo 90:7-9 a cumpli riba e israelitanan?

¹⁴ E salmista ta agregá relacioná cu Dios: “Nos a yega na nos fin den bo rabia, i dor di bo furia nos a keda perturbá. Bo a pone nos erornan net bo dilanti, nos cosnan scondí dilanti bo cara briyante. Pasobra tur nos dianan a yega na nan fin den bo furia; nos a caba nos añanan mescos cu un fluister.”—Salmo 90:7-9.

¹⁵ E israelitanan sin fe a ‘yega na nan fin den Dios su rabia.’ Nan a keda ‘perturbá dor di su furia,’ of ‘terorisá dor di su indignacion.’ (New International Version) Algun a “keda bentá abou den e desierto” como resultado di huicio divino. (1 Corintionan 10:5) Jehova a ‘pone nan erornan net dilanti dje.’ El a tene nan responsabel pa nan malecho público, pero asta nan “cosnan scondí,” of picánan cu nan a tapa, tabata ‘dilanti su cara briyante.’ (Proverbionan 15:3) Como obheto dje furia di Dios, e israelitanan cu no a repentí a ‘caba nan añanan mescos cu un fluister.’ Den e contexto ei, nos mes bida corticu ta manera un rosea cu ta pasa nos lipnan mescos cu djis un fluister.

16. Si algun persona ta practicá picá secretamente, kico nan mester haci?

 ¹⁶ Si cualkier un di nos practicá picá secretamente, kisas nos lo por sconde e mal conducta ei for di nos próhimo pa un tempu. Pero nos malecho scondí lo ta ‘dilanti Jehova su cara briyante,’ i nos accionnan lo daña nos relacion cuné. Pa nos por bolbe haña un bon relacion cu Jehova, nos lo tin cu pidié pordon, bandoná nos erornan i aceptá cu gratitud e yudansa spiritual di ancianonan cristian. (Proverbionan 28:13; Santiago 5:14, 15) Esei lo ta muchu mas mihó cu core e riesgo di ‘caba nos añanan mescos cu un fluister,’ i pone nos speransa di bida eterno na peliger.

17. Por lo general cuantu aña hende ta biba, i nos añanan ta yen di kico?

¹⁷ Relacioná cu e duracion di bida di hende imperfecto, e salmista ta bisa: “Riba nan mes e dianan di nos añanan ta setenta aña; i si debí na poder special nan ta ochenta aña, sin embargo nan insistencia ta den afan penoso i cosnan perhudicial; pasobra e tin cu pasa bai lihé, i nos ta bula bai.” (Salmo 90:10) Por lo general, hende ta biba 70 aña. Pues cu su 85 aña di edad, Caleb por a papia di forsa extraordinario. Tabatin excepcionnan sí, manera Aron (123), Moises (120) i Hosué (110). (Númeronan 33:39; Deuteronomio 34:7; Hosué 14:6, 10, 11; 24:29) Pero e generacion sin fe cu a sali for di Egipto, esnan cu tabatin 20 aña bai ariba, a muri denter di 40 aña. (Númeronan 14:29-34) Awe, den hopi pais e duracion normal di bida humano ta keda den e márgen cu e salmista a duna. Nos añanan ta yen di “afan penoso i cosnan perhudicial.” Nan ta pasa bai lihé, “i nos ta bula bai.”—Job 14:1, 2.

18, 19. (a) Kico kier men “conta nos dianan di tal manera cu nos por trece un curason di sabiduria aden”? (b) Si nos ta sabí, kico nos lo haci?

¹⁸ E salmista ta canta siguientemente: “Ta ken conocé e forsa di bo rabia i bo furia di acuerdo cu e temor di bo? Mustra nos exactamente con pa conta nos dianan di tal manera cu nos por trece un curason di sabiduria aden.” (Salmo 90:11, 12) Ningun di nos conocé e forsa dje rabia di Dios completamente of te con leu su furia ta yega. P’esei nos temor respetuoso di Jehova mester ta asta mas grandi. De echo, esei mester motivá nos pa pidié mustra nos “exactamente con [nos por] conta nos dianan di tal manera cu nos por trece un curason di sabiduria aden.”

¹⁹ E salmista ta pidi den oracion pa Jehova siña su pueblo con pa usa sabiduria den balorá e dianan cu nan lo biba ainda i con pa usa esakinan na un manera cu Dios ta aprobá. Un bida di 70 aña ta nificá cu un hende lo por biba rond di 25.500 dia. Pero sea cual sea nos edad, ‘nos no sa con nos bida lo ta mañan, pasobra nos ta un neblina cu ta presentá pa poco tempu anto disparcé.’ (Santiago 4:13-15) Dor cu ‘tempu i suceso imprevisto ta cai riba nos tur,’ nos no por bisa cuantu aña mas nos lo biba. P’esei laga nos pidi sabiduria pa enfrentá prueba, pa trata otro bon i pa awor akí, sí awe mes, nos haci nos best den sirbishi di Jehova! (Eclesiástes 9:11; Santiago 1:5-8) Jehova ta guia nos pa medio di su Palabra, su spiritu i su organisacion. (Mateo 24:45-47; 1 Corintionan 2:10; 2 Timoteo 3:16, 17) Si nos ta sabí, nos lo ‘busca promé e Reino di Dios’ i usa nos dianan di bida na un manera cu ta duna gloria na Jehova i haci su curason alegrá. (Mateo 6:25-33; Proverbionan 27:11) Claro cu nos lo no keda liber di tur problema ora nos ta adorá Jehova di henter curason, pero sí nos lo haña hopi goso den bida.

Jehova Su Bendicion Ta Duna Nos Goso

20. (a) Den ki sentido Dios ta “sinti duele”? (b) Con Jehova lo trata nos si nos faya seriamente, pero ta demostrá berdadero repentimentu?

²⁰ Con magnífico lo ta si nos por a alegrá p’e resto di nos bida! Relacioná cu esaki, Moises ta roga: “Bolbe, o Jehova! Pa cuantu tempu lo e ta? I sinti duele di bo sirbidónan. Satisfacé nos mainta cu bo bondad amoroso [of, “amor leal”], pa nos por grita di goso i alegrá durante tur nos dianan.” (Salmo 90:13, 14; nota na pia di página) Dios no ta cometé eror. No obstante,  e ta “sinti duele” i ta “bolbe” for di su rabia i keda sin duna castigu ora su spiertamentu tocante un medida asina producí un cambio den actitud i conducta di malechornan repentí. (Deuteronomio 13:17) Pues asta si nos faya seriamente, pero ta demostrá berdadero repentimentu, Jehova lo ‘satisfacé nos cu su bondad amoroso,’ i nos lo tin motibu pa “grita di goso.” (Salmo 32:1-5) I dor di cana riba e caminda di husticia, nos lo sinti e amor leal cu Dios tin pa nos i nos lo por “alegrá durante tur nos dianan”—sí, pa e resto di nos bida.

21. Cu e palabranan na Salmo 90:15 i 16, kico Moises lo tabata pidiendo?

²¹ E salmista ta resa pidi sinceramente: “Haci nos contentu conforme e dianan cu bo a afligí nos, e añanan cu nos a mira calamidad. Cu bo actividad aparecé na bo mes sirbidónan i bo splendor riba nan yunan.” (Salmo 90:15, 16) Tal bes Moises tabata pidiendo Dios p’e bendicioná Israel cu e alegria cu a corespondé, of cu a dura mes largu, cu nan dianan di afliccion i e añanan durante cua nan a sufri calamidad. El a pidi pa Dios su “actividad” di bendicioná e israelitanan bira bisto pa Su sirbidónan i pa Su splendor keda manifestá riba nan yunan, of desendientenan. Ta apropiado pa nos pidi Dios drama su bendicionnan riba humanidad obediente den Dios su mundu nobo primintí.—2 Pedro 3:13.

22. Segun Salmo 90:17, kico ta apropiado pa nos resa pidi p’e?

²² Salmo 90 ta concluí cu e súplica aki: “Laga e agradabilidad di Jehova nos Dios resultá di ta riba nos, i establecé firmemente e obra di nos mannan riba nos. Sí, e obra di nos mannan,  establec’é firmemente.” (Salmo 90:17) E palabranan aki ta mustra cu ta apropiado pa nos resa pidi Dios p’e bendicioná nos esfuersonan den su sirbishi. Como cristian ungí of nan compañeronan, e ‘otro carnénan,’ nos ta alegrá cu “e agradabilidad di Jehova” ta riba nos. (Juan 10:16) Nos ta masha contentu cu Dios a ‘establecé firmemente e obra di nos man’ como proclamadó di Reino i tambe den otro manera!

Laga Nos Sigui Conta Nos Dianan

23, 24. Ora nos ta meditá riba Salmo 90, con esei por beneficiá nos?

²³ Ora nos meditá riba Salmo 90, nos ta bai dependé mas riba Jehova, nos “berdadero lugá di biba.” Dor di refleccioná riba su palabranan tocante con corticu bida ta, nos mester bira mas conciente dje necesidad pa busca e guia di Dios ora di conta nos dianan. I si nos perseverá den busca i ehercé sabiduria divino, nos sigur lo ricibí e bondad amoroso i bendicion di Jehova.

²⁴ Jehova lo sigui mustra nos con pa conta nos dianan. I si nos aceptá su instruccion, nos lo por sigui conta nos dianan pa tur eternidad. (Juan 17:3) Si di berdad nos kier haña bida eterno, anto Jehova mester ta nos refugio. (Hudas 20, 21) Manera nos lo mira den e siguiente artículo, e palabranan alentador di Salmo 91 ta trece e punto aki masha cla padilanti.

Con Lo Bo Contestá?

• Den ki sentido Jehova ta “un berdadero lugá di biba” pa nos?

• Pakico nos por bisa cu Jehova ta semper cla pa yuda nos?

• Con Jehova ta yuda nos “conta nos dianan”?

• Kico ta pone cu nos ta “alegrá durante tur nos dianan”?

[Preguntanan di Estudio]

[Plachi na página 10]

Jehova tabata Dios “promé cu e cerunan mes a nace”

[Plachi na página 12]

For dje punto di bista di Jehova, Metúsalem di 969 aña di edad a biba ménos cu un dia

[Plachinan na página 14]

Jehova a ‘establecé firmemente e obra di nos man’