Con Bo Bida Por Tin un Nificacion Mas Grandi

UN PROVERBIO di antiguo ta bisa: “No afaná bo pa gana rikesa. Kita for di bo mes comprendimentu. Bo a haci bo wowo tira un bista riba dje, ya cu e no ta nada? Pasobra sin falta e ta traha ala pa su mes manera esnan di un águila i ta bula bai shelu.” (Proverbionan 23:4, 5) Cu otro palabra, no ta sabí pa nos cansa nos mes purbando di bira ricu, pasobra rikesa por bula bai manera riba ala di un águila.

Manera Bijbel ta mustra, rikesa material por disparcé rápidamente. E por disparcé den un anochi dor di un desaster natural, un colapso económico of otro sucesonan imprevisto. Ademas, asta esnan cu logra éxito den cosnan material hopi bes ta desilusioná. Considerá e caso di Juan, kende su trabou tabata pa entretené políticonan, deportistanan famoso i hende di cas real.

Juan ta bisa: “Mi a dedicá mi mes completamente na mi trabou. Financieramente mi a prosperá, mi tabata keda den hotelnan luhoso i tin bes asta bai trabou cu avion privá. Na principio mi a disfrutá di dje, pero gradualmente mi a fada di esei. E hendenan cu mi a trata di agradá a parce superficial. Mi bida tabata sin nificacion.”

Manera Juan a descubrí, un bida sin balor spiritual no ta duna satisfaccion. Den su famoso Sermon Riba Ceru, Jesucristo a mustra con pa experenciá felicidad duradero. El a bisa: “Felis ta esnan cu ta conciente di nan necesidad spiritual, ya cu e reino di shelu ta pertenecé na nan.” (Mateo 5:3) Sin duda anto, ta sabí pa pone asuntunan spiritual na promé lugá den bida. Sin embargo, otro factornan tambe por yuda duna bida un nificacion mas grandi.

Bo Famia i Amigunan Realmente Ta Importá

Lo bo a disfrutá di bida si bo no tabatin ningun contacto cu bo famia i no tabatin ningun amigu íntimo? Claro cu no. Nos Creador a crea nos cu e necesidad di stima i ser stimá. Esaki ta un motibu pakico Jesus a enfatisá e importancia di ‘stima nos próhimo mescos cu nos mes.’ (Mateo  22:39) Famia ta un regalo divino cu ta percurá un ambiente ideal pa desplegá amor inegoista.—Efesionan 3:14, 15.

Con nos famia por duna nos bida un nificacion mas grandi? Wel, por compará un famia uní cu un hardin bunita cu ta percurá un refugio refrescante for dje stres diario di bida. Asina tambe den famia, nos por haña compañerismo i cariño refrescante cu ta core cu sintimentunan di soledad. Naturalmente, un famia no ta percurá tal refugio automáticamente. Sin embargo, segun cu nos ta fortalecé e banchi di famia, nos ta hala mas cerca di otro i esei ta enrikesé nos bida. Por ehempel, e tempu i atencion cu nos ta dedicá na mustra amor i respet pa nos casá ta un inversion diario cu por resultá finalmente den recompensa ricu.—Efesionan 5:33.

Si nos tin yu, nos mester haci esfuerso pa percurá e ambiente adecuá pa lanta nan aden. Dedicá tempu na nan, mantené e canal di comunicacion habrí i duna nan instruccion spiritual por ta pisá. Pero tal tempu i esfuerso por duna nos gran satisfaccion. Mayornan exitoso ta mira yunan como un bendicion, como un herencia for di Dios cu tin cu ser bon cuidá.—Salmo 127:3.

Bon amigunan tambe ta contribuí na un bida satisfactorio i cu propósito. (Proverbionan 27:9) Nos por haña hopi amigu dor di demostrá comprension. (1 Pedro 3:8) Berdadero amigu ta yuda nos lanta ora nos trompecá. (Eclesiástes 4:9, 10) I “un berdadero compañero . . . ta un ruman cu a nace pa ora tin angustia.”—Proverbionan 17:17.

Esta un satisfaccion berdadero amistad por duna! Un bahada di solo ta mas impresionante, un cuminda mas sabroso, i música mas placentero, ora compartié cu un amigu. Naturalmente, un famia uní i amigunan confiabel ta djis dos faceta di un bida significativo. Ki otro provisionnan Dios a percurá cu por duna nos bida un nificacion mas grandi?

Satisfacé Nos Necesidad Spiritual

Manera a ser mencioná promé, Jesucristo a asociá felicidad cu ser conciente di nos necesidad spiritual. Nos a ser creá cu un capacidad spiritual i moral. P’esei Bijbel ta referí na “e hende spiritual” i “e persona secreto di curason.”—1 Corintionan 2:15; 1 Pedro 3:3, 4.

Segun An Expository Dictionary of New Testament Words, di W. E. Vine, e curason figurativo ta indicá “henter e actividad mental i moral di hende, tantu e elementonan di razoná como esnan emocional.” Pa splica esei, Vine a agregá: “Cu otro palabra, ta usa e curason figurativamente como e fuente scondí di e bida personal.” E mésun buki ta remarcá tambe cu “e curason, situá profundamente paden, ta contené ‘e hende scondí’ . . . e berdadero hende.”

Con nos por satisfacé e necesidad di “e hende spiritual,” of “e hende scondí” cu ta “e persona secreto di curason”? Nos ta dal un paso importante pa haci esaki i satisfacé nos necesidad spiritual ora nos ta reconocé e punto cu e salmista inspirá a señalá. El a canta: “Sabi cu Jehova ta Dios. E ta esun cu a traha nos, i no nos mes. Nos ta su pueblo i e carnénan di su sabana.” (Salmo 100:3) Reconociendo esaki ta hiba nos lógicamente n’e conclusion cu nos tin cu rindi cuenta na Dios. Si nos kier ta incluí entre “su pueblo i e carnénan di su sabana,” nos tin cu actua na armonia cu su Palabra, Bijbel.

Rindi cuenta na Dios ta un desbentaha? No, pasobra ora nos ta conciente dje echo cu Dios ta duna importancia na nos conducta, esaki ta agregá nificacion na nos bida. Esaki ta animá nos pa ta un mihó persona, un meta cu sigur ta bale la pena. Salmo 112:1 ta bisa: “Felis ta e homber cu ta teme Jehova, den kende su mandamentunan el a deleitá masha tantu.” Teme Dios cu respet profundo i obedecé su mandamentunan di curason, por duna nos bida un nificacion mas grandi.

Pakico obedencia na Dios ta satisfacé nos? Pasobra nos tin un concenshi, un don cu Dios a duna tur hende. E concenshi ta un examinadó moral cu ta registrá aprobacion of desaprobacion di loke nos a haci of loke nos tin pensá di haci. Nos tur a experenciá e angustia di un concenshi cu a molestiá nos. (Romanonan 2:15) Pero nos concenshi por recompensá nos  tambe. Ora nos haci algu inegoista pa cu Dios i próhimo, nos ta sinti nos contentu i satisfecho. Nos ta haña cu “tin mas felicidad den duna cu tin den ricibí.” (Echonan 20:35) Tin un motibu importante pa esaki.

E Creador a traha nos di tal forma cu e deseonan i necesidadnan di nos próhimo tin un efecto riba nos. Yuda otro hende ta producí goso den nos mes curason. Ademas, Bijbel ta sigurá nos cu ora nos ta duna na un persona den necesidad, Dios ta considerá esaki un fabor hací na dje.—Proverbionan 19:17.

Fuera di duna nos satisfaccion interno, atencion na nos necesidad spiritual por yuda nos den un manera práctico? Wel, un comerciante di Medio Oriente cu yama Raymond ta kere cu sí. “Mi único meta tabata pa gana placa,” el a bisa. “Pero n’e momento cu mi a aceptá den mi curason cu ta existí un Dios i cu Bijbel ta expresá su deseonan, mi a bira un homber diferente. Traha pa e pan di cada dia, awor ta na di dos lugá den mi bida. Trata na agradá Dios, a spar mi dje sintimentu destructivo di odio. Aunke mi tata a muri durante un conflicto, mi no tin deseo di venga esnan responsabel.”

Manera Raymond a descubrí, percurando bon pa e necesidad di “e hende spiritual” por cura heridanan emocional profundo. Sin embargo, a ménos cu nos enfrentá e problemanan di tur dia cu éxito, bida lo no ta completamente satisfactorio.

Nos Por Tin “e Pas di Dios”

Den e mundu druk aki, ta poco dia ta pasa suavemente. Accidente ta sosodé, plannan ta bai malu, i hende ta decepcioná nos. E contratempunan aki por horta nos felicidad. Pero, pa esnan cu ta sirbi Jehova Dios, Bijbel ta primintí un felicidad interno: “e pas di Dios.” Con nos por adkerí e pas aki?

Apostel Pablo a skirbi: “No sea ansioso riba nada, sino den tur cos mediante oracion i súplica huntu cu gradicimentu, laga boso peticionnan bira conocí na Dios; i e pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.” (Filipensenan 4:6, 7) En bes di purba carga nos problemanan nos so, nos mester haci oracion ferviente, tirando nos carga diario riba Dios. (Salmo 55:22) Segun cu nos ta crece spiritualmente i ta dicerní con Dios ta yuda nos, nos fe cu e lo contestá tal súplica mediante su Yu Jesucristo, lo aumentá.—Juan 14:6, 14; 2 Tesalonicensenan 1:3.

Despues cu nos a edificá nos confiansa den Jehova Dios, e “Tendedor di oracion,” nos ta mihó capacitá pa enfrentá cu éxito pruebanan manera enfermedad prolongá, edad avansá of pérdida di un ser kerí. (Salmo 65:2) Sin embargo, pa un bida berdaderamente significativo, nos mester tuma e futuro tambe na cuenta.

Alegrá den e Speransa Nos Dilanti

Bijbel ta primintí “shelu nobo i un tera nobo,” un gobiernu celestial hustu i bondadoso gobernando riba un famia humano obediente. (2 Pedro 3:13) Den e mundu nobo ei cu Dios a primintí, guera i inhusticia lo ser remplasá pa pas i husticia. Esaki no ta djis un deseo pasahero,  pero e ta un conviccion cu por bira mas fuerte cada dia. Di berdad e ta bon nobo i sigur un motibu pa alegrá.—Romanonan 12:12; Tito 1:2.

Juan, cu a ser mencioná na principio, awor ta sinti cu su bida tin un nificacion mas grandi. “Aunke nunca mi tabata masha religioso, semper mi a kere den Dios,” el a bisa. “Pero mi no a haci nada cu e creencia aki, sino te ora cu dos Testigo di Jehova a bishitá mi. Mi a bombardiá nan cu pregunta, manera: ‘Pakico nos ta aki na mundu? Unda nos ta bai?’ Nan contestanan bíblico satisfactorio a duna mi un sentido di propósito pa promé biaha den mi bida. Esei tabata solamente e comienso. Mi a desaroyá un sed pa berdad cu a hiba mi na cambia tur mi normanan. Apesar cu materialmente mi no ta ricu mas, spiritualmente mi ta sinti mi un miyonario.”

Mescos cu Juan, kisas bo a laga bo capacidad spiritual inactivo pa hopi aña. Sin embargo, dor di desaroyá “un curason di sabiduria,” bo por rebib’é. (Salmo 90:12) Cu determinacion i esfuerso, bo por tin berdadero goso, pas i speransa. (Romanonan 15:13) Sí, i bo bida por tin un nificacion mas grandi.

[Plachi na página 6]

Oracion por duna nos “e pas di Dios”

[Plachinan na página 7]

Bo sa kico por haci bida di famia mas satisfactorio?