Rescate Riba Isla  Robinson Crusoe

ROBINSON CRUSOE ta un di e tres islanan den océano Pacífico cu ta forma e archipiélago yamá Juan Fernández, mas o ménos 640 kilometer for di e costa di Chile. * E isla di 93 kilometer cuadrá a haña e nomber ei di un buki famoso di siglo 18 titulá Robinson Crusoe, skirbí dor di e autor ingles Daniel Defoe. E buki aparentemente tabata basá den liñanan general riba e aventuranan di un escoses, Alexander Selkirk, cu pa un cuater aña a biba su so riba e isla.

Un borchi di palu riba e isla ta bisa en parti: “Na e sitio aki, dia aden dia afó pa mas cu cuater aña, e nabegante escoses Alexander Selkirk tabata wak horizonte ansiosamente en busca i en espera di un boto di rescate cu lo a bin libr’é for di su isolacion.” Finalmente, nan a rescatá Selkirk i hib’é su tera natal bek, na un mundu cu no a satisfacé mas despues cu el a biba den su mes paradijs chikitu. Segun informe, el a bisa despues: “Ai, mi isla stimá! Mare nunca m’a laga bo!”

Segun cu tempu a pasa, a usa e isla como un colonia penal, habitá solamente pa esnan cu a cometé “crímen di fe” contra Iglesia Católico. Ki un cambio for di e isla paradísico cu Selkirk a conocé! Sin embargo, e habitantenan actual dje isla ta gosa di un serenidad trankil desconocí den hopi parti di mundu. E estilo di bida di bai poco-poco, cu ta algu típico di hopi cultura di isla, ta hacié fácil pa cuminsá un combersacion cu ken cu ta.

Oficialmente, Robinson Crusoe tin mas o ménos 500 habitante, pero durante gran parti di aña, solamente un 400 hende ta biba riba dje. Esaki ta en parti debí cu algun mama i nan yunan ta biba riba e tera firme di Chile durante e aña escolar, i ta bai bek na e isla solamente durante e lunanan di vakansi pa pasa tempu huntu cu e resto dje famia.

Apesar di ta rondoná pa un ambiente bunita manera hardin riba Robinson Crusoe, algun isleño ta sinti un bashí spiritual i ta buscando contesta pa nan preguntanan. Otronan a sinti como si fuera nan mester a ser rescatá spiritualmente.

Un Rescate Spiritual

E trabou di rescate ei a cuminsá rond di 1979. Un señora cu tabata studia Bijbel cu Testigonan di Jehova na Santiago, Chile, a muda p’e isla i a cuminsá instruí otronan loke el a siña. Algun tempu despues un anciano di congregacion cu a bishitá e isla pa motibunan seglar a keda sorprendí di haña un grupo chikitu di studiantenan di Bijbel ta haci progreso spiritual cu yudansa dje señora ei. Tres luna despues, ora e anciano a bishitá e isla atrobe, e maestra di Bijbel isolá aki i su dos studiantenan tabata cla pa bautisá, pues e anciano a dirigí nan bautismo.  Mas despues, un dje cristiannan nobo bautisá aki a casa i huntu cu su casá, a sigui busca otronan cu tabatin mester di rescate spiritual. Su casá a hiba delantera den construí un Salon di Reino modesto, cu te awe ta sirbi e grupo chikitu riba e isla. Cu tempu, pa motibunan económico, nan a bandoná Robinson Crusoe i a muda pa un congregacion den central di Chile, caminda nan ta sigui sirbi Jehova activamente.

Tiki-tiki, e grupo chikitu riba e isla a sigui crece segun cu otronan ta ser rescatá for di religion falsu. Dor cu alumnonan tin cu muda bai tera firme pa bai nan scol secundario, e grupo a mengua te na dos ruman muher bautisá i un hobencita. E grupo ta crece durante e temporada di vakansi ora algun mama ta bolbe n’e isla. Esaki ta sirbi pa animá e tres isleñonan cristian isolá cu ta keda einan henter aña. Como resultado dje trabou duru di e tres ruman muhernan ei, Testigonan di Jehova ta bon conocí na Robinson Crusoe. Ta berdad cu tin algun hende ta oponé nan trabou i ta purba preshoná otronan pa rechasá e mensahe di Reino. Apesar di esei, simianan di berdad bíblico plantá den curasonnan sincero ta sigui spruit.

Fortaleciendo Esnan Rescatá

Un bes pa aña un superintendente biahero ta bishitá e isla. Con un bishita na un grupo chikitu di Testigo riba un isla asina leu ta bai? Un superintendente di circuito ta describí su promé bishita na Robinson Crusoe:

“E biahe aki tabata un soño cu a bira realidad. El a cuminsá 7’or di mainta ora nos a bai for di Valparaiso cu auto p’e Aeropuerto Cerrillos di Santiago. Nos a subi un avioneta di shete pasahero, i despues di un vuelo di 2 ora i 45 minuut, nos a mira riba un distancia un punta di ceru cu tabata pasa e nubianan bai. Segun cu nos tabata yega mas cerca, nos por a mira e isla—un baranca impresionante meimei di océano. El a parce di ta drif meimei di un cantidad enorme di awa, manera un barcu perdí riba laman.

 Despues di aterisahe, un boto a hiba nos n’e pueblito. Aki aya, tabatin barancanan grandi ta sali for di laman formando islanan chikitu cu a sirbi como lugá di descanso pa Juan Fernández su cachónan di awa. E cachónan di awa aki ta un sorto protehá dor cu nan cantidad a mengua drásticamente. Di ripiente un cos a bula pasa banda di e boto promé cu el a disparcé den laman atrobe. Tabata un piscá buladó, cua su hala plisá ta parce hala di para. Ta parce cu el a gusta bula for di awa pa coge insecto. Claro cu tin biaha nan ta coge e mes tambe; podisé su bulamentu ta hala atencion di otro yagdó cu ta cla pa gulié ora e ta bayendo bek den awa.

Finalmente nos a yega n’e pueblo di San Juan Bautista. Tabatin basta isleño pará riba waf, sea pa spera nan bishitantenan of simplemente curioso pa mira ken a yega e biaha aki. Nos a keda impresioná cu e panorama bunita—e ceru mahestuoso i cu punta yamá El Yunque (E Bloki di Mula), como si fuera cubrí cu un tapijt di felpa berde scur, i den fondo, un shelu blou cla-cla cu na su rand un cantidad di nubia blancu.

Pronto nos a ripará cu tabatin un grupo di rumannan muher cristian huntu cu nan yunan ta warda nos riba waf. Tabata temporada di vakansi, p’esei e grupo tabata mas grandi cu normal. Despues di a cumindá otro calurosamente, nan a hiba nos na un bungalow atractivo cu nos lo a yama cas pa un siman.

Tabata un siman mashá special, i nos a realisá cu e lo a pasa lihé. Nos mester a haci bon uso di nos tempu. E mésun dia ei, djis despues di lunch, nos a bishitá un studiante di Bijbel cu pronto lo a bira nos ruman muher spiritual i parti di Dios su paradijs spiritual. E tabata briya di alegria pero tambe e tabata un tiki nervioso. E tempu tan sperá di su bautismo tabata acercando. Nos a considerá algun informacion necesario cuné pa asina e por a cualificá como publicadó di e bon nobo. E siguiente dia, el a participá den e trabou di predicá pa promé bes. E di tres dia, nos a cuminsá considerá e rekisitonan pa bautismo cuné. Promé cu e siman a terminá, e tabata bautisá.

E reunionnan durante e siman ei tabatin bon asistencia, un máximo di 14 persona. Tur dia tabatin areglo pa sirbishi di veld, rebishita, studio di Bijbel i bishitanan di pastoreo. Esta un animacion p’e ruman muhernan cu tabata cumpli cu nan actividad nan so durante henter e aña!”

Tabata mas difícil pa hende homber riba e isla reaccioná n’e berdad, kisas pa motibu dje demandanan pisá di nan trabou seglar. E trabou principal ta pisca kref, cu ta rekerí hopi dedicacion. Prehuicio tambe ta hunga un papel den e reaccion negativo di hopi hende. Sin embargo, ta di spera cu mas isleño, tantu homber como muher, lo respondé den futuro.

Te cu awor, dies persona riba e isla a ser rescatá dor di siña conocé e berdad i Jehova Dios su propósitonan. Pa diferente motibunan algun di nan a bai for dje isla. Pero sea nan ta keda of no, nan rescate spiritual a duna prueba di ta hopi mas significativo cu Alexander Selkirk su rescate. Nan ta gosa awor di un paradijs spiritual unda cu nan por ta bibando. E rumannan muher i nan yunan cu ainda ta biba riba e isla ta disfrutá di un ambiente manera hardin, pero mas cu esei, nan tin e prospecto di biba ora henter e tera lo ta un berdadero paradijs den tur sentido dje palabra.

E Trabou di Rescate Ta Sigui

Geográficamente, e grupo chikitu aki di Testigonan di Jehova riba Isla Robinson Crusoe ta biba leu di nan otro rumannan spiritual. Tog nan no ta sinti nan mes bandoná, manera e escoses Selkirk a sinti su mes. Pa medio di e fluho constante di literatura teocrático, e videonan di asamblea i congresonan cu ta ser mandá pa nan for di e oficina di sucursal di Sociedad Watch Tower di Chile tres bes pa aña, i e bishita tur aña di e superintendente di circuito, nan ta keda den contacto estrecho cu Jehova su organisacion. Asina nan ta sigui ta un parti activo di ‘henter e asociacion di rumannan den e mundu.’—1 Pedro 5:9.

[Nota]

[Mapanan/Plachi na página 9]

(Pa e teksto den su formato kompleto, wak e publikashon)

CHILE

Santiago

ISLA ROBINSON CRUSOE

San Juan Bautista

El Yunque

OCEANO PACIFICO

ISLA SANTA CLARA

[Plachi]

Ora cu bo cuminsá mira e isla, un baranca impresionante meimei di océano ta aparecé

[Rekonosementu]

Mapa di Chile: Mountain High Maps® Copyright © 1997 Digital Wisdom, Inc.

[Plachi na página 8, 9]

E mahestuoso ceru cu punta yamá El Yunque (E Bloki di Mula)

[Plachi na página 9]

E pueblito di San Juan Bautista

[Plachi na página 9]

Islanan mas chikitu ta sirbi como lugá di descanso pa cachó di awa

[Plachi na página 10]

Nos a bula den un avioneta for di Santiago, Chile

[Plachi na página 10]

E costa yen di baranca dje Isla Robinson Crusoe

[Plachi na página 10]

E Salon di Reino modesto riba e isla